“Kõl̦l̦ã Men eo Kwõj Kallim̦ur Kake”

“Kwõn kam̦ool ñan Irooj men ko kwõj kallim̦ur kaki.”—MATU 5:33.

AL: 18, 7

KWÕJ KAORÕK KE KALLIM̦UR EO KWAAR KÕM̦M̦ANE . . .

ke kwaar ajel̦o̦k mour n̦e am̦ ñan Jeova?

ke kwaar m̦are?

ke kwaar bõk kun̦aam̦ ilo jerbalin special full-time?

1. (1) Ta eo me Riekajet eo Jepta im Hanna rej ãinl̦o̦k wõt juon kake? (Lale pija eo itulõñ.) (2) Ta kajjitõk ko jenaaj uwaaki ilo katak in?

EM̦M̦AAN in ekar juon rũtõl ekajoor; im kõrã in ekar juon kõrã elukkuun jel̦ã kõttãiki ñan l̦eo pãleen. L̦ein ekar juon rũttarin̦ae eperan ak liin ekar juon kõrã ettã bũruon im ear lale jerbal ko ilo m̦weo im aikuj ko an l̦eo pãleen. Armej rein ej Riekajet Jepta im Hanna, kõrã eo pãleen Elkena. Meñe erro kar oktak jãn doon ak erro jim̦or ar kabuñ ñan Jeova. Bareinwõt kajjojo iaaerro ar kõm̦m̦ane juon kallim̦ur ñan Jeova im kam̦oole kallim̦ur ko aer. Erro ej juon joñak em̦m̦an ñan aolep em̦m̦aan im kõrã ro rainin me em̦õj aer kar kõm̦m̦an kallim̦ur im̦aan mejãn Jeova. Jen kiiõ etale jilu kajjitõk ko me el̦ap aer aorõk: Ta in kallim̦ur? Ñe jej kõm̦m̦ane juon kallim̦ur ñan Anij, ewi joñan an aorõk? Im ta ko jemaroñ katak jãn waanjoñak ko an Jepta im Hanna?

2, 3. (1) Ta in kallim̦ur? (2) Ta eo Baibõl̦ ej ba kõn aorõkin kallim̦ur ko juon armej ej kõm̦m̦ani im̦aan mejãn Anij?

² Ekkar ñan Baibõl̦, ñe juon ej kõm̦m̦ane juon kallim̦ur ñan Anij, ekanooj in aorõk bwe en kajejjete. Ta in kallim̦ur? Kallim̦ur ej ñe juon armej ej ba bwe enaaj kõm̦m̦ane juon men, lel̦o̦k juon menin lel̦o̦k, kõm̦m̦ane juon jerbal eaorõk, ak ba bwe eban kõm̦m̦ane jet men ko. Ñe juon ej kõm̦m̦an kallim̦ur, e eo make ej ba bwe em̦õn̦õn̦õ in naaj kõm̦m̦ane men in. Ejjel̦o̦k juon ear iuuni ñan kõm̦m̦ane. Joñan an aorõk kallim̦ur ko juon ej kõm̦m̦ani ñan Anij, ej ãinwõt ñe ej kajje im̦aan mejãn Anij im ba bwe enaaj kam̦ool men ko ej ba ak jab kõm̦m̦ani men ko ej kallim̦ur bwe eban kõm̦m̦ani. Kõn men in, Jeova ej kõtmãne bwe armej eo ej kõm̦m̦an kallim̦ur enaaj kajejjet kallim̦ur ko an. (Jen. 14:22, 23, UBS; Hi. 6:16, 17, UBS) Ta eo Baibõl̦ ej ba kõn aorõkin kallim̦ur ko me juon armej ej kõm̦m̦ani im̦aan mejãn Anij?

