M̦õn̦õn̦õ kõn Jerbal ko Ad

1, 2. (1) Ta eo ej wal̦o̦k ñan elõñ ri jerbal ro ilo raan kein? (2) Ta eo Baibõl̦ ej ba kõn jerbal?

RAININ, elõñ armej ro rem̦õk im rejjab kõn̦aan jerbal. Ñe rej jerbal, rej aikuj jol̦o̦k elõñ awa ko im kõm̦m̦ani jerbal ko me ejjab em̦m̦an ippãer. Kõn wõt men in, aolep raan relukkuun m̦õk bõtab rej kate wõt er bwe ren etal im jerbal. El̦aññe kwõj juon iaan armej rein, ta ko kwõmaroñ kõm̦m̦ani bwe kwõn kijenmej wõt im m̦õn̦õn̦õ kõn jerbal eo am̦? Eokwe, jen etale jet wãween ko.

² Baibõl̦ eo ej rõjañ armej ro bwe ren m̦õn̦õn̦õ in kate er buul̦ jerbal. Baibõl̦ ej bar ba bwe ej juon jeraam̦m̦an ñe armej rej kate er jerbal innem l̦ak m̦õj amãne leen jerbal ko aer. Solomon ear ba: “Jabdewõt armej en m̦õñã im idaak im lañlõñ ilo tokjãn jerbal eo an, eñin menin lel̦o̦k jãn Anij.” (Ekklisiastis 3:13) Jeova ej yokwe kõj im ekõn̦aan bwe jen m̦õn̦õn̦õ. Ekõn̦aan bwe jen m̦õn̦õn̦õ ñe jej jerbal im m̦õn̦õn̦õ ñe jej bõk leen ad kate kõj ilo jerbal ko ad. Bwe jen maroñ pãd wõt ilo yokwe eo an Anij, jej aikuj l̦oore l̦õmn̦ak ko an im jerbale naan in kakapilõk ko an kõn jerbal.​—Ekklisiastis 2:24, UBS; 5:18.

3. Ta kajjitõk ko jenaaj etali ilo katak in?

³ Ilo naaj katak in, jenaaj etale emãn kajjitõk ko. (1) Ewi wãween jemaroñ kate kõj ilo jikin jerbal bwe jen maroñ m̦õn̦õn̦õ? (2) Kain jerbal rot ko me rejakkar ñan ro me rej m̦ool in Kũrjin? (3) Ta ko jemaroñ kõm̦m̦ani bwe jerbal ko ad ren jab kapañ ad karejar ñan Anij? (4) Ta jerbal eo eaorõktata im jemaroñ kõm̦m̦ane? M̦okta jãn ad uwaake kajjitõk kein, jen etale joñak ko an Jeova Anij im Jijej Kũraij kõn wãween aerro jerbal. Errein ej ri jerbal ro ruo rem̦m̦antata ijoko otemjej.

RI JERBAL EO EUTIEJTATA IM RI JERBAL EO EKAPEEL

4, 5. Ewi wãween an Baibõl̦ kaalikkar bwe Jeova ejjab bõjrak jãn an jerbal?

⁴ Jeova ej Ri Jerbal eo Eutiejtata. Bok in Jenesis 1:1 ej ba: “Ilo jinoin Anij ear kõm̦anm̦an lañ im lal̦.” Ãlikin an kar Anij kõm̦m̦ani aolep men ko ilo lal̦ in, ear etali im loi bwe “rekanooj em̦m̦an.” (Jenesis 1:31) Mel̦el̦ein men in bwe Anij ear lukkuun m̦õn̦õn̦õ kõn jerbal kein an. Jeova ej Anij eo me “em̦õn̦õn̦õ.” Ejjel̦o̦k pere bwe el̦ap an kar m̦õn̦õn̦õ kõn an kar lo el̦ap tõprak ko ilo jerbal ko an.​—1 Timote 1:11.

