Kwõpojak Ke ñan “Jolõte Lal̦ In”?

POJAK ÑAN JIPAÑ KÕM̦M̦AN BWE LAL̦ IN EN JUON PEDETAIJ

Ke Jeova ear jiroñ armej ro ñan “koobrak lal̦, im kajoor jãne,” ear kaalikkar bwe aolepen lal̦ in enaaj jidik kõn jidik etal ñan an erom juon pedetaij. (Jen. 1:28) Ro me renaaj mour ñan indeeo renãj aikuj pokake ejja kakien in wõt. Ijoke, lal̦ in eban kajju juon pedetaij kõnke em̦õj an jako jikin kallib in Iden. Ãlikin wõt Armagedon, enãj lukkuun l̦ap jerbal ko jaikuj kõm̦m̦ani ñan karreoiki jikin ko ilo lal̦ in me rejorrããn. Ejjel̦o̦k pere bwe enaaj juon eddo el̦ap!

Men in ekakeememej kõj kõn eddo eo me ri-Israel ro rar jelm̦aiki ke rar jepl̦aak jãn Babil̦on. Ear ejjel̦o̦k armej rar jokwe ilo aelõñ eo aer ium̦win 70 iiõ. Bõtab Aiseia ear kanaan im ba bwe ikijjeen kõjeraam̦m̦an eo an Jeova, renaaj maroñ kõm̦m̦an bwe en bar aiboojoj ãneo. Kanaan eo ear ba: “[Enaaj] kõm̦m̦an ãne jem̦aden ie bwe en ãinwõt Iden, im ãne jem̦aden in bwe en ãinwõt jikin kallib an Jeova.” (Ais. 51:3) Ri-Israel ro rar lo tõprak. Ejja ãindeinl̦o̦k wõt, ikijjeen kõjeraam̦m̦an eo an Jeova, ro me renaaj jolõte lal̦ in renaaj lo tõprak ilo aer jipañ kõm̦m̦an bwe lal̦ in en erom juon pedetaij. Im ewõr men ko me kwõmaroñ kõm̦m̦ani kiiõ ñan kaalikkar bwe kokõn̦aan bõk kun̦aam̦ ilo naaj jerbal in.

Juon wãween ej ilo am̦ kõm̦m̦an jabdewõt men kwõmaroñe ñan kõm̦m̦an bwe en erreo im karbõb m̦weo im̦õm̦ kab men ko ipel̦aakin. Kwõmaroñ kõm̦m̦ane men in meñe ro ri-turum̦ rejjab kõm̦m̦ane. Kwõmaroñ bar jipañ karreoik im kõjparok Im̦õn Kweilo̦k eo im Im̦õn Kweilo̦k eo El̦ap ilo jikin eo kwõj pãd ie. El̦aññe em̦m̦an jabdewõt im ewõr am̦ maroñ, kwõmaroñ bareinwõt kanne application ñan am̦ maroñ bõk kun̦aam̦ im jipañ ilo iien ko ewõr jorrããn. Men in enaaj kaalikkar bwe kokõn̦aan jipañ ñe ewõr jabdewõt aikuj. Kajjitõk ippam̦ make men in, ‘Imaroñ ke ekkatak jet kapeel ko me imaroñ kõjerbali el̦aññe inaaj bõk jeraam̦m̦an eo ñan jolõte lal̦ in?’

POJAK ÑAN JIPAÑ LALE AIKUJ KO AN RO RENAAJ JERKAKPEJE

Ãlikin wõt an kar Jesus kõjerkakpejeik ledik eo nejin Jairõs, ear ba bwe rej aikuj lel̦o̦k kijen ledik eo bwe en m̦õñã. (Mark 5:42, 43) Emaroñ kar jab juon jerbal epen ñan lale ledik in me 12 an iiõ. Ijoke l̦õmn̦ak kõn joñan jerbal eo jenaaj aikuj kõm̦m̦ane ñe Jesus enaaj kajejjet kũtien kallim̦ur in an bwe “aolep ro rej pãd ilo lõb ko renaaj roñ ainikien im diwõjtok.” (Jon 5:28, 29) Meñe Baibõl̦ eo ejjab tipdikitok elõñ mel̦el̦e ko, ak jemaroñ pijaikl̦o̦k an ro renaaj jerkakpeje aikuj jipañ ñan kappok kijeer, jikin aer jokwe, im aer nuknuk. Meñe ilo tõre in ak kwõmaroñ ke kaalikkar bwe kwõpojak ñan jipañ? Ewõr jet kajjitõk ko itulal̦ me kwõmaroñ l̦õmn̦ak kaki.