³ Juon iaan kien ko ilo Kien Moses ej ba: “Ñe juon em̦m̦aan ej kõm̦m̦an an kallim̦ur ñan Jeova, . . . en jab riab kõn an in naan; en kõm̦m̦an ãinwõt naan otemjej rar wal̦o̦k jãn lo̦ñiin.” (Bõn. 30:2) Tokãlik, Solomon ear je naan kein: “Ñe kwõj kallim̦ur ñan Anij, kwõn jab rum̦wij ilo am̦ kõl̦l̦ã, bwe Ejjab yokwe ro rũbwebwe; kwõn kõl̦l̦ã men eo kwõj kallim̦ur kake.” (Ekl. 5:4) Jijej ear kam̦ool bwe elukkuun aorõk kallim̦ur ko juon ej kõm̦m̦ani im̦aan mejãn Anij, ilo an kar ba: “Bwe ar ba ñan rũtto ro, ‘Kwõn jab riab ilo am̦ kallim̦ur, a kwõn kam̦ool ñan Irooj men ko kwõj kallim̦ur kaki.’”​—Matu 5:33.

4. (1) Ewi joñan an aorõk kallim̦ur ko juon ej kõm̦m̦ani ñan Anij? (2) Ta men ko jenaaj katak kaki kõn Jepta im Hanna?

⁴ Innem ealikkar bwe kallim̦ur ko juon ej kõm̦m̦ani ñan Anij rejjab kallim̦ur bajjek. Wãween ad watõki enaaj jelõt kõtaan eo ad ippãn Jeova. Devid ear je im ba: “Wõn eo ej tõllo̦kũn bwe en wanlõñl̦o̦k ilo tol̦ eo an Irooj? Wõn eo emãlim an del̦o̦ñ ilo Tampel̦ eo an eokkwõjarjar? Eo . . . ejjab riab an kallim̦ur.” (Sam 24:3, 4, UBS) Ta ko Jepta im Hanna rar kallim̦ur kaki, im ear ke pidodo ñan aer kajejjeti?

RAR KAJEJJET KALLIM̦UR KO AER ÑAN ANIJ

5. Ta eo Jepta ear kallim̦ur kake, im ta eo ear wal̦o̦k?

⁵ Jepta ear tiljek wõt im kajejjet kallim̦ur eo ear kõm̦m̦ane ñan Jeova ke ear ilo̦k im tarin̦aeik RiAmon ro me rar kajjioñ in tõn ko̦kkure armej ro an Anij. (Eka. 10:7-9) Joñan an kar Jepta kõn̦aan anjo̦ ilo tarin̦ae eo, ear kallim̦ur ñan Jeova im ba: “El̦aññe em̦ool Kwõnaaj letok ro nejin Amon n̦a ilo peiũ, innem jabdewõt eo enaaj diwõjtok jãn kõjãm in m̦weo im̦õ bwe en wõnm̦ae eõ, ñe inaaj jepl̦aaktok ilo aenõm̦m̦an jãn ippãn ro nejin Amon, enaaj an Jeova.” Innem ta eo ear wal̦o̦k? Jeova ear jipañe bwe en bõk anjo̦ ioon RiAmon ro im armej eo m̦oktata ear itok im wõnm̦aiki ke ej jepl̦aaktok jãn tarin̦ae, ej jiroñ eo nejin me ej make wõt. Eñin kar armej eo Jepta ear kallim̦ur bwe enaaj “an Jeova.” (Eka. 11:30-34) Enaaj kar ta mel̦el̦ein men in ñan jiroñ in nejin?

6. (1) Ear ke pidodo ñan an Jepta im jiroñ eo nejin kajejjet kallim̦ur eo an ñan Anij? (2) Ta eo Duteronomi 23:21, 23 im Sam 15:4 rej ba kõn kallim̦ur ko jej kõm̦m̦ani, im ta eo em̦m̦an ippam̦ kõn eoon kein?

