MAKABI WALANKA 7
¿Rug lâka daukaia upla taibi ai munbia kaka dîa daukaia sip sna ki?
¿MAN DÎA DAUKMA?
Nahara luks: Yondra bara Miguel wal kati wâl kut munisa, sakuna Yondra ba lukisa piu wihka wina Miguel wal kakaira sa. Yu bani pana pana chat munisa, telefono bâk aisisa, bara kumi bani kau aisi danh takras ba ra, wala ba pat nu sa dîa aisabia ba. Ban sakuna, Miguel ba kau diara wala daukaia want sa.
Miguel bara Yondra wal ai mihta alki wapisa, bara aima kum kum wâl kîa walan sa. Yondra ba diara wala daukaia want apia sa, sakuna sîa brisa Miguel ba witin ra swibia. Miguel lamara sa taim witin pain ai dara walisa. Baha mita witin lukisa: “Miguel ra latwan sna bara witin latwan ai kaikisa”.
Upla kum wal kut munaia mankam pat brisma, bara Yondra katma kaka, ¿dîa daukaia kapram?
LUKI KAIKS
Wan maya wal brih prawaia ba Gâd prisantka kum sa, bara marit takan uplika nani ra baman baha chanska yaban sa. Kau marit takras upla kum wal brih prawma kaka, baha prisantka ba bahki kulkma. Nahara luks, upla kum prâk painkira kum maikisa, sakuna man baha prâkka ba diara tâski klin munaia kwalka baku yus munisma kaka, baha prisantka ba bahki kulkisma, sim baku sa kau marit takras upla kum wal brih prawaia ba.
Man dus kum ra uli tnawira baku pâlaia wisi kauhma kaka pât brima, ¿rait apia? Man upla kum wal marit takras rug lâka daukma kaka, sim baku mai takbia bara baku lâ kum krikma (1 Tesalonaika 4:3).
¿Baha lâka man krikma kaka, dîa takbia? Baibil ba wisa: “Ai maya briras tâski lâka dauki uplika ba, ai wîna tara mapara saura daukisa” (1 Korint 6:18). ¿Baha dîa tânka sa ki?
Tânka pliki kaikanka nani wisa, wahma bara tiara ailal kau marit takras upla wal brin ba mita pât wahwisa, nahara mariki ba baku:
UPLA SAURA DAUKAN TÂKA MITA AI SWIRA BRISA BARA SARI TAKAN. Wahma bara tiara ailal kau marit takras upla wal brin ba wisa saura daukan, bara baha mita ai swira tara brin.
LUKAN SAURA BRISA. Wahma bara tiara kum kum rug lâka daukan ningkara, ai wîna kat lukisa ai maya ba ya wal sin brih prawan sapa.
KUPIA KRIWAN. Tiara ailal want sa ai maya ba witin ra main kaikbia, sakuna ai maya witin ra lulki swibia lika want apia sa. Bara wahma ailal ba isi lâka ra tiara kum wal brih prawan ningkara, tiarika ra lulki swisa.
Bîla prahni ra: Kau marit takras upla kum wal brih prawma kaka, upla rispik mai munbia apia (Roman 1:24). Wînam tara ba kulkanka tara brisa. ¡Upla ra prisant yapara!
Kupiam karna bas, marit takras sma kaka upla kum wal bripara (1 Tesalonaika 4:3). Marit takma taim, chanska brima upla kum wal brih prawaia. Bara baha piua ra, maritkam dukiara saura lukma apia, baku sin saura daukram ba lukma apia, kupiam kriwan sin takma apia. Marit takras wâl brih prawi uplika nani ba lika trabil brisa (Sins Lâka 7:22, 23; 1 Korint 7:3).
¿DÎA LUKISMA?
Upla kum rait latwan mai kaikisa kaka, ¿rait apia man wînam tara yamnika bara kupiam liliaka ba dukiara lukaia sa?
Baku sin, upla kum man yamnika dukiara lukisa kaka, Gâd lâka nani ba krikma mai wibia apia, ¿rait apia? (Hibru Nani 13:4).