⁵ Anij ejjañin bõjrak jãn an jerbal. Elõñ to̦ujin iiõ ko ãlikin an kar Anij kõm̦anm̦an men otemjej ilo lal̦ in, Jijej ear ba: “Jema ej jerbal [wõt] ñan iien in.” (Jon 5:17) Ta ko Anij ej kõm̦m̦ani? Eokwe, ej pãd ilañ im el̦ap an poub ilo an tõl im kõjparok armej ro. Ñan waanjoñak, em̦õj an kããlõt juon kumi in armej ilo an kar lutõkl̦o̦k kajoor eo an iooer. Armej rein renaaj irooj im tõl ippãn Jijej ilañ. (2 Korint 5:17) Ej bar jerbal wõt ñan kiiõ bwe en tõprak ankilaan ak kõn̦aan eo an ñan armej ro. Ej ankilaan Anij bwe juon iien armej ro me rej yokwe e ren mour ñan indeeo ilo juon jukjuk im pãd ekããl. (Rom 6:23) Jeova ej lukkuun m̦õn̦õn̦õ kõnke el̦ap tõprak ko ilo jerbal kein an. Elõñ milien armej ro rar roñjake nuuj eo em̦m̦an kõn Aelõñ ak Kien eo an Anij. Jeova ej kamaroñ rein bwe ren epaake im armej rein rej kate er bwe ren pãd wõt ilo yokwe eo an.​​—Jon 6:65.

6, 7. Etke jemaroñ ba bwe Jijej ej juon ri jerbal eo eniknik im ekijejeto jãn kar iien ko etto?

⁶ Jãn kar etto, Jijej ear juon ri jerbal eniknik im el̦ap an kijejeto. M̦okta jãn an kar itok ñan lal̦ in ãinwõt juon armej, ear “juon eo ekapeel ilo jerbal” ke ear jerbal ippãn Anij im kõm̦m̦ani men otemjej “ilañ kab men ko ioon lal̦.” (Jabõn Kõnnaan 8:22-31; Kolosse 1:15-17) Ke Jijej ear pãd ilo lal̦ in, ear bar kate ilo jerbal ko an. Ilo an kar dik im rũttol̦o̦k ilo lal̦ in, ear katak kilen ekkal. Eñin unin armej ro rar jel̦ã kajjien ãinwõt juon “kaam̦tõ.” (Mark 6:3) Ri kaam̦tõ ro rej aikuj kapeel ilo elõñ wãween ko im rej aikuj kõm̦m̦ane elõñ kain jerbal ko me rekam̦m̦õkm̦õk. Keememej wõt bwe ilo kar iien ko etto, ekar ejjel̦o̦k jikin kõm̦m̦an al̦al̦ im m̦õn wia kein jerbal. Ekar bar ejjel̦o̦k kein jerbal ko rekapeel ak tuul̦ ko me jej kõjerbali ilo raan kein. Kõn men in, bõlen Jijej ear aikuj make ilo̦k im jekjek wõjke im ineeki l̦o̦k ñan jikin jerbal eo an. Ear kõm̦m̦an al̦al̦ jãn wõjke kein innem kõjerbali ñan ekkal em̦, kõm̦m̦an bõrwaj, kõm̦m̦an kajem, ak kõm̦m̦ani men ko jet kõbwebwein ak kobban m̦weo. Kwõmaroñ ke baj pijaikl̦o̦k an kõm̦m̦ani aolep men kein? Ejjel̦o̦k pere bwe Jijej ear lukkuun m̦õn̦õn̦õ ke ear lo el̦ap tõprak ko ilo an kar kõm̦m̦ani jerbal kein me reppen.

