Nu Takan Daukisa

◼ Taura smasmalkra nani ra nahki ta baikaia sip sa ki?

Tasba aiska ra smalkaia warkka ta krikaia manka 2009 ba ra, 800.000 muihni lakri nani taura smasmalkra bara pyu aiska smasmalkra baku takan. Naha smalki tataukra pyu aiska smalkaia warkka dauki ba, ai taimka, ai karnika bara diara sut bri ba King laka sturka nani smalkaia dukyara yus munisa (Sins.l 3:9). Witin nani baha sakripaiska daukan ba tawan Jehova lilia pali sa! Nahki tnatka ra yawan Jehova tnata lukaia sip sa? Smalkaia warkka ra witin nani liliakira bara bapi buan laka wal smalkbia dukyara yawan dia daukaia sa?

Wan bila aisanka pain nani wal taura smasmalkra nani kupia bukaia sip sa, smalkaia warkka ba ban ai taura brih wabia (Sins.l 25:11). Witin nani wal smalkaia dukyara wan taimka ba laki kaiki, chens munaia sip sa ki? Taura smasmalkra kum wal smalki kabia taim, yawan wiaia sip sa witin trukka yus munaia watlika ra selp wan trukka ba yus munbia. Bara witin nani trukka ra aikuki waia makabia kaka, wilin kaia sa pana ta baikaia, apia kaka witin nani pasiska aibapaia sip sa (1 Kor. 13:5; Pil. 2:4). Witin nani ra yamni muni wan latwanka laka marikisa. Baku sin, sam taim wan watla ra wih plun kum piaia dukyara paiwaia sip sa (1 Pi. 4:8, 9).

Baibil bila King laka pas taura mangki uplika nani ra Jehova dia nit ba yabia (Lawana 37:25; Mat. 6:33). Tnatka kum Jehova yus muni ba sika wan aslika laka latwankira ba (Jan 3:16-18). Sakuna, taura smasmalkra nani ba bila kaikras sa lalah trabilka mapara upla wala nani mita witin nani ra ta baikbia. Ban kra, taura smasmalkra nani ba dia ai nitka bri kabia sin upla wala ra aisaras. Bahamna, