Jeorlok Bwid Jen Buruõm

“Im ein drein Jema i lõñ E naj kõmõnmõn ñõn kom, elañe kom otemjej jab jeorlok nana ko an ro jeõmi im ro jãtõmi jen buruemi.”​—MATU 18:35.

1, 2. (a) Ewi wãwen an juõn kõrã eo elap jelã kake bwe ri jerawiwi kar kwalok an kamolol ñan Jesus? (b) Ta point eo Jesus ear kõmmane ilo an uak?

KÕRÃ eo einwõt kar juõn kõrã ekijoñ, ejjab juõn eo kwo naj kar kõtmene in lo ilo mweo imõn juõn armij in kabuñ. Elañe jet rar ilbõk kin air lo e ijo, men eo ear kõmmane elaplok an kailbõkbõk. Kõrã eo ear kebak leo elap mour in erreo ibben im kwalok an kamolol kin jerbal ko an, kwal neen kin dennin kemjalal in mejen im kõmerãiki kin kolan bõran.

² Lein, Jesus, kõrã in ear jab kajekdone, kõrã in me “rar jelã kake ilo jikin kwelok eo bwe ej juõn ri jerawiwi.” Ak Simon Pharisee eo, me mweo kar imõn, ear lemnak kin lio bwe kar juõn ri jerawiwi. Jesus ear uak ilo an jiroñ kin ruo maan ro rar muri ñan juõn ri kemouri. Juõn ear lap an muri​—enañin tarrin ruo yiõ in kõllã eo an ke ej juõn ri jerbal. Eo juõn ear muri juõn mõttan joñoul in joñan eo​—ediklok jen wõnãn ilo jilu alliñ. Ke ejelok airro ear maroñ kõllã, ri kemouri eo “ear jeorlok airro muri.” Alikar, eo elaplok kar jeorlok an bwid ear laplok unin ñan an uak ilo yokwe. Elikin an karõktok kõmman eo ejoij an kõrã eo, Jesus ear kobaiktok nan in kaiñi eo: “Eo edik an jeorlok, edik an yokwe.” Inem ear jiroñlok kõrã eo: “Jerawiwi ko am emwij jeorilok.”​—Luke 7:36-48, New World Translation.

3. Ta eo jej aikwij lemnak kake kin kij make?

³ Kajitõkin yuk make, ‘I ar lo ke kõrã in ak elañe I ar bed ilo juõn wãwen eo einlok wõt in im kar kwalok tiriamo ñan iõ, in kar lej ke ilo aõ jab kwalok jeorlok bwid ñan ro jet?’ Kwo maroñ uak, ‘I lukkun jamin kar!’ Mekarta, emol ke am tõmak bwe kwoj itok wõt in jeorlok bwid? Eñin bedbed eo kwoj bed ie ke? Ekkã am bojak in kõmman eindein, im ro jet ren kar kwalok ke kake yuk bwe kwoj jeorlok bwid? Jen lale etke kajjojo iad ej aikwij lale menin, etale im lemnak kake.

Aikwij Jeorlok Bwid—im Jaketok ñan kij

4. Jej aikwij kwalok kin mol et eo kin kij make?

⁴ Kwoj jab wãppen, einwõt am lukkun jelã kake. Elañe kar kajitõk, kwo naj kamole, bõlen ilo am kememej nan kein jej loi ilo 1 Jon 1:8: “Elañe jej ba bwe ejelok jerawiwi iber, jej mõke mone kij, im mol e jab ilo kij.” (Dri Rom 3:23; 5:12) Ibben jet, jerawiwi emaroñ kar alikar ikijen jerawiwi ko renana im kamijak. Ak meñe kwoj jab jelã kin kain bwid rot in, emol elõñ ien ko im wãwen ko kwar likjap ie ilo kien ko an Anij​—kwar jerawiwi. Ejjab wãwen dein ke?

