Baibõl̦ eo ear kanaan bwe ãlikin an Christ mej, enaaj wõr ri kaki ro reriab ibwiljin kar Kũrjin ro jinoin. Armej rein renaaj kobaik katak ko aer ippãn katak ko rem̦ool jãn Baibõl̦ eo. (Jerbal 20:29, 30, UBS) Ãlikin jejjo iiõ, men in ear jejjet kitien. Armej rein rar kobaik katak ko an Jesus ippãn katak ko reriab an kabuñ ko jet. Eñin ej jinoin an kar wal̦o̦k kabuñ ko me rej riab in Kũrjin. (2 Timote 4:3, 4, UBS) Ak kiiõ, etke kõm jel̦ã bwe ejim̦we mel̦el̦e ko amim kõn katak ko jãn Baibõl̦ eo?

Ekar jejjet iien an Jeova kwal̦o̦k m̦ool. Anij ear kanaan bwe ilo naaj raan ko ãliktata, enaaj l̦apl̦o̦k an armej ro jel̦ã m̦ool eo kõn Baibõl̦ eo. (Daniel 12:4) Ilo kar 1870 ko, ekar wõr juon kumi jidikdik im rar make kile bwe elõñ iaan katak ko ilo im̦õn jar ko aer rejjab pedped ioon Baibõl̦ eo. Kõn men in, rar jino aer kappukot katak ko rem̦ool jãn Baibõl̦ eo. Jeova ear kajeraam̦m̦an armej rein im ear jipañ er bwe ren mel̦el̦e kõn eoon ko ilo Baibõl̦ eo.

Em̦m̦aan ro retiljek rar lukkuun etale im katak Baibõl̦. Kar ãt eo m̦okta etan Ri Kõnnaan ro an Jeova ej Ri Katak Baibõl̦ Ro. Ri katak Baibõl̦ rein rar kõm̦m̦ane juon laajrak in katak Baibõl̦ me kõmij l̦oore wõt ñan rainin. Rar bwebwenato ippãn doon kõn katak ko ilo Baibõl̦ eo juon ilo̦k juon. Ñe ej wal̦o̦k juon eoon ilo Baibõl̦ eo im epen aer mel̦el̦e kake, rar kappukot eoon ko jet ñan jipañ er mel̦el̦e kõn eoon in. El̦aññe rej errã ippãn doon bwe kõmel̦el̦e ko aer rej errã ippãn eoon ko jet ilo Baibõl̦ eo, eokwe renaaj jei kõmel̦el̦e kein. Rar kappukot uwaak in kajjitõk ko aer jãn Baibõl̦ eo wõt. Ilo wãween in, m̦ool eo me eto an kar n̦ojak ear bar alikkar. Rar kiiõ jel̦ã m̦ool eo kõn etan Anij im Aelõñ eo an. Rar katak im jel̦ã m̦ool eo kõn ankilaan Anij kõn armej ro im lal̦ in. Rar bar katak im jel̦ã m̦ool eo kõn ro remej im kallim̦ur eo an Anij bwe juon iien ro remej renaaj bar mour. Kõn aer kar kate er ñan kappukot m̦ool eo, men in ear jipañ er bwe ren ilo̦k jãn katak im m̦anit ko reriab an kabuñ ko wõj.​—Jon 8:31, 32, UBS.

Ilo kar iiõ eo 1879, Ri Katak Baibõl̦ Ro rar kile bwe ekar jejjet iien bwe ren kwal̦o̦k m̦ool eo ñan armej otemjej. Kõn men in, jino jãn kar iiõ in, rar kõm̦m̦ane juon bok me kõmij wõnm̦aanl̦o̦k wõt im kõm̦m̦ane ñan rainin. Etan bok in ej Naan in Keeañ Kõn Aelõñ eo an Jeova.a Rainin, kõmij kwal̦o̦k kõn katak ko rem̦ool jãn Baibõl̦ eo ilo 240 aelõñ ko im ilo elõñl̦o̦k jãn 750 kajin ko. El̦apl̦o̦k wõt an armej ro rainin jel̦ã m̦ool eo kõn Baibõl̦ jãn kar m̦okta!

• Ãlikin an kar Christ mej, ta eo ear wal̦o̦k ñan katak ko rem̦ool?

• Ta eo ear jipañ kõm bwe kõmin jel̦ã katak ko rem̦ool jãn Baibõl̦ eo im eto aer kar n̦ojak?

Ium̦win elõñ iiõ ko, Ri Kõnnaan ro an Jeova rar kõjerbale ukok in Baibõl̦ ko an kabuñ ko jet. Rar bareinwõt print im ajeji ukok kein. Bõtab, kõmar kile bwe ej aikuj wõr juon ukok in Baibõl̦ ñan jipañ armej ro bwe ren katak ñan “jel̦ã m̦ool” eo. Eñin ej ankilaan Anij ñan armej otemjej. (1 Timote 2:3, 4) Kõn men in, ilo kar iiõ eo 1950, kõmar kadedel̦o̦k ukok in Baibõl̦ eo amim.a Ukok in Baibõl̦ in elukkuun jejjet im ej wal̦o̦k ilo elõñl̦o̦k jãn 130 kajin ko.

Armej ro rar aikuji juon Baibõl̦ me enaaj pidodo aer mel̦el̦e. Kajin ko rej oktak jãn iien ñan iien. Ilo elõñ ukok in Baibõl̦ ko, ewõr naan in etto ko me epen ad mel̦el̦e kaki. Bareinwõt, em̦õj loi bar jet bok lemlem in etto ko me rej jipañ kõm bwe en l̦apl̦o̦k am mel̦el̦e kajin Hibru, Aramaic, im Grik. Eñin ej kajin ko me kar je Baibõl̦ eo m̦oktata.

Kar aikuji juon ukok in Baibõl̦ me ejim̦we im ejejjet ñan naan ko an Anij. Ri ukok in Baibõl̦ ro rejjab aikuj kõm̦m̦an oktak ko ñan naan in Anij. Rej aikuj ukoti naan ko ilo jim̦we im ilo m̦ool. Bõtab, ilo enañin aolep ukok in Baibõl̦ ko, ri ukok ro rar jol̦o̦ke ãt in, Jeova.

Ej aikuj wõr juon Baibõl̦ im ej nõbar Eo ear kõm̦m̦ane Baibõl̦ eo. (2 Timote 3:16) Ãinwõt an wal̦o̦k ilo pija in itulal̦, Ri Kõnnaan ro an Jeova rar l̦oore jeje ko kar m̦oktata im likũt etan Anij, Jeova ilo ukok in Baibõl̦ eo aer. Kõn men in, ãt in Jeova ej wal̦o̦k enañin 7,000 alen ilo Baibõl̦ eo am. (Sam 83:18) Kõnke rar jol̦o̦k elõñ iiõ ñan aer lukkuun etale im katak kake, ukok in Baibõl̦ in elukkuun em̦m̦an im ealikkar an kõmel̦el̦eik armej ro kõn l̦õmn̦ak ko an Anij. Kõmij rõjañ eok bwe kwõn riiti Naan ko an Jeova kajjojo raan jekdo̦o̦n ñe ewõr Baibõl̦ in an Ri Kõnnaan ro an Jeova ilo kajin eo am̦ ak jaab.​—Joshua 1:8; Sam 1:2, 3.

• Etke kõmar kõm̦m̦ane juon ukok in Baibõl̦ kããl?

• El̦aññe juon armej ekõn̦aan jel̦ã kõn ankilaan Anij, ta eo ej aikuj kõm̦m̦ane kajjojo raan?