Bõk Jerammõn ko jen Kiñ eo Ej Bõk Tel jen Kajur eo an Anij!
“[Kajur eo an] Jeova e naj ber ion.”—AIS. 11:2.
1. Ta inebata ko jet rar kwaloki kin abañ ko an lõl in?
ILO yiõ eo 2006, juõn scientist etan Stephen Hawking ear kajitõk im ba, “Ewi wãwen an armij ro maroñ wõnmanlok im mour iomin bar 100 yiõ ko ilo juõn lõl elap bwoktak ko rej walok ilo kien ko, ilo mour ko an armij ro, im kin an jorranlok lõl in?” Ekkar ñõn juõn magazine ear ba: “Ejañin or juõn kien ear maroñ jolok jeramel ak kõmõn bwe en or ainemõn iaolepen lõl in. Ilo mol, elap an oktõk men eo jar kõtõbrõke, meñe elõñ jibarbar ko jar kõmõni. Jar kate kij ñõn kajutõk elõñ kain kien ko, jen juõn kien me elap an maroñ ion men ko ilo mour ko an armij ro ñõn juõn kain kien me ej kõtlok an armij ro anemkwoj. Jar bareinwõt kajerbal elõñ kain kõl ko ñõn bõktok ainemõn, jen juõn rolul jar kajutõke me elõñ ailiñ ko rej jerbal iben dron ñõn kõmõn ainemõn ñõn juõn kain kõl me ailiñ ko rej kalõñlok kein tõrinae ko ñõn air bõprae an walok tõrinae. Kinke jar bõk kwonad ilo elõñ tõrinae ko ñõn kajemlok tõrinae, men in ej kalikar bwe jejaje kilen bõpraiki.”
2. Ejjabto jen kiõ, ewi wãwen Jeova enaj jerbale iroij potata eo an ion lõl?
2 Dri korijer ro an Jeova rejjab bwilõñ kin nan rõt kein kar kwaloki itulõñ. Baibel eo ej jiroñ kij bwe kar jab kõmõnmõn armij ro kin maroñ eo ñõn air iroij ioir mõke. (Jerm. 10:23, UBS) Ej tellokin wõt Jeova bwe en Iroij Potata eo ar. Kin men in, eor iben maroñ eo ñõn kajutõk kien ko ñõn kij, ñõn kwalok ta karõk eo ar kin mour, im tel kij ñõn ar lo jejit in kitien karõk in. Bareinwõt, mõtõn jidrik enaj kajerbal maroñ eo an ñõn kajemlok jibarbar ko an armij ro me ejañin or tõbrõkiir ñõn iroij ioir mõke. Ilo ejja ien eo wõt, enaj kokkure aolep ro im rej kõmõn bwe armij ro ren wõnmanlok wõt im dri kamakoko ñõn jerawiwi, jab wãppen, im ñõn “anij in lõl in,” Setan Devil eo, ilo air karmijete iroij potata eo An.—2 Kor. 4:4.
3. Ta eo Aiseia ear kanan kake kin Messaia eo?
3 Ilo jukjuk im ber eo ekãl, Jeova enaj ilo yokwe, jerbale iroij potata eo an ion armij ro ikijen Ailiñ in Messaia eo. (Dan. 7:13, 14, UBS) Ikijen Kiñ eo an Ailiñ in, Aiseia ear kanan: “Juõn ãjib e naj walok jen kejinelap in Jesse, im juõn ra jen okar ko an e naj jebar leen. Im [kajur eo an] Jeova e naj ber ion, jitõb in meletlet im jelalokjen, jitõb in bebe im kajur, jitõb in jela im mijõk Jeova.” (Ais. 11:1, 2) Ilo wãwen it ko Anij ear kajerbal kajur eo an ñõn kamaroñ “ãjib [eo] e naj walok jen kejinelap in Jesse,” ak Jisõs Kraist, ñõn an iroij ion armij ro? Ta jerammõn ko renaj walok jen iroij eo an? Im ta eo jej aikwij kõmõne ñõn ar bõk jerammõn kein?
Anij Ear Kamaroñ Jisõs bwe En Tellokin an Iroij
4-6. Ta jelalokjen eo eaurõk enaj kamaroñ Jisõs ñõn an tellokin jerbal einwõt juõn Kiñ, Pris Elap, im dri Ekajet emeletlet im tiriamokake?
4 Jeova ekõnan bwe armij ro an ren bõk mour wãppen iomin tel eo an juõn Kiñ, Pris Elap, im dri Ekajet eo im elap an meletlet im etiriamokake. Eñin unin Anij ear kãlet Jisõs Kraist, eo ear bõk jibõñ jen kajur eo an Anij bwe en tellokin an bõk jerbal kein elap air aurõk. Jen etali jet ian un ko unin Jisõs enaj kajejiti jerbal ko Anij ear jitõñ e ñõn an kõmõni.
5 Jisõs ej eo im elaptata an jela kin Anij. Nejin eo ej mõke wõt ear jela kajen Jemen mokta jen jabrewõt armij ak enjel ro iomin elõñ billion yiõ ko. Iomin ien kein, joñõn an kar lap an Jisõs katak im jela kin Jeova, Baibel eo ej kwalok bwe ej “ilo nememen Anij eo je ban lo E.” (Kol. 1:15) Jisõs mõke ear ba: “Eo e ar lo Ña, e ar lo Jema.”—Jon 14:9.
6 Ijellokin Jeova, elaptata an Jisõs jela kin aolep menin kõmõnmõn ko, ekoba armij ro. Dri Kolosse 1:16, 17 ej ba: “Bwe kin E [Nejin Anij] emwij kõmõn men ko otemjej, men ko i lõñ kab men ko ion lõl, ko jej loi im ko je jab loi, . . . Im Ej mokta jen men otemjej, im kin E men otemjej rej ber.” Baj lemnok mõk kin men in! Einwõt “dri mejerik” eo an Anij, ear or kwonan Jisõs ilo aolep menin kõmõnmõn ko jet. Kin men in, emelele kin aolep men ko kin lõñ im lõl, ekoba kamelij eo an armij me elap an kabwilõñlõñ. Aet, Kraist ej joñok eo emõntata kin meletlet!—Ken. 8:12, 22, 30, 31.
7, 8. Ewi wãwen Anij ear kajerbal kajur eo an ñõn jibõñ Jisõs ilo jerbal in kwalok nan eo an?
7 Kar kabit Jisõs kin kajur eo an Anij. Jisõs ear ba, “[Kajur eo an Jeova] ej Ioõ, bwe E ar kabit Iõ bwe In kwalok gospel ñõn ro dri jeramel; E ar jilkintok Iõ bwe In kwalok kõtlok ñõn matõn iri, im lolokjen ñõn ro rebilo, bwe In kõtlok ro ar kokkure ir, bwe In kwalok yiõ eo emõn an Iroij.” (Luk 4:18, 19) Ke Jisõs ear baptais, kajur eo an Anij ear kõmõn bwe en kememej aolep men ko ear katak kaki mokta jen an kar itok ñõn lõl, ekoba ta eo Anij ear kõnan bwe en kõtõbrõke ilo ien jerbal in kwalok nan eo an ion lõl einwõt Messaia eo.—Riit Aiseia 42:1; Luk 3:21, 22; Jon 12:50.
8 Kinke Jisõs ear wãppen ilo lemnok im enbwin im ear bõk maroñ jen kajur eo an Anij, Jisõs ear armij eo elaptata ear mour ion lõl im bareinwõt ear dri Kaki eo elap. Ilo mol, ro im rar roñjake e rar “bwilõñ kin An katak.” (Matu 7:28) Men in ear eindrein kinke Jisõs ear maroñ kwalok kin men ko im rej unjen abañ ko an armij ro, einwõt jerawiwi, jab wãppen, im an armij likjõp in jela kin Anij. Bareinwõt, ear maroñ lo ta eo ej ber ilo buruen armij ro im ear jerbal ibeir ilo juõn wãwen ekkar.—Matu 9:4; Jon 1:47.
