Solomon Ej Kalek Tempel Eo

MOKTA jen an Devid mij, e ar lelok ñõn Solomon, jemenei ko jen Anij ñõn kalek tempel eo an Jeova. Ilo yiõ eo ken ka emen in an iroij, Solomon e ar jino kalek tempel eo, im r’ar jerbal iomin jiljilimjuõn yiõ jimõttõn bwe ren kadrerelok e. Elõñ tausan eman ro r’ar kalek tempel eo, im e kanuij in lap wõnan mweo. Unin an lap wõnan r’ar kajerbal gold im silver na ie.

Eor ruo rum ko iloan tempel eo, einwõt kar ilo imõn kaber eo. Ak rum kein relaplok ruo alen jen kar rum ko ilo imõn kaber eo. Solomon e ar ba bwe ren likit dipdip in bujen eo iloan rum eo ken ka ruo ilo tempel eo, im menko jet an imõn kaber eo r’ar likiti ilo rum eo juõn iman.

Ke e ar drerelok tempel eo, r’ar kõmõn juõn kwojkwoj elap. Solomon e ar bukwelõlõ iman tempel eo im jar, einwõt am loe ilo pija eo. Solomon ej ba ñõn Jeova: ‘Lõñ ko rejjab bwe ñõn am ber ie; im mwin elaplok an drik ñõn am ber ie. Bõtap, O Jeova, kwon joij im roñjake ro dri korijerõm ñe rej jar ñõn jikin in.’

Ke e ar jemlok an Solomon jar, kijeek e ar wonlõltak jen lõñ. Ej tile men in mour ko r’ar katok kaki. Im juõn maram e kanuij kajur jen Jeova ej romak im kobrak tempel eo. Men in ej kwalok bwe Jeova ej roñjake, im bwe e mõnõnõ kin tempel eo im jar eo an Solomon. Ejemlok air kabuñ ilo imõn kaber eo kiõ, kinke edrerelok tempel eo im ej jikin eo dre in re naj kabuñ ie.

Iomin juõn ien e aitok, Solomon e ar iroij ilo meletlet, im e ar mõnõnõ armij ro. Ak Solomon e ar belek elõñ kõra ro jen ailiñ ko me rejjab kabuñ ñõn Jeova. Kwoj lo ke juõn iair ej kabuñ iman juõn ekjõp? Tokelik, limaro belen r’ar karel Solomon bwe en kabuñ ñõn anij ro air. Kwo jela ke ta eo e ar walok ke Solomon e ar kõmõn men in? E jõko an joij ñõn armij ro. Ej oktak im lej, im e jõko an armij ro mõnõnõ.

Men in ej kõmõn bwe Jeova en illu iben Solomon, im ej jirõn e: ‘I naj bõk ailiñ eo jen yuk im lelok e ñõn bar juõn eman. I jamin kõmõn men in ilo ien kwoj mour, ak naj ilo ien eo me leo nejõm ej iroij.’ Jen lale wãwen an walok men in.