Jibõñ Ro Rekãl bwe Ren Ridtolok ilo Mour in Kristian
1 Ro rekãl im ejelok air iminene ilo mour in Kristian rej aikwij bõk jibõñ im kakabilek jen ro rekajur ilo tõmak. (Rom. 15:1) Eñin unin, ilo letter eo an ñõn dri Hibru ro, Paul ear kalikar wãwen ko rar aikwij ridtolok ilo mour in Kristian. Ta men kein, im ewi wãwen ar maroñ lelok jibõñ?
2 Katak Mõkelok Iam: Ekkar ñõn nan in jiroñ eo an Paul, juõn dri katak emõn enaj wõnmanlok im katak wõt, bar eliji, im enaj kortokjen “ekõn ko rebin” me ej bõk jen rolul eo an Jeova. (Hib. 5:13, 14) Ilo ar bwebwenato kin katak ko ilo Baibel iben dri tõmak ro rekãl im kwalok katak ko reaurõk me jar tõbare ilo ar mõke etale katak ko, emaroñ kamakit ir ñõn kakõmõnmõnlok wãwen air katak mõkelok iair. Jen ien ñõn ien kwomaroñ kir ir ñõn kobawõj ibõm ñe kwoj katak mõkelok iam ak iben baamle eo am.
3 Keini Am Ber ilo Kwelok ko: Joñok eo am etiljek im nan in rejañ ko am kwoj kwalok ilo yokwe enaj bõprae bar men eo juõn Paul ear bar inebata kake—“mõnit an jet” ilo air jakkene ien kwelok ko an Kristian. (Hib. 10:24, 25) Jibõñ ir ñõn kile aurõkin kwelok ko ej menin kabin tõmak eo air iben congregation eo. Jab kõtar ñõn karuwaineneik ir bwe ren iñjake yokwe in jimjãn jimjãten eo ar.
4 Jar: Bwe jen anjo ion mõjino ko ar ilo kõniek im likjõp ko ilo karkar ko ar, jej aikwij bukot Jeova ilo jar, im kwalok aolep lemnok im inebata ko remũlõl ilo buruer. Ro rekãl rej aikwij katak bwe ilo air jar ñõn Jeova kin jibõñ, einwõt Paul ear rejañ kij, ren jab ãliklik. (Hib. 4:15, 16; 10:22) Am kwalok abañ im jibõñ ko kwar bõki, enaj kakajur tõmak an ro rekãl ñõn air kile bwe Jeova ej roñjake jar ko rej walok jen buruer.
5 Jerbal in Kwalok Nan: Paul ear bareinwõt kwalok bwe ñe jej “katok ñõn Anij kin wijtak ien otemjej,” ej juõn menin kakajur tõmak eo ar. (Hib. 13:15) Kwomaroñ ke kir juõn dri kwalok ekãl bwe en jerbal ibõm ñe kwoj karõk ien am jerbal in kwalok nan ilo juõn wik? Bwelen komro maroñ keboji nan in kebellok ko amiro ak etale juõn wãwen kwalok nan me eo ekãl ejañin jerbale.
6 Jarlepju in armij ro rej kobatok wõt iber ej juõn unin lõñliñ elap. Ar kate kij in katakin im rejañ ro rekãl ilo congregation eo ar enaj jibõñ ir ñõn kalek juõn tõmak ekajur “ñõn lomorir.”—Hib. 3:12, 13; 10:39.