⁶ Ñan kajejjet kallim̦ur eo an jemãn, jiroñ eo nejin Jepta ear aikuj etal im jerbal ilo im̦õn kõppãd eo an Jeova. Kallim̦ur in an Jepta ej ke juon kallim̦ur me el̦ap an kar m̦õkaj kake im jab l̦õmn̦ak m̦okta jãn an kar kõm̦m̦ane? Ejjab. Unin ej kõnke Jepta emaroñ kar jel̦ã kadede bwe juon iaan armej ro enaaj diwõjtok jãn m̦weo im̦õn im wõnm̦aiki, ej jiroñ eo nejin. Meñe ãindein ak ekar pen ñan erro ledik eo nejin, im erro jim̦or ar aikuj kaarmejjete erro ñan kajejjete kallim̦ur eo an. Ke Jepta ear lo an jiroñ eo nejin itok im wõnm̦aiki, “ear kekõle nuknuk eo an” im ear ba bwe erup bũruon. Ak ñe jiroñ eo nejin, ear jañ kõnke ej juon bõjin im kiiõ ejjãmin pãlele. Etke ear jañ kõn men in? Eokwe ilo tõre eo, ekar ejjel̦o̦k nejin Jepta l̦addik im jiroñ in me ej make wõt nejin kõrã eban kiiõ pãlele, im eban maroñ wõr jibwin ajri. Innem etan baam̦le eo aer eban maroñ wõnm̦aanl̦o̦k wõt. Bõtab, ejjab men eo in me el̦ap aerro kar inepata kake. Jepta ear ba: “Em̦õj aõ kallim̦ur ñan [Jeova], im ijjab maroñ ukote!” Im jiroñ eo nejin ear ba: “El̦aññe em̦õj am̦ kallim̦ur ñan [Jeova], innem kwõn kõm̦m̦ane men eo kwaar ba kwõnaaj kõm̦m̦ane ñan eõ.” (Eka. 11:35-39, UBS) Jiroñ in im jemãn rej jet iaan armej ro me rar jab l̦õmn̦ak ñan jidik bwe remaroñ rupe kallim̦ur eo aer ñan Anij eo Eutiejtata. Rar kajejjet wõt kallim̦ur eo aer jekdo̦o̦n ta ñe enaaj kar wõr apañ ko renaaj iiooni.​—Riit Duteronomi 23:21, 23, UBS; Sam 15:4.

7. (1) Ta eo Hanna ear kallim̦ur kake, im etke? (2) Im ta eo ear wal̦o̦k? (3) Ta eo enaaj wal̦o̦k ñan Samuel kõn kallim̦ur eo jinen ear kõm̦m̦ane? (Lale kõmel̦el̦e jidikdik eo.)

⁷ Hanna ear bar juon eo me ear tiljek wõt im kajejjet kallim̦ur eo an ñan Jeova. Hanna ear kõm̦m̦ane juon kallim̦ur ñan Jeova ilo iien eo ear lukkuun bũrom̦õj im inepata kõn an jab maroñ wõr nejin, im kõn aer kar kajjirere kake aolep iien im kakũtõtõiki kõn men in. (1 Sa. 1:4-7, 10, 16, UBS) Hanna ear lutõkl̦o̦k aolepen bũruon ñan Anij im ear kallim̦ur im ba: “Irooj Ekajoor Bõtata, kwõn kalimjek eõ, karejeram̦! Kwõn lale aõ inepata im keememej eõ! El̦aññe kwõnaaj letok juon nejũ m̦aan, ij kallim̦ur bwe inaaj ajewaj bwe en am̦ wõt ilo aolepen an mour, im ejãmin m̦wijbar.”a (Lale kõmel̦el̦e eo itulal̦.) (1 Sa. 1:11, UBS) Anij ear eo̦roñ kajjitõk in an Hanna, im Hanna ear keotak juon nejin l̦addik. Ejjel̦o̦k pere bwe men in ear kõm̦m̦an an Hanna lukkuun m̦õn̦õn̦õ! Bõtab, ear jab mel̦o̦kl̦o̦k kallim̦ur eo an ñan Anij. Ãlikin an kar l̦otak l̦adik eo nejin, ear ba: “Iar kajjitõk ippãn [Jeova] kake.”​—1 Sa. 1:20, UBS.

8. (1) Ekar ke pidodo ñan an Hanna kajejjet men eo ear kallim̦ur kake? (2) Ewi wãween an naan ko an Devid ilo Sam 61 kakeememej eok kõn joñak eo em̦m̦an an kar Hanna?

