Wãween bwe Kwõn M̦õn̦õn̦õ in Kate Eok Jerbal

KATE EOK BWE EN EM̦M̦AN WÃWEEN AM̦ L̦ÕMN̦AK KÕN JERBAL

Ewõr kain jerbal me rej kitibuj ad kõjerbal bõrad, im ebar wõr kain jerbal me jej kõjerbal ãnbwinnid, im jerbal ko me rekitibuj ad kõjerbal bõrad im ãnbwinnid jim̦or. Jekdo̦o̦n jerbal rot eo kwõj kõm̦m̦ane, ak Baibõl̦ ej ba bwe “ewõr tokjãn jabdewõt jerbal.” (Jabõn Kõnnaan 14:23) Ta tokjãn ko? Juon iaan tokjãn kein ej bwe ilo ad kate kõj jerbal, jemaroñ kabwe aikuj ko ad. Anij ej kallim̦ur bwe enaaj jipañ kabwe aikuj ko an ro rej m̦ool ilo aer karejar ñane. (Matu 6:31, 32) Bõtab, ej bar kõtmãne bwe jen kõm̦m̦ane ijo kun̦aad ilo ad niknik im kate kõj jerbal bwe jen maroñ mour.​—2 Tessalonika 3:10.

Kõn men in, jej aikuj keememej bwe ewõr unin ad jerbal. Jel̦ak jerbal, jemaroñ kajejjet eddo ko ad. Juon likao etan Joshua me 25 an iiõ ej ba: “Ej juon tõprak el̦ap ñe jejel̦ã make kabwe aikuj ko ad. Ñe ewõr am̦ maroñ ñan kõl̦l̦ãik on̦ãn men ko kwõj aikuji, mel̦el̦ein bwe ewõr tokjãn am̦ jerbal.”

Ilo ad kate kõj jerbal, men in ej jipañ kõj ñan kile bwe ewõr tokjãd. Jerbal ejjab juon men epidodo. Bõtab, ñe jej kammineneik kõj make bwe jen niknik ilo jerbal meñe epen jerbal eo ad ak ejjab limo ippãd, men in enaaj kõm̦m̦an bwe jen m̦õn̦õn̦õ kõnke jejel̦ã bwe jemaroñ katõprak jerbal ko jej kõm̦m̦ani. Jenaaj kile ad jel̦ã irooj ioon kõn̦aan eo ñan kõmatte ak ko jãn jerbal ko ad. (Jabõn Kõnnaan 26:14, UBS) Im men in enaaj kõm̦m̦an ad m̦õn̦õn̦õ. Likao eo etan Aron, me katak eo m̦oktal̦o̦k ear kwal̦o̦k kake, ej ba: “Elukkuun em̦m̦an eñjake eo ij bõke ilo raan ko me ij kate eõ jerbal. Im̦õk, im ro jet remaroñ kar jab lo men ko iar kõm̦m̦ani, ak ijel̦ã bwe el̦ap tõprak ko iar kõm̦m̦ani.”

KATE EOK BWE KWÕN JEL̦ÃL̦O̦K KILEN KÕM̦M̦ANI JERBAL KO AM̦

Baibõl̦ ej nõbar em̦m̦aan ro me ‘rekapeel ilo aer jerbal’ im kõrã ro me rej ‘m̦õn̦õn̦õ in jerbal kõn pã ko peier.’ (Jabõn Kõnnaan 22:29, UBS; 31:13) Juon armej ejjab maroñ kajju jel̦ã kilen jerbal. Im jet wõt iaad jem̦õn̦õn̦õ in kõm̦m̦ani men ko me jejjab lukkuun jel̦ã kilen kõm̦m̦ani. Bõlen unin an elõñ armej jab m̦õn̦õn̦õ kõn jerbal ko aer ej kõnke rejjab kate er bwe ren jel̦ãl̦o̦k kilen kõm̦m̦ani.

Ilo m̦ool, juon armej emaroñ katak bwe en m̦õn̦õn̦õ kõn jabdewõt kain jerbal ko ej kõm̦m̦ani ñe ej kate bwe en jel̦ã kilen kõm̦m̦ani. Juon likao 24 an iiõ etan William ej ba: “Ñe kwõj kate eok kõm̦m̦ane juon jerbal im kwõj lo tokjãn ko rej wal̦o̦k, ekõm̦m̦an bwe kwõn m̦õn̦õn̦õ im em̦m̦an am̦ mour. Kwõban bõk kain eñjake rot in ñe kwõj kõmatte ak ñe ejjab tiljek am̦ kõm̦m̦ani jerbal ko am̦ kõn am̦ ekkaiuriur.”

