Bar Kalõk Jem̦jerã eo Am̦ Ippãn Jeova

KAJJOJO iiõ, elõñ iaan jiip ro raorõk rej bar jepl̦aaktok ñan eklejia eo ak ñan Jeova. L̦õmn̦ak kõn joñan an l̦ap “lañlõñ ilañ” ñe kajjojo iaan rein rej jepl̦aak! (Luk 15:7, 10) El̦aññe kwõj juon eo me ej kab bar jepl̦aaktok ñan Jeova, kwõmaroñ lõke im tõmak bwe Jesus, enjel̦ ro, im bareinwõt Jeova rej aolep m̦õn̦õn̦õ in bar lo am̦ jutak pen kõn m̦ool eo. Ijoke, ilo am̦ nãj bar kalõke jem̦jerã eo am̦ ippãn Jeova, kwõmaroñ iioon mãlejjoñ ko. Ta jet iaan mãlejjoñ ko kwõmaroñ iiooni, im ta ko remaroñ jipañ eok?

TA MÃLEJJOÑ KO?

Elõñ ro jeid im jatid rej tarin̦ae eñjake ko rekabbweerer ãlikin aer jepl̦aak ñan eklejia eo. Bõlen kwõj mel̦el̦e kõn eñjake ko Kiiñ Devid ear bũki. Meñe kar jeorl̦o̦k bõd ko an, ak ear ba: “Bõd ko aõ rar lukwarkwar eõ im bõk eõ.” (Sam 40:12; 65:3) Ãlikin an juon bar jepl̦aaktok ñan Jeova emaroñ bõk eñjake in jook im emaroñ nana wõt an mour ium̦win elõñ iiõ. Isabelle, eo me kar bukwel̦o̦ke ium̦win elõñl̦o̦k jãn 20 iiõ ko.a Ej ba, “Epen aõ kar tõmak bwe Jeova ear jeorl̦o̦k aõ bõd.” El̦aññe kwõj ebbweer, kwõmaroñ bar ro̦o̦l im m̦õjn̦o̦ ilo tõmak. (JK. 24:10) Kajjioñ jab kõtl̦o̦k bwe men in en wal̦o̦k ñan eok.

Ro jet remaroñ inepata im l̦õmn̦ak bwe rejjab maroñ kõm̦m̦ani aolep men ko renãj aikuj in kõm̦m̦ani bwe ren maroñ bar epaake Jeova. Ãlikin an kar Antoine bar jepl̦aak ñan Jeova, ej ba, “Ear ãinwõt ñe em̦õj aõ mel̦o̦kl̦o̦k ewi wãween aõ kar mour ke iar juon Kũrjin.” Kõn kain eñjake rot kein, jet remaroñ ãliklik in lukkuun bõk kun̦aaer ilo m̦akũtkũt ak jerbal ko ilo doulul in.

Ñan kõm̦m̦ane juon waanjoñak kõn men in, juon eo me ear jorrããn m̦weo im̦õn jãn juon kõto el̦ap emaroñ lukkuun nana an mour ñe ej l̦õmn̦ak kõn joñan iien im maroñ ko me enaaj aikuj julo̦ki ñan an bar kalõk m̦weo im̦õn. Ejja ãindeinl̦o̦k wõt, ñe ear jorrããn kõtaan eo am̦ ippãn Jeova kõn wõt juon jerawiwi el̦ap, kwõmaroñ bõk eñjake eo bwe ñan an maroñ bar em̦m̦an jem̦jerã eo am̦ ippãn Jeova, enaaj aikuj lukkuun l̦ap jerbal. Ijoke, ewõr jipañ ko me kwõmaroñ bũki.

Jeova ej kũr kõj ilo an ba: “Kom̦win itok kiiõ, im jen kõl̦mãnl̦o̦kjen̦ ippãn doon [ak, “kõm̦adm̦õdi apañ ko ikõtaad,” NW].” (Ais. 1:18) Em̦õj am̦ lukkuun kate eok ñan “kõm̦adm̦õdi apañ ko” ikõtaamiro Jeova. Im el̦ap an Jeova yokwe eok kõn am̦ kar lukkuun kate eok ñan kõm̦m̦ane men in. Baj l̦õmn̦ak m̦õk, em̦õj am̦ lel̦o̦k juon pedpedin an Jeova naaj kwal̦o̦k juon uwaak ekanooj kajoor ñan naanin riab n̦ae ko an Setan!—JK. 27:11.