⁷ Jijej ear bar niknik im kijejeto ilo jerbal in kwal̦o̦k naan. Ear lukkuun poub im ear kate ilo jerbal in elukkuun eaorõk ium̦win jilu im jimattan iiõ. Kõnke ear kõn̦aan tõpar elõñ armej ro, ear ruj wõt in jimmarok im kwal̦o̦k naan m̦ae iien eboñ. (Luk 21:37, 38; Jon 3:2) Ear ilo̦k ñan “jikin kweilo̦k ko rel̦l̦ap im ko reddik im kwal̦o̦k Naan eo Em̦m̦an kõn Aelõñ in Anij.” (Luk 8:1, UBS) Jijej ear etetal elõñ bukwi m̦ail̦ ilo ial̦ ko rebũñalñal bwe en maroñ bõkl̦o̦k naan eo em̦m̦an ñan armej ro.

8, 9. Ta tõprak ko Jijej ear loi kõn an kar niknik im kijejeto ilo jerbal in kwal̦o̦k naan?

⁸ Jijej ear ke lo tõprak ilo jerbal in kwal̦o̦k naan? Aet! Ear kwal̦o̦k naan kõn Aelõñ eo ñan elõñ armej ro. Ear ãinwõt juon ri kallib me ear ekkat elõñ ine ko ilo kõkkar me repojak ñan an rũkal̦oor ro an itok im m̦adm̦õdi. Joñan an kar jerbal in kwal̦o̦k naan kakajoor Jijej, jet iien ear jab m̦õñã kõnke ekõn̦aan kadedel̦o̦k jerbal in an Anij. (Jon 4:31-38) Baj l̦õmn̦ak m̦õk kõn joñan an kar Jijej m̦õn̦õn̦õ ke ear dedel̦o̦k jerbal in an ilo lal̦ in. Ear maroñ ba ñan Jemen im ba: “Iar kwal̦o̦k am̦ aiboojoj ioon lal̦; iar kam̦õj jerbal eo kwaar letok bwe in kõm̦m̦ane.”​—Jon 17:4, UBS.

⁹ Jeova im Jijej rar lo el̦ap tõprak ko kõn wõt aer kar niknik im kijejeto ilo jerbal ko aer. Ejjel̦o̦k bar juon joñak em̦m̦anl̦o̦k jãn joñak kein aerro. Kõnke jej yokwe Jeova, jej kate kõj im “kajjioñe.” (Epesõs 5:1) Im kõnke jej bar yokwe Jijej, jej kate kõj ñan “anõke jenkwan ne ko neen.” (1 Piter 2:21) Jen kiiõ etale ta ko jej aikuj kõm̦m̦ani bwe jen maroñ lo tõprak im m̦õn̦õn̦õ kõn jerbal ko ad.

WÃWEEN JEMAROÑ LO TÕPRAK IM M̦ÕN̦ÕN̦Õ KÕN JERBAL KO AD

10, 11. Ta eo emaroñ jipañ kõj bwe jen m̦õn̦õn̦õ bwe ewõr ad jerbal?

¹⁰ Ro me rej m̦ool in Kũrjin rej aikuj jerbal bwe ren mour. Kõn men in, jej aikuj kate kõj bwe jen m̦õn̦õn̦õ kõn jerbal ko ad. Bõtab, emaroñ pen ad m̦õn̦õn̦õ ñe jej kõm̦m̦ani jerbal ko me jediki. Ñe jej iioon wãween in, ta ko jemaroñ kõm̦m̦ani bwe jen lo tõprak im m̦õn̦õn̦õ kõn jerbal ko ad?