L̦ÕMN̦AK KÕN TOKJÃN KO RO JET REJ BŨKI JÃN AM̦ JERBAL

Kõjparok eok jãn am̦ l̦õmn̦ak wõt kõn joñan on̦ãm̦. Kwõj aikuj kajjitõk ippam̦ make im ba: ‘Etke eaorõk jerbal in aõ? Ta ko ren kar wal̦o̦k ñe en kar jab tõprak ak jim̦we aõ kõm̦m̦ane jerbal in? Ewi wãween an ro jet bõk tokjãn jãn jerbal in aõ?’

Em̦m̦an kajjitõk kein, ak el̦aptata an em̦m̦an ñan l̦õmn̦ak kõn kajjitõk eo ãliktata. Men eo el̦aptata an kõm̦m̦an bwe jen m̦õn̦õn̦õ in jerbal ej ñe jej loe an ro jet bõk tokjãn. Jijej make ear ba: “M̦õn̦õn̦õ in lel̦o̦k el̦ap jãn bõk.” (Jerbal 20:35) Ro jej jerbal ippãer im kajtõm̦ar ro ad rej bõk tokjãn jãn ad jerbal. Bõtab, ejjab rein wõt rej bõk tokjãn. Ro uwaan baam̦le ko ad im ro rej pãd ilo aikuj rej bar bõk tokjãn.

Ro uwaan baam̦le eo. Ñe em̦m̦aan eo ilo juon baam̦le ej kate jerbal bwe en kabwe aikuj ko an baam̦le eo an, ewõr ruo tokjãn ko rej wal̦o̦k. M̦oktata, ilo an jerbal emaroñ kabwe aikuj ko aer ãinwõt m̦õñã, nuknuk, im jikin jokwe. Im ilo an kõm̦m̦ane men in, ej kajejjet eddo eo an jãn Anij ñan “kabwe aikuj ko an” baam̦le eo an. (1 Timote 5:8) Kien karuo, ilo an kate jerbal, ej kwal̦o̦k juon joñak em̦m̦an ñan ro jet bwe ren kile joñan aorõkin jerbal. Shane, eo me katak eo m̦oktal̦o̦k ear kwal̦o̦k kake, ej ba: “Elukkuun em̦m̦an joñak eo an jema kõnke ej juon eo eniknik ilo jerbal. Ej juon em̦m̦aan etiljek im m̦ool an jerbal im jãn ke ear dik in an kate jerbal, el̦aptata ilo jerbalin kaam̦tõ. Ij katak jãn joñak in an bwe elukkuun aorõk jerbal kõn peid ak kõm̦m̦ani men ko me ro jet remaroñ kõjerbali im bõk tokjãn jãni.”

Ro rej pãd ilo aikuj. Rijjilõk Paul ear rõjañ Kũrjin ro bwe ren ‘jerbal bwe en wõr ippãer in lel̦o̦k ñan eo ej aikuj.’ (Epesõs 4:28) El̦aññe jej kate kõj jerbal bwe jen maroñ kabwe aikuj ko ad im baam̦le eo ad, men in ej kõm̦m̦an bwe en bar wõr ad maroñ ñan jipañ ro rej pãd ilo aikuj. (Jabõn Kõnnaan 3:27) Kõn men in, ñe jej kate kõj jerbal, enaaj l̦ap ad m̦õn̦õn̦õ kõn ad jipañ ro jet.

KATE EOK BWE EN EM̦M̦ANL̦O̦K IM M̦ÕKAJL̦O̦K WÕT AM̦ JERBAL

Ke Jijej ear kwal̦o̦k Katak eo an ioon Tol̦ eo, ear ba: “Jabdewõt eo enaaj kõm̦akokoik eok, bwe kwõn ilo̦k ippãnl̦o̦k ilo juon m̦ail̦, en ruo alen am̦ ilo̦k ippãnl̦o̦k.” (Matu 5:41) Ewi wãween am̦ l̦oore naan kein ñe kwõj jerbal? Ñe kwõj jerbal, pukot men ko kwõmaroñ kõm̦m̦ani bwe en l̦apl̦o̦k tõprak ko kwõj kõm̦m̦ani, ijello̦kun am̦ kõmatte ak jab kate eok bwe en dedel̦o̦k jerbal ko am̦. Kõm̦m̦an am̦ mejãnkajjik bwe en em̦m̦anl̦o̦k im m̦õkajl̦o̦k am̦ kõm̦m̦ani jerbal ko am̦ jãn joñan eo rej kõtmãne kake. Bareinwõt kwõn kate eok bwe en bar tiljek am̦ kõm̦m̦ani jerbal dikdik ko kwõj kõm̦m̦ani. Men in enaaj kõm̦m̦an bwe kwõn m̦õn̦õn̦õ kõn jerbal ko am̦.