⁸ Ke ear bõjrak an ajri eo ninnin ippãn jinen, emaroñ ke ear 3 an iiõ, Hanna ear kõm̦m̦ane men eo ear kallim̦ur kake ñan Anij. Ear jab kajjioñ ukot l̦õmn̦ak eo an kõn men in. Ear bõk Samuel ñan ippãn Bũrij L̦apl̦ap Ilai ilo im̦õn kõppãd eo ilo Shailo, im ear ba: “Iar kajjitõk ippãn [Jeova] kõn ajri in, im ear letok ekkar ñan kajjitõk eo aõ. Kõn men in ij itõn ajel̦o̦k e ñan [Jeova].” (1 Sa. 1:24-28, UBS) Ilo ijin, “Samuel ear rũttol̦o̦k ilo an jerbal ñan [Jeova].” (1 Sa. 2:21, UBS) Ewi wãween an kar men in jelõt Hanna? Alikkar bwe ear lukkuun yokwe l̦adik jidikdik in nejin, im ear pen ñane bwe kiiõ eban loe aolep raan im lale an rũttol̦o̦k. Ejjel̦o̦k pere bwe ewõr iien ear kõn̦aan kiki iturin, iukkure ippãn, katakini, im kõm̦m̦ani aolep men ko me juon jinen ekkã an kõm̦m̦ani ippãn ajri eo nejin ilo an rũttol̦o̦k. Meñe ear pen ñan Hanna bwe eban maroñ kõm̦m̦ani aolep men kein ippãn l̦adik eo nejin, ak ear jab ajl̦o̦k kõn men eo ear kõm̦m̦ane ñan kajejjet kallim̦ur eo an ñan Anij. Hanna ear m̦õn̦õn̦õ kõnke Jeova ear kobrak bũruon kõn lañlõñ.​—1 Sa. 2:1, 2, UBS; riit Sam 61:1, 5, 8, UBS.

9. Ta kajjitõk ko jenaaj etali kiiõ?

⁹ Kiiõ ke jejel̦ã joñan an lukkuun aorõk bwe jen kajejjet kallim̦ur ko jaar kõm̦m̦ani ñan Anij, em̦m̦an bwe jen etale kajjitõk kein: Kain kallim̦ur rot ko Kũrjin ro rej kõm̦m̦ani? Im ewi joñan ad aikuj kate kõj ñan kajejjet kallim̦ur ko ad?

KALLIM̦UR EO AM̦ KE KWAAR AJEL̦O̦K MOUR EO AM̦

10. Ta kallim̦ur eo eaorõktata an juon Kũrjin, im ta mel̦el̦ein men in?

¹⁰ Kallim̦ur eo eaorõktata an juon Kũrjin, ej kallim̦ur eo ear kõm̦m̦ane ke ear ajel̦o̦k mour eo an ñan Jeova. Etke? Kõnke ilo iien eo ej make iaan im jar ñan Jeova ej lukkuun kallim̦ur bwe enaaj kiiõ kõjerbale mour eo an ñan karejar ñane toon wõt an mour, jekdo̦o̦n ta ko renaaj wal̦o̦k. Jijej ear ba bwe juon armej ej aikuj ‘kaarmejjete e make.’ Mel̦el̦ein men in bwe ejako kiiõ aolep jim̦we im maroñ ko an ñan kõm̦m̦ani kõn̦aan ko an make, im ej kallim̦ur bwe enaaj likũt ankilaan Anij ilõñin men otemjej ilo mour eo an. (Matu 16:24) Innem jãn iien eo im m̦aanl̦o̦k, mour eo an “ej an Jeova, [NW].” (Rom 14:8) Jabdewõt eo em̦õj an kõm̦m̦ane kallim̦ur in ej aikuj lale bwe en kajejjete. Ej aikuj bõk ejja l̦õmn̦ak eo wõt an rijeje sam, eo me ekar ba kõn kallim̦ur ko ear kõm̦m̦ani ñan Anij: “Ta eo inaaj lel̦o̦k ñan Jeova kõn men ko otemjej Ear letok ñan eõ? Inaaj kõl̦l̦ã men ko iar kallim̦ur kaki ñan Jeova; aet im̦aan mejãn ro doon otemjej.”​—Sam 116:12, 14.

