Mel̦el̦e eo Em̦ool kõn Armagedon

“Jetõb in tim̦on̦ ro [enjel̦ ro renana] rej . . . ilo̦k ñan ippãn kiiñ ro an aolepen lal̦, . . . im rar ko̦kweilo̦kl̦o̦k er ñan jikin eo n̦a etan ilo Hibru, Armagedon.”​—REVELESÕN 16:14, 16.

ARMAGEDON ej etan juon jikin. Ak ta lukkuun mel̦el̦ein naan in “Armagedon”? Etke ekkã aer kõjerbal naan in “Armagedon” ñe rej jitõñl̦o̦k ñan juon men me ear wal̦o̦k, ãinwõt juon tarin̦ae?

Rar Kweilo̦kl̦o̦k ilo Jikin eo N̦aetan Armagedon

Naan in Hibru eo me Armagedon ej itok jãne ej Har–​Magedon. Mel̦el̦ein naan in ej “Tol̦ Megido.” Meñe ejjab lukkuun tol̦ men in, ak ewõr juon lukkuun jikin etan Megido. Jikin in Megido kar juon jikin eaorõk im ear pãd tueañ turilik in ijo me Ri Israel ro etto rar jokwe ie. Elõñ kar tarin̦ae ko rar wal̦o̦k iturin Megido. Eñin unin ãt in Megido ear jino ekkejel ippãn tarin̦ae ak kõkkar kõn tarin̦ae.a (Lale kõmel̦el̦e eo itulal̦.)

Bõtab, unin aorõkin jikin in Megido ejjab kõnke kar jikin tarin̦ae ak ej kõn un ko unin aer kar tarin̦ae ilo jikin in. Megido ear juon iaan jikin ko ilo Ãnen Kallim̦ur eo me Jeova Anij ear lel̦o̦k ñan Ri Israel ro. (Exodus 33:1; Joshua 12:7, 21) Jeova ear kallim̦ur ñan armej rein bwe enaaj lo̦mo̦o̦ren er jãn ro rar kajjioñ in ko̦kkure er, im ãindein ear lo̦mo̦o̦ren er. (Duteronomi 6:18, 19) Ñan waanjoñak, ilo kar jikin in Megido, Jeova ear lo̦mo̦o̦ren Ri Israel ro jãn jarin tarin̦ae ko an Irooj eo an Kenean etan Jabin im kapen eo aer etan Sisera.​—Ekajet 4:14-16.

Kõn men in, naan in “Har–​Magedon” ak “Armagedon” ej kõkkar kõn juon mel̦el̦e eaorõk im el̦ap. Ej ekkejell̦o̦k ñan juon bata ikõtaan ruo kumi rekajoor.

Kanaan eo ilo bok in Revelesõn ej kwal̦o̦k bwe m̦õttan jidik ilo raan ko rej pãd im̦aan, Setan im enjel̦ ro renana renaaj kõm̦akũt kien ko an lal̦ in bwe ren ko̦kweilo̦k jarin tarin̦ae ko aer. Im ilo aer kõm̦m̦ane men in rej jum̦ae armej ro an Anij im jerbal eo aer. Ñe Anij enaaj ko̦kkure ri jum̦ae rein, men in enaaj kõm̦m̦an an mej elõñ milien armej ro.​—Revelesõn 19:11-18.

Etke Anij enaaj kõm̦m̦an an mej elõñ armej ro ke Baibõl̦ ej ba bwe ej juon eo ‘eobrak kõn yokwe, erum̦wij an illu, im an tũriam̦o ekanooj l̦ap’? (Nihimaia 9:17, UBS) Eokwe, bwe jen maroñ mel̦el̦e kõn men in Anij enaaj kõm̦m̦ane, jej aikuj etale uwaak ko ñan kajjitõk kein jilu: (1) Wõn eo ej jinoe tarin̦ae eo? (2) Etke Anij ej bõk kun̦aan ilo tarin̦ae in? (3) Ta ko renaaj wal̦o̦k ioon lal̦ im ñan armej ro jãn tarin̦ae in?

1. WÕN EO EJ JINOE TARIN̦AE EO?

Tarin̦ae in Armagedon ejjab juon tarin̦ae me Anij enaaj m̦ane armej ro. Ak ej juon tarin̦ae me enaaj jojomare im lo̦mo̦o̦ren ro rem̦m̦an jãn an ri nana ro kajjioñ in ko̦kkure er. Ri nana rein me rej ko̦kkure armej ro an Anij rej “kiiñ ro an aolepen lal̦” ak ri tõl ro an lal̦ in. Etke rekõn̦aan ko̦kkure armej ro an Anij? Eokwe ej kõnke Setan enaaj kõm̦akũt kien ko an lal̦ im jarin tarin̦ae ko bwe ren jum̦ae im ko̦kkure ro rej kabuñ ñan Jeova Anij.​—Revelesõn 16:13, 14; 19:17, 18.

