Juõn Letter jen Kumi eo ej Tel
Yokwe Dri Kennan ro Mõtar An Jeova:
Kimij lukkun mõnõnõ in jejewõj ñõn kom, ro jeõm im jãtõm rejitenburu ibem! Kimij bõk ejja iñjake eo an dri jilik Jon ke ear ba kin dri tõmak ro mõtõn ‘ij yokwe ir’ im ear lõñliñ kin an lo air “etetal ilo mol.” (2 Jon 1, 4) Enañin lap ar jerammõn kin mol eo! Mol eo ear kanemkwoj kij jen katak im mõnit ko an Babilõn Elap, ko im rejjab koutiej Anij. Bokake mol eo ej kalaplok ar jela yokwe, joij, im tiriamo. Im mol eo ear kebellok juõn ial bwe jen erreo iman mejen Anij im ear bareinwõt letok juõn kejatrikrik kin mour in drio.
Jej bar kamolol Jeova kin jitõb eo an, eo ej kaiñi im kakajur kij ran otemjej! Kimij tõmak bwe komar mõnõnõ in liñõri katak ko remenin yokwe jen Jeova ilo Kwelok Eo Elap (3 ran ko) etan “Jitõbõn Anij En Tel Kij.” Kin an nana laplok ilo lõl in, eaurõk bwe jen liki jitõb eo ekajur an Jeova bwe en tel kij ilo ran ko relap rej ber iman.
Kimij tõmak bwe men in ear lujur kom ke komar riiti bwebwenato ko rekabwilõñlõñ ilo Yearbook eo, kin ro jeer im jãter me rar kijenmij iomin iñtan kin tõmak eo air. Im ej juõn men ekabwilõñlõñ ñõn jela bwe elõñ ian ro rar tiljek wõt ear jab to air baptais ak rejañin kar baptais ke ear walok abañ ko. Elap ar yokwe ir kin air drebij wõt air tiljek im kin air jutõk bin kin wãnik. Emol, joñok eo air emõntata ej kabinlok bebe eo ar bwe jen tiljek wõt ñõn Ailiñ eo jekron ta abañ ko renaj walok.—1 Tes. 1:6-8.
Kim jela, ro jeim im jãtim, man im kõra ro rejitenburu, bwe komij kate im kamarmiri elõñ abañ ko kin mõnni im men ko jet bwe komin kejbãrok baamle ko ami ilo yokwe. Ñõn jet iami ejjab juõn men ebiruru ñõn ami keini ien kwalok nan kin Ailiñ eo im ñõn ami ber ilo aolep kwelok ko. Eñin unin, elikin am kwelok im jar elõñ alen, kimar kõmõn jet oktõk ko ilo kwelok ko an congregation ko jino jen Jãnwõde 1, 2009. Kimij kejatrikrik bwe komnaj kajerbal ien ko rebellok ñõn kom ñõn kalaplok ien ami katak mõkelok iami im iben baamle ko ami.
Ilo kajuju kwelok ko relap ilo yiõ in, ear juõn menin kalõñliñ elap ñõn lo elõñ ro im rar tellokin baptais. Jet ian rein rar drik wõt. Kom ridto ro komij tellokin bõk nebar kin ami kakajiririk ajiri ro nejimi bwe ren koutiej mol eo im kin ami rejañ ir bwe ren ajelok air mour im korijer ñõn Jeova meñe rej drik wõt. Meñe rein rej iion elõñ abañ ko ilo jikuul, air tellokin baptais, ej kalikar tokjen katak ko rar bõki ilo moko imwiir.—Sam 128:1-6.
Kimij kõnan kwalok am mõnõnõ kin an lõñlok ro rej katak Baibel—kab kwonan missionary im special pioneer ro ar. Ear kanuij lap kwonair ilo laplok in. Kim, ro uan Kumi Eo Ej Tel, elap am kamolol kom, ro jeim im jãtim iaolepen lõl kin jibõñ ko ami ke ealikar ami ba “Kwon itok!” ñõn ro im emol burueir, im ilo ami kir aolep ro remaro bwe ren “bõk dren in mour ejij wõnan.” (Rev. 22:17) Kimij karuwaineneik kom, ro uan 289,678, ro rar ajelok air mour im baptais ilo dren ilo yiõ eo ej kab jemlok, ñõn loan rolul eo an jeer im jãter ibelakin lõl in!
Jen jab mõk in eliji nan ko an dri jilik Jon, eo ear je: “Im lõl e jokolok im mõm ko an: a eo ej kõmõnmõn ankil an Anij ej berwõt in drio.” (1 Jon 2:17) Jej lukkun kile joñõn an ebak ien an lõl in naj ‘jokolok’! Ej juõn menin meletlet ñõn ar ‘ekil’ im boub wõt ilo ar kõmõnmõn ankil an Anij. (Matu 24:42) Jejamin ajlok kin ar eindrein, im jenaj bõk jerammõn ko an Jeova im joij eo an.—Ais. 63:7.
Kimij kejatrikrik bwe bwebwenato ko rej walok ilo Yearbook eo an yiõ in enaj kakajur kom aolep bwe komin likit Ailiñ eo bwe en moktata ilo mour ko ami. Kim kõnan bwe komin jela bwe ien otemjej komij ber ilo lemnok im jar ko am im bwe kimij lukkun yokwe kom. Jerammõn ko an Jeova ren buñleplep iomi.
Ro jeimi im jãtimi,
Kumi eo Ej Tel Rolul eo An Dri Kennan ro An Jeova