Jodikdik Ro Rej Kamõnõnõik Buruen Jehovah
Rar jeje katak kein elaptata ñan jodikdik ro an Ri Kennan ro an Jehovah. Kin men in, jej rejañ jodikdik ro bwe ren etale katak in im uak ilo mõnõnõ ñe rej katak kake ilo ien Katak kin Imõniaroñroñ ilo congregation eo.
“Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.”—JABÕN KENNAN KO 27:11.
1, 2. Kamelele bwe elañe juõn Ri Christian ej itoklimo kin men ko an lal ej melelen ejjab maroñ erom juõn Ri Christian ak jab. (Dri Rom 7:21)
BAJ LEMNAK mõk kin men in, kwoj kaikujkuj ñan wiaik nuknuk. Ñe kwoj baj etale jet nuknuk ko, kwoj bwilõñ im lo juõn nuknuk kwolukkun mõnõnõ kake. Color im style eo relukkun jejjet im jimwe ekkar ñan kõnan eo am, im wõnãn ej kalikar bwe nuknuk in ej juõn men emõn ñan bõke. Ak kiõ kwoj lukkun kalimjeke im etale wãwen kar air kõmmane. Kwoj ilbõk kiõ, kinke kwoj lo bwe nuknuk eo ejorrãn itõrerein, im ejjab emõn wãwen kije. Nuknuk eo, meñe eaibujuij, wãwen air kije ear jab emõn. Kwonaj kar jolok ke money ko am, im wiaiki meñe wãwen kije ear jab emõn?
2 Keidi men in ibben juõn wãwen kwoj wõnmae einwõt juõn Christian jodikdik. Ilo jinoin, men ko kwoj loi ilo lal in—rej einlok wõt nuknuk eo—emaroñ einwõt aibujuij im emõn. Ñan wanjoñok, ri school ro mõttam remaroñ etal ñan party ko, bõk uno ko rekajur, idak den in kadõk, date bajjek ak ladik im ledik ro rej karõk in kamao bajjek ibben don, im babu ibben don mokta jen air mare. Baj kwe, jet ien, kwoj bo ke ilo kain wãwen mour rot in? Kwoj kijoror wõt ke in edjoñ kain anemkwoj in air? Elañe aet, jab beek ilo mõkaj bwe enana buruõm im kwojjab maroñ erom juõn Ri Christian emõn. Emol, Bible eo ej ba bwe lal in elap an kajur ñan kabo armij—elaptata ñan juõn armij eo ekõnan kabuñburuen Anij.—2 Timote 4:10.
3. (a) Etke ejelok tokjen ñan jibadõk men ko an lal? (b) Ewi wãwen an juõn Ri Christian kamelele kin jerata ko rej waloktok jen ad jibadõk men ko an lal?
3 Kiõ kalimjek mõk, joñan wõt am maroñ kõmmane ñe kwoj etale juõn nuknuk kwoj itoklimo in wiaiki. Kajitõk ibbem make, ‘Ewi joñan emõnin jukjuk im bed in?’ Bible eo ej ba bwe “lõl ejokolok.” (1 Jon 2:17) Jabdewõt mõnõnõ im lañliñ jen e rejjab bed ñan indio. Bareinwõt, mwil eo ejõkkar enaj madmõd jorrãn ko relap. Emol ejelok tokjen. Juõn Ri Christian, eo ear aikwij kijenmij iumin “elõñ eñtan ko rar waloktok jen bwid ko ear kõmmani ke ear jodikdik,” ear ba: “Lal in emaroñ aibujuij iman mejed. Im ekõnan bwe kwon tõmak bwe kwomaroñ bõk mõnõnõ eo an ilo ejelok eñtan. Ak men in ejjab mol. Lal in enaj kajerbal kwe le jen joñan, im ñe ejjab aikwij kwe, enaj jolok yuk.” Etke kwokõnan jerwane ien am jodikdik ilo juõn wãwen ettã im ejelok tokjen?
Kejbãrok Jen “Dri Nana Eo”
4, 5. (a) Mokta wõt jen an kar mij, ta eo Jesus ear jar kake ñan Jehovah? (b) Etke men in ear juõn kajitõk ekkar?