Rainin el̦ap an armej ro kaorõk maroñ im jim̦we ko aer ñan kwal̦o̦k l̦õmn̦ak ko aer im ñan kããlõt kabuñ eo aer. Eñin unin epen ñan an armej ro rainin ilo jet jikin ko tõmak bwe kien ko an lal̦ renaaj kajjioñ in kapañ ak ko̦kkure kabuñ ko. Bõtab, ilo m̦ool em̦õj an kar kien ko kõm̦m̦ane men in elõñ iiõ ko l̦o̦k im rej kiiõ jino kõm̦m̦ane men in rainin.b (Lale kõmel̦el̦e eo itulal̦.) Meñe ãindein, ak ewõr ruo oktak ko rel̦l̦ap ikõtaan tarin̦ae ko kien ko rekar kõm̦m̦ani im tarin̦ae in Armagedon. Ta oktak kein? Kein kajuon, tarin̦ae in Armagedon enaaj wal̦o̦k ipel̦aakin lal̦ in. Im kein karuo, men eo Jeova Anij enaaj kõm̦m̦ane n̦ae ri jum̦ae rein enaaj l̦apl̦o̦k im kajoorl̦o̦k jãn men ko ekar kõm̦m̦ani m̦okta n̦ae ro rar jum̦ae e. (Jeremaia 25:32, 33) Baibõl̦ eo ej ba bwe Armagedon ej “tarin̦ae in raan el̦ap, raan in Anij e kajoor otem kajoor.”

2. ETKE ANIJ EJ BÕK KUN̦AAN ILO TARIN̦AE IN?

Jeova ej katakin ro rej kabuñ ñan e bwe ren kõm̦m̦an aenõm̦m̦an im yokwe ro rej kõjdat er. (Maika 4:1-3; Matu 5:43, 44; 26:52) Kõn men in, rein reban bõk kun̦aaer im tarin̦ae ñan jojomare er make ñe ewal̦o̦k tarin̦ae in Armagedon. El̦aññe Anij ejjab bõk kun̦aan ilo tarin̦ae in ñan lo̦mo̦o̦ren armej rein an, innem rein remaroñ aolep jako. Ñe enaaj ãindein, innem enaaj nana etan Jeova Anij. El̦aññe ri kõjdat ro renaaj maroñ ko̦kkure armej ro an Anij, innem men in enaaj kwal̦o̦k bwe Jeova ej juon eo ejjel̦o̦k yokwe ippãn, ejjab jim̦we wãween an jerbal, im bwe ejjel̦o̦k an kajoor. Bõtab, eban ãindein kõnke jelukkuun tõmak bwe Jeova enaaj jojomare im lo̦mo̦o̦ren armej ro an!​—Sam 37:28, 29.

Anij ejjab kõn̦aan ko̦kkure jabdewõt armej, eñin unin ej kakkõl l̦o̦k im̦aan ñan armej ro kõn men eo enaaj kõm̦m̦ane. (2 Piter 3:9) Anij ej kakeememej aolep ikijjeen bwebwenato ko ilo Baibõl̦ bwe ilo iien ko etto ear ko̦kkure ro rar kajjioñ in ko̦kkure armej ro an. (2 Kiiñ 19:35) Baibõl̦ eo ej bareinwõt kakkõl kõj bwe ilo raan ko im̦aan, Setan im kien ko an lal̦ ekoba jarin tarin̦ae ko renaaj kajjioñ in ko̦kkure armej ro an Jeova. Ak ilo iien in, Jeova enaaj bar kõjerbal an kajoor ñan m̦an rein. Ilo m̦ool jãn etto in an kar Naan in Anij kanaan bwe Jeova enaaj ko̦kkure ri nana ro. (Jabõn Kõnnaan 2:21, 22, UBS; 2 Tessalonika 1:6-9, UBS) Ilo iien in, ri jum̦ae rein renaaj kile bwe rej tarin̦ae ippãn Anij, eo Ekajoor Bõtata.​—Ezekiel 38:21-23.

3. TA KO RENAAJ WAL̦O̦K IOON LAL̦ IM ÑAN ARMEJ RO JÃN TARIN̦AE IN?

Tarin̦ae in Armagedon enaaj lo̦mo̦o̦ren mour ko an elõñ milien armej ro. Ãlikin Armagedon, enaaj jino wõr aenõm̦m̦an ioon lal̦.​—Revelesõn 21:3, 4.

Bok in Revelesõn ej kwal̦o̦k kõn juon “jar el̦ap” im ejjel̦o̦k juon ejel̦ã oraer me renaaj el̦l̦ã im mour jãn tarin̦ae in Armagedon. (Revelesõn 7:9, 14) Ium̦win tõl eo an Anij, rein renaaj jipañ karreo lal̦ in bwe en ãinwõt Pedetaij eo me kar kõn̦aan eo an Jeova jãn jinointata.

Jejel̦ã ke ñããt eo tarin̦ae eo n̦ae armej ro an Anij enaaj wal̦o̦k?

[Komel̦el̦e eo itulal̦]

[Pija eo ilo peij 6]

Jeova Anij ear m̦an ro rar kajjioñ in ko̦kkure armej ro an im ear lo̦mo̦o̦ren ri karejar ro an ilo iien ko etto

[Pija eo ilo peij 7]

Jeova enaaj bar lo̦mo̦o̦ren armej ro an ilo iien tarin̦ae in Armagedon