11. Ta eo ear wal̦o̦k ilo raan eo kwaar peptaij?

¹¹ Em̦õj ke am̦ ajel̦o̦k mour n̦e am̦ ñan Jeova im kaalikkare ñan ro jet ilo am̦ peptaij? El̦aññe aet, eokwe men in ej juon jeraam̦m̦an el̦ap! Bõlen kwõj keememej kajjitõk ko kwaar uwaaki im̦aan mejãn aolep ro me rar pãd ilo raan eo kwaar peptaij. Em̦m̦aan eo ear kõm̦m̦ane katak eo ear kajjitõk ippam̦ el̦aññe em̦õj am̦ ajel̦o̦k mour eo am̦ ñan Jeova im ñe kwõmel̦el̦e bwe “ilo am̦ ajel̦o̦k mour eo am̦ im peptaij, kwõnaaj erom juon iaan Ri Kõnnaan ro an Jeova im kobatok ilo doulul eo an me jetõb eo an ej tõle.” Ilo am̦ kar uwaak im ba aet, kwaar kwal̦o̦k im̦aan mejãn aolep bwe em̦õj am̦ kar ajel̦o̦k mour n̦e am̦ im kwõpojak ñan am̦ peptaij im erom juon rukwal̦o̦k an Jeova. Ejjel̦o̦k pere bwe kwaar lukkuun kam̦õn̦õn̦õik bũruon Jeova ilo raan eo!

12. (1) Ta kajjitõk ko jej aikuj kajitũkin kõj make kaki? (2) Ta ko Piter ear ba bwe jen kate kõj bwe en wõr ippãd?

¹² Ke kwaar peptaij, kwaar kallim̦ur ñan Jeova bwe kwõnaaj kõjerbal mour eo am̦ ñan karejar ñane im kate eok ñan pokake aolepen kien ko an. Bõtab, peptaij ej baj buñtõn ne eo jinoin jej kõm̦m̦ane ilo ad karejar ñan Jeova. Ejjab jem̦l̦o̦k ijin. Kõj aolep jej aikuj wõnm̦aanl̦o̦k wõt im mour ekkar ñan ajel̦o̦k eo ad im tiljek wõt ilo ad karejar ñan Anij. Kõn men in, em̦m̦an jen kajitũkin kõj make: ‘Ewi joñan an l̦apl̦o̦k aõ epaake Jeova jãn iien eo iar peptaij? Ij ke wõnm̦aanl̦o̦k wõt ilo aõ karejar ñan Jeova kõn aolepen bũruõ? (Kol. 3:23, UBS) Ij ekkeini ke aõ jar? Ij ke riit Baibõl̦ aolep raan? Im ij ke pãd ilo aolep kweilo̦k im keini aõ kwal̦o̦k naan? Ke ta, edikl̦o̦k ke aõ kijejeto im kõm̦m̦ani men kein raorõk?’ Rijjilõk Piter ear ba bwe jemaroñ bõbraik an men in wal̦o̦k el̦aññe jej kate kõj ñan kal̦apl̦o̦k ad tõmak, jel̦ãl̦o̦kjen̦, kijenmej, im wãnõk.​—Riit 2 Piter 1:5-8.