¹¹ Kwõn m̦õn̦õn̦õ bwe ewõr am̦ jerbal. Ilo lal̦ in rainin, ejjab aolep iien jemaroñ bõk jerbal ko me jekõn̦aan. Bõtab, jemaroñ kate kõj bwe en jim̦we wãween ad l̦õmn̦ak kõn jerbal eo ad. El̦aññe jej katak kõn l̦õmn̦ak ko an Anij kõn jerbal, men in emaroñ jipañ kõj bwe jen kajim̦we wãween ad l̦õmn̦ak kõn jerbal eo. Ñan waanjoñak, el̦aññe kwe eo kwõj bõk eddon kabwe aikuj ko an eo pãleem̦ ak ajri ro nejũm̦, jouj im keememej bwe jerbal eo am̦ ej jipañ eok ñan kõm̦m̦ane eddo in am̦. Jekdo̦o̦n ewi joñan an ettã jerbal eo am̦, ak enaaj baj wõt jipañ eok ñan katõprak aikuj ko ami. Im̦aan mejãn Anij, elukkuun aorõk bwe kwõn kabwe aikuj kein an rein me rejitõnbõro ippam̦. Naan in Anij ej ba bwe eo me ejjab kabwe aikuj ko an ajri ro nejin ak eo pãleen, armej in “el̦apl̦o̦k an nana jãn ro rejjab tõmak.” (1 Timote 5:8, UBS) Kõn men in, jouj im keememej bwe ilo am̦ jerbal, kwõj kajejjet eddo eo me Anij ear lewõj ñan kwe. Ñe kwõnaaj keememej men in, kwõban ãinwõt ri jerbal ro me rejjab m̦õn̦õn̦õ kõn jerbal ko aer. Kwõnaaj m̦õn̦õn̦õ kõnke kwõjel̦ã bwe eaorõk im ewõr unin am̦ jerbal.

12. Ta tokjãn ko rej wal̦o̦k ñe jej tiljek im m̦ool ilo jikin jerbal?

¹² Kwõn tiljek im m̦ool ilo am̦ jerbal. El̦aññe jej buul̦ jerbal im katak kilen jerbal, enaaj lõñ tokjãn ko im rej wal̦o̦k ñan kõj. Ñan waanjoñak, ekkã an jikin jerbal ko kappok ri jerbal ro me retiljek im rekapeel. (Jabõn Kõnnaan 12:24; 22:29, UBS) Kõnke jej Kũrjin ro rem̦ool, ej aikuj jim̦we im m̦ool ad jerbal iien otemjej ilo jikin jerbal ko ad. Eñin unin jeban ko̦o̦t jããn, ko̦o̦t kein jerbal ak m̦weiuk, kõmatte im riabe bo̦o̦j eo ad kõn awa in jerbal ko ad. (Epesõs 4:28, UBS) Ãinwõt ad kar etale ilo kar katak eo l̦o̦k, jej lo elõñ tokjãn ko ñe jej kwal̦o̦k m̦ool. El̦aññe juon armej ejim̦we im m̦ool an jerbal, ri jerbal ro jet im bo̦o̦j eo an renaaj lõke. Bõtab, meñe bo̦o̦j eo ad emaroñ jab reitok im lo bwe em̦ool im jim̦we ad jerbal, jenaaj baj m̦õn̦õn̦õ wõt. Etke? Kõnke jejel̦ã bwe ejim̦we men ko jej kõm̦m̦ani im jejel̦ã bwe Anij ej loe aolep jerbal ko ad im ej buñbũruon kake kõj.​—Hibru 13:18, UBS; Kolosse 3:22-24, UBS.

13. Ta tokjãn ko remaroñ wal̦o̦k el̦aññe em̦m̦an etad im m̦wilid ilo jikin jerbal?

¹³ Keememej bwe m̦wilid ej bõktok nõbar ñan Anij. El̦aññe jej kate kõj bwe en em̦m̦an etad im m̦wilid ilo jikin jerbal, ro jet renaaj kile. Ta tokjãn men in? Eokwe, jej kõm̦m̦an bwe ro jet ren kile joñan an jim̦we im ‘aiboojoj katak ko an Anij Ri Lo̦mo̦o̦red.’ (Taitõs 2:9, 10) Ñe enaaj em̦m̦an m̦wilid, ro jet renaaj kile bwe jej pãd ilo kabuñ eo em̦ool. Kõn men in, remaroñ kõn̦aan kobatok ippãd. Baj l̦õmn̦ak m̦õk kõn joñan am̦ naaj m̦õn̦õn̦õ ñe juon iaan ro ilo jikin jerbal eo am̦ ej m̦õn̦õn̦õ in katak Baibõl̦ kõn wõt an em̦m̦an m̦wilũm̦! Bõtab, men eo eaorõktata ej ad jel̦ã bwe m̦wilid ej kabuñbũruon Jeova im bõktok nõbar ñan e.​—Jabõn Kõnnaan 27:11; 1 Piter 2:12, UBS.

