Ewi Wãwen Am Maroñ Katak Kin Anij

Kwomaroñ katak kin Jehovah ilo am readi Bible eo. Ien ko etto Anij ear kãlet jet armij ro ñan je lemnak ko an. Jeje kein rej naetan Bible eo. Rainin jej katak kin Anij ilo ad readi Bible eo. Kinke kobban Bible eo ej nan eo an Jehovah, ej naetan Nan in Anij bareinwõt. Jemaroñ tõmak kin ta eo Bible ej ba kinke Jehovah ejamin riap. “Anij e ban riõp.” (Dri Hibru 6:18) Nan in Anij ej mol eo.​—Jon 17:17.

Bible eo ej juõn ian men in letok ko raorõk Anij ear letoke ñan kij. Ej einwõt juõn letter jen juõn jemen ej yokwe ñan ajiri ro nejin. Ej jiroñ kij kin kallimur eo an Anij ñan ukõt lal in ñan juõn jikin eaibujuij ñan jokwe ion​—juõn paradise. Ej jiroñ kij kin ta eo ear kõmmane ilo ien ko etto, ta eo ej kõmmane kiõ, im ta eo enaj kõmmane ilo ran ko renaj itok ñan ajiri ro nejin retiljek. Ej bareinwõt jibañ kij ñan kamadmõde abañ ko ad im lo mõnõnõ.​—2 Timote 3:16, 17.

Ri Kennan ro an Jehovah Rej jeran Anij; renaj jibañ yuk ñan melele kin ta eo Bible ej katakin kake. Baj jiroñ wõt ir bwe kwokõnan katak kin Bible eo. Ejelok wõnãn kin men in. (Matu 10:8) Kobatok ibben men in, kwomaroñ kwelok ibbeir ilo kwelok ko an Christian. Rej kõmman kwelok kein ilo jikin kwelok ko rej naetair Kingdom Hall ko. Elañe kwoj bed ilo kwelok in Christian kein, enaj kalaplok am jelã ilo mõkaj kin Anij.

Kwomaroñ katak kin Anij jen men ko ear kõmanmõni. Ñan wanjoñok, Bible eo ej ba: “Anij ear kõmõnmõn lõñ im lõl.” (Jenesis 1:1) Ke Jehovah ear kõmanmõn “lõñ ko,” ear kõmmane al. Inem ta eo men in ej jiroñ kij kin Anij? Ej jiroñ kij bwe Jehovah elap an wõr kajur. Ej E wõt emaroñ in kõmanmõn juõn men elap an kajur einwõt al. Bareinwõt ej jiroñ kij bwe Jehovah ej meletlet, kinke ej aikwij wõr meletlet ñan kõmanmõn al, eo ej kõmãnãn im kameram kij im ejjab kun.

Men in kõmanmõn ko an Jehovah rej kwalok bwe ej yokwe kij. Lemnak kin aolep leen wijki ko rekajju jen don ion lal. Jehovah ear maroñ kar letok juõn wõt kain leen wijki ñan kij​—ak jab letok jabdewõt ñan jidik. Jen men in, Jehovah ear letok elõñ kain leen wijki ko rekajju jen don ilo joñan, unokan, im nemen. Men in ej kwalok bwe Jehovah ejjab juõn Anij in yokwe wõt ak bareinwõt ej joij im mõnõnõ in lelok men ko.​—Sam Ko 104:24.