4 Ilo air kile bwe ejelok jabdewõt men emõn ilo jukjuk im bed in, jodikdik ro ibwiljin Ri Kennan ro an Jehovah rej kate ir bwe ren jab jeran lal in. (Jemes 4:4) Kwe kwoj ke juõn ian jodikdik rein retiljek? Elañe aet, kwoj tellokin am bõk nebar. Emol, ejjab bidodo ñan jumae ijjibed ko jen armij ro im jutak einwõt armij ro reinjuõn jen ir, ak ewõr juõn ñan jibañ yuk kõmmane men in.
5 Mokta wõt jen an kar mij, Jesus ear jar ñan Jehovah bwe en “kejbãrok” ri kalor ro an “jen eo enana.” (Jon 17:15) Jesus ear kajitõk kin men in kin juõn un emõn. Ear jelã bwe mour ilo tiljek ejjab juõn men ebidodo ñan kõmmane ibben ri kalor ro an, jekdon ewi joñan dettair. Etke? Juõn un ej, einwõt an kar Jesus kalikar, ri kalor ro an renaj kar wõnmae juõn ri kijirãt ekajur im rejjab maroñ loe—”dri nana eo,” Satan Devil eo. Bible eo ej ba bwe jitõb in enana ej “einwõt juõn laion e rorror, ej etetal wõt im bukot eo ej maroñ in kõñi.”—1 Piter 5:8.
6. Ewi wãwen ad jelã bwe Satan ejjab tiriamokake jodikdik ro?
6 Ilo aolepen bwebwenato eo an armij, Satan ear lo mõnõnõ ilo an kaeñtan armij kin elõñ melejoñ ko relukkun lej. Lemnak kin jorrãn ko relukkun nana Satan ear kõmmani ñan Job im family eo an. (Job 1:13-19; 2:7) Bõlen kwomaroñ kememej kin men ko rar walok jen ien eo kwar lotak tok ñan kiõ im rej kwalok jitõbõn Satan eo elap an lej. Devil eo ej apãde armij kiõ, im ekõnan kañ ir, ejjab tiriamokake jodikdik ro. Ñan wanjoñok, ilo jinoin ebeben eo kein kajuõn C.E., Herod ear karõk bwe en man aolep ladik ro ruo air yiõ ak diklok ilo Bethlehem. (Matu 2:16) Alikar bwe Satan ear kamakit buruen Herod ñan an kõmmane men in—bwe en kokkure ajiri eo enaj kar erom Messiah eo Anij ear kallimur kake im bõktok ekajet eo an Anij ion Satan! (Jenesis 3:15) Alikar, Satan ejjab yokwe jodikdik ro. Mejenkajjik eo an ej ñan kañ elõñ armij joñan wõt an maroñ. Emol men in elaptata kiõ, kinke emwij an jollaltak Satan jen lañ ñan lal in, im “elap an illu, bwe jirik wõt ien iben.”—Reveles̃õn 12:9, 12.
7. (a) Ewi wãwen an Jehovah einjuõn jen Satan? (b) Ewi lemnak eo an Jehovah kin am lo mõnõnõ ilo mour eo am?
7 Ilo oktan Satan, eo elap an “illu,” Jehovah “elap tiriamo” ibben. (Luk 1:78) Ej wanjoñok eo emõntata kin yokwe. Emol bwe, joñan an lap an Ri Kõmanman eo ad kwalok kadkad in elaptata bwe Bible ej ba: “Anij yokwe.” (1 Jon 4:8) Elap an oktak kõtan anij in jukjuk im bed in im Anij eo kwomaroñ kabuñ ñan e! Meñe Satan ej bukõt armij ñan kañi, Jehovah ejjab “kõnan bwe jabrewõt en joko.” (2 Piter 3:9) Ej kaorõk armij otemjej—ekoba kwe. Ñe Jehovah ilo Nan eo an ej rejañ yuk bwe kwon jab mõttan lal, ej kõnan kabõjrak yuk jen am lo mõnõnõ ilo mour eo am ak debij anemkwoj eo am. (Jon 15:19) Jen an eindein, ej lale yuk kinke ri nana eo ej bed. Jemem ilañ ekõnan bwe kwon bõk juõn men emõnlok jen men in kamõnõnõ ko rejakolok an lal in. Kõnan eo an ej bwe kwon bõk “mour eo emol”—Mour indio ilo paradise ion lal. (1 Timote 6:17-19) Jehovah ekõnan bwe kwon lo tõbrak, im ej rejañ yuk bwe kwon jibadõk mejenkajjik in. (1 Timote 2:4) Bareinwõt, Jehovah ej lewõj ñan yuk juõn nan in kir eo ejejuan. Ta in?