9. Ilo am kalomõnlokjen kin men ko Jisõs ear iioni ion lõl, ewi wãwen men in ej kalaplok am liki Jisõs einwõt Iroij eo?
9 Jisõs ear mour einwõt juõn armij. Men ko Jisõs ear iioni einwõt juõn armij im an ber iben armij ro rejjab wãppen ear lap an kar jibõñ ñõn kõmõn bwe en tellokin bõk jerbal eo einwõt juõn Kiñ. Dri jilik Paul ear je: “Ej ekar ñõn E [Jisõs] bwe En einwõt ro jãtin ilo men otemjej, bwe En pris elap e tiriamo im etiljek ilo men ko an Anij, bwe En dri Mirik kin jerawiwi ko an armij rõn. Bwe kin An iñtan ke ar [melejoñwe] E, ej maroñ in jibõñ ro [melejoñwe] ir.” (Hib. 2:17, 18) Kinke kar ‘melejoñwe’ e, Jisõs ej tiriamokake ro im rej iion melejoñ. Tiriamo eo an Jisõs ear alikar ilo ien jerbal in kwalok nan eo an ion lõl. Ro renañinmij, reutame ilo enbwin, ro rar iñtan, im bareinwõt ajiri ro, rar jab mijõk in kebak e. (Mark 5:22-24, 38-42; 10:14-16) Ro etã burueir im ro eor air kõnan ñõn jela kin Anij rar bareinwõt mõnõnõ in kebak e. Ijo turãjet, ro eutiej burueir, ro rekibbon, im ro ejelok ‘yokwe Anij ilo ir’ rar karmijete, kijirãte, im jumae e.—Jon 5:40-42; 11:47-53.
10. Ta wãwen eo elap Jisõs ear kamol yokwe eo an ñõn kij?
10 Jisõs ear lelok mour eo an kin kij. Bwelen kein kamol eo elaptata bwe ejelok bar juõn iroij emõnlok jen Jisõs ej bwe ear mõnõnõ in mij kin kij. (Riit Sam 40:6-10.) Kraist ear ba, “Ejelok yokwe iben armij elap jen yokwe in, bwe armij en lelok an mour kin ro jeran.” (Jon 15:13) Aet, ilo an jab einwõt iroij ro rejjab wãppen, ro im remweie kin air bõk jããn ko jen armij ro, Jisõs ear lelok mour eo an kin armij otemjej.—Matu 20:28.
Kar Kamaroñ E ñõn Letok Jerammõn ko kin Binmour Eo
11. Etke jemaroñ liki Jisõs einwõt eo ear binmour kin kij?
11 Einwõt Pris eo Elap, elukkun ekkar bwe Jisõs ej eo im enaj letok ñõn kij jerammõn ko kin katok in binmour eo an! Ilo mol, ke Jisõs ear ber ion lõl ear kwalok kin jidrik in ta eo enaj kõmõne einwõt eo ear binmour kin armij otemjej ñe enaj Iroij iomin Juõn Tausan Yiõ ko. Im elañe jej tiljek wõt, jenaj maroñ bõk jerammõn ko iomin iroij eo an. Ear kejmour ro renañinmij im ro reutame ilo enbwin, kejerkakbiji ro remij, najirik jar in armij ro, im bareinwõt ear kalur lañ ko. (Matu 8:26; 14:14-21; Luk 7:14, 15) Ear kõmõni men kein jab ñõn kimjãje kin joñõn maroñ im kajur eo an, ak kinke ear tiriamokake im yokwe armij ro. Ke juõn dri leper ear eowore bwe en kejmour e, ear ba: “I kõnan.” (Mark 1:40, 41) Jisõs enaj bar kwalok tiriamokake ilo ien Iroij eo an iomin Juõn Tausan Yiõ, bõtab enaj kõmõne men in iaolepen lõl.
12. Ewi wãwen an naj jejit kitien Aiseia 11:9?
12 Kraist im ro renaj iroij iben renaj bareinwõt kowõnmanlok jerbal eo ñõn katakin armij ro kin Anij me Jisõs ear jino kõmõne elõñlok jen 2,000 yiõ ko remotlok. Ilo wãwen in, enaj jejit kitien nan ko ilo Aiseia 11:9 me ej ba: “Lõl e naj obrõk kin jela Jeova einwõt dren ko rej kalibubu lojit.” Ejelok berre, jelalokjen eo jen Anij enaj kitibuj nan in jiroñ ko kin wãwen eo jemaroñ kejbãrok lõl in im aolep menin mour ko ie, einwõt kar jerbal eo an Adam ilo jinoin. Ilo jemlokõn 1,000 yiõ ko, karõk eo an Anij ilo jinoin me ej walok ilo Jenesis 1:28 im bareinwõt jerammõn ko rej waloktok jen katok in binmour eo renaj jejit kitieir.
