Baibil Sturka Nani Bukka
NAHA bukka na sturi rait takan nani ba dukyara sa. Tasba ra buk kau tara, Baibil ba wina brin. Bukka na, Gâd tasba ra diara nani paski ta krikan ba wina yawan iwi na pyua kat dukyara aisisa. Bara Gâd kaina tanira diara daukaia pramis munan ba dukyara sin aisisa.
Bukka na Baibil ra dia dukyara wan aisi ba tanka marikisa. Baibil uplika nani bara witin nani dia daukan ba dukyara sin aisisa. Bara Gâd mita upla nani ra paradais tasbaia kum ra raya ban kaiara iwaia bila kaikanka yaban ba dukyara sin aisisa.
Sturi 116 brisa. Ulbanka Daknika 8 ra baiki sakan sa. Ulbanka Daknika wahya ta krikanka banira bila kunhku ra ulbi marikan sa dia dukyara aisi ba. Sturka nani na dia pyua ra takan ba kat ulban sa. Baha mita man sip sma sturi wala nani wal praki kaiki sturka kumi bani ba ahkia takan ba tanka pain briaia.
Sturka nani na bila aisanka isi ra ulban sa. Tuktan ailal sip kabia silp aisi kaikaia. Aisa yapti nani kaikbia, kli kli naha sturka aisi kaikanka walaia ba, ai luhpia nani ra lihki kabia. Bukka na wahma, tyara bara almuk nani dukyara diara aihka painkira ailal bri ba kaikma.
Sturka kumi bani tnata ra Baibil tikska nani marikisa. Naha nani na aisi kaikma dukyara kupiam buki bangwisna. Sturka kum aisi kaiki danh takma taim, makabi walanka nani taki ba laki kaiks. Naha makabi walanka nani ba sturi 116 wina takisa bara trai muns ansika nani kupiam kraukaia.