Nan eo an Jehovah Ej Mour Wõt

Katak ko Relap Jen Book in Ruo Kiñ Ro

ILO Bible eo ilo book in Ruo Kiñ Ro ej wõnmanlok ilo bwebwenato eo ijo Juõn Kiñ Ro ej jemlok ie. Ej juõn bwebwenato kin 29 king ro​—12 jen ailiñ eo itu-eañ ilo Israel im 17 jen ailiñ eo itu-rak ilo Judah. Ruo Kiñ Ro ej bareinwõt kwalok kin makitkit ko an ri kanan ro Elijah, Elisha, im Isaiah. Meñe rejjab kwaloki ekkar ñan juõn lajrak in wãwen men ko rar walok, lokbook eo ej koba men ko rar walok ilo ien jeebeplok eo an Samaria im Jerusalem. Koba ibben don, Ruo Kiñ Ro ej kitibuj 340 yiõ ko​—jen 920 B.C.E. ñan 580 B.C.E. ilo ien eo ke ri kanan Jeremiah ear kadedelok an kar je book in.

Ewi tokjen book in Ruo Kiñ Ro ñan kij? Ta eo ej katakin kij kin Jehovah im wãwen an kar jerbal ibben armij ro? Ta men ko jemaroñ katak jen makitkit ko an king ro, ri kanan ro, im ro jet me book in ej konono kaki? Jen lale ta eo jemaroñ katak jen book in Ruo Kiñ Ro.

ELISHA EJ BINEJ JENKWON ELIJAH

(2 Kiñ 1:1–​8:​29)

King Ahaziah in Israel ear wõtlok ilo mweo imõn im ej nañinmij. Ej kajitõk ibben ri kanan eo Elijah im ej bõk uak eo bwe enaj mij. Ahaziah emij, im leo jatin, Jehoram, ej bõk jikin. Ilo ejja ien eo wõt, Jehoshaphat ej king ilo Judah. Juõn lañ ear bõkliñlok Elijah, im ri jibañ eo an, Elisha, ej bõk jikin einwõt ri kanan eo. Iumin enañin 60 yiõ ko ilo jerbal eo an, Elisha ej kõmman elõñ men in bwilõñ ko.​Lale box eo “Men in Bwilõñ ko Elisha ear Kõmmani.”

Ke juõn king in Moab ear jumae Israel, Jehoram, Jehoshaphat, im king eo an Edom rej wõnmaik e ilo tarinae. Rej bõk anjo kin tiljek eo an Jehoshaphat. Tokelik, king in Syria eo ej kõmmane juõn karõk ñan an tarinaik Israel ilo jidimkij. Bõtab, Elisha ej kokkure karõk in. King in Syria eo ear illu im ej jilkinlok “ors ko, jariot ko, im juõn jar in tõrinae elap” ñan air jibwe Elisha. (2 Kiñ 6:​14) Elisha ej kõmman ruo men in bwilõñ ko im ej karol Ri Syria ro ilo ainemõn. Tokelik, king in Syria eo Ben-hadad ej nitbwili Samaria. Men in ear kõmman bwe en walok juõn ñitta elap, ak Elisha ej kanan bwe enaj jemlok ñitta eo.

Tokelik, Elisha ej etal ñan Damascus. King Ben-hadad, eo enañinmij kiõ, ej jilkinlok Hazael ñan an kajitõk elañe enaj mour jen nañinmij eo an. Elisha ej kanan bwe king eo enaj mij im bwe Hazael enaj bõk jikin. Ran eo juõn, Hazael ej mõn king eo kin juõn “kooj” etutu im ej bõk iroij eo. (2 Kiñ 8:​15) Ilo Judah, Jehoram nejin Jehoshaphat ej erom king, im Ahaziah nejin ej binej jenkwon.​—Lale box eo “King Ro an Judah im Israel.”

Emwij Uaki Kajitõk ko Rej Bedbed ion Bible:

2:9​—Etke Elisha ear kajitõk ‘bwe en ruo alen an jitõb eo an Elijah bed ion’? Ñan kajejjet eddo eo an einwõt juõn ri kanan ñan Israel, Elisha enaj kar aikwij ejja jitõb eo wõt Elijah ear kwaloke, kin beran. Ilo an kile men in, Elisha ear kajitõk bwe ruo alen jitõb eo an Elijah en bed ion. Elijah ear jitõñ Elisha einwõt eo enaj binej jenkwon im ear an ri karejar iumin jiljino yiõ, inem Elisha ear watõk Elijah einwõt jemen ilo jitõb; Elisha ear einwõt manje eo nejin Elijah ilo jitõb. (1 Kiñ 19:19-​21; 2 Kiñ 2:​12) Kin men in, einwõt juõn lukkun manje eo ej bõk ruo alen kin men in jolet eo an jemen, Elisha ear kajitõk im ear bõk ruo alen kin men in jolet eo ilo jitõb jen Elijah.