Ilo am̦ kar kõm̦m̦ane men in, em̦õj am̦ kadede epaakel̦o̦k Jeova, im ej kallim̦ur bwe enaaj bar epaakewaj eok. (Jem. 4:8) Ijoke, ewõr bar men ko jet me juon enãj aikuj kõm̦m̦ani ilo an jepl̦aaktok ñan eklejia eo ijello̦kun an baj ro jet kile wõt bwe em̦õj an jepl̦aak. Kwõnãj aikuj wõnm̦aanl̦o̦k wõt ilo am̦ kõkajoorl̦o̦k yokwe eo am̦ ñan eo Jem̦am̦ im M̦õttam̦, Jeova. Ewi wãween am̦ maroñ kõm̦m̦ane men in?

KÕM̦M̦AN MEJÃNKAJJIK KO KWÕMAROÑ TÕPARI ILO AM̦ BAR KALÕK JEM̦JERÃ EO AM̦

Kajjioñ kõm̦m̦ane jet mejãnkajjik ko me kwõmaroñ tõpari. Keememej bwe pedpedin an kar ejaak tõmak eo am̦—jel̦ãl̦o̦kjen̦ eo kwaar bõke kõn Jeova im kallim̦ur ko an kõn ilju im jekl̦aj—men in emaroñ juon men kwõj keememeje wõt. Bõtab kiiõ kwõj aikuj bar kalõk mour eo am̦ ãinwõt juon Kũrjin. Men in ekitibuj am̦ kwal̦o̦k kõn ennaan eo em̦m̦an, im ekkeini am̦ kõm̦m̦ao ak kobal̦o̦k ippãn ro jeim̦ im jatũm̦ ilo tõmak. L̦õmn̦ak kõn mejãnkajjik kein tok jet itulal̦.

Ekkeini am̦ kõnono ippãn Jeova. Jeova, eo me ej Jem̦am̦, emel̦el̦e bwe ñe kwõj wõnm̦aanl̦o̦k wõt im bõk eñjake ko me rej kõm̦m̦an an nana am̦ mour kõn bõd eo kwaar kõm̦m̦ane, men in emaroñ kõm̦m̦an an pen am̦ jar ñane. (Rom 8:26) Meñe ãindein, ak kwõn ‘niknik ilo am̦ jar’ ñane im kwal̦o̦k ñane joñan am̦ kõn̦aan jem̦jerã ippãn. (Rom 12:12) Andrej ej keememejtok im ba: “Ear lukkuun nana aõ mour im iar jook. Bõtab, ãlikin aõ jar kajjojo iien, eñjake kein rar dikl̦o̦k. Ear l̦apl̦o̦k an aenõm̦m̦an kõl̦mãnl̦o̦kjen̦ eo aõ.” El̦aññe kwõjaje ta eo kwõn jar kake, lale im l̦õmn̦ak kõn jar ko an Kiiñ Devid, juon eo me ear kwal̦o̦k an ukel̦o̦k, ilo Sam 51 im 65.

Ekkeini am̦ katak Baibõl̦. Men in enaaj kõkajoorl̦o̦k tõmak eo am̦ im kõm̦m̦an bwe yokwe eo am̦ ñan Jeova en eddekl̦o̦k ak l̦apl̦o̦k. (Sam 19:7-11) Felipe ej ba, “Kõnke iar jab ekkeini aõ riiti Baibõl̦ im katak ippa make, men in ear kõm̦m̦an bwe in m̦õjn̦o̦l̦o̦k im kabũrom̦õj Jeova. Iar jab kõn̦aan bwe in bar kõm̦m̦ane ejja bõd in wõt, im iar pepe ñan kõm̦m̦an bwe katak ippa make en juon menin kõjparok eõ.” Kwe bareinwõt kwõmaroñ kõm̦m̦ane men in. El̦aññe kwõaikuj jipañ kõn katak ta ko me rejejjet ñan am̦ katak ippam̦ make kaki, kwõmaroñ kepaak juon m̦õttam̦ me erũtto ilo tõmak bwe en jipañ eok kõn men in.

