L̦õmn̦ak Wõt Kõn Men eo Eaorõktata

1, 2. (1) Ta men eo eaorõktata me ejelõt aolep armej? (2) Ewi joñan an aorõk bwe jen kwal̦o̦k ad kam̦m̦oolol kõn men in?

IPPÃN elõñ armej, men eo el̦ap an aorõk ej jããn. Eñin men eo el̦ap aer l̦õmn̦ak im inepata kake. Rej jol̦o̦k el̦ap aer iien im pukot kilen bwe en l̦ap aer jããn im bwe ren m̦weiie, im bwe ren jab luuji aolep jããn im men ko m̦weieer. Bareinwõt, ro jet rej watõk bwe men ko el̦ap aer aorõk ippãer ej baam̦le ko aer, ãjmour ko aer, ak men ko rekõn̦aan bwe ren tõprak ilo mour ko aer.

² Bõtab, men eo eaorõktata ippãd ej irooj bõtata eo an Jeova im bwe ej tõllo̦kũn an irooj. Jej aikuj kõjparok bwe en jab jako ad l̦õmn̦ak kõn men in elukkuun aorõk. Ewi wãween an men in maroñ wal̦o̦k? Eokwe, emaroñ l̦ap wõt ad l̦õmn̦ak kõn men ko jej kõm̦m̦ani jãn raan ñan raan, ak bõlen el̦apl̦o̦k wõt ad l̦õmn̦ak kõn apañ ko jej iiooni, innem jemaroñ jino mel̦o̦kl̦o̦k kõn ewi joñan an aorõk irooj bõtata eo an Jeova. Bõtab, el̦aññe el̦apl̦o̦k ad kwal̦o̦k kam̦m̦oolol kõn irooj bõtata eo an Jeova, men in enaaj jipañ kõj bwe jen jel̦ã kõm̦adm̦õdi apañ ko, im wãween ko reppen jej iiooni ilo mour ko ad kajjojo raan. Bareinwõt enaaj kõm̦m̦an bwe jen epaakel̦o̦k wõt Jeova.

ETKE ELUKKUUN AORÕK?

3. Ta ko Setan ear ba kõn wãween an Jeova irooj im tõl?

³ Setan Tepil̦ eo ear bõkm̦aantak aitwerõk eo kõn jim̦we im maroñ eo an Jeova ñan irooj bõtata. Ear jum̦ae im ba bwe enana wãween an Anij irooj im tõl, im bwe Jeova ej dãpij men ko rem̦m̦an jãn aolep armej. Ear bareinwõt ba bwe enaaj kar em̦m̦anl̦o̦k ñe armej ro renaaj tõl er make im enaaj l̦apl̦o̦k aer m̦õn̦õn̦õ. (Jen. 3:1-5, UBS) Setan ear bareinwõt kaalikkar bwe ejjel̦o̦k juon armej emaroñ dãpij an tiljek ñan Anij, im ñe elõñ apañ im wãween ko reppen rej wal̦o̦k, armej ro renaaj el̦l̦o̦k jãn Jeova im kõjekdo̦o̦ne an tõl. (Job 2:4, 5, UBS) Kõn an kar Setan bõkm̦aantak aitwerõk in, Jeova ej kõtl̦o̦k jidik iien bwe aolep armej ren kile bwe rejjab maroñ make tõl er, im bwe rej aikuji tõl eo an.

4. Etke aolep rej aikuj lukkuun jel̦ã wõn eo ejim̦we ñan an tõl?

⁴ Alikkar bwe Jeova ejel̦ã bwe naanin jum̦ae ko an Setan reriab. Innem etke Anij ej kõtl̦o̦k bwe aitwerõk in en wõnm̦aanl̦o̦k wõt im bwe Setan en kajjioñ kam̦ool naan kein an? Uwaak eo ejelõt aolep ro ilañ ekoba ro ijin ioon lal̦. (Riit Sam 83:18.) Armej ro jinointata rar kõjekdo̦o̦n wãween an Jeova tõl im jãn kar iien in elõñ ro rar bar kõjekdo̦o̦ne. Men in emaroñ kar kõm̦m̦an bwe jet ren l̦õmn̦ak bwe em̦ool men ko Setan ear ba. Toon wõt an armej ro im enjel̦ ro jab lukkuun jel̦ã wõn eo ejim̦we ñan an tõl, eban wõr aenõm̦m̦an im bõrokuk. Bõtab, ãlikin wõt an naaj alikkar bwe Jeova ej tõllo̦kũn an irooj im tõl, aolep armej renaaj kõttãik er ñan tõl eo an ñan indeeo im enaaj wõr aenõm̦m̦an ilo aolepen lal̦ in.​—Ep. 1:9, 10, UBS.