2:​11​—“Ilaija e ar wõnliñlok ilo juõn aire” ñan “lõñ” et ko? Jikin kein rar jab mõttan ko retolok tata ilo lukkun lañ im ear jab jikin eo ijo Anij im enjel ro nejin rej bed ie. (Duteronomi 4:​19; Sam 11:4; Matu 6:9; 18:10) “Lõñ” ko ijo Elijah ear wanliñlok ñan e kar ilo mejatoto. (Sam 78:26; Matu 6:​26) Ilo an kelok ilo mejatoto eo an lal, jariot kijeek eo ear bõklok Elijah ñan bar juõn mõttan ilo lal in, ijo ear bed ie iumin jet yiõ ko. Ilo mol, elõñ yiõ ko tokelik Elijah ear je juõn letter ñan Jehoram, king in Judah.​—2 Kronikel 21:​1, 12-​15.

5:​15, 16​—Etke Elisha ear jab bõk men in lelok eo an Naaman? Elisha ear makoko in bõk men in lelok eo kinke ear kile bwe an kar kejmour Naaman ilo kabwilõñlõñ ear walok ikijen kajur eo an Jehovah, im jab jen eo an make. Ear jab lemnak ñan jidik in bõk wõnãn ñan e make jen jerbal eo an ijjitõñ in Anij. Ri kabuñ ro remol rainin rejjab bukõt wõnãir jen jerbal eo an Jehovah. Rej bõk ñan burueir nan in kakabilek eo an Jesus: “Kom ar bõk im ejej wõnãn, en ein drein ami lelok.”​—Matu 10:8.

5:​18, 19​—Naaman ear kajitõk jeorlok bwid ke kinke ear bõk kunan ilo juõn mantin kabuñ? King in Syria eo ear ritto im mõjno im ear aikwij atartar ibben Naaman. Ke king eo ear badikdik ñan an kabuñ ñan Rimmon, Naaman ear bareinwõt kõmman eindein. Bõtab, Naaman ear badikdik kinke ear aikwij jibañ king eo im jab kin kabuñ. Naaman ear kajitõk bwe Jehovah en jolok bwid eo an kin an kajejjet eddo in. Elisha ej tõmak Naaman, im ear ba ñan e: “Kwon ilok ilo ainemõn.”

Tokjen Katak ko ñan Kij:

1:​13, 14. Katak jen men ko jej loi im jerbal ilo ettã buru emaroñ lomoren armij.

2:​2, 4, 6. Meñe Elisha ear ri karejaran Elijah iumin jiljino yiõ, ear jab kõnan ilok jen e. Ear juõn joñok emõn kin tiljek im jimjera!​—Jabõn Kennan Ko 18:24.

2:​23, 24. Un eo elaptata kin air kajirere kake Elisha kar kinke juõn armij ebilal ear kõnak liboror eo an Elijah. Ajiri rein rar kile bwe Elisha ear juõn ri karejaran Jehovah im rar jab kõnan bwe en bed ijo Rar jiroñ e “kwon wõnliñlok,” melelen, en etal wõt ñan Bethel ak bwe ren bõkliñlok e einwõt kar Elijah. Ajiri rein rar kwalok ejja jitõb eo wõt elej an jemeir im jineir. Elap an aorõk bwe ro jemen im jinen ren katakin ro nejiir ñan air kautiej ri karejar ro an Anij!

3:​14, 18, 24. Ien otemjej ej jejjet kitien Nan eo an Jehovah.

3:​22. Meram eo ear romak ion den eo ilo jibboñ ear kõmman bwe en kilmir einwõt bõtõktõk, bõlen kinke bũdej eo ilo birikõt eo ear wõr kle bũrõrõ ie. Jehovah emaroñ kajerbal wãwen ko ilo lal in ñan kõtõbrak karõk ko an.

