KATAK 2

Am̦ Kõnnaan Ippãn Ro Jet En Jejjet Ekkar ñan Wãween Kõnono

2 Korint 2:17

ILO TUKADU: Kõnono jãn bũruom̦ im ilo juon wãween ãinwõt ñe kwõj bwebwenato (natural) ñan kaalikkar am̦ itoklimo kõn katak eo im armej ro.

Pojakl̦o̦k im̦aan ilo am̦ jar im kõl̦mãnl̦o̦kjen̦. Jar im kajjitõk jipañ bwe kwõn l̦õmn̦ak wõt kõn ennaan eo kwõnaaj kwal̦o̦ke, ijello̦kun ta eo ro jet renaaj l̦õmn̦ak kake kwe. Kajjioñ keememej boin ko raorõk me kwõj aikuj kwal̦o̦ki. Kõpooj katak eo ilo naan ko am̦ make, ijello̦kun am̦ kakkilõklõki aolepen naan ko ilo peba eo am̦.

El̦aññe kwõj l̦õmn̦ak in riit jãn Baibõl̦ eo ak bok ko jet ad, kwõn lukkuun mel̦el̦e kõn ta eo ej kõnono kake. Am̦ kõm̦m̦ane men in enaaj jipañ eok bwe en em̦m̦an wãween am̦ riit. El̦aññe kwõnaaj riiti naan ko an juon armej, kajjioñ riiti ilo juon wãween kwõj kwal̦o̦k eñjake eo, ijoke en jab tarjen joñan ak kõl̦l̦apl̦ap.
Kõnono jãn bũruom̦. L̦õmn̦ak kõn unin an aorõk bwe armej ro ren roñ kõn ennaan eo. Kajjioñ in l̦õmn̦ak wõt kõn er. Ilo wãween in, am̦ jouj im itoklimo kake er enaaj alikkar ilo turin mejam̦ im wãween am̦ kõm̦akũtkũt ãnbwinnũm̦.

Ad kõnono jãn bũruod ejjab mel̦el̦ein bwe jen jabde ad kõnnaan ilo ejjel̦o̦k kautiej. En alikkar aorõkin ennaan eo kwõj kwal̦o̦ke ilo am̦ kõjerbal naan ko rejejjet im rekkar, im repidodo ñan mel̦el̦e.
Reilo̦k ñan armej ro. El̦aññe eban kal̦õkatip armej ro, kwõmaroñ reilo̦k ñan er ñe kwõj kõnono. El̦aññe kwõj kwal̦o̦k juon katak, em̦m̦an ñe kwõj reilo̦k ñan kajjojo iaan ri-kweilo̦k ro, ijello̦kun am̦ reito reitak.