Ñe rej kõjjel̦ã im ba bwe ri-lotok eo enaaj lowaj eklejia eo am̦, kwõj ke kõm̦m̦an karõk ñan m̦õñã ippãn? Ñe rej bar kõjepl̦aak ro me rej pãd ilo jerbalin jipejel̦ full-time ilo Betel̦ bwe ren bar ro̦o̦l ñan jerbalin kwal̦o̦k naan ak ñe juon eo ej lol̦o̦k eklejia ej kõjem̦l̦o̦k an pãd ilo jerbalin lol̦o̦k eklejia ko, kwõmaroñ ke jipañ er ñan kappokl̦o̦k jikin aer jokwe? Ñe juon iien kweilo̦k el̦ap (regional ak special convention) enaaj bõk jikin ilo jikin eo kwõj pãd ie, kwõmaroñ ke volunteer ñan jipañ m̦okta jãn ak ãlikin iien kweilo̦k el̦ap eo ak karwaineneiktok ro me rej itok jãn ijoko jet ñan iien kweilo̦k eo?

POJAK ÑAN KATAKIN RO RENAAJ JERKAKPEJE

Ekkejell̦o̦k ippãn Jerbal 24:15, jej kõtmãne bwe elõñ pilien armej ro renaaj jerkakpeje. Elõñ iaan rein rejjañin kar jel̦ã kajjien Jeova. Im jeraam̦m̦an in enaaj pel̦l̦o̦k ñan er ãlikin aer jerkakpeje.a Ri-karejar ro an Anij me retiljek im el̦ap imminene ko ippãer renaaj bõk kun̦aaer ilo jerbal in ñan katakin. (Ais. 11:9) Charlotte, eo me ear kwal̦o̦k naan ilo Europe, South America, im Africa, ej reim̦aanl̦o̦k ñan men in. Ej kwal̦o̦k an m̦õn̦õn̦õ im ba: “Ij reim̦aanl̦o̦k in nãj katakin armej ro ilo iien jerkakpeje eo. Ñe ij riit kõn juon eo me ear mour ilo iien ko m̦oktal̦o̦k, ekkã aõ l̦õmn̦ak im ba: ‘Yokwe bwe ñe armej in en kar jel̦ã kajjien Jeova, enaaj kar lukkuun oktak mour eo an.’ Ikijooror in nãj kwal̦o̦k ñan ro renaaj jerkakpeje kõn Jeova im kõn joñan an nãj em̦m̦an mour ko aer ñe renaaj karejar ñane.”

Meñe ri-karejar ro retiljek an Jeova me rar mour m̦oktal̦o̦k jãn an kar Jesus itok ñan lal̦ in ak enãj lukkuun lõñ men ko renaaj aikuj katak. Baj pijaikl̦o̦k m̦õk joñan an nãj juon men ekalañlõñ im juon jeraam̦m̦an el̦ap ñan kõmel̦el̦eik Daniel kõn jejjetin kũtien kanaan ko me ear jei ak ear jab mel̦el̦e kaki. (Dan. 12:8) Ak ta kõn jeraam̦m̦an eo ñan jipañ Rut im Naomi ñan katak im jel̦ã kõn an kar Messaia eo itok jãn l̦ain in baam̦le eo aer? Enaaj juon men ekalañlõñ ñan bõk kun̦aad ilo jerbalin katakin eo ipel̦aakin lal̦ in, ilo an ejjel̦o̦k menin ijjiped im kõm̦ad ko an jukjukun pãd in enana rainin!

Ta ko kwõmaroñ kõm̦m̦ani kiiõ bwe kwõn maroñ pojak ñan katakin ro renaaj jerkakpeje? Juon wãween ej ilo am̦ kate eok ñan kakõm̦anm̦anl̦o̦k am̦ kapeel ilo katakin im ilo am̦ ekkeini am̦ bõk kun̦aam̦ ilo jerbalin kwal̦o̦k naan eo ipel̦aakin lal̦ in me ej wal̦o̦k ilo raan kein. (Matu 24:14) Meñe kwõjjab maroñ lukkuun bõk kun̦aam̦ ilo jerbalin kwal̦o̦k naan kõn wõt joñan am̦ rũtto ak kõn un ko jet, ak kwõmaroñ kwal̦o̦k bwe kwõlukkuun kijooror in katakin ro renaaj jerkakpeje ilo am̦ kate eok joñan wõt am̦ maroñ kiiõ ilo jerbalin kwal̦o̦k naan.

Kajjitõk eo eaorõk in kiiõ, Kwõj ke lukkuun m̦oolin reim̦aanl̦o̦k ñan am̦ naaj jolõte lal̦ in? Kwõj kijooror ke im reim̦aanl̦o̦k ñan am̦ naaj jipañ kõm̦m̦an bwe lal̦ in en juon pedetaij, im jipañ kõn aikuj ko kab katakin ro me renaaj jerkakpeje? Kwõmaroñ kaalikkar am̦ pojak ilo am̦ kate eok ñan bõk kun̦aam̦ ilo jerbal ko rainin me rej ãinl̦o̦kwõt jerbal kein me rej itok wõt, ñe kwõnaaj jolõte lal̦ in!