4:​8-​11. Ilo an kile bwe Elisha ear “juõn armij õn Anij e kwojarjar,” juõn kõrã in Shunem ear kwalok karuwainene ñan e. En kar jab eindein ke ad kõmman ñan ri tõmak ro rekijejeto an Jehovah?

5:3. Ledik in Israel eo ear tõmak ilo maroñ eo an Anij ñan kõmman men in bwilõñ ko. Ear bareinwõt beran in konono kin tõmak eo an. Kom ajiri ro komij kate ke kom ñan kakajurlok tõmak eo ami ilo kallimur ko an Anij im beran ilo ami konono kin mol eo ibben ri kaki ro ami im ri school ro mõttami?

5:​9-​19. Wanjoñok eo an Naaman ejjab kwalok ke bwe juõn armij eutiej buruen emaroñ katak ñan an kwalok ettã buru?​—1 Piter 5:5.

5:​20-​27. Gehazi ear madmõde tokjen ko renana kin an jerbal ilo juõn wãwen etao! Ilo ad lemnak kin buromõj im jorrãn ko rej walok ñe juõn armij ej kõmman einwõt ñe ej karejar ñan Anij im ilo ejja ien eo wõt kõmman nana men in enaj jibañ kij bõprae juõn ial rot in.

ISRAEL IM JUDAH REJ RI JIBOWE

(2 Kiñ Ro 9:1–​25:30)

Kar kabit Jehu bwe en king ilo Israel. Ilo mõkaj ear jino jerbal eo ñan mõn imõn Ahab. Ilo kabel Jehu ej ‘kokkure kabuñ ñan Baal jen Israel.’ (2 Kiñ 10:28) Ke ear jelã bwe Jehu ear mõn leo nejin, Athaliah, jinen Ahaziah, ‘e ar jutak im mõn lõmaro otemjej nejin king in Judah eo’ im bõk throne eo. (2 Kiñ 11:1) Kar lomoren ladik eo ediktata nejin Ahaziah, Jehoash, im elikin jiljino yiõ in an tilekek kar kairoij e king in Judah. Priest Jehoiada ej katakin e, im Jehoash ej wõnmanlok im kõmman emõn iman mejen Jehovah.

Elikin Jehu, aolep king ro me rar iroij ilo Israel rar kõmman nana iman mejen Jehovah. Elisha ej mij ilo ien iroij eo an leo jibwin Jehu. King eo kein kemen ilo Judah elikin Jehoash ej Ahaz, im ‘ear jab kõmman emõn iman mejen Jehovah.’ (2 Kiñ 16:​1, 2) Bõtab, Hezekiah nejin ej juõn king eo ‘ear eddeb ñan Jehovah.’ (2 Kiñ 17:20; 18:6) Ilo 740 B.C.E., ke Hezekiah ej king ilo Judah im Hoshea ej iroij ilo Israel, King in Assyria eo Shalmaneser ej ‘bõk Samaria, im ãñinlok ro Ri Israel ñan Assyria.’ (2 Kiñ 17:6) Tokelik, rar bõktok ro ruwamaejet ilo enen Israel, im ej jino walok kabuñ eo an Ri Samaria ro.

Ian king ro jiljilimjuõn elikin Hezekiah ilo Judah, Josiah wõt ear bõk buñten nee ko ñan jolok kabuñ waan jen eneo. Eliktata, ilo 607 B.C.E., Ri Babylon ro rej anjo ion Jerusalem im ‘ãñinlok Judah, ri jibokwe jen eneir.’​—2 Kiñ Ro 25:21.

Emwij Uaki Kajitõk ko Rej Bedbed ion Bible:

13:20, 21​—Men in bwilõñ in ej rejañ ke bwe ren kokwojarjar men in kabuñ ko? Jaab. Bible eo ejjab ba bwe rar kokwojarjar di ko diin Elisha. Kar kajur eo an Anij eo ear kõmman bwe en walok men in bwilõñ in, einwõt kar aolep men in bwilõñ ko me Elisha ear kõmmani ke ear mour.

15:​1-6​—Etke Jehovah ear kajorrãn Azariah (Uzziah, 15:6, footnote) kin leper? “Ke [Uzziah] e kajur, e utiejlok buruen . . . , im e ar bwir nae Jeova an Anij; bwe e ar dreloñ iloan tempel an Jeova bwe en kõkaijurjur ion lokatok in kaijurjur eo.” Ke priest ro rar “jumae Uzziah kiñ eo” im jiroñ e bwe en “drioijlok jen jikin kwojarjar eo,” ear illu nae priest ro im ear bõk nañinmij in leper.​—2 Kronikel 26:16-​20.