5. Ta eo jej aikwij kwalok ad kamolol kake ñan Jehovah?

⁵ Kin menin, wãwen eo kwoj bed ie emaroñ einlok wõt eo ñan wãwen eo ri jilek Paul ej kwalok kake: “Im komeo, dri mij kin jerawiwi ko ami im kin jabmijmij in kõniekemi, Anij ear kemour kom jimor iben [Jesus]. E ar julok bwir ko ar otemjej.” (Colossians 2:13; Ephesians 2:1-3, NW) Lale kajin in “julok bwir ko ar otemjej.” Menin elap ijo ej kitibuji. Kajjojo iad ewõr un eo emõn ibbed ñan ad eowor einwõt kar David: “Kin etõm, O Jeova, kwon jolok aõ bwir bwe elap.”​—Sam 25:11.

6. Ta eo jemaroñ tõmak kake ikijen Jehovah im jeorlok bwid?

⁶ Ewi wãwen am maroñ​—ak jabdewõt iad​—bõk jeorlok bwid? Juõn key ej bwe Jehovah Anij ej itok wõt in jeorlok bwid. Menin ej alikar kin kadkadin. (Exodus 34:6, 7; Sam 86:5) Ilo melele kake, Anij ej kõtmene ad oktaklok ñan e ilo jar im kajitõk an kõtlok kij jen kaje, kajitõk bwe en jolok ad bwid. (2 Kronikel 6:21; Sam 103:3, 10, 14) Im emwij an karõk juõn bedbed in jerbal in kien ñan kaetoklok jolok bwid rot in​—katok in binmour eo an Jesus.​—Rom 3:24; 1 Piter 1:18, 19; 1 Jon 4:9, 14.

7. Ilo wãwen et eo kwoj aikwij kõnan ñan kajeoñe Jehovah?

⁷ Kwoj aikwij lo ilo an Anij mõnõnõ in jolok bwid juõn joñok einwõt ñan wãwen am aikwij kõmman ñan armij ro jet. Paul ej kalikar menin, ilo an jeje: “Im komin joij ñõn don, en emõn buruemi, jolok nana jen dron, einwõt Anij ilo Kraist E ar jolok ami nana.” (Dri Epesõs 4:32) Ejelok bere bwe melele eo an Paul ekoba ad katak jen joñok eo an Anij, bwe eon in tok juõn ej etal wõt: “Inem, komin dri kajeoñwe Anij, einwõt ajiri re jitenburu.” (Dri Epesõs 5:1) Kwoj lo ke kõtan eo ijin? Jehovah Anij ej jolok am bwid, inem​—Paul ej kõmmanwa ilo tu kajur in​—komij aikwij kajeoñwe E im “joij ñõn don, en emõn buruemi, jolok bwid” an ro jet. Ak kajitõkin yuk make, ‘Ij kõmmane ke menin? Elañe ejjab wãwen eo in ibba, ij kate ke iõ ilo ial in, im lukkun kate iõ ñan kajeoñwe Anij ilo jolok bwid?’

Jej Aikwij Kate Kij ilo Jolok Bwid

8. Ta eo jej aikwij kile ikijen ejaakin congregation eo ad?

⁸ Enaj emõn ñan bõk lemnak in bwe ilo congregation eo an Christian, ewõr jejjo ien ko ñe jej aikwij kaminene kin ialin jolok bwid eo an Anij. Elañe ejjab eindein ejamin mol. Emol, Christian maan im kõrã ro jeid im jatid rej kate ir anõk joñok in yokwe eo an Jesus. (Jon 13:35; 15:12, 13; Dri Galetia 6:2) Etto air jerbal, im rej jerbal wõt, ñan air ellok jen wãwen lemnak, konono, im kõmman ko ekkã kõmmani ilo lal in enana. Rej lukkun kamol air kõnan kalikar kadkad in armij eo ekãl. (Dri Kolosse 3:9, 10) Ak, jejjab maroñ kajekdon mol in bwe congregation eo ibelakin lal, im kajjojo congregation ilo juõn bukwon, ej ejaakin armij jab wãppen. Ak jen jabõn ñan jabõn, emol remõnlok jen kar wãwen eo rar bed ie juõn ien mokta, ak rejjab wãppen wõt.

9, 10. Etke jejjab aikwij ilbõk elañe abañ ko rej jarjar ikõtan jimjãn jimjatin ro?