Kar Kamaroñ E bwe En Dri Ekajet
13. Ewi wãwen Jisõs ear kwalok bwe ej yokwe wãnik?
13 Kraist ej “Eo Anij e ar likit E bwe En Dri Ekajet ro remour im ro remij.” (Jerb. 10:42) Inem, ej menin kainemõn ñõn jela bwe Jisõs ej juõn eo ejime im mol, im bwe wãnik im tiljek rej einwõt kõñõr in ibin! (Ais. 11:5) Ear kwalok an drike kibbon, etao, im men ko jet renana, im ear koweik ro im rar jab kwalok tiriamokake ñõn ro rar iñtan. (Matu 23:1-8, 25-28; Mark 3:5) Bareinwõt, Jisõs ear kalikar bwe armij ro rejjab maroñ mone e, kinke ear lap “an jelã buruen armij.”—Jon 2:25, UBS.
14. Ilo wãwen it eo Jisõs ej kwalok kiõ bwe ej yokwe wãnik im ekajet jime, im ta eo jej aikwij kajitõkin kij mõke kake?
14 Jisõs ej wõnmanlok wõt im kwalok bwe ej yokwe wãnik im ekajet jime ilo an lolorjake jerbal in kwalok nan im katakin, me ej walok ibelakin lõl. Ejelok juõn armij, juõn jitõb enana, ak kien an armij emaroñ kabwijrõk jerbal in jen an walok ilo joñõn eo Anij ej buñburuen kake. Kin men in, jemaroñ lukkun liki bwe ñe Armagedõn ejemlok, ekajet jime eo an Anij enaj bedjake lõl. (Riit Aiseia 11:4; Matu 16:27.) Kwon kajitõkin yuk mõke: ‘Ij ke bõk ejja lemnok eo an Jisõs kin armij ro ij iion ir ñe ij kwalok nan? Ij ke lelok aolepen aõ ñõn jerbal eo an Jeova meñe ejmour eo aõ ak wãwen ko iba remaroñ kõmõn bwe en or joñõn men ko imaroñ kõmõni?’
15. Ñõn jibõñ kij lelok aolepen ar ilo jerbal eo an Anij, ta eo jej aikwij kõmõne?
15 Elañe jej kememej bwe jerbal in kwalok nan eo ej jerbal eo an Anij, men in enaj jibõñ kij bwe jen korijer ñõn E kin aolepen ar. Anij eo ear kakien jerbal in, im ej kajerbal Nejin ñõn an lolorjake, im ikijen kajur eo Anij ej kamaroñ ro rej bõk kwonair ñõn air kõmõne. Kwoj ke kaurõk jerammõn eo ñõn am jerbal iben Anij im Nejin, eo ej bõk tel jen kajur eo an Anij? Ejelok juõn ijellokin wõt Jeova emaroñ kamakõt elõñlok jen jiljilimjuõn million armij ro im elõñ iair rej “dri jab katak im dri jab meletlet,” ñõn air kwalok kin ennan eo kin Ailiñ eo ñõn armij ro ilo 236 ailiñ ko.—Jerb. 4:13.
Kwonaj Jerammõn Ikijen Kraist!
16. Ta eo Jenesis 22:18 ej kalikar kin jerammõn ko jen Anij?
16 Jeova ear jiroñ Ebream: “Ilo ineõm dri ailiñ otemjej i lõl re naj jerammõn; bwe kwar bokake ainikiõ.” (Jen. 22:18) Men in ej kalikar bwe ro im rej kaurõk jerbal eo air ñõn Anij im Nejin remaroñ reimanlok ñõn jerammõn ko Messaia eo enaj bõktoki. Im ranin, rein rej likit jerammõn kein ilo lemnok eo air ke rej boub in kõmõne jerbal eo an Anij.
17, 18. Ta eo Jeova ear kalimur kake ilo Duteronomi 28:2, im ta melelen men in ñõn kij?