L̦ÕMN̦AK M̦OKTA JÃN AM̦ BÕK JUON JERBAL

14. Ewi wãween eoon ko ilo Baibõl̦ remaroñ jipañ kõj ñe jej kappok ad jerbal?

¹⁴ Baibõl̦ eo ejjab kõllaajrak tok ta jerbal ko rem̦m̦an jemaroñ bõki im ta jerbal ko rejekkar ñan kõj. Mel̦el̦ein ke bwe em̦m̦an ñe jej bõke jabdewõt kain jerbal ko jekõn̦aan? Ejjab. Ewõr eoon ko ilo Baibõl̦ im remaroñ jipañ kõj ñan kããlõt jerbal ko rekkar im renaaj kabuñbũruon Anij. Eoon kein remaroñ bar jipañ kõj bwe jen jab bõk jerbal ko me Anij eban buñbũruon kaki. (Jabõn Kõnnaan 2:6) M̦okta jãn ad kããlõt juon jerbal, ewõr ruo kajjitõk ko raorõk jej aikuj kajjitõkin kõj kaki.

15, 16. M̦okta jãn ad kããlõt juon jerbal, ta kajjitõk ko ruo raorõk im jej aikuj kajjitõk ippãd make kaki?

¹⁵ Ñe inaaj bõk jerbal in, inaaj ke aikuj in kõm̦m̦ani men ko me rej n̦ae Baibõl̦? Naan in Anij ej kajju im ba bwe enana ko̦o̦t, riab, im kõm̦m̦an ak ãeik ekjab ko. (Exodus 20:4; Jerbal 15:29; Epesõs 4:28, UBS; Revelesõn 21:8) Kũrjin ro rem̦ool reban bõk jerbal ko me ri jerbal ro rej aikuj ko̦o̦t, riab, im kõm̦m̦an ekjab. Kõnke jej yokwe Jeova, jeban bõk jabdewõt jerbal ko me ri jerbal ro rej aikuj kõm̦m̦ani men ko renana me rej n̦ae kien ko an Anij.​—1 Jon 5:3.

¹⁶ Ñe inaaj bõk jerbal in, inaaj ke aikuj in jipañ armej ro ilo men ko renana im rebõd? Jen lale juon waanjoñak: Jen ba bwe ewõr juon em̦m̦aan me ej Kũrjin im ejel̦ã kaam̦tõ. Juon iien, kar kõl̦l̦ãiki jikin jerbal eo an bwe ren ilo̦k im kalõk juon im̦õn jar. Ejjel̦o̦k jorrããn ilo jerbal in kaam̦tõ kõnke jerbal in ejjab kajju jipañ armej ro bwe ren bõk kun̦aaer ilo kabuñ ko reriab. Bõtab, el̦aññe em̦m̦aan in ej ilo̦k im kalõke juon im̦õn jar, eokwe ej ãinwõt ñe ej bõk kun̦aan ilo an jipañe kabuñ in eriab ñan kajeeded m̦anit im katak ko reriab. (Revelesõn 18:4) Kõnke jej yokwe Jeova, jeban bõk kun̦aad im kõm̦m̦ani jabdewõt jerbal ko ñan jipañ ak kowõnm̦aanl̦o̦k men ko ej diki.

17. (1) Ta ko jej aikuj kõl̦mãnl̦o̦kjen̦ kaki m̦okta jãn ad kããlõt ak bõk juon jerbal? (Jouj im lale bo̦o̦k eo, “Ekkar Ke bwe In Bõke Jerbal In?”) (2) Maroñ eo ad ñan jel̦ã em̦m̦an im nana emaroñ jipañ kõj bwe jen kõm̦m̦ani pepe ko me renaaj kabuñbũruon Anij. Ewi wãween?