13. Ta eo juon Kũrjin me em̦õj an ajel̦o̦k mour eo an im peptaij ej aikuj kile?

¹³ Jejjab maroñ ukot l̦õmn̦ak eo ad kõn kallim̦ur eo jaar kõm̦m̦ane ke jaar ajel̦o̦k mour eo ad. Ñe em̦õj ad kallim̦ur ñan Anij, ejjel̦o̦k men en̦ jemaroñ kõm̦m̦ane ñan ukote. El̦aññe juon armej em̦õk in karejar ñan Jeova im em̦õk in mour ekkar ñan wãween mour eo an juon Kũrjin, ejjab maroñ jekpen im ba bwe ear bajjek ajel̦o̦k mour eo an im ear jab m̦ool ilo an peptaij.b (Lale kõmel̦el̦e eo itulal̦.) Ilo m̦ool, e make eo ear ba bwe epojak in ajel̦o̦k mour eo an ñan Anij. Kõn men in, e make enaaj uwaak ñan Jeova im eklejia eo kõn jabdewõt jerawiwi enaaj kõm̦m̦ane. (Rom 14:12, UBS) Jen kate kõj bwe jen jab ãinwõt ro me Jijej ekar ba bwe ‘rejjab yokwe Anij kiiõ ãinwõt kar m̦okta.’ Jekõn̦aan bwe en ba kõn kõj: “Ijel̦ã ta eo kwõj kõm̦m̦ane. Ijel̦ã am̦ yokwe, am̦ tiljek, am̦ jerbal, im am̦ ineem̦m̦an. Ijel̦ã ke elõñl̦o̦k men ko kwõj kõm̦m̦ani kiiõ jãn m̦okta.” (Rev. 2:4, 19, UBS) Innem, jen wõnm̦aanl̦o̦k wõt im kate kõj ñan mour ekkar ñan ajel̦o̦k eo ad. Jen kam̦õn̦õn̦õik bũruon Jeova ilo ad kajejjet kallim̦ur in jaar kõm̦m̦ane.

KALLIM̦UR EO AM̦ KE KWAAR M̦ARE

14. Ta kallim̦ur eo kein karuo me eaorõktata, im etke?

¹⁴ Kallim̦ur eo kein karuo me eaorõktata, ej kallim̦ur eo juon ear kõm̦m̦ane ke ear m̦are. Etke? Kõnke m̦are eokkwõjarjar im̦aan mejãn Anij. Ilo iien eo juon em̦m̦aan im juon kõrã rej m̦are, rej jutak im kõm̦m̦ane kallim̦ur ko aer ñan doon im̦aan mejãn Anij im ro rej pãd ilo iien kõm̦are eo aerro. Ekkã an l̦eo im lio kallim̦ur bwe renaaj yokwe doon, kaorõk doon, im kautiej doon im bwe renaaj kõm̦m̦ane men in “toon wõt aerro mour ioon lal̦ in ekkar ñan karõk eo an Anij kõn mourin pãlele.” Emaroñ oktakl̦o̦k jidik naan ko me armej ro jet rej ba jãn naan kein, bõtab ñe rej kallim̦ur ñan doon ilo iien aer m̦are, rej kallim̦ur im̦aan mejãn Anij. Ãlikin aer kallim̦ur, eo ej kõm̦areik er ej ba bwe kiiõ erro ej l̦eo im lio pãlele. Innem, erro ej aikuj pãdwõt ippãn doon toon wõt aerro mour. (Jen. 2:24; 1 Ko. 7:39) Jijej ear ba: ‘Men eo Anij ear kobaiki, armej ren jab kõjepele.’ Mel̦el̦ein men in bwe ejjel̦o̦k juon armej, ekoba l̦eo im lio, ej aikuj kõjepel pãd in aerro. Kõn men in, armej ro rej pojak in m̦are rejjab aikuj likũt ilo l̦õmn̦ak ko aer ñan jidik bwe ñe ewal̦o̦k apañ tokãlik, remaroñ jepel.​—Mark 10:9.

