Kõjerbal Bok eo Etan, “Ta ko Jemaroñ Katak jãn Naanin Anij?”—Jino Juon Bwebwenato
1. Etan bok eo em̦õj kõm̦m̦ane me jenaaj kõjerbale ilo kwal̦o̦k naan?
1 Em̦õj an Kumi eo Ej Lale Aolep Eklejia ko kõm̦m̦ane juon bok jidikdik ñan elõñ kajin ko. Etan bok in ej “Ta ko Jemaroñ Katak jãn Naanin Anij?” Elemen ad maroñ kõjerbale bok in ñe jej kõppojak ñan kwal̦o̦k naan? Eokwe bok in enãj l̦ap an jipañ kõj ñan jino bwebwenato ippãn armej ro. Unin ej kõnke bok in ej ãinwõt bok eo etan Reasoning kõnke ium̦win kajjojo kajjitõk ko, ebar lõñ eoon ko.
2. Ñe jej kwal̦o̦k naan, elemen ad kõjerbal bok eo ekããl?
2 Kwõmaroñ kõjerbal kajjitõk 8 im ba: “Kõmij bwebwenato jidik ippãn armej ro ilo bukwõn in kõnke elõñ armej rej kajjitõk ippãer make, ‘Anij ej ke kõm̦m̦an bwe armej ren eñtaan?’ [Ilo jet jikin ko em̦m̦anl̦o̦k ñan kwal̦o̦k kajjitõk eo ñan rũm̦weo.] Ak baj kwe? [Kõtl̦o̦k an uwaak.] Eokwe Baibõl̦ ej kwal̦o̦k uwaak eo ejim̦we.” Riitil̦o̦k jãn Baibõl̦ juon ak ruo eoon jãn kajjitõk 8 im kõmel̦el̦eiki. El̦aññe armej eo ej itoklimo, kwõmaroñ kwal̦o̦k kajjitõk ko 20 jãn peij eo jinointata ilo bok eo. Ãlikin, kwõmaroñ kajjitõk ippãn ñan kããlõt juon iaaer me komiro nãj bwebwenato kake ñe kwõbar ro̦o̦ll̦o̦k. Ñe eaab, kwõmaroñ lel̦o̦k juon bok ej bar kõmel̦el̦e kõn kajjitõk eo ej kab m̦õj amiro etale.
3. Elemen ad jino bwebwenato ippãn armej ro rejjab kabuñ ñan Anij ilo ad kõjerbal bok eo ekããl?
3 Kajjitõk 4 im 13 l̦o̦k ñan 17 relukkuun jejjet ñan territory ko me kabuñ ko an armej ro ie rejjab kabuñ ñan Anij. Ñan waanjoñak, kwõmaroñ kwal̦o̦k mel̦el̦e ko jãn kajjitõk 17 im ba: “Kõmij itoitak im bwebwenato jidik ippãn baam̦le ko. Kwõj ke errã bwe elõñ wãween ko reppen baam̦le ko rej jelm̦ae? [Kõtl̦o̦k an uwaak.] Elõñ rippãlele ro em̦õj aer loe bwe naanin kakapilõk kein el̦ap aer kar jipañ er: “Lio en kautiej l̦eo pãleen.” [Kwõjjab aikuj ba bwe ej itok jãn Epesõs 5:33. El̦aññe kõrã men eo, kwõmaroñ kwal̦o̦k kobban Epesõs 5:28, UBS.] Kwõj l̦õmn̦ak ke bwe naanin kakapilõk kein enãj l̦ap aer jipañ rippãlele ro ñe renaaj l̦oori?”
4. Ta eo kwõmaroñ kõm̦m̦ane ãlikin am̦ bwebwenato ippãn juon eo ejjab kabuñ ñan Anij?
4 Ñe em̦õj amiro bwebwenato, kõm̦m̦an karõk ñan bar ro̦o̦l ippãn. Bõlen kwõmaroñ pepe ñan bwebwenato kõn eoon ko jet ilo ejja kajjitõk eo wõt. Ilo iien eo ejejjet, kwõmaroñ ba ñan armej eo bwe naanin kakapilõk ko kwaar bwebwenato ippãn kaki m̦aantak rej jãn Baibõl̦. Itok wõt jãn amiro kar bwebwenato m̦aantak im am̦ kiiõ jel̦ã kõn l̦õmn̦ak eo an kõn Baibõl̦, kwõmaroñ lel̦o̦k juon an bok me enaaj m̦õn̦õn̦õ in riiti.—Lale peij eo ilowaan Ad Jerbal ñan Anij eo an Tijem̦ba 2013.