¹⁷ Jemaroñ make kile kain jerbal rot ko rekkar im rejekkar el̦aññe jej lukkuun etale im uwaake kajjitõk ko ruo ilo pãrokõrããp 15 im 16. Bõtab, ebar wõr jet men ko im jej aikuj kõl̦mãnl̦o̦kjen̦ kaki m̦okta jãn ad kããlõt ak bõk juon jerbal.a Jen jab kõtmãne bwe ri karejar eo etiljek im mãlõtlõt enaaj letok kien ko kõn kain jerbal rot ko rekkar im kain jerbal rot ko rejekkar ñan Kũrjin ro. Eñin ej iien eo me jej aikuj jel̦ã kõm̦m̦ani pepe ko rejim̦we. Ãinwõt ad kar etale ilo Katak 2, jej aikuj katak Baibõl̦ im jel̦ã kilen jerbale naan in kakapilõk ko ie. Ñe jej kõm̦m̦ane men kein, enaaj jim̦we an jerbal maroñ eo ad ñan jel̦ã em̦m̦an im nana. El̦aññe jej kõjerbal Baibõl̦ ñan katakin im kammineneik kõj make bwe jen “jel̦ã ta eo em̦m̦an im ta eo enana,” jenaaj maroñ kõm̦m̦ani pepe ko me renaaj kabuñbũruon Anij im pãd wõt ilo yokwe eo an.​—Hibru 5:14, UBS.

JERBAL EO AM̦ EN JAB KAPAÑ AM̦ KAREJAR ÑAN ANIJ

18. Etke jet iien epen ad kõm̦m̦ani pepe ko me rej kabuñbũruon Jeova?

¹⁸ “Ilo raan ko ãliktata enaaj kanooj pen mour.” Eñin unin jet iien epen ad kõm̦m̦ani pepe ko me rej kabuñbũruon Jeova. (2 Timote 3:1, UBS) Epen ellolo jerbal ilo raan kein. El̦aññe jej ellolo jerbal, elukkuun pidodo ad maroñ luuji. Kõnke jej Kũrjin ro rem̦ool, jejel̦ã joñan aorõkin ad aikuj jerbal ñan kabwe aikuj ko an eo pãleed ak ajri ro nejid. Bõtab, jej aikuj kõjparok. Etke? Kõnke emaroñ wal̦o̦k jet men ko ilo jikin jerbal eo me remaroñ kapañ kõj jãn ad karejar ñan Anij. Bareinwõt, ñe jenaaj jino ad arõk m̦weiuk ãinwõt armej ro wõj ilo lal̦ in, men in emaroñ jelõt ad jerbal ñan Anij. (1 Timote 6:9, 10, UBS) Jen kiiõ etale men ko jej aikuj kõm̦m̦ani bwe jerbal eo ad en jab kapañ ad karejar ñan Anij. Jenaaj bar etale ta ko jemaroñ kõm̦m̦ani bwe jen likũt men ko rej kabuñbũruon Irooj m̦oktata ilo mour ko ad.​—Epesõs 5:10, UBS.

19. (1) Etke jej aikuj lõke Jeova kõn aolepen bũruod? (2) El̦aññe jenaaj lõke Jeova, ewi wãween men in enaaj kõjparok kõj?