“Kamõnõnõik Buruõ”
8, 9. (a) Ta men in lelok eo kwomaroñ lelok ñan Jehovah? (b) Ewi wãwen an Satan kinaak Jehovah, einwõt ear kõmmane ibben Job?
8 Kwonañin ke kar wiaik juõn men in lelok ñan juõn jeram ebak im lo turin mejen ñe ej bõke ej ettõñdikdik im rere kin an bwilõñ im elap an kamolol kake? Bõlen kwar jolok elap ien ñan am lemnak im kalmenlokjen kin kain men in lelok rot eo emõn im ekkar ñan armij eo kwonaj kar wiaiki ñan e. Kiõ lemnak kin kajitõk in: Kain men in lelok rot eo kwomaroñ lelok ñan Ri Kõmanman eo am, Jehovah Anij? Ilo jinoin, jemaroñ watõk kajitõk in einwõt juõn kajitõk ebwebwe. Ta eo Iroij eo eutiejtata ej aikwiji jen juõn armij bajjek? Ta eo kwomaroñ lelok ñan e im ejañin wõr ibben? Bible eo ej uak ilo Jabõn Kennan Ko 27:11: “Nejiõ, kwon meletlet, im kamõnõnõik buruõ, bwe in uak ñõn eo ej kinak iõ.”
9 Einwõt emwij am jelã kadede jen katak ko am ilo Bible eo, Satan Devil eo ej kinaak Jehovah. Ej ba bwe jabdewõt eo ej karejar ñan Anij ej kõmman eindein, jab kin an yokwe e, ak kin un ko rekibbon. Elañe rej bed ilo eñtan, Satan ej ba, im ilo mõkaj renaj ilok jen kabuñ eo emol. Ñan wanjoñok, lemnak kin ta eo Satan ear ba ñan Jehovah ikijen Job leo ewãnik: “Kwar jab likit juõn worwor in kabol e, im mweo imõn, im men ko otemjej iben, ijoko otemjej ke? Kwar kejerammõn jerbal ko an pein, im e lõñlok men ko an ilo eneo. A Kwon kõtellok peiõm kiõ, im uñire men otemjej an, inem e naj karmijete Yuk iman mejõm.”—Job 1:10, 11.
10. (a) Ewi wãwen ad jelã bwe Satan ear kajitõk ilo bere kin tiljek eo an elõñlok jen Job wõt? (b) Ewi wãwen an wõr kunam ilo aitwerõk in kin wõn eo Ekajur Bõtata ilañ im ion lal?
10 Einwõt emwij an bwebwenato eo ilo Bible eo kwalok, Satan ear kajitõk ilo bere jab kin tiljek eo an Job wõt ak bareinwõt kin tiljek eo an aolep ro jet rej karejar ñan Anij—ekoba kwe. Emol, ikijen armij ro an lal, Satan ear ba: “Men otemjej iben juõn armij [ejjab Job wõt ak armij otemjej] e naj lelok kin an mour.” (Job 2:4) Kwoj lo ke kunam ilo kajitõk in? Einwõt an kar Jabõn Kennan Ko 27:11 kalikar kake, Jehovah ej ba bwe ewõr juõn men kwomaroñ lelok ñan e—juõn bedbed eo ñan an uake ri kinaak eo, Satan. Lemnak mõk—Iroij Bõtata eo ilañ im ion lal ej kir yuk ñan bõk kunam ilo kajitõk in elaptata jen ien jinoin ñan kiõ. Ej juõn eddo im jerammõn elap ibbem! Kwomaroñ ke kajejjet kitien men eo Jehovah ej kajitõkin yuk kake? Job ear. (Job 2:9, 10) Jesus im elõñ ro jet rar kõmman eindein ilo aolepen bwebwenato eo an lal, ekoba jodikdik ro. (Dri Pilippai 2:8; Reveles̃õn 6:9) Kwomaroñ kõmman eindein. Bõtab, kwon jab bwid kake men in, ejelok juõn bebe iolaplap kin men in. Ekkar ñan kõmman ko am, kwonaj kwalok bwe kwoj rejetak nan in kinaak eo an Satan ak uak eo an Jehovah. Ta eo kwonaj kãlet in rejetake?
Jehovah Ej Yokwe Yuk!
11, 12. Ej ke juõn men elap an jelet Jehovah elañe kwoj karejar ñan e ak jab? Kamelele.
