Smalkaia warkka wan taura bri kaia
1. Jisas mapara smalkaia warkka ba kau tara kan ba nahki marikan?
1 Jisas mapara, smalkaia warkka baman ai rayaka aiska ra kan. Baha warkka daukaia dukyara Pilistain taunka ra ai mina ni wapi upla an ra wih kaikaia sip kan ba 100 kilumita pura smalkan. Baha sim taka ba mita, ai rayaka ba isi tnatka ra iwan, baku witin sip kan naha warkka ra kau ai taimka yabaia bara pain daukaia (Mat. 8:20). Upla ailal ai uplika siknis bri kan nani ba Jisas ra brih balan rakbia dukyara. Witin nani want kan alki takaskaia, sakuna Jisas win: “Yang taun wala nani ra sin Gâd King aimaki ba Laka sturka ba wiaia, kan baha dukyara ai blikan sa” (Luk 4:43).
2. Dia muni Jisas mapara smalkaia warkka ba kau tara kan?
2 Dia muni Jisas mapara smalkaia warkka ba kau tara kan? Kan diara sut purkara, witin Gâd nina ba hulikira daukaia want kan (Mat. 6:9). Bara ai Aisika ra uba latwan kaiki kan ba mita: Witin mita daukaia win ba kat daukaia want kan (Jan 14:31). Baku sin, upla nani ra luki kan bara help munaia want kan (Mat. 9:36, 37).
3. Yawan nahki marikisa smalkaia warkka ba taura brisa?
3 Jisas tnata lukaia. Jisas naha warkka kaikan baku kaikaia ba, yawan mapara karna kaia sip sa. Kan, naha tasba dukya nani uba wan taimka tiki bara diara bahki nani ailal yan wan nakra ra kaikisa (Mat. 24:37-39; Luk 21:34). Baha mita, aitani kabia diara yamni tanka ba trai kaiki aihwa man kulki kaia bara smalkaia warkka daukaia dukyara taim sakaia (Pil. 1:10). Baku sin, trai munaia sa wan rayaka ba kau isi iwaia bara naha tasba helpka saki ba aiska pali yus munaia apia (1 Kor. 7:31).
4. Dia muni aitani sa smalkaia warkka ba taura bri kaia?
4 Sins laka bri uplika ba ai taimka wiria man sa kaiki, nu sa dia ba pas alki daukaia sa. Sampla baku marikbia, pasa karna kum krauisa kaka pas ai pamalika kan kahbaia wisi, ai taimka, ai karnika sut yabisa bara ai lama uplika ra sin maisapahkisa. Kan diara wala nani ba bila kaikaia sip sa, rait apia? Rait pali, kau pyu wiria baman sa Harmagedon payaska karna ba wan pura ra balbia (Sip. 1:14-16; 1 Kor. 7:29). Bahamna, wan wîna tara bara wan wali bangwi rayaka sin swaki sakaia want sa kaka, kangrigisan bila ra apia kaka latara tauki kabia kra, wan wîna ba kat, bara wan smalkanka ba sin aman kaiki kaia sa (1 Tim. 4:16). Kasak sika, smalkaia warkka ban wan rayaka ra taura mangki brisa kaka raya kaia laka ba bribia.