5. Ta eo jej aikuj kõm̦m̦ane ñan rejetak Jeova im kwal̦o̦k bwe ej tõllo̦kũn an irooj im tõl?

⁵ Jeova enaaj kaalikkar bwe ej tõllo̦kũn an irooj im enaaj jol̦o̦k Setan im armej ro jãn aer tõl. Men in ej kaalikkar bwe elikjab im ejjab em̦m̦an wãween an Setan im armej ro tõl. Ikijjeen Aelõñ eo an Jeova me em̦õj an kããlõt bwe Jijej en kiiñ, enaaj lukkuun em̦m̦an wãween an Jeova tõl. Im ro rej kwal̦o̦k aer tiljek rej kam̦ool bwe armej ro remaroñ tiljek wõt ñan Jeova im rejetake wãween an irooj im tõl. (Ais. 45:23, 24, UBS) Kokõn̦aan ke pãd ibwiljin rein me rej wõnm̦aanl̦o̦k wõt im kwal̦o̦k bwe rej rejetake irooj bõtata eo an Jeova? Ejjel̦o̦k pere bwe kokõn̦aan. Innem bwe jen tiljek wõt, jej aikuj jel̦ã im mel̦el̦e kõn ewi joñan an men in lukkuun aorõk.

AN ALIKKAR BWE EJIMWE WÃWEEN AN JEOVA IROOJ EAORÕKL̦O̦K JÃN AD BÕK LO̦MO̦O̦R

6. Ewi joñan an aorõk irooj bõtata eo an Jeova im bwe ej tõllo̦kũn an irooj im tõl?

⁶ Ãinwõt kar kwal̦o̦k kake m̦oktal̦o̦k, irooj bõtata eo an Jeova im bwe ej tõllo̦kũn an irooj im tõl, ej men eo eaorõktata ñan aolep armej. El̦apl̦o̦k an aorõk men in jãn ad lo m̦õn̦õn̦õ ilo mour ko ad. Bõtab, men in ej ke kaalikkar bwe Jeova ejjab kõn̦aan bwe jen bõk lo̦mo̦o̦r im ejjab kea im kaorõk kõj? Ejjab ñan jidik. Etke jejel̦ã men in?

7, 8. Etke irooj bõtata eo an Jeova im bwe ej tõllo̦kũn an irooj, ej kitibuj an kajejjet kallim̦ur ko an?

⁷ El̦ap an Jeova yokwe im kaorõk aolep armej. Ilo m̦ool, joñan ad aorõk ippãn ear letok Nejin eo ej make wõt bwe jen maroñ mour ñan indeeo. (Jon 3:16; 1 Jon 4:9, UBS) El̦aññe Jeova ear jab kajejjet kallim̦ur ko an, en kar wõr an Setan kein jekpen ñan ba bwe Anij eriab, im ej dãpij men ko rem̦m̦an jãn armej, im ejjab jim̦we wãween an irooj im tõl. Men in en kar bar kõm̦m̦an bwe en m̦ool naan ko an rijum̦ae ro me rej ba: “Ta ear jab kallim̦ur bwe enaaj itok ke? Epãd ia? Etto wõt ke ro jemãd rar mej, ak men otemjej rejja ãindein wõt jãn kar jinoin kõm̦anm̦an lal̦.” (2 Pi. 3:3, 4, UBS) Bõtab, Jeova enaaj kajejjet wõt kallim̦ur ko an. An Jeova naaj kaalikkar bwe e wõt ej tõllo̦kũn ñan an irooj im tõl, men in ej kitibuj an lo̦mo̦o̦ren armej ro rej pokake e. (Riit Aiseia 55:10, 11, UBS.) Bareinwõt, wãween an Jeova tõl ej pedped ioon yokwe. Kõn men in, jemaroñ lukkuun lõke bwe aolep iien enaaj yokwe im kaorõk rũkarejar ro an me retiljek.​—Ex. 34:6, UBS.

⁸ Ilo ad jel̦ã bwe irooj bõtata eo an Jeova ej men eo eaorõktata, ejjab mel̦el̦ein bwe ad bõk lo̦mo̦o̦r ejjab aorõk im̦aan mejãn Jeova. Bõtab ñe jej kile bwe irooj bõtata eo an Jeova eaorõkl̦o̦k jãn jabdewõt men, ekoba ad bõk lo̦mo̦o̦r, jej kaalikkar bwe ejim̦we l̦õmn̦ak eo ad kõn irooj bõtata eo an. El̦aññe jekõn̦aan bwe jen l̦õmn̦ak wõt kõn men eo el̦ap an aorõk im rejetake wãween an Jeova tõl, eaorõk bwe en jim̦we wãween ad l̦õmn̦ak kõn men kein.