Bar kalõk jem̦jerã eo am̦ ippãn ro jeim̦ im jatũm̦. Jet iaan ro me rar jepl̦aaktok ñan eklejia eo rej inepata ñe eban lukkuun em̦m̦an wãween an ro jet watõk ak l̦õmn̦ak kõn er. Larissa ej kwal̦o̦k eñjake eo an im ba: “Iar lukkuun jook. Iar bõk eñjake eo bwe ãinwõt ñe iar kõmetak im kabũrom̦õj ro ilo eklejia eo. Im eñjake kein ebwe an kar to aõ bũki.” Kwõn tõmak im lõke bwe em̦m̦aan ro rej lale eklejia eo kab Kũrjin ro jet rerũtto ilo tõmak el̦ap aer kõn̦aan jipañ eok ilo am̦ bar kalõke tõmak eo am̦. (Lale bo̦o̦k eo etan, “Ta eo Em̦m̦aan ro Rej Lale Eklejia Remaroñ Kõm̦m̦ane?”) El̦ap aer lañlõñ bwe em̦õj am̦ jepl̦aaktok, im rekõn̦aan bwe en em̦m̦an am̦ wõnm̦aanl̦o̦k!—JK. 17:17.

Ta eo emaroñ kõm̦m̦an bwe kwõn epaakel̦o̦k eklejia eo? Kwõn bõk kun̦aam̦ ilo men ko ro jeim̦ im jatũm̦ rej kõm̦m̦ani—kobal̦o̦k ilo kweilo̦k ko im ekkeini am̦ bõk kun̦aam̦ ilo jerbalin kwal̦o̦k naan. Ewi wãween an men in naaj jipañ? Felix ej ba: “Eklejia eo ear reim̦aanl̦o̦k ñan iien eo inaaj bar jepl̦aak. Iar bõk eñjake eo bwe iaorõk. Er aolep rar jipañ eõ bwe in bar erom m̦õttan baam̦le eo, ñan bõk eñjake eo bwe em̦õj jeorl̦o̦k aõ bõd, im ñan wõnm̦aanl̦o̦k wõt.”—Lale bo̦o̦k eo etan, “Ta eo Kwõmaroñ Kõm̦m̦ane?”

JAB EBBWEER!

Eban bõjrak an Setan wõnm̦aanl̦o̦k im kõm̦m̦an bwe kwõn iioon “taibuun ak kõto ko rel̦l̦ap” ilo kõkkar ñan kajjioñ kam̦õjn̦o̦ikl̦o̦k eok ilo am̦ bar kalõk jem̦jerã eo am̦ ippãn Jeova. (Luk 4:13) Kwõn pojak wõt ilo am̦ kõkajoorl̦o̦k kõtaan eo am̦ ippãn Jeova kiiõ.

Jeova ear kwal̦o̦k kallim̦ur in kõn jiip ko an: “Inaaj pukot ko rejako, im karo̦o̦ltok ko em̦õj kajjeplõklõki, im korake ko em̦õj kakinejnej, im kõkajoor ko rem̦õjn̦o̦.” (Ezk. 34:16) Elukkuun lõñ ro me em̦õj an Jeova jipañ er ña bar kakõm̦anm̦an kõtaan eo aer Ippãn. Kwõmaroñ tõmak im lõke bwe ekõn̦aan jipañ eok ñan wõnm̦aanl̦o̦k wõt im kalõk juon jem̦jerã Ippãn me elukkuun pen.

Ta eo Em̦m̦aan ro Rej Lale Eklejia Remaroñ Kõm̦m̦ane?

Elukkuun lõñ men ko em̦m̦aan ro rej lale eklejia remaroñ kõm̦m̦ani ñan jipañ ro me rej bar jepl̦aaktok bwe ren maroñ bar kalõk ak kakõm̦anm̦an kõtaan eo aer ippãn Jeova. Lale men ko me em̦m̦aan rein remaroñ kõm̦m̦ani ñan jipañ rein.

Kakeememej im kaenõm̦m̦an er. Rijjilõk Paul ear jel̦ã bwe juon eo ej ukel̦o̦k jãn jerawiwi ko an emaroñ lukkuun “ebbeer kõn an l̦e jãn joñan an bũrom̦õj.” (2 Kor. 2:7) Emaroñ wõr iien an bõk eñjake in jook im bũrom̦õj. Paul ear kakapilõk ro ilo eklejia bwe ren “m̦õn̦õn̦õ in jol̦o̦k an bõd im kaenõm̦m̦ane.” Ro me rej bar jepl̦aaktok rej aikuj jipañ ñan kakeememej er bwe Jeova im rũttõmak ro m̦õttaer el̦ap aer yokwe er. Ñe em̦m̦aan ro rej lale eklejia rej ekkeini aer kam̦m̦oolol ak nõbar er im jipañ er ilo wãween ko renaaj bõk tokjãn jãni, men in emaroñ jipañ bõbrae aer jino ebbweer.