¹⁹ Lõke Jeova kõn aolepen bũruod. (Jabõn Kõnnaan 3:5, 6) Jej aikuj lõke Jeova kõnke el̦ap an yokwe im kaorõk kõj. (1 Piter 5:7) El̦apl̦o̦k an Anij jel̦ãl̦o̦k jãn kõj kõn ta ko jej aikuji, im ewõr an maroñ ñan jipañ. (Sam 37:25, UBS) Eñin unin elukkuun aorõk bwe jen l̦oore naan kein ilo Baibõl̦ eo: “Kom̦win jab arõk m̦ani, ak kom̦win jokwane kõn men ko ewõr ippemi. Bwe Anij ear ba, ‘Ijamin el̦l̦o̦k jãn eok; ijamin likũt eok make iaam̦.’” (Hibru 13:5, UBS) Elõñ ro me rej kamaat aolepen iien ko aer ñan jerbal ko an Jeova rej kam̦ool bwe Anij ej kabwe aikuj ko ad. El̦aññe jej lukkuun tõmak bwe Jeova enaaj lale im kõjparok kõj, eokwe enaaj dikl̦o̦k ad inepata kõn men ko jej aikuj kõm̦m̦ani bwe en tõprak aikuj ko an eo pãleed im ro nejid. (Matu 6:25-32) Im el̦aññe jej lõke Jeova kõn aolepen bũruod, jeban kõtl̦o̦k bwe jerbal ko ad ren kapañ kõj jãn ad kõm̦m̦ani jerbal ko an Anij, ãinwõt kwal̦o̦k naan im pãd ilo iien kweilo̦k ko.​—Matu 24:14; Hibru 10:24, 25, UBS.

20. (1) Ta mel̦el̦ein an Baibõl̦ ba bwe jen “kalimjek wõt” men ko rej ankilaan Anij? (2) Ta eo enaaj jipañ eok bwe kwõn kõm̦m̦ane men in?

²⁰ “Kalimjek wõt” men ko me rej ankilaan Anij. (Jabõn Kõnnaan 4:25, UBS) El̦aññe jej “kalimjek wõt” men ko me rej ankilaan Anij, mel̦el̦ein men in bwe jeban kobrak mour ko ad kõn men ko im m̦weiuk ko me rejjab menin aikuj. Kũrjin ro rej aikuj kaorõk wõt jerbal ko an Anij ilõñin men otemjej. El̦aññe jenaaj kõm̦m̦ane men in, jeban jol̦o̦k iien ko ad ñan kappok jerbal ko me elukkuun l̦ap on̦aer. Jeban bar jol̦o̦k iien im maroñ ko ad bwe jen lukkuun m̦weiie im ãinwõt armej ro ilo lal̦ in me rekõn̦aan wõt wiaiki m̦weiuk ko rekããl bwe ren maroñ m̦õn̦õn̦õ. Ta eo enaaj jipañ eok bwe kwõn kaorõk wõt jerbal ko an Anij? Eokwe, kwõn kõjparok bwe kwõn jab m̦uritak wõt. Kwõn kate eok im jab wiaiki m̦weiuk ko me kwõnaaj aikuj jol̦o̦k el̦ap iien im maroñ ko am̦ ñan kõjerbali. Em̦m̦an ñe kwõj roñjake naan in kakapilõk eo ilo Baibõl̦ me ej ba: “El̦aññe ewõr m̦õñã im nuknuk ko ippãd, jen jokwane kaki.” (1 Timote 6:8) Kwõn kate eok ñan kõm̦m̦an oktak ko ilo mour eo am̦ bwe en l̦apl̦o̦k am̦ iien ñan Anij.

21. (1) Etke jej aikuj pepe in kõm̦m̦ani men ko raorõk m̦oktata? (2) Ta men ko ren kar aorõktata ilo mour ko ad?

