Juõn Letter jen Governing Body Eo
Yokwe Kom Ro Jeid im Jatid Ri Kennan Ro an Jehovah:
Ri jilek Paul ear kajerbal aolep ien ko remõn ñan kwalok an yokwe im kamolol kin ri tõmak ro mõttan. Ñan Ri Christian ro ilo Rome, ear je: “Ij kamolol aõ Anij ilo Jisõs Kraist kin kom otemjej, bwe ami tõmak e buñbuñ i aolepen lõl.” (Rom. 1:8) Aet, ilo aolepen Ailiñ eo an Rome, kar jelã kajjen Ri Christian ro ilo ebeben eo kein kajuõn kin tõmak eo air ekajur, im bareinwõt kin kijejeto eo air ilo jerbal in kwalok nan. (1 Tes. 1:8) Eñin unin ekar wõr ibben Paul yokwe eo emũlal kin ro jein im jatin!
Einwõt Paul, kimij lelok kamolol ñan Jehovah aolep ien kimij lemnak kin kom. Elap am yokwe kom aolep! Im kom maroñ liki bwe Jehovah ej yokwe kom kajjojo. Jet iami komij jelmae jumae ko relap, ak komij wõnmanlok wõt im kwalok nan. Ilo ami kwalok jitõb in beran im jab mijak, men kein rej kamõnõnõik buruen Jehovah!—Ken. 27:11.
Yearbook eo ej letok elõñ menin kamol ko bwe Iroij Jesus Christ eo “Ej bõk anjo im wõnmanlok bwe En bõk anjo” im bwe jabdewõt kein tarinae me naj nawãwen nae ri kalor ro an Christ eban lo tõbrak.—Rev. 6:2; Ais. 54:17.
Ñan Ri Christian ro ilo Philippi, Paul ear je: “Ij kamolol aõ Anij . . . kin ami kõmao ilo driõklok gospel.” (Pil. 1:3-5) Kim ro uan Governing Body eo kimij eñjake ilo ejja wãwen in wõt kin kom. Ilo yiõ in jerbal eo ilo 2007, 6,691,790 ri kwalok ro rar kajerbal 1,431,761,554 awa ko ilo air kwalok kin news eo emõn ilo 236 ene ko ibelakin lal in. Elukkun lap ami kate kom ñan kajededlok news eo emõn! Lemnak kin elõñ buki thousand armij ro me rar bõk jibañ ikijen jibadbad ko ad aolep, im men kein aolep rej kaibujuij Jehovah!
Ilo bar juõn ien, Paul ear kwalok bwe elap an kar tiriamo kin ro jein im jatin. Ear je ñan ro im rej bed ilo Thessalonica: “E jab jokwõr am kememej . . . ami kijenmij in kejatrikrik ilo ar Iroij Jisõs Kraist, iman mejen Anij eo Jemer.” (1 Tes. 1:2, 3) Aet, elõñ abañ ko ilo mour. Abañ ko rej walok, ak elap an aorõk bwe jen kijenmij. Ta abañ ko kwoj make jelmaiki? Kwoj ebwer ke kinke juõn nañinmij elap ej kadiklok joñan maroñ eo am kin ta eo kwomaroñ kõmmane ilo jerbal eo an Jehovah? Eo beleõm ejitenburu me etto amiro kar bed ibben don ear ke mij kin ri kijirãt eo ejamin mat, Hedis? (Ken. 30:15, 16) Kwoj ke kabuk, ak ebin lo, juõn beleõm me ej kwalok ejja yokwe eo am kin Jehovah, ak meñe eindein kwoj tiljek wõt in bokake nan in kakabilek eo ilo Bible ñan mare ilo Iroij? (1 Kor. 7:39) Kwoj ke kate yuk ñan kakajiririk ajiri ro nejõm meñe kwoj ion abañ ko kin economy (money)? Jekdon ta abañ eo am, elañe kwoj likit men ko an Ailiñ eo mokta, kwomaroñ liki bwe Jehovah ejamin “meloklok ami jerbal im yokwe, eo kom ar kwalok kin etan.” Ro jeid im jatid, joij im jab “mõk ilo kõmõn emõn”!—Hib. 6:10; Gal. 6:9.
Ta eo enaj kamaroñ kom ñan kijenmij? Einwõt ibben Ri Thessalonica ro, ej “kejatrikrik ilo ar Iroij Jisõs Kraist.” Kin juõn un emõn, tokelik Paul ear keidi “kejatrikrik in lomor” ñan juõn helmet ebin me emaroñ kejbãrok juõn Ri Christian jen lemnak ko renana im bere ko.—1 Tes. 5:8.
Emol, ilo ami kijenmij ilo lañliñ, komij uake nan in kinaak ko an Satan kin aitwerõk eo kin iroij bõtata eo ijoko otemjej ilañ im ion lal. Satan ej ba bwe ri karejar ro an Anij rekibbon im meñe remaroñ mõnõnõ in jerbal ñan Anij iumin jidik wõt ien, renaj jidik kin jidik jakkeini air kabuñ elañe elaplok an walok abañ ko ak elañe eaetoklok an bed jukjuk im bed in jen air kar kõtmene. Ewõr ien eo emõn ñan am kajedmatmat Devil eo einwõt ri riap eo ekanuij nana! Kajjojo ran in ami mour komij ebaklok ñan bõk jerammõn eo kom kar kejatdikdik kake.
Einwõt an kar Paul mõnõnõ in bõk ien ko remõn ñan nebar ro jein im jatin kin tõmak eo air ekajur, ijo kunair elap ilo jerbal in kwalok nan, im air kijenmij, kimij mõnõnõ in bõk ien in emõn ñan nebar kom im ñan kalikar yokwe eo am kin kom. Kate wõt kom!
Kimij kejatdikdik bwe jerammõn ko relap ilo jitõb ren bed ibbemi ñan yiõ eo ej bed imad. Jerammõn ñan kom, kim
Ro jeimi im jatimi,
Governing Body eo an Ri Kennan ro an Jehovah