Kajjitõk Ko Jãn Ro Rej Riit
Ta boin eo jãn kien ak naanin jiroñ eo ilo Livitikõs 19:16 ñan jab “jutak jum̦ae bõtõktõkin” bar juon armej, im ta eo jemaroñ katak jãn men in?
Jeova ear rõjañ ri-Israel ro bwe ren kwõjarjar. Ñan jipañ er katõprak men in, ear ba ñan er: “Kwõn jab itoitak ãinwõt juon ri-ruruwe eol̦apãn armej ro am̦, im kwõn bareinwõt jab jutak jum̦ae bõtõktõkin ri-turum̦: Ña Jeova.”—Liv. 19:2, 16.
Naan kein “jutak jum̦ae,” elukkuun em̦m̦an aer kaalikkar mel̦el̦e eo kar je ilo kajin Hibru, ak ta mel̦el̦ein naan kein? Juon bok an ri-Ju ro kõn bokin Livitikõs ej ba: “Baat in ilo eoon in elukkuun . . . pen ñan ukote kõn wõt apañ eo ñan lukkuun mel̦el̦e jitael̦ in kõnono (idiom) in ilo kajin Hibru me ej mel̦el̦ein, ‘jab jutak ioon, ikijjeen, ak epaake.’”
Jet rimmãlõtlõt ro rej l̦õmn̦ak bwe naan kein rej ekkejell̦o̦k ippãn eoon eo m̦oktal̦o̦k jãn eoon in me ej ba: “Kom̦win jab kõm̦m̦an jab wãnõk ilo ekajet. Kwõn jab kalijekl̦o̦k ri-jeram̦õl, im kwõn jab kautiej eo ekajoor, a ilo wãnõk kwõn ekajete ri-turum̦.” (Liv. 19:15) Ilo wãween in, mel̦el̦ein bwe naanin jiroñ eo ilo eoon 16 ñan jab “jutak jum̦ae” n̦ae bar juon armej emaroñ mel̦el̦ein bwe armej ro an Anij ren jab ko̦kkure ak kõjorrããn juon eo me ej jerbal ippãer ñe ej liaakel̦o̦k ñan jikin ekajet, ak ikijjeen peejnej, ak apañ ko an ilowaan juon baam̦le. Im en jab kajjioñ ukotl̦o̦k juon men ak jerbal jab jim̦we ñan an kõjeraam̦m̦an e make. Em̦ool bwe jejjab aikuj kõm̦m̦ani wãween kein, bõtab ebar lõñl̦o̦k wãween ko rejim̦we im alikkar ñan mel̦el̦e kõn naan kein ilo eoon 16.
L̦õmn̦ak kõn naanin kõppel̦l̦o̦k ko ilo tujinoin eoon in. Anij ear jiroñ armej ro an bwe ren jab itoitak im ruruwe. Keememej bwe ruruwe el̦apl̦o̦k an eddo im nana jãn an juon baj kõnnaan kõn ro jet, ijoke jejel̦ã bwe kõnnaan kõn ro jet emaroñ bar bõktok el̦ap apañ. (JK. 10:19; Ekl. 10:12-14, UBS; 1 Tim. 5:11-15; Jem. 3:6) Ruruwe ekkã an wal̦o̦k ilo naan, im kõttõpar eo an juon eo ej ruruwe ej ñan ko̦kkure etan bar juon armej. Eo me ej ruruwe emaroñ kwal̦o̦k mel̦el̦e ko reriab n̦ae armej eo juon, meñe an kõm̦m̦ane men in enaaj likũt mour eo an armej eo ilo kauwõtata. Ñe jej keememejl̦o̦k, ewõr em̦m̦aan ro me rar riab n̦ae Nebot, im men in ear kõm̦m̦an bwe ren kade Nebot ñan mej meñe ear ejjel̦o̦k ruõn. (1 Kñ. 21:8-13) Aet, juon eo ej ruruwe emaroñ jutak jum̦ae bõtõktõkin bar juon armej ak kõm̦m̦an bwe armej eo en mej, ãinwõt an jem̦l̦o̦kinl̦o̦k Livitikõs 19:16 kwal̦o̦k kake.
Bareinwõt, juon emaroñ lukkuun ruruwe bar juon armej itok wõt jãn an lukkuun dike armej in. Ilo 1 Jon 3:15, ej ba: “Jabdewõt eo ej dike jein ak jatin, ej juon ri-uror, im kom̦ jel̦ã bwe ejjel̦o̦k mour indeeo ippãn juon eo ej ri-uror.” Elukkuun aorõk ñan jel̦ã bwe ãlikin wõt naanin jiroñ eo ilo eoon 16, Anij ear kwal̦o̦k mel̦el̦e in: “Kwõn jab dike ri-turum̦ [ak, “eo jeim̦ ak jatũm̦,” NW] ilo bũruom̦.”—Liv. 19:17.
Innem naan kein me elõñ rej kõn̦aan mel̦el̦e kaki me kar jei ilo Livitikõs 19:16 rej letok juon naanin kauwe ak kakapilõklõk me ekajoor im aorõk ñan Kũrjin ro. Jej aikuj in kõjparok kõj jãn l̦õmn̦ak ko rejjab em̦m̦an im jab ruruwe ak kõnono n̦ae bar juon armej ñan jidik. Ñe jej “jutak jum̦ae” bar juon armej ilo ad kõtl̦o̦k bwe dike ak ebbanban en kõm̦m̦an ad ruruwe armej eo, men in emaroñ kaalikkar bwe jedike armej in. Ro rej Kũrjin rej aikuj in jab kõm̦m̦ane men in ñan jidik.—Matu 12:36, 37.