⁹ Ilo Bible, Anij ilo karõk ej jiroñ kij bwe jemaroñ watõk jab wãppen ilo congregation eo, ibwiljin maan im kõrã ro jeid im jatid. Ñan wanjoñok, lemnak kin nan ko an Paul emwij jei ilo Colossians 3:13, NW: “Etal wõt im meanwõd ñan don im jeorlok an don bwid elañe jabdewõt ewõr unin an abõnõnõ nae eo juõn. Im einwõt an Jehovah jeorlok ami bwid, en eindein ami bareinwõt kõmman.”

¹⁰ Eaorõk, bwe ijin Bible ej kakememej kij kin kõtan eo ikõtan an Anij jeorlok ad bwid im eddo eo ad im aikwij eo ñan jeorlok bwid ñan ro jet. Etke menin ej juõn aitwerõk ebin? Kinke Paul ej kamol bwe juõn armij emaroñ wõr “juõn unin an abõnõnõ nae bar eo juõn.” E ar kile bwe un rot in emaroñ walok. Remaroñ kar walok ilo ebeben eo kein kajuõn, meñe ibwiljin Christian “ri kwojarjar ro,” ro ear wõr juõn air ‘kejatdikdik emwij keboj ñan ir ilo lañ ko.’ (Dri Kolosse 1:2, 5) Inem jemaroñ ke kalmenlokjen bwe enaj einjuõn rainin ke elõñ wõt Christian ro remol ejelok menin kamol ibbeir kin jitõb bwe rej “ro Anij e ar kãlet kom, rokwojarjar im jitenburu”? (Dri Kolosse 3:12) Kin menin, jej aikwij jab bõk jemlok in bwe ewõr juõn men eo ebwer elañe ilo congregation eo ad ewõr un ko ñan abõnõnõ​—metak in eñjake ko ion mol eo emol ak bwid ko rej enoiki.

11. Ta eo ri kalor James ear kakkõl kij ñane?

¹¹ Nan ko an James leo jatin Jesus ear bareinwõt kwalok bwe jemaroñ ilo jet ien jelmae wãwen ko rej kir kij ñan jolok bwid an ro jeid im jatid. “Wõn iami e meletlet im jelãlokjen? en kwalok, kin an kõmõn emõn, jerbal ko an ilo inemõn in meletlet. Ak elañe kãtõk emeo im akwail rej ilo buruemi, komin jab kimjãje im riõp nae mol.” (Jemes 3:13, 14) “Kãtõk emeo im akwail” ilo buruen Christian ro remol ke? Aet, nan ko an James rej kwalok ilo alikar bwe men kein rar walok ilo congregation eo ilo ebeben eo kein kajuõn im enaj kõmman eindein rainin.

12. Ta abañ eo ear jarjar ilo congregation eo an ri Pilippai etto?

¹² Juõn wanjoñok eo emol ear jelet ruo Christian ri kabit ro ear emõn etair ilo air kar kate ir make im kobalok ibben Paul. Kwo maroñ kememej konono kin Euodia im Syntyche, ro uan congregation eo an Philippian. Meñe ear jab kwalok ilo tibdikin, Dri Pilippai 4:​2, 3 ej kwalok bwe ear wõr jet abañ ikõtair ñan don. Ear ijjino ke kin juõn lemnak wan, konono ilo jab joij, juõn melele eo ejabwe in juõn nukin, ak jet menin kamol in aitwerõk in ebbanban? Jabdewõt wãwen eo an, ear oktak im lap bwe Paul ear roñ kake jen ijo ettolok ilo Rome. Jabwe konono ikõtan don emaroñ kar ejaak ikõtan ruo kõrã ro jimjãn jimjatin ilo jitõb, im menin ear tellok ñan airro kõtan don ilo kwelok ko ak kwalok nan ko renana kin eo juõn ñan ro jerair.