WÃWEEN AN KAR JOB KAJIM̦WE L̦ÕMN̦AK EO AN

9. Ta eo Setan ear ba kõn Job? (Lale pija eo ilo jinoin katak in.)

⁹ Ilo bokin Job, juon iaan bok ko ilo Baibõl̦ me kar je jinointata, ej kwal̦o̦k kõn ad aikuj bõk l̦õmn̦ak eo ejim̦we. Jej riiti im katak kõn naanin jum̦ae ko an Setan kõn Job bwe el̦aññe enaaj l̦ap an iioon eñtaan, enaaj el̦l̦o̦k jãn Anij. Setan ear bareinwõt kajjitõk bwe Anij en kõm̦m̦an bwe Job en eñtaan. Jeova ear jab kõn̦aan kõm̦m̦ane men in, ak ear kõtl̦o̦k bwe Setan en mãlejjoñe Job ilo an kar ba: “Am̦ wõt pepe men otemjej ippãn.” (Riit Job 1:7-12.) Ãlikin wõt iien in, Job ear luuji rũkarejar ro an, men ko m̦weien, im ajri ro 10 nejin. Setan ear kõm̦m̦ane men in ãinwõt ñe Anij eo ear kõm̦m̦an bwe Job en iioone wãween kein. (Job 1:13-19) Tokãlik, Setan ear kaeñtaan Job kõn juon nañinmej ekõmmetak im nana. (Job 2:7) Bareinwõt, ear l̦apl̦o̦k wõt an Job bũrom̦õj ke lio pãleen im l̦õm̦aro jilu m̦õttan rar kwal̦o̦k naan ko rekkabereer ñane.​—Job 2:9; 3:11, UBS; 16:2, UBS.

10. (1) Ewi wãween an kar Job kwal̦o̦k an tiljek ñan Anij? (2) Etke kar aikuj kajim̦we l̦õmn̦ak eo ebõd an Job?

¹⁰ Ear m̦ool ke naanin jum̦ae ko an Setan? Rar jab kõnke Job ear jab el̦l̦o̦k jãn Anij meñe ear iioon eñtaan im wãween ko renana. (Job 27:5) Bõtab ium̦win jidik iien, Job ear jino bõk l̦õmn̦ak eo ejjab jim̦we im ear l̦ap an l̦õmn̦ak wõt kõn e make. Ear bar l̦õmn̦ak bwe juon ej aikuj kõmel̦el̦eiki unin an eñtaan. (Job 7:20; 13:24, UBS) Jemel̦el̦e bwe unin an kar Job ãindein kõnke ear lukkuun eñtaan. Bõtab, Jeova ear lo bwe ej aikuj kajim̦we l̦õmn̦ak eo ebõd an Job. Ewi wãween an kar kõm̦m̦ane men in?

11, 12. Ta eo Jeova ear jipañ Job bwe en kile, im ta eo Job ear kõm̦m̦ane?

¹¹ Jemaroñ riiti im lo naan ko an Anij ñan Job me repãd ilo bokin Job jebta 38 ñan 41. Bõtab, ejjel̦o̦k juon eoon ilo jebta kein jej loe an Jeova kõmel̦el̦e ñan Job kõn unin an kar eñtaan. Ijello̦kun an kar Jeova jab ba men in, ear kõn̦aan jipañ Job bwe en kile ewi joñan an dik im ettã ak joñan an jab utiej im l̦ap ãinwõt E. Im ear bar jipañ Job ñan kile bwe ewõr men ko raorõkl̦o̦k me ej aikuj in l̦õmn̦ak kaki. (Riit Job 38:18-21, UBS.) Naan kein an Jeova rar jipañ Job ñan bar bõk l̦õmn̦ak eo ejim̦we.

¹² Ear ke nana im jab jouj wãween an kar Jeova kõnnaan ñan Job ãlikin wõt an kar iioon eñtaan im bũrom̦õj? Ear jab, im Job ear jab l̦õmn̦ak rot in. Meñe ear iioon eñtaan im wãween ko reppen, ak ear kwal̦o̦k an kam̦m̦oolol im kaorõk naan kein an Jeova. Ear ba: “Ikanooj jook kõn men ko otemjej iar ba, im ij kwal̦o̦k aõ ukel̦o̦k ilo aõ jijet ioon bũñalñal im kũbwen upaaj.” (Job 42:1-6, UBS) M̦oktal̦o̦k, juon em̦m̦an etan Ilaihu ear bar jipañ Job ñan kajim̦we l̦õmn̦ak eo an. (Job 32:5-10, UBS) Job ear roñjake naanin kauwe kein an Jeova im ukot l̦õmn̦ak eo an ebõd. Kõn men in, Jeova ear kwal̦o̦k ñan ro jet bwe ebuñbũruon ippãn Job kõn an tiljek wõt ium̦win wãween ko reppen ear iiooni.​—Job 42:7, 8.

