Kakajiriri Ajiri ro Emõn Mwiliir Ej Maroñ Wõt Ke?

“JEJ MOUR kiõ ilo juõn jukjuk im bed elap an kabwokbwok, juõn jukjuk im bed ekajjo manit ko ie, ijo ejelok kien mour emõn,” Robert Glossop ilo Vanier Institute for the Family ilo Ottawa, Canada ej loe. Kin ta tokjen eo? Juõn report ilo newspaper eo The Toronto Star ej ba: “Jodikdik ro rej bõroru, jodikdik ro relej im jodikdik ro rej man ir make rej aolep laplok wõt.”

Abañ eo ej jeded ellãlok jen North America. Bill Damon, director eo an Center for Human Development ilo Brown University ilo Rhode Island, U.S.A., ear katak kin abañ kein ilo Britain im ailiñ ko jet ilo Europe, im bareinwõt Australia, Israel, im Japan. Ej jitõñlok ñõn likjap eo an kabuñ ko, school ko, im dolul ko jet ñõn tel jodikdik ro. Jukjuk im bed eo ad, ej tõmak, “ear meloklok kin ta eo ajiri ro rej aikwiji ñõn kalek kadkad ko kadkadiir im maroñ ko air.” Ilo an elij nan ko an ro rej tijemlok in kakajiriri ajiri ro, ro rej katakin bwe “kauwe ej kauatata ñõn ejmour im emõnin ajiri ro,” Damon ej wõnmanlok im kamol bwe men in ej “juõn lõõt ñõn kakajiriri ajiri ro rej kiblia.”

Ta eo jodikdik ro ilo ran kein rej aikwiji? Rej aikwij nan in kibel ko rej yokwe me ej kajimwe lemnak ko air im burueir. Kajjojo jodikdik ro rej aikwij kajjo kain men in katakin. Ñe yokwe ej kamakite, ekkã am maroñ lelok kauwe ilo am kammanwa ibbeir. Eñin unin Jabõn Kennan 8:33 ej jiroñ kij ñõn “eoroñ nan in katak.” Ak, jet rejjab bõk “kauwe jen nan ko wõt.” Ñõn ir, kaje eo ekkar kin jab bokake, ñe leloke ilo joñan eo ekkar, ej men in aikwij eo. (Jabõn Kennan 17:10; 23:13, 14; 29:19) Ilo an kwalok nan in rejañ in, Bible eo ejjab errã ibben deñdeñ ilo illu ak lejen joñan manman, eo emaroñ kakinejnej ak kokkure juõn ajiri. (Jabõn Kennan 16:32) Jen men in, juõn ajiri ej aikwij melele ta unin ej bõk kauwe im eñjake bwe ej kinke jemen ak jinen ej yokwe e, ej rejtak e.​—Keiri Hebrew 12:6, 11.

Nan in kakabilek rot in ekeie im emõn rej kalikare ilo book eo The Secret of Family Happiness.