Armagedon Ta Mel̦el̦e eo an Armej Kake?
“Im rar ko̦kweilo̦kl̦o̦k er ñan jikin eo n̦a etan ilo Hibru, Armagedon.”—REVELESÕN 16:16.
TA EO kwõj l̦õmn̦ak kake ñe kwõj roñ naan in “Armagedon”? Eokwe, bõlen ilo l̦õmn̦ak eo am̦ kwõj pijaik juon jorrããn el̦ap. Meñe naan in ej wal̦o̦k juon wõt alen ilo Baibõl̦, ak ekutkut an ri jerbal ro ilo nuuj im ri tõl ro an kabuñ kõjerbale naan in.
Mel̦el̦e ko an elõñ armej ro kõn Armagedon ej ke jejjet ippãn katak ko ilo Baibõl̦? Ewõr tokjãn ad jel̦ã uwaak in kajjitõk in. Etke? Kõnke ad jel̦ã mel̦el̦e eo em̦ool kõn Armagedon emaroñ jol̦o̦k ad lõl̦ño̦ñ. Emaroñ bareinwõt kõm̦m̦an bwe jen reim̦aanl̦o̦k ñan raan ko rej pedotok im kajim̦we wãween ad l̦õmn̦ak kõn Anij.
Jen etale jilu kajjitõk ko, im keidi mel̦el̦e ko an elõñ armej ro kõn Armagedon ippãn mel̦el̦e ko rem̦ool ilo Baibõl̦ kõn men in.
1.ARMAGEDON EJ KE JORRÃÃN KO REL̦L̦AP ME ARMEJ RO REJ KÕM̦M̦ANI?
Ñe ri etale ro im ro rej je ripoot ko rej kwal̦o̦k kõn jorrããn ko rel̦l̦ap me armej ro rej kõm̦m̦ani, ekkã aer ba bwe men kein rej “Armagedon.” Ñan waanjoñak, rar ba bwe Bata eo an Lal̦ Kein Kajuon im Kein Karuo rej Armagedon. Ãlikin an kar wal̦o̦k bata kein, armej rar inepata im ekkõl ñe Amedka im kien eo kar m̦okta an Rojia etan Soviet Union renaaj ko̦kkure doon kõn kein tarin̦ae ko ãinwõt mijel̦ im baam̦ ko. Ikijjeen men in, ri jerbal ro ilo nuuj rar ba bwe enaaj juon Armagedon me rej kõjerbal kein tarin̦ae ko rekajoor. Rainin, ri etale ro me rej inepata kõn an ettoon mejatoto, rej ba bwe men in enaaj kõm̦m̦an an wõr oktak rej wal̦o̦k. Im rej kakkõl bwe ilo raan ko im̦aan, enaaj nana men ko rej wal̦o̦k ioon lal̦ itok wõt jãn an oktakl̦o̦k mejatoto, im rej n̦aetan Armagedon.
Mel̦el̦e eo an armej: Lal̦ in kab men otemjej ie, im men ko renaaj wal̦o̦k ilju im jekl̦aj, rej pãd ium̦win maroñ im kajoor eo an armej. El̦aññe ejjab em̦m̦an im jim̦we an kien ko jerbal, innem lal̦ in enaaj lukkuun jorrããn.
Mel̦el̦e eo em̦ool jãn Baibõl̦: Anij ejamin kõtl̦o̦k an armej ro ko̦kkure lal̦ in. Baibõl̦ eo ej kam̦oole men in ñan kõj ilo an ba bwe ke Jeova ear kõm̦anm̦ane lal̦ in, ear jab “kõm̦m̦ane waan.” Ak ear kõm̦m̦ane ‘bwe armej ren jokwe ie.’a (Lale kõmel̦el̦e eo itulal̦.) (Aiseia 45:18) Ijello̦kun an kõtl̦o̦k bwe armej ren ko̦kkure ak kajorrããne lal̦ in, Anij enaaj “ko̦kkure ro rej ko̦kkure lal̦.”—Revelesõn 11:18.