11 Ej juõn men eaorõk ke ibben Jehovah kin wõn eo kwoj kãlete? Ejjab bwe ke joñan armij ro rar tiljek ñan e ñan kwalok juõn uak ealikar ñan Satan? Emol, Devil eo ear ba bwe ejelok juõn ej karejar ñan Jehovah ilo yokwe, juõn nan emwij an kamol bwe ear jab mol. Meñe eindein, Jehovah ekõnan bwe kwon rejetak e kinke ej yokwe yuk einwõt juõn armij. Jesus ear ba: “Ein drein Jememiuij ej ber i lõñ E jab kõnan bwe juõn ian rein redrik en joko.”—Matu 18:14.
12 Alikar, Jehovah ej itoklimo kin ta ial eo kwoj kãlete. Elaplok jen men in, jokãlet eo am ej jelet e. Bible eo ej kalikar bwe kõmman ko remõn ak nana an armij rej jelet eñjake ko remũlal an Jehovah. Ñan wanjoñok, ke Ri Israel ro rar jumae elõñ alen, rar “kaburomõj” Jehovah. (Sam 78:40, 41) Mokta jen Ien Ibwijleplep eo ilo ran eo an Noah, ke “elap nana ko an armij ion lõl,” Jehovah ear “buromõj buruen.” (Jenesis 6:5, 6) Kwon lemnak kin ta melelen men in. Elañe kwoj kãlet juõn ial enana, kwonaj kaburomõj Ri Kõmanman eo am. Ejjab melelen bwe Anij ej mõjno ak eñjake eo an ej iroij ion. Jen men in, ej yokwe yuk im kaorõk wãwen mour eo am. Iturãjet, ñe kwoj kõmman men eo ejimwe, kwoj kamõnõnõik buruen Jehovah. Ejjab baj mõnõnõ wõt kinke emaroñ uak ñan Satan ak bareinwõt kinke emaroñ erom Ri Letok Jinekjej eo am. Im ej juõn men ekõnan kõmmane. (Dri Hibru 11:6) Jehovah Anij ej juõn Jemen elap an yokwe yuk!
Jerammõn ko Relõñ Kiõ
13. Ewi wãwen am karejar ñan Jehovah ej bõktok jerammõn ko kiõ?
13 Jerammõn ko rej itok jen ad Karejar ñan Jehovah jejamin loi ilo ran ko renaj itok wõt. Elõñ jodikdik ro ibwiljin Ri Kennan ro an Jehovah rej lañliñ im juburueir kiõ, im ewõr juõn un emõn kin men in. “Nan ko nan in kaiñi an Jeova re jime im re kalõñliñ burueir,” ri jeje sam ear jei. (Sam 19:8) Elaplok an Jehovah jelã kin ta eo emõn ñan kij, jen armij. Ikijen ri kanan eo Isaiah, Jehovah ear ba: “Ña, Jeova am Anij, Eo eor tokjen An katakin yuk, Eo ej tel yuk ilo ial eo emõn kwon etal ie. O elañe kwar eoroñ kien ko Aõ! inem am ainemõn e naj kar einwõt juõn river, im am wãnik einwõt no ko ilo lometo.”—Aiseia 48:17, 18.
14. Ewi wãwen jerbali bedbed in kien ko an Bible emaroñ kejbãrok yuk jen am eñtan kin elap muri?
14 Bokake bedbedin kien ko an Bible renaj kejbãrok yuk jen elap eñtan im buromõj. Ñan wanjoñok, Bible eo ej ba bwe ro rar arõk money rar “wie ir kin elõñ iñtan ko.” (1 Timote 6:9, 10) Jabdewõt ian ro mõttam emwij ke air lo tokjen arõk money, einwõt ear ba ilo eon eo? Jet maan im kõrã ro emõn dettair elukkun lap muri ko air kinke rej baj lemnak wõt bwe rej aikwij wõr air nuknuk ko rekãl im buñbuñ im kein jerbal ko rekãl tata im elap wõnãir. Kinke kwoj aikwij kõllã kin muri ko relap etto air bed im ejelok am maroñ ñan kõmman men in ej juõn wãwen kamakoko elap an kaeñtan yuk kake!—Jabõn Kennan Ko 22:7.