18:19-​21, 25​—Hezekiah ear kõmman ke juõn bujen ibben Egypt? Jaab. Nan in kinaak eo an Rabshakeh ear jab mol, einwõt nan ko an ke ear ba bwe “Jeova e jab iba ke?”

Tokjen Katak ko ñan Kij:

9:​7, 26. Ekajet eo elap nae imõn Ahab ej kwalok bwe kabuñ waan im katorlok bõtõktõkin ro ejelok rueir rej men in jõjõik ñan Jehovah.

9:​20. Ilo air jelã kin Jehu einwõt juõn eo e iim an kattõr jariot eo an ear kamol kijejeto eo an ñan kajejjet jerbal eo an. Rej jelã ke kajjiõm einwõt juõn ri kwalok ekijejeto kin Ailiñ eo?​—2 Timote 4:2.

9:​36, 37; 10:17; 13:18, 19, 25; 14:25; 19:20, 32-​36; 20:16, 17; 24:13. Jemaroñ liki bwe ‘nan eo ej waloklok jen loñin Jehovah ien otemjej enaj wõr tõbrak.’​—Aiseia 55:10, 11.

10:15. Einwõt an kar Jehonadab bõk kin aolepen buruen nan in kir eo an Jehu ñan iuwe ibben ilo jariot eo, “jar eo elap” rej mõnõnõ in jurake Jesus Christ, Jehu ilo ran kein, im ri kabit ri kalor ro an.​—Reveles̃õn 7:9.

10:30, 31. Meñe kõmman ko an Jehu rejjab wãppen, Jehovah ear kwalok an kamolol kin aolep men ko ear kõmmani. Emol, ‘Anij e wãnik wõt, im E jamin meloklok jerbal eo ad.’​—Dri Hibru 6:​10.

13:14-​19. Kinke leo jibwin Jehu Jehoash ear jab kate ak ear deñlokwe lal jilu wõt alen kin made ko, ear lo jidik wõt tõbrak ilo an anjo ion Ri Syria ro. Jehovah ej kõtmene bwe jen jerbal kin aolepen buruõd im ilo kijejeto ñe jej kõmmane jerbal eo ear letok ñan kij.

20:​2-6. Jehovah ej “Ri Roñjake jar ko.”​—Psalm 65:​2, NW.

24:​3, 4. Kin men eo ruõn Manasseh kin katorlok bõtõktõk, Jehovah “e jab kõnan jeorlok” bwid eo an Judah. Anij ej kautiej bõtõktõkin ro ejelok rueir. Jemaroñ liki bwe Jehovah enaj idenwõne ro ejelok rueir ilo an kokkure ro rar katorlok bõtõktõkiir.​—Sam 37:​9-​11; 145:20.

Eaorõk ñan Kij

Book in Ruo Kiñ Ro ej kwalok kin Jehovah einwõt Eo ej kajejjet kallimur ko. Jibokwe eo an ro ilo ailiñ ko ruo, mokta ilo Israel inem ilo Judah, ej kalikar ñan kij kin ewi wãwen ekajet eo kar kanan kake ilo Duteronomi 28:⁠15–​29:28 ear jejjet kitien. Ruo Kiñ Ro ej kwalok kin Elisha einwõt juõn ri kanan eo ekijejeto kin etan Jehovah im kin kabuñ eo emol. Kar kwalok kake Hezekiah im Josiah einwõt king ro ettã burueir me rar kautiej Kien eo an Anij.

Ñe jej kalmenlokjen kin lemnak im kõmman ko an king ro, ri kanan ro, im ro jet rej konono kaki ilo book in Ruo Kiñ Ro, jejjab katak ke men ko raorõk kin ta eo jen jibadõke im ta eo jen bõprae? (Dri Rom 15:4; 1 Korint 10:11) Aet, “nan in Anij ej mour im jerbal wõt.”​—Dri Hibru 4:​12.

[Pija eo ilo peij 28, 29]

Naaman ear kõttãik e make im kar kejmour e ikijen kajur eo an Jehovah

[Pija ilo page 28, 29]

Ta eo ear walok ñan Elijah ke ear “wõnliñlok ilo juõn aire ñõn lõñ”?