²¹ Jek ilo bũruod bwe jen kõm̦m̦ani m̦okta men ko Anij ekõn̦aan. Kõnke ejabwe iien ilo mour ko ad kajjojo raan, jejjab maroñ kõm̦m̦ani aolep men ko jekõn̦aan kõm̦m̦ani. Eñin unin jej aikuj pepe in kõm̦m̦ani men ko raorõk m̦oktata. El̦aññe jejjab, jenaaj jol̦o̦k iien ko ad ñan kõm̦m̦ani men ko rejjab kanooj aorõk im jujen wõt ejjel̦o̦k ad iien ñan men ko raorõkl̦o̦k. Ta men ko ren kar aorõktata ilo mour ko ad? Eokwe, elõñ armej ro ilo lal̦ in rej ba bwe men ko raorõktata ilo mour in ej jikuul̦ im jerbal ko me el̦ap on̦aer. Bõtab, Jijej ear rõjañ rũkal̦oor ro an bwe ren “pukot m̦okta aelõñ in Anij.” (Matu 6:33) Kõnke jej Kũrjin ro rem̦ool, jej likũt men ko an Aelõñ eo an Anij im kõn̦aan ko an Anij m̦oktata ilo mour ko ad. Ej aikuj alikkar men in ilo aolep pepe ko ad, jibadbad im kõttõpar ko ad, im aolep men ko jej kõm̦m̦ani. Jej aikuj bar kaalikkar bwe men kein relukkuun aorõkl̦o̦k jãn jerbal ko ad im men ko m̦weied.

KATE KÕJ ILO KWAL̦O̦K NAAN

22. (1) Ta jerbal eo eaorõktata an armej ro doon Anij? (2) Ewi wãween jemaroñ kaalikkar bwe jerbal in elukkuun aorõk ippãd? (Jouj im lale bo̦o̦k eo, “El̦ap Aõ M̦õn̦õn̦õ Kõnke Ear Jim̦we Jokãlõt eo Aõ.”)

²² Jej mour kiiõ ilo raan ko ãliktata. Eñin unin jej aikuj lukkuun kaorõke jerbal eo ad ñan kwal̦o̦k naan im ñan kõm̦m̦an rũkal̦oor. (Matu 24:14; 28:19, 20) Kõnke jej l̦oore Jijej, jej aikuj kate kõj joñan wõt ad maroñ ilo jerbal in me elukkuun aorõk. Ewi wãween jemaroñ kaalikkar bwe jerbal in elukkuun aorõk ippãd? Armej ro an Anij rej kate er kwal̦o̦k naan ilo eklejia ko rej pãd ie. Jet iaaer rar kõm̦m̦an oktak ko ilo mour ko aer bwe ren jerbal ãinwõt pioneer ak mejinede. Elõñ jinen im jemen ajri ro rej make kile joñan aorõkin jerbal ko an Anij. Kõn men in, rej rõjañ ro nejier bwe ren kate er im jibadek jerbal ko ilo doulul in. Ri kwal̦o̦k naan ro rekijejeto rej ke lo tõprak im m̦õn̦õn̦õ ilo jerbal in kwal̦o̦k naan? Aet! Ejjel̦o̦k juon jerbal em̦m̦anl̦o̦k jãn jerbal in an Anij kõnke ej bõktok el̦ap lañlõñ, m̦õn̦õn̦õ im elõñ jeraam̦m̦an ko.​—Jabõn Kõnnaan 10:22.

23. El̦aññe ewõr am̦ jerbal, ta eo kwõnaaj kate eok im kõm̦m̦ane?

²³ Elõñ iaad jej jol̦o̦k elõñ awa ko ilo jikin jerbal ko ad bwe jen maroñ kabwe aikuj ko an eo pãleed ak ro nejid. Jouj im keememej bwe Jeova ekõn̦aan bwe jen lo tõprak im m̦õn̦õn̦õ kõn jerbal ko ad. El̦aññe jenaaj l̦oore l̦õmn̦ak ko an Anij im jerbale naan in kakapilõk ko an kõn jerbal, jenaaj lo tõprak im m̦õn̦õn̦õ kõn jerbal ko ad. Bõtab, jen kate kõj bwe jerbal ko ad ren jab kapañ kõj jãn ad kwal̦o̦k naan kõn nuuj eo em̦m̦an kõn Aelõñ eo an Anij. Eñin ej jerbal eo eaorõktata. El̦aññe jenaaj kaorõk jerbal in el̦apl̦o̦k jãn men otemjej, jej kaalikkar bwe jej yokwe Jeova. Innem, jenaaj pãd wõt ilo yokwe eo an.