Ñe kwõj kate eok bwe en em̦m̦anl̦o̦k im m̦õkajl̦o̦k wõt am̦ jerbal jãn joñan eo rej kõtmãne kake, men in emaroñ kõm̦m̦an bwe kwõn m̦õn̦õn̦õ in jerbal. Etke? Kõnke am̦ kõm̦m̦ane men in ej kaalikkar am̦ jel̦ã make kõm̦m̦ani jerbal ko am̦. Kwõj kate eok bwe en em̦m̦an im m̦õkaj am̦ jerbal kõnke kokõn̦aan, ejjab kõnke ro jet rej iuun eok. (Pailimõn 14, UBS) Men in ej kakeememej kõj kõn naanin kakapilõk eo ilo bokin Jabõn Kõnnaan 12:24 (UBS) me ej ba: “Am̦ niknik ilo jerbal ej lewaj ñan eok kajoor; ak am̦ jowan enaaj kõm̦m̦an bwe kwõn juon rũkõm̦akoko.” Ealikkar bwe jet iaad jej kõm̦m̦ani jerbal ko rekam̦m̦õkm̦õk im pen. Bõtab, ñe juon armej ej kõmatte im jab kate kõn jerbal ko an, enaaj jino l̦õmn̦ak bwe ej ãinwõt juon rũkõm̦akoko kõn an ro jet aolep iien kwal̦o̦k ta ko en kõm̦m̦ani. Ak ñe ej kate e bwe en em̦m̦an im m̦õkaj an jerbal jãn joñan eo rej kõtmãne kake kõnke ekõn̦aan, eban kile bwe ej juon rũkõm̦akoko kõnke ro jet rejjab kwal̦o̦k ta ko en kõm̦m̦ani.

KWÕJ AIKUJ JEL̦Ã PEL̦AN

Elukkuun em̦m̦an ñe jej kate kõj jerbal. Bõtab, jej aikuj keememej bwe ebar wõr men ko raorõk jej aikuj kõm̦m̦ani. M̦ool bwe Baibõl̦ ej rõjañ kõj bwe jen owan. (Jabõn Kõnnaan 13:4, UBS) Bõtab, ejjab rõjañ kõj bwe en l̦e jãn joñan ad jerbal. Bokin Ekklisiastis 4:6 (UBS) ej ba: “Armej eo eaenõm̦m̦an im m̦õn̦õn̦õ meñe ejeram̦õl, ejeraam̦m̦anl̦o̦k jãn armej eo epoub kõn an lukwarkware kõto in.” Ta eo jemaroñ katak jãn eoon in? Jej katak bwe juon eo el̦e jãn joñan an jerbal eban lo m̦õn̦õn̦õ kõn men ko ej kõm̦m̦ani ñe el̦ap an jol̦o̦k aolep iien im maroñ ko an ilo jerbal eo an. Men in ej kõm̦m̦ane ejjel̦o̦k tokjãn kõnke ej ãinwõt ñe ej “lukwarkware kõto in.”

Baibõl̦ emaroñ jipañ eok bwe kwõn jel̦ã pel̦an ñe ej itok ñan jerbal. Meñe ej rõjañ kõj bwe jen kate kõj ilo jerbal, ak ej bar rõjañ kõj bwe jen “kããlõt men ko rem̦m̦antata” ak raorõkl̦o̦k im̦aan mejãn Anij. (Pilippai 1:10, UBS) Ta jet iaan men kein raorõkl̦o̦k? Men kein rej kitibuj iien ko jej julo̦k ippãn baam̦le eo ad im ro m̦õttad. Juon men el̦apl̦o̦k an aorõk ej ilo ad kõm̦m̦ani men ko me rej kõm̦m̦an ad epaake Anij, ãinwõt riit Baibõl̦ im kõl̦mãnl̦o̦kjen̦ kõn men ko jej riiti.

Ro rejel̦ã pel̦ane men ko rej kõm̦m̦ani ilo mour ko aer ekkã aer lo lañlõñ ilo aer kõm̦m̦ani jerbal ko aer. William, eo jaar kwal̦o̦k kake m̦oktal̦o̦k ej ba: “Juon iaan bo̦o̦j ro aõ kar m̦okta ear juon eo me ejel̦ã pel̦ane an jerbal. El̦ap an kate jerbal, im em̦m̦an jem̦jerã eo an ippãn ro ej jerbal ñan er kõn an em̦m̦an an jerbal. Kajjojo raan ñe ej m̦õj jerbal, ejel̦ã ke en ro̦o̦l im jab jerbal wõt, kõnke en maroñ pãd ippãn baam̦le eo an im kõm̦m̦ani m̦akũtkũt ko an ilo kabuñ eo an. Im kwõn ba ta? Em̦m̦aan in ej juon iaan armej ro ijel̦ã kajjier me el̦aptata aer m̦õn̦õn̦õ!”