2. ARMAGEDON EJ KE JORRÃÃN KO REL̦L̦AP ÃINWÕT M̦AKŨTKŨT LAL̦?
Jet iien, ro rej je ripoot ko rej kõjerbal naan in “Armagedon” ñe rej kwal̦o̦k kõn jorrããn ko rel̦l̦ap ãinwõt m̦akũtkũt lal̦. Ñan waanjoñak, ilo iiõ eo 2010, ekar wõr juon ripoot im ear kwal̦o̦k kõn “‘Armagedon’ eo ilo Haiti.” Ripoot in ear kwal̦o̦k kõn jorrããn ko rar wal̦o̦k, eñtaan ko an armej ro, im an kar mej elõñ armej jãn kar m̦akũtkũt lal̦ eo el̦ap ear wal̦o̦k ilo aelõñ in. Ri jerbal ro ilo nuuj rejjab kõjerbale naan in “Armagedon” ñan jorrããn ko wõt me em̦õj kadede aer wal̦o̦k. Ak rej bar kõjerbale naan in ñan jorrããn ko me rej ba renaaj wal̦o̦k ilju im jekl̦aj. Ñan waanjoñak, rej l̦õmn̦ak bwe juon iien dekã ko jãn lañ renaaj wõtlo̦k im ko̦kkure lal̦ in, im rej ba bwe men in ej “Armagedon.”
Mel̦el̦e eo an armej: Armagedon ej jorrããn ko rejidimkij me rej ko̦kkure mour ko an armej ro, meñe rej armej ro rem̦m̦an. Ejjel̦o̦k men en̦ kwõmaroñ kõm̦m̦ane ñan kõjparok eok jãn men in.
Mel̦el̦e eo em̦ool jãn Baibõl̦: Armagedon ejjab juon jorrããn ejidimkij me ej ko̦kkure mour ko an aolep armej ro. Ilo iien eo enaaj wal̦o̦k Armagedon, naaj ko̦kkure ro wõt im renana. Baibõl̦ eo ej kallim̦ur bwe m̦õttan jidik “eo e nana enaaj jako; aet, kwõnaaj kallimjeke jikin im enaaj ejjel̦o̦k.”—Sam 37:10.
3. ANIJ ENAAJ KE KO̦KKURE LAL̦ IN ILO IIEN EO ENAAJ WAL̦O̦K ARMAGEDON?
Elõñ armej ro ilo kabuñ ko rej tõmak bwe enaaj wõr juon tarin̦ae ãliktata ikõtaan ro rem̦m̦an im ro renana, im men in enaaj tõll̦o̦k ñan an jako lal̦ in ñan indeeo. Ãlikin an kar juon kumi in ri etale ro ilo Amedka kepaak im kõnnaan ippãn elõñ armej ro, rar lo bwe 40 bõjjããn in rũtto ro rar kõnnaan ippãer rej tõmak bwe lal̦ in enaaj jako “ilo tarin̦ae in Armagedon.”
Mel̦el̦e eo an armej: Kar jab kõm̦anm̦an armej bwe ren mour ioon lal̦ ñan indeeo, im kar jab kõm̦anm̦an lal̦ bwe en pãd ñan indeeo. Armej ro rej l̦õmn̦ak bwe Anij ear kõm̦anm̦an armej bwe ren mour, im bwe juon iien er aolep rej aikuj mej.
Mel̦el̦e eo em̦ool jãn Baibõl̦: Baibõl̦ ej ba bwe Anij “ear likũt l̦oñtak ko an lal̦ bwe en jab m̦akũtkũt ñan indeeo.” (Sam 104:5) Im ikijjeen ro rej jokwe ie, Baibõl̦ eo ej ba: “Ro rem̦m̦an renaaj jolõt ãne eo, im jokwe ilowaan ñan indeeo.”—Sam 37:29.
Alikkar bwe Baibõl̦ eo ejjab errã ippãn mel̦el̦e ko an elõñ armej ro kõn Armagedon. Ak kiiõ, ta lukkuun mel̦el̦ein naan in Armagedon?
[Komel̦el̦e eo itulal̦]
a Baibõl̦ ej kwal̦o̦k bwe etan Anij ej Jeova.