15. Etke Kũrjin ro rejjab aikuj bõk l̦õmn̦ak ko an armej in lal̦ in kõn mourin pãlele?

¹⁵ Jejel̦ã bwe ejjel̦o̦k juon mourin pãlele eweeppãn. Mourin pãlele eo an ruo rũm̦are ej ejaakin ruo armej rejjab weeppãn. Eñin unin Baibõl̦ ej ba bwe jet iien ‘inepata ko renaaj wal̦o̦k’ ikõtaan rippãlele ro. (1 Ko. 7:28, UBS) Ekabũrom̦õjm̦õj bwe elõñ iaan armej ro ilo lal̦ in ebõd wãween aer l̦õmn̦ak kõn mourin m̦are im rejjab kaorõke. Ñe ejino wal̦o̦k apañ ikõtaan rippãlele ro, em̦õkaj aer jutak im etal jãn eo pãleer. Ejjab aikuj wãween dein ippãn Kũrjin ro. Joñan an nana ñe juon rippãlele ej rupe kallim̦ur eo an ej ãinwõt ñe ej riab ñan Anij, im Anij edike rũriab! (Lv. 19:12; JK. 6:16-19) Rijjilõk Paul ear je naan kein im ba: “Em̦õj ke am̦ pãlele? Kwõn jab pukot bwe kwõn jepel jãn kõrã eo.” (1 Ko. 7:27) Paul ekar maroñ ba men in kõnke ear jel̦ã bwe Jeova bareinwõt edike ro rej jol̦o̦k eo pãleer kõn aer etao.​—Mal. 2:13-16, UBS.

16. Ta eo Baibõl̦ ej ba kõn an juon jepel jãn eo pãleen im an juon ilo̦k jãn eo pãleen?

¹⁶ Jijej ear katakin armej ro bwe wãween eo wõt emãlim ñan an ruo rippãlele jepel, ej ñe eo ejjel̦o̦k ruon ejjab kõn̦aan jol̦o̦k bõd eo an armej eo pãleen me ear l̦õñ. Wãween eo in me Baibõl̦ ej kamãlim an rippãlele ro maroñ kõm̦m̦an aer peba in jepel im anemkwõj jãn kallim̦ur eo aer. (Matu 19:9; Hi. 13:4) Ak ta ñe juon ear jab l̦õñ ak ej baj jutak im etal jãn eo pãleen? Baibõl̦ ej bar kõnnaan kõn men in. (Riit 1 Korint 7:10, 11.) Baibõl̦ ejjab rõjañ im kwal̦o̦k un ko me emãlim an juon etal jãn eo pãleen ñe ear jab l̦õñ. Bõtab, jet Kũrjin rar lo bwe emenin aikuj ñan aer kõm̦m̦ane men in kõn jet un ko rel̦l̦ap im rejjab maroñ el̦l̦ã ioer. Ñan waanjoñak, rar pepe in ilo̦k jãn ro pãleer kõn aer m̦an er im likũt mour ko aer ilo kauwõtata ak kõn aer jum̦ae im kajjioñ kabõjrak aer karejar ñan Jeova.c—Lale kõmel̦el̦e eo itulal̦.

17. Ta eo rippãlele ro remaroñ kõm̦m̦ane ñan kõkajoor pãd eo aer?

¹⁷ Ñe rippãlele ro rej kepaak em̦m̦aan ro rej lale eklejia bwe ren lel̦o̦k naanin kakapilõklõk kõn apañ ko rej iiooni, enaaj em̦m̦an ñe rej kajjitõk ippãn rippãlele ro el̦aññe em̦õj aer alwõje pija eo What Is True Love? im katak ippãn doon kõn bok eo Baam̦le n̦e Am̦ Emaroñ M̦õn̦õn̦õ. Etke? Kõnke kein jipañ kein rej kwal̦o̦k naanin kakapilõklõk ko jãn Baibõl̦ me rar jipañ elõñ rippãlele ro ñan kõkajoor pãd eo aer. Ruo rippãlele rar ba: “Jãn iien eo kõm̦ro ar katak kõn bok in, ekar l̦apl̦o̦k wõt am̦ro m̦õn̦õn̦õ jãn kar m̦okta.” Juon kõrã me 22 iiõ in aerro kar l̦eo pãleen m̦are im m̦õttan jidik erro en kar jepel, ej ba: “Kõm̦ro jim̦or em̦õj am̦ro peptaij, bõtab wãween am̦ro kar l̦õmn̦ak im eñjake relukkuun kar oktak jãn doon. Elukkuun kar jejjet iien eo ekar diwõjtok pija eo What Is True Love? Kiiõ elukkuun em̦m̦anl̦o̦k pãd eo am̦ro.” Em̦õj ke am̦ m̦are? El̦aññe aet, eokwe komiro eo pãleem en kate komiro ñan l̦oore naanin kakapilõklõk ko an Jeova ilo mourin pãlele n̦e amiro. Amiro kõm̦m̦ane men in enaaj jipañ kom̦ro ñan kajejjet kallim̦ur eo amiro ñan doon im komiro naaj lukkuun lo m̦õn̦õn̦õ!