17 Ñõn ro inen Ebream, ailiñ in Israel, Anij ear ba: “Jerammõn kein otemjej [kar likit ilo Bujen Kien eo] re naj itok iom, im tõbar yuk, elañe kwo naj eoroñ ainiken Jeova am Anij.” (Dut. 28:2) Men in emaroñ bareinwõt jerbal ñõn dri korijer ro an Anij ranin. Elañe kwokõnan bõk kejerammõn jen Jeova, kwon “eoroñ” ainiken. Inem jerammõn ko jen E renaj “itok iom, im tõbar yuk.” Bõtab, ar “eoroñ” ainiken Anij ej kitibuj ta?
18 Ar eoroñ ainiken Anij ej kitibuj ar bõk ñõn buruer Nan eo an Anij im katak ko ej litok ikijen dri korijer eo etiljek. (Matu 24:45) Ej bareinwõt melelen ar bokake Anij im Nejin. Jisõs ear ba: “Jab otemjej rej ba ñõn Iõ, Iroij, Iroij, re naj dreloñtok ilo ailiñ in lõñ; a eo ej kõmõnmõn ankil an Jema ej ber i lõñ.” (Matu 7:21) Im ar eoroñ Anij ej melelen bwe jej mõnõnõ in kõtãik kij ñõn congregation eo an Kristian me ear kajutõke im elder ro im ear jitõñ ir, ro im rej ilo kõkkar “menin letok” ilo armij.—Ep. 4:8, UBS.
19. Ewi wãwen jemaroñ bõk jerammõn?
19 Ian eman ro im rej einwõt “menin letok” ko ej Kumi eo Ej Tel Dri Kennan ro an Jeova (Governing Body), ro im rej jutõk kin aolep congregation ko. (Jerbal 15:2, 6) Ilo mol, naj ekajete kij ilo ien iñtan eo elap ekkar ñõn wãwen ar lemnok im kõmõn ñõn dri kabit ro jein im jãtin Kraist. (Matu 25:34-40) Kin men in, juõn wãwen jemaroñ bõk jerammõn ej ikijen ar rejetake wõt ro im Anij ear kabit ir.
20. (a) Ta erro eo elaptata an man ro jeer im jãter im rej einwõt juõn “menin letok”? (b) Ewi wãwen jemaroñ kwalok ar kamolol kin rein?
20 Eman ro im rej bareinwõt juõn “menin letok” me kar jitõñ ir ikijen kajur eo an Anij ej kitibuj ro uan Committee eo an juõn ra, overseer ro rej itoitak, im elder ro ilo congregation eo. (Jerbal 20:28) Erro eo elaptata an rein jeer im jãter ej ñõn kõkãtõk armij ro an Anij “mae aruij tõbare juõn wõt tõmak, im jela Nejin Anij, ñõn armij eridto, ñõn joñõn ridtõn an Kraist obrõk.” (Ep. 4:13) Emol bwe einwõt kij aolep, rein bareinwõt rejjab wãppen. Mekarta, jej bõktok jerammõn ñõn kij mõke ñe jej kwalok ar kamolol im mõnõnõ in bokake nan in tel ko air.—Hib. 13:7, 17.
21. Etke eaurõk bwe jen bokake Nejin Anij kiõ?
21 Ejjabto jen kiõ, Kraist enaj kokkure jukjuk im ber in enana an Setan. Ñe enaj mottok ien in, jenaj atartar ion Jisõs kin mour eo ar kinke Anij ear kamaroñ e ñõn an tel ‘jar eo elap’ ñõn “dren ko dren in mour.” (Rev. 7:9, 16, 17) Kin men in, jen kate kij joñõn wõt ar maroñ kiõ ñõn kõtãik kij ilo mõnõnõ im kwalok ar kamolol ñõn Kiñ eo me ej bõk tel jen kajur eo an Jeova.
Ta eo Kwar Katak Jen . . .
• Aiseia 11:1-5?
• Jenesis 22:18?
[Caption on page 17]
Tiriamokake eo an Jisõs ear alikar ke ear kejerkakbiji ledrik eo nejin Jairõs
[Caption on page 18]
Jisõs Kraist ej lolorjake jerbal in kwalok nan eo me ej walok ibelakin lõl