Jar ippãer. “Jar in akwel̦ap eo an juon eo ewãnõk ekanooj in kajoor im l̦ap tokjãn.” (Jem. 5:16) Larissa, eo me kar kwal̦o̦k kake m̦oktal̦o̦k ej ba: “Iar kwal̦o̦k ñan em̦m̦aan ro rej lale eklejia eo kõn men ko ij mijak im pere kaki. Rein rar jar kõn ña. Innem iar mel̦el̦e bwe em̦m̦aan ro rej lale eklejia eo rejjab illu ippa. Rar kõn̦aan jipañ eõ bwe en bar em̦m̦an kõtaan eo aõ ippãn Jeova.” Theo ej ba: “Jar ko an em̦m̦aan ro rej lale eklejia rar jipañ eõ ñan tõmak im lõke bwe Jeova elukkuun m̦ool an yokwe eõ im bwe ej lo em̦m̦an ko ippa, im jab men ko wõt me renana.”

M̦õttãik er. Ro me rej jepl̦aaktok rej aikuj ro m̦õttaer ilo eklejia eo. Juon iaan em̦m̦aan ro rej lale eklejia etan Justin ej ba, “Kwõn lale jabdewõt wãween ko repel̦l̦o̦k ñan am̦ maroñ kũrwaj er ñan jerbal ippãer ilo kwal̦o̦k naan, im men eo eaorõkl̦o̦k, lol̦o̦k er ilo m̦õko im̦weer. Elukkuun aorõk ñan ad m̦õttãik er!” Bar juon em̦m̦aan me ej lale eklejia etan Henry ej ba, “Ñe ro jet ilo eklejia eo rej lo an em̦m̦aan ro rej lale eklejia m̦õttãik ro me rej jepl̦aaktok, renaaj bar kõm̦m̦ane ejja men in wõt.”

Jipañ er ñan katak. Juon eo me erũtto ilo tõmak emaroñ jipañ juon eo ej jepl̦aaktok ñan ejaake juon imminene ñan ekkeini an katak ippãn make. Juon em̦m̦aan ej lale eklejia etan Darko ej ba: “Em̦m̦an ippa bwebwenato ippãer im kwal̦o̦k kõn boin ko raorõk me iar loi jãn aõ katak ippa make im kaalikkar joñan aõ itoklimo kõn katak Baibõl̦. Juon men ij bar kõm̦m̦ane ej kõm̦m̦an karõk ñan am etale jet katak ippãn doon.” Bar juon em̦m̦aan ej lale eklejia etan Clayton ej ba: “Ij rõjañ er ñan kappukot bwebwenato ko ilo Baibõl̦ me wãween ko rar wal̦o̦k eitõnl̦o̦k wãween ko me rej bar iiooni im ta ko remaroñ katak jãn bwebwenato kein.”

Jabõte er. Ro me rej jepl̦aaktok em̦õj aer lo an em̦m̦aan ro rej lale eklejia jerbale eddo eo aer ãinwõt ro im rej ekajet. Ak kiiõ, el̦apl̦o̦k aer aikuj in lo im watõk rein ãinwõt jabõt ro aer ak ro im rej ri-lale er. (Jrm. 23:4) Kwõn m̦õkaj in roñjake im pojak in lel̦o̦k naanin nõbar. Ekkeini am̦ kõnono ippãer. Eñin men eo juon iaan em̦m̦aan ro me rej lale eklejia etan Marcus ej kõm̦m̦ane ñe rej lol̦o̦k rein, ej ba: “Kõmij kwal̦o̦k juon l̦õmn̦ak jãn Baibõl̦, nõbar er, im kaalikkar ñan er bwe kõmij m̦õn̦õn̦õ kõn aer lukkuun kar kate er ñan jepl̦aaktok im bwe Jeova, el̦ap an bar buñbũruon im m̦õn̦õn̦õ kõn er. Aolep jem̦l̦o̦kin kajjojo iien kõmij lol̦o̦k er, kõmij karõk bar juon iien ñan am bar jepl̦aak im lol̦o̦k er.”

a Em̦õj ukot ãt ko etan armej ro ilo katak in.