13. Ta eo ear einwõt jerbal ikõtan Euodia im Syntyche, im ta katak eo ej letok ñan kij?

¹³ Ewõr ke jabdewõt ainikien ilo wãwen in ewõr am jelã kake, einwõt men eo ear walok ikõtan jet ilo congregation eo am ak juõn men eo kwar lorak ie? Juõn abañ eo ilo wãwen in emaroñ meñe kiõ wõr ilo juõn wãwen. Ta eo kwo maroñ kõmmane? Ilo juõn wãwen eo etto, Paul ear rejañ kõrã ro ruo emwij air kar wujleplok “bwe ren lemnak einwõt juõn ilo Iroij.” Remaroñ kar errã ñan konono kin wãwen eo, ñan konono ilo joij ñan bõprae jabwe in melele ak lo mejelan einjuõn ko, ñan kwalok juõn mõnõnõ in jolok bwid, inem lukkun kajeoñwe wãwen an Jehovah jolok bwid. Ejelok unin lemnak ijellokin eo an Euodia im Syntyche eo ear wõr tõbrak ie, im kij bareinwõt jemaroñ lo tõbrak. Juõn lemnak in jolok bwid eo einwõt in emaroñ jerbal rainin im lo tõbrak.

Kõmman Ainemõn​—Jolok Bwid

14. Ta eo ekkã an maroñ im emõntata ñan baj kõtlok an ellã einjuõn ko an armij ñan don?

¹⁴ Ta eo jen lukkun bõke ñan jolok bwid ñe ej wõr juõn am abañ ibben bar juõn Christian? Ilo mol, ejelok juõn kilen en ebidodo, ak Bible ej letok joñok ko rej menin jibañ im kakabilek eo emol. Juõn key ñan kakabilek​—meñe ejjab juõn eo ebidodo ñan bõke im jerbale​—ej ñan baj meloklok wõt wãwen eo, kõtlok bwe en ellã. Ekkã an walok ñe ej wõr juõn abañ, einwõt an kar walok ikõtan Euodia im Syntyche, kajjojo iairro ej eñjake bwe eo juõn eo ebwid ak e eo elap an likjap. Inem ilo juõn wãwen eo einlok wõt in, kwo maroñ lemnak bwe Christian eo juõn en e eo naruõn ak e eo ear kõmmane men eo elap an kõmman jorrãn. Mekarta, kwo maroñ ke baj jolok wõt wãwen eo ikijen jolok bwid? Kwoj aikwij kile bwe elañe, im menin emaroñ juõn men eo elap Christian eo juõn ej e eo elikjap, kwoj bed ilo wãwen eo ñan kõtlok bwe men eo en ellã einwõt jolok bwid im kajemloke.

15, 16. (a) Ewi wãwen an kar Micah kwalok kin Jehovah? (b) An Anij kõtlok an “ellã jerawiwi” ta melelen”?

¹⁵ Jen jab luji ad lo wãwen eo an Anij bwe en einwõt joñok eo ad ilo jolok bwid. (Dri Epesõs 4:32–5:1) Einwõt ñan joñok eo an ilo kõtlok bwid ko bwe ren ellã, ri kanan Micah ear je: “Wõn ej juõn Anij einwõt kwe, juõn eo ej jolok bwid im kõtlok an ellã jerawiwi eo an bwen ri jolet ro an? E ejamin debij wõt an illu ñan indio, bwe e ej mõnõnõ ilo joij im yokwe.”​—Micah 7:18, NW.

¹⁶ Ilo an kwalok Jehovah einwõt juõn eo ej “kõtlok an ellã jerawiwi,” Bible eo ejjab ba bwe ejjab maroñ kememej bwid ko, kin an melokloki. Lemnak kin wãwen ko an kar Samson im David, erro jimor rar kõmman bwid ko relap. Anij ear maroñ kememej jerawiwi ko tokelik elikin juõn ien eo eaetok; meñe kij jejelã kin jerawiwi ko air kinke Jehovah ear likit bwe ren jei ilo Bible eo. Ak, ad jolok bwid Anij ear kwalok ilo tiriamokake eo an ñan rein ruo, likit ir imad einwõt joñok in tõmak ñan ad kajeoñwe.​—Dri Hibru 11:32; 12:1.

17. (a) Ta kilen kebak eo emaroñ jibañ kij ellã ion bwid ko, ak jerawiwi ko an ro jet? (b) Elañe jej kate kij kõmmane menin, ewi wãwen ad naj kajeoñe Jehovah? (Lale footnote eo.)

