Ro Jeran Anij Renaj Mour Ilo Paradise

Paradise ejamin einwõt lal in jej jokwe ie kiõ. Anij ear jab kõnan bwe lal in en obrak kin abañ im buromõj, metak im eñtan. Ilo ran ko renaj itok, Anij enaj kõmman bwe lal in en juõn paradise. Paradise enaj einwõt ta? Jen lale ta eo Bible eo ej ba:

Armij ro remõn. Paradise enaj jikin jokwe eo an ro jeran Anij. Renaj kõmman men ko remõn ñan don. Renaj mour ekkar ñan wãwen ko rewãnik an Anij.​—Jabõn Kennan 2:21.

Elap mõñã. Ilo Paradise eo, enaj ejelok kwuli. Bible eo ej ba: “E naj’lõñ korn [ak, mõñã] ilo ene ion jabõn tol ko.”​—Sam Ko 72:16.

Moko remõn im jerbal ko elap tokjeir. Ilo Paradise eo ion lal, family otemjej enaj wõr moko imwiir. Aolep armij renaj jerbal ilo wãwen eo enaj bõktok mõnõnõ eo emol.​—Aiseia 65:21-23.

Ainemõn ibelakin lal. Armij rejamin ire im mij ilo tarinae. Nan in Anij ej ba: “[Anij] ej kejemlok tõrinae ko.”​—Sam Ko 46:8, 9.

Ejmour eo emõn. Bible eo ej kallimur: “Dri jokwe ie e jamin ba, I nañinmij.” (Aiseia 33:24) Bareinwõt, ejelok juõn enaj ajkuk ak bilo ak ban konono.​—Aiseia 35:5, 6.

Eñtan, buromõj, im mij renaj jako. Nan in Anij ej ba: “E naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”​—Reveles̃õn 21:4.

Armij ro renana renaj jako. Jehovah ej kallimur: “Ro re nana . . . naj kamõkit ir jen eneo; im ro re jelã mon, naj totõk ir jen e.”​—Jabõn Kennan 2:22.

Armij ro renaj yokwe im kautiej don. Enaj ejelok ekajet jab jimwe, iroij ion armij ilo jab jimwe, kibbon im dike don. Armij ro renaj burukuk im jokwe ekkar ñan wãwen ko rewãnik an Anij.​—Aiseia 26:9.