13. Ewi wãween an kar naanin kauwe ko an Jeova wõnm̦aanl̦o̦k wõt im jipañ Job ãlikin an kar iiooni wãween ko reppen?

¹³ Ãlikin an kar Job iioon wãween ko reppen, naanin kauwe ko an Jeova rar wõnm̦aanl̦o̦k wõt im jipañe. Jeova “ear kajeraam̦m̦an Job ilo jem̦l̦o̦kin mour eo an el̦apl̦o̦k jãn an kar kajeraam̦m̦ane ilo jinoin.” Ãlikin, “ear bareinwõt wõr jiljilimjuon nejin m̦aan kab jilu nejin kõrã.” (Job 42:12-14, UBS) Meñe Job ear yokwe ajri rein nejin me Jeova ear kajeraam̦m̦ane kaki tokãlik, ak ear jab jem̦l̦o̦k an bũrom̦õj kõn ajri ro nejin m̦okta me Setan ear m̦an er. Im bõlen jet iien, ej bar keememejtok men ko rar wal̦o̦k ñane im an kar iioon eñtaan. Bõlen tokãlik Job emaroñ kar jel̦ã im mel̦el̦e taunin an kar iiooni wãween ko reppen, bõtab emaroñ kar l̦õmn̦ak wõt kõn etke ear l̦ap an kar eñtaan ñan joñan eo. Jekdo̦o̦n ta ko ear l̦õmn̦ak kaki, ak en kar keememej wõt naan ko an Jeova ñane. Men in enaaj kar kaenõm̦m̦ane im jipañe ñan bõk wõt l̦õmn̦ak eo ejim̦we.​—Sam 94:19.

14. Ta eo jej katak jãn bwebwenatoun Job?

¹⁴ Ad kõl̦mãnl̦o̦kjen̦ kõn men eo ear wal̦o̦k ñan Job, enaaj jipañ kõj bwe en jim̦we l̦õmn̦ak eo ad im kaenõm̦m̦an kõj. Bareinwõt, bokin Job ej m̦õttan bok ko Jeova ear je im litok bwe en “kein katakin kõj, bwe kõj kõn kijenmej, im kõn aenõm̦m̦an jãn Jeje ko, en wõr ad kõjatdikdik.” (Rom 15:4) Ej katakin kõj bwe en jab lukkuun l̦ap ad l̦õmn̦ak kõn apañ ko jej iiooni, ñan joñan eo me enaaj kõm̦m̦an bwe en jako ad l̦õmn̦ak kõn irooj bõtata eo an Jeova. Ãinwõt Job, jej kwal̦o̦k bwe jej rejetake irooj bõtata eo an Jeova ñe jej tiljek wõt meñe jej iiooni wãween ko reppen.

15. Ta tokjãn eo enaaj wal̦o̦k ñe jej tiljek wõt ium̦win wãween ko reppen jej iiooni?

¹⁵ Bwebwenatoun Job emaroñ kaenõm̦m̦an kõj kõnke ej kaalikkar bwe ejjab unin ad iioon wãween ko reppen ej kõnke Jeova ej illu ippãd. Iien kein rej jet iien ko jemaroñ kwal̦o̦k ad rejetake irooj bõtata eo an Jeova. (JK. 27:11) Ñe jej kijenmej im kwal̦o̦k wõt ad tiljek, jenaaj kabuñbũruon Jeova im enaaj kõm̦m̦an bwe jen reim̦aanl̦o̦k wõt ñan kõjatdikdik eo ad epãd im̦aan. (Riit Rom 5:3-5, UBS.) Bwebwenatoun Job ej kwal̦o̦k bwe Jeova “eobrak kõn jouj im tũriam̦o.” (Jem. 5:11, UBS) Kõn men in, jemaroñ lukkuun lõke bwe Jeova enaaj kajeraam̦m̦an kõj im ro otemjej rej rejetake irooj bõtata eo an. Ad jel̦ã men in, enaaj jipañ kõj ñan lukkuun kijenmej im lañlõñ wõt.​—Kol. 1:11, UBS.

