Smalkisa taim dia muni upla mawan ra kaikaia sa ki?

Wan nakra nani ba dia luki bara wan daukanka nani ba param marikisa. Sip sa lilia laka kum kaikaia apia kaka sîbrin laka sin marikaia. Baku sin, sam taim latwan laka, umpira kaikan laka sin marikisa. Waitna almuk kum witin ai taunka wina uplika nani pât ailal wauhwan kan dukyara, naku win: “Wan nakra nani ra kaikisa sari laka tara bara ba”.

Upla wala nani ba yawan diaura kaiki ba wina tanka kum sakaia sip sa, yawan dia aisi ba bara dia sat uplika sa. Kuntri kum kum ra upla kum upla wala mawan ra lilia baku kaikisa kaka, naha sat uplika ra kasak lukisa. Sakuna, upla mawan ra kaikaia watlika ra, upla kum ai lal makupi tasba ra kaikisa kaka, baha sat uplika ra uya kasak lukras. Kuntri wala ra, upla kum upla nakra kat uba kaikisa kaka, baha sat uplika ra ai swira laka apu sa kulkisa, apia kaka unsabaia want sa bara upla ra kulkras baku kaikisa. Bara plis kum kum ra wahma tyara kum upla almuk kum wal aisisa taim nakra kat kaikisa kaka, rispik laka apu sa marikisa.

Sakuna, plis kum kum ra yawan smalkisa taim upla mawan ra kaikisa kaka, yawan dia aisi ba ra kasak lukisa marikisa. Kaiks nahki Jisas ansika kum yaban, witin disaipelka nani diara kum makabi walan taim: “Baku bara ya sip swaki sakan kabia ki?” Baibil bila: “Jisas witin nani ra kaikisi, win: ‘Upla nani ba naha na daukaia sip apia sa, sakuna Gâd lika diara sut daukaia sip sa’” (Mat. 19:25, 26). Baibil sin wisa apastil Pâl ba upla nani mawan ra kaiki kan. Yu kum witin smalki kan pyua ra waitna kum aisubi takan wina skahwa kan ba bara kan. Wark nani 14:9, 10 bila: “Bara naha waitnika lika Pâl dia aisi kan ba kat aman pali wali kan. Bara Pâl waitnika ba kat taui kaikan bara, ai dara walan nahki naha waitna kasak luki kan witin ba rawbia. Bara ai bila baikra karna wini, win: ‘Minam ra wapni bus’”.

Smalkaia warkka dukyara helpka nani. Yawan upla nani ra smalkisa taim, lilia bara rispik laka wal aisaia sa. Sanska bara sa kaka, sip sa makabi walanka kum daukaia, witin nani wal aisanka kum ta krikaia dukyara. Trai kaiks ta wina uplika mawan ra kaikaia, apia kaka lilia laka wal bara rispik laka wal aisas. Liliakira upla nani ra kaikisa kaka, upla nani ba want kabia yawan wal aisaia. Kan, naku daukisa taim upla nani ra marikisa yawan dia sat uplika sa, bara uplika ai srînhka bribia apia.

Ani pyua ra sanska kum bara sa kaka, uplika nakra ra kaiks, kan naku tanka brima nahki witin wal aisanka kum ta krikaia. Ban kra, nu takma watla dawanka ba ai kupia baikan sa, apia kaka walaia want apia sa bara dia aisisma ba tanka briras. Baku sin, nu takma witin ba mahka waia want sa, apia kaka dia yawan aisi ba aman walisa sapa. Witin nakra ra kaiki, nu takaia sip sa kau isti, apia kaka kau tawa aisaia nit sa sapa. Baku sin, nu takaia sip sa witin kau aisaia want sa, apia kaka wan aisanka ba mahka dan prakaia sa. Bara sin nu takma Baibil stadika kum nahki ta krikaia marikaia sip sma sapa.

Smalkaia warkka ra sa taim, apia kaka Baibil stadika kum yabisa pyua ra, upla mawan ra rispik laka wal kaikaia trai munaia sa. Sakuna, witin nakra pali kat kaiki kaia lika apia sa, kan naku daukbia kaka, witin ai swira bribia (2 King 8:11). Kau pain sa, yawan minit kum witin ra kaikuya, baha wina wan nakra diara wala ra kaikaia sa, kan naha ba, kuntri ailal ra tnatka pain kum baku kaikisa. Bara Baibil ba apia kaka ulbi sakanka kum aisi kaikisma taim, namkra nani ba baha pali ra mangki kaikaia sma. Bara uplika ra diara kum wiaia want sma kaka witin nakra nani ra minit kum kaikaia sip sma. Bara Baibil ba aisi kaikisma ba ra, sam taim uplika ra kaikaia sip sma, kan baku nu takma witin nahki ai dara walisa.