15. Ilo wãwen et ko bedbed in kien ko an Bible rej kejbãrok yuk jen eñtan eo ej itok jen mour in ejej?
15 Lemnak bareinwõt kin mour in ejej. Ibelakin lal ilo kajjojo yiõ, elõñ ledik ro rejañin mare rej bõroru. Jet iair rej keotak juõn ajiri meñe rejjab kõnan ak ejelok air maroñ ñan lale nejiir. Ibben ro jet rej man lojiir im eñtan kin bebe eo air im kokkure bõklikit eo air. Ak ewõr likao im jiroñ ro me rej bõk nañinmij in likao im jiroñ, einwõt AIDS. Emol bwe, ñan eo ej jelã kin Jehovah im kõmman men kein, men eo enana tata ibben ej ñan kokkure kõtan eo an ibben Jehovah.a (Dri Galetia 5:19-21) Eñin unin, Bible eo ej ba: “Ko jen lũñ.”—1 Dri Korint 6:18.
Karejar ñan juõn “Anij E Mõnõnõ”
16. (a) Ewi wãwen jejelã bwe Jehovah ekõnan bwe kwon lo mõnõnõ ilo mour eo am einwõt juõn jodikdik? (b) Etke Jehovah ej kajutak nan in tel ko bwe kwon lori?
16 Bible eo ej kwalok bwe Jehovah ej juõn “Anij e mõnõnõ.” (1 Timote 1:11) Ekõnan bwe kwe kwon mõnõnõ bareinwõt. Emol, Nan eo an make ej ba: “Kwon mõnõnõ, O likao, ilo ien emõn dettam.” (Ecclesiastes 11:9, Today’s English Version) Ak Jehovah ej lo manlok jen ien eo wõt im emaroñ kile ta tokjen ko etto air bed im rej itok jen mwil ko remõn im nana renaj walok. Eñin unin ej kakabilek yuk: “Kwon bareinwõt kememej Eo Dri Kõmõnmõn yuk ilo ran ko ñe emõn ridtõm, mokta jen an ran ko re nana itok, im yiõ ko rej kebaktok, ñe kwo naj ba, I jab mõnõnõ kake.”—Ekklisiastis 12:1.
17, 18. Ewi wãwen juõn Ri Christian ear lo mõnõnõ ilo an karejar ñan Jehovah, im ewi wãwen am maroñ lo ejja lañliñ in wõt?
17 Rainin, elõñ jodikdik ro rar lo mõnõnõ eo elap ilo air karejar ñan Jehovah. Ñan wanjoñok, Lina juõn ledik eo ej 15-an yiõ ej ba: “I maroñ jutak im jab jok ak lelñoñ kin jabdewõt men. Enbwiniõ ej emõn wõt kinke ijjab kõbatat im bõk uno ko rejõkkar. Congregation eo ear letok nan in tel ko raorõk ñan jibañ iõ bwe in jumae ijjibed ko renana an Satan. Turin meja ej bõplolin kinke elõñ ri kamao ro remõn rej kõketak don rej bed ilo Kingdom Hall eo. Men eo elaptata, ewõr juõn kejatdikdik elap ibba ñan mour indio ion lal.”
18 Einwõt Lina, elõñ Christian jodikdik ro rej bed ilo juõn tarinae elap kin tõmak eo, im men in ej kalañliñ ir. Rej kile bwe mour eo air—meñe eobrak kin abañ ko jet ien—ewõr juõn un im ilju eo emol. Inem, kwon wõnmanlok im karejar ñan Anij eo ej lukkun itoklimo kin wãwen mour eo am. Kwon kamõnõnõik buruen, im enaj kamõnõnõik yuk kiõ im ñan indio!—Sam 5:11.
[Kamelele ko itulal]
a Ej juõn men in kainemõn ñan jelã bwe ñe juõn armij ej ukwelok, bõjrak jen an kõmman nana, im kwalok jerawiwi ko an, Jehovah “e naj kanuij wujlep in jolok bwir ko an.”—Aiseia 55:7.
Kwoj Kememej Ke?
• Ta men in kauwatata eo kwoj wõnmae jen “ri nana eo,” Satan?
• Ewi wãwen am maroñ kamõnõnõik buruen Jehovah?
• Ewi wãwen Bible eo ej kwalok bwe Jehovah ej kaorõk yuk?
• Ta jet ian jerammõn ko rej itok jen ad karejar ñan Jehovah?
[Pija ko ilo peij 9]
Jehovah elap an itoklimo kin kwe, ak mejenkajjik eo an Satan ej ñan kañ yuk
[Pija eo ilo peij 10]
Elõñ jodikdik ro rej lo mõnõnõ eo elaptata ilo air karejar ñan Jehovah ibben Ri Christian ro mõttair