L̦ÕMN̦AK WÕT KÕN MEN EO EAORÕK

16. Etke jen keememej wõt bwe ad rejetak irooj bõtata eo an Jeova ej men eo eaorõktata?

¹⁶ Em̦ool bwe emaroñ pen ñan ad l̦õmn̦ak wõt kõn irooj bõtata eo an Jeova ñe jej iioon apañ ko ilo mour ko ad. Jet iien, apañ ko reddik remaroñ oktak im jet apañ ko rel̦l̦ap el̦aññe el̦ap ad l̦õmn̦ak kaki. Kõn men in, ñe jej iioon apañ im wãween ko reppen, jen wõnm̦aanl̦o̦k wõt im kakeememej kõj make kõn joñan aorõkin ad aikuj rejetake irooj bõtata eo an Jeova.

17. Ewi wãween ad poub wõt ilo ad jerbal ñan Jeova enaaj jipañ kõj ñan l̦õmn̦ak wõt kõn men eo el̦ap an aorõk?

¹⁷ Ñe jej wõnm̦aanl̦o̦k wõt im kijejeto ilo ad jerbal ñan Jeova, men in enaaj jipañ kõj ñan l̦õmn̦ak wõt kõn men eo eaorõktata. Ñan waanjoñak, juon jeid im jatid etan Renee ear eñtaan kõn an kar mej rãjetin ãnbwinnin, wõr an kããnjõr, im ikkutkut an metak ãnbwinnin. Ke ear pãd ilo aujpitõl̦, ear kwal̦o̦k naan ñan rijerbal ro, rinañinmej ro jet, im ro rekõn lol̦o̦k e. Juon iien ke Renee ear del̦o̦ñ aujpitõl̦ ear kwal̦o̦k naan, im ium̦win wõt ruo jimattan wiik ear wõr an 80 awa. Meñe ear jel̦ã bwe epaak an naaj kar mej, ak ear jab jako an l̦õmn̦ak kõn irooj bõtata eo an Jeova im men in ear lukkuun kaenõm̦m̦ane.

18. Ewi wãween bwebwenato eo an juon jeid im jatid kõrã ej kwal̦o̦k bwe jemaroñ lo tokjãn ad rejetake irooj bõtata eo an Jeova?

¹⁸ Alikkar jekõn̦aan bwe jen poub wõt ilo ad rejetake irooj bõtata eo an Jeova ilo iien ko me jej iioon ijjiped im apañ ko jãn raan ñan raan. Juon jeid im jatid kõrã etan Jennifer, ear pãd ilo juon airport ium̦win jilu raan im kõttar bal̦uun eo waan bwe en ro̦o̦l ñan ijo jikin. Ear cancel aolep bal̦uun ko rej etal ñan ijo ej jibadekl̦o̦k. Jennifer emaroñ kar jino bũrom̦õj kõn an kar m̦õk im make iaan. Bõtab, ear l̦õmn̦ak wõt kõn men eo el̦apl̦o̦k an aorõk, im ear jar ñan Jeova bwe en jipañe ñan kwal̦o̦k kõn nuuj eo em̦m̦an ñan ro rej bar kõttar ilo airport eo. Innem ta eo ear wal̦o̦k? Eokwe, ear kwal̦o̦k naan ñan elõñ armej im lel̦o̦k aer bok. Ej ba: “Iar lo an kar Jeova kajeraam̦m̦an im kõkajoor eõ ñan kortokjãn iien eo im kwal̦o̦k kõn etan, meñe ear wal̦o̦k apañ in ñan ña.”

19. Ta eo ej kaalikkar bwe armej ro an Jeova rej rũkarejar ro rem̦ool?

¹⁹ Armej ro wõt an Jeova el̦ap aer mel̦el̦e kõn joñan an aorõk irooj bõtata eo an. Aer mel̦el̦e kõn men in, ej kaalikkar bwe rej rũkarejar ro rem̦ool. Innem, kõj kajjojo jen wõnm̦aanl̦o̦k wõt im rejetake irooj bõtata eo an Jeova.

20. Ewi wãween an Jeova l̦õmn̦ak kõn am̦ kate eok ilo am̦ rejetake irooj bõtata eo an?

²⁰ Keememej bwe el̦ap an Jeova kaorõk aolep men ko kwõj kõm̦m̦ani ñan rejetake irooj bõtata eo an ilo am̦ jerbal ñane, im ilo am̦ tiljek wõt ium̦win wãween ko reppen kwõj iiooni. (Sam 18:25) Katak eo tok juon enaaj kwal̦o̦k kõn etke jej aikuj rejetake irooj bõtata eo an Jeova, im ewi wãween jemaroñ kwal̦o̦k ad lukkuun rejetake.