¹⁷ Aet, Jehovah ear maroñ ‘kõtlok an ellã’a jerawiwi ko, einwõt an kar David elijinmen an kajitõk ibben ñan an kõmmane. (2 Samuel 12:13; 24:10) Jemaroñ ke kajeoñwe Anij ilo menin, ad mõnõnõ in kõtlok an ellã konono nae ko im bwid ko ri karejar ro mõttad rej kõmmani einwõt armij jab wãppen? Kalmenlokjen kin kwe make bwe kwoj bed ion juõn balun kõto im kaiũmlok ion ialin ettõr eo ke kwoj iten kelok. Kwolak reinabõjlok kwoj lo iturin ialin ettõr eo juõn eo kwo jelã kajeoñ im ej kato loon wuj ñan yuk im an kõmman einwõt ajiri. Kwo jelã bwe ear wõr an inebata im emaroñ kar likit yuk ilo lemnak eo an. Ak emaroñ kar jab lemnak kake yuk ñan jidik. Ak, ke balun eo ej rol im leliñlok, kwoj kãloklok ion kõrã eo, eo kiõ ej einwõt juõn men dikdik bajjek wõt. Iumin juõn awa emwij am ellãlok buki mail, im kõmman eo an enana emwij an le ilik im ettolok jen yuk. Ilo wãwen in lok wõt, elõñ alen ej jibañ kij meloklok elañe jej kajeoñ bwe jen einwõt Jehovah im ilo meletlet ellãlok ion bwid eo. (Jabõn Kennan Ko 19:11) Konono nae eo ejelok tokjen joñoul yiõ ko jen kiõ ak rubuki yiõ ko ren etal wõt ke ñan loan buki thousand yiõ ko? Etke kwoj jab baj kajettokjen bwid eo?

18. Elañe jej einwõt jab maroñ likit juõn jerawiwi ilikid, ta kakabilek eo jemaroñ jerbale?

¹⁸ Ak, ilo juõn ien eo ejeja, kwo maroñ kar jar kin wãwen eo im kajeoñ jolok bwid, ak kwoj eñjake bwe kwoj jab maroñ. Inem ta? Jesus ear rejañ ñan jibadõklok eo juõn im kajeoñ lo mejelan einjuõn eo ilo amiro makelok iamiro ñan tõbar ainemõn. “Inem elañe kwoj katok kin am jurtak i lokatok, im ijo kwoj kememej bwe eor am nana ñõn jeõm im jatõm, kwon likit am jurtak na iman lokatok eo, im ilok; kwon kainemõn jeõm im jatõm mokta, inem katok.”​—Matu 5:23, 24.

19. Ta lemnak eo ej aikwij wõr ibbed im ta lemnak eo jej aikwij bõpraiki ke jej jibadõk ainemõn ibben ro jeid im jatid?

¹⁹ Elap tokjen, bwe Jesus ear jab ba ilok ñan ibben jeim im jatim im kamol ñane bwe kwe eo kwo jimwe im e eo ebwid. Bõlen e eo ear bwid. Ak bõlen ear wõr likjap ibbemiro jimor. Ilo jabdewõt wãwen, mejenkajjik eo ej aikwij jab lelok ñan eo juõn bwe ejimwe, ñan riap, einwõt ilo nan in kõkkar. Elañe wãwen eo in kwoj bõke ilo konono eo, likjap enaj einwõt mol an walok. Bareinwõt mejenkajjik eo ejjab aikwij ñan etale tibdik in men eo emol ak bwid eo ewõr kalmenlokjen kake. Ñe ewõr konono ilo inemõn ilo jitõbõn yokwe eo an Christian eo ej kalikar juõn jamelele eo ekaburomõjmõj ilo tuiolaplapin abañ eo, komro jimor maroñ kajeoñ karreoiki wãwen eo. Ak elañe konono eo ejjab tellok ñan errã eo ededelok, menin ej aolep ien menin aikwij ke? Ejamin kar emõnlok ke elañe kwe kwar errã bwe komro jimor ilo ettã komro ej kõnan karejar ñan Anij eo ad ej jolok bwid? Ñe kwoj jelmae mol in, emaroñ bidodolok ñan an kajjojo iamiro ba jen buru, “Iburomõj bwe ilo jab wãppen eo ad ear bed ibbed einjuõn in. Ilo joij, jen kijone im ellãlok jene.”