KALLIM̦UR EO AM̦ KE KWAAR BÕK KUN̦AAM̦ ILO JERBALIN SPECIAL FULL-TIME

18, 19. (1) Ta eo elõñ ro jemãn im jinen rar rõjañ ro nejier ñan kõm̦m̦ane? (2) Ta eo jemaroñ ba kõn ro rej pãd ilo jerbalin special full-time?

¹⁸ Kwaar ke kile bar juon men me kallim̦ur ko an Jepta im Hanna rej ãinl̦o̦k wõt juon kake? Ikijjeen kallim̦ur ko rar kõm̦m̦ani, jiroñ eo nejin Jepta im l̦adik eo nejin Hanna rar etal im jerbal ilo im̦õn kõppãd eo an Anij. Rar maroñ kõjerbal mour ko aer ilo wãween eo em̦m̦antata. Rainin, elõñ ro jemãn im jinen rej rõjañ ajri ro nejier ñan jibadek jerbalin full-time im kõjerbal aolepen mour ko aer ñan karejar ñan Jeova. El̦ap ad nõbar jo̦dikdik ro me rej kõm̦m̦ane men in ilo tõrein.​—Eka. 11:40; Sam 110:3.

¹⁹ Kiiõ, ewõr joñan in 67,000 Ri Kõnnaan ro an Jeova rej pãd ilo jerbalin special full-time ipel̦aakin lal̦ in. Jet rej jerbal ilo Betel̦, ro jet rej jerbal ilo jerbalin ekkal, ak itoitak im lol̦o̦k eklejia ko. Bar jet rej rũkaki ñan jikuul̦in Baibõl̦ ko, jipejel̦ bainier, mijinede, im rej lale Im̦õn Kweilo̦k ko Rel̦l̦ap im m̦õko rej kõm̦m̦ane jikuul̦in Baibõl̦ ko ie. Kajjojo iaan rein rar jaini peba eo me ej ba rej kallim̦ur bwe renaaj pokake im jokwane kõn men ko ewõr ippãer (Vow of Obedience and Poverty). Rein rar kallim̦ur bwe renaaj kõm̦m̦ane jabdewõt jerbal rej kajjitõk bwe ren kõm̦m̦ane ñan kowõnm̦aanl̦o̦k men ko an Aelõñ eo an Anij, im renaaj jokwane ilo mour ko aer, im bareinwõt reban kappok aer jerbal ilo lal̦ in m̦ae iien rej bõk mãlim. Ejjab armej rein eo ejejuwaer (special), ej jerbal ko aer. Rein rej kile bwe rej aikuj kõttãik bũrueer im kajejjet kallim̦ur eo rar kõm̦m̦ane toon wõt aer pãd ilo jerbalin special full-time.

20. Ta eo jen kõm̦m̦ane “raan otemjej,” im etke?

²⁰ Jete iaan kallim̦ur ko jaar etali me em̦õj am̦ kõm̦m̦ani ñan Anij? Kallim̦ur kein kajuon ke, kein karuo ak aolepeer jilu? Ejjel̦o̦k pere bwe el̦ap am̦ jel̦ã bwe elukkuun aorõk ñan am̦ kajejjet kallim̦ur eo am̦. (JK. 20:25, UBS) El̦aññe juon ejjab kajejjet kallim̦ur eo an ñan Jeova im ejjab kõl̦l̦ã men eo ear kallim̦ur kake, enaaj lo leen kõm̦m̦an ko an. (Ekl. 5:6, UBS) Kõn men in, jen m̦õn̦õn̦õ ilo ad ‘al im nõbar Jeova iien otemjej, im ilo raan otemjej ke jej lel̦o̦k ñane men ko jaar kallim̦ur kaki.’​—Sam 61:8, UBS.

[Kõmel̦el̦e ko itulal̦]