20. Ta eo jemaroñ katak kake jen joñok eo an ri jilek ro?

²⁰ Kememej bwe ri jilek ro ear wõr einjuõn ko air jen don, einwõt ñe jet iair rar kõnan bwe en laplok air bõk nebar. (Mark 10:35-39; Luk 9:46; 22:24-26) Menin ear kõmman an wõr bwoktak, bõlen eñjake ko rekõmmetak, ak meñe bwid eo emũlal. Ak rar maroñ ellãlok ion einjuõn kein im etal wõt im jerbal ibben don. Tokelik juõn iair ear je: “Bwe, Eo e kõnan yokwe mour, im lo ran ko remõn, en drebij loin jen nana, im tien bwe ren jab konono etao, im en illok jen nana im en kõmõn emõn; en kabukot ainemõn im lor e.”​—1 Piter 3:10, 11.

21. Jesus ear letok kakabilek et eo emũlal kin jeorlok bwid?

²¹ Moktalok jar lo juõn eon kin juõn wãwen: Anij ej jeorlok jerawiwi ko jar kõmmani ilo ien ko remotlok, inem jej aikwij kajeoñe e im jolok an ro jeid im jatid bwid. (Sam 103:12; Aiseia 43:25) Ak ebar wõr juõn eon ñan wãwen in. Elikin an kwalok joñok in jar eo, Jesus ear ba: “Bwe elañe komij jeorlok bwir ko an armij, bareinwõt Jememiuij ilõñ E naj jeorlok bwir ko ami.” Iumin juõn yiõ tokelik, ear eliji bedbed eo, katakin ri kalor ro an ñan jar: “Im jolok amuij muri ibõm einwõt kim ar jolok an armij muri ibem.” (Matu 6:12, 14; Luk 11:4) Inem, jejjo wõt ran mokta jen an mij, Jesus ear kobaiktok: “Im ñe komij jutõk im jar, elañe jabrewõt armij eor ruõn ibemi, komin jeorlok e, bwe bareinwõt Jememi i lõñ En jeorlok jerawiwi ko ami.”​—Mark 11:25.

22, 23. Ewi wãwen mõnõnõ eo ad ñan jeorlok bwid maroñ jelet ilju eo ad?

²² Aet, jerammõn ko ad ñan ad wõnmanlok wõt im bõk an Anij jeorlok ad bwid rej ñan juõn joñan eo elap rej wawa ion, ion ad kõnan jeorlok an ro jeid im jatid bwid. Ñe juõn abañ an juõn armij ej walok ikõtan Christian ro, kajitõkin yuk make, ‘Bõk an Anij jeorlok bwid ejjab laplok an aorõk jen aõ kamol bwe juõn jeiõ im jatiõ maan ak kõrã ear bwid kin juõn men eo edik, ak jerawiwi eo edik, ak juõn men eo ej jelet jab wãppen eo an armij ke?’ Kwo jelã uak eo.

²³ Ak, ta, ñe wãwen eo elaplok jen juõn bwid edik ak abañ an juõn armij? Im ñããt eo nan in kakabilek eo Jesus emwij je ilo Matu 18:15-18 ej jerbal? Jen etale wãwen kein tok ilokan.

[Kamelele eo itulal]

Kwoj Kememej Ke?

◻ Ewi wãwen an Jehovah letok ñan kij juõn joñok ñan anõke ikijen jeorlok bwid?

◻ Ta eo jej aikwij kememej kin ro ilo congregation eo?

◻ Ilo elõñ wõt wãwen ko, ta eo jej aikwij maroñ kõmmane kin konono nae ko ak jerawiwi ko?

◻ Elañe ej menin aikwij, ta eo jemaroñ kõmmane kin ainemõn ibben ro jeid im jatid?

[Pija eo ilo peij 11]

Ñe juõn einjuõn eo ibben juõn Christian ej walok, kajeoñ kõtlok bwe en ellã; kin ien im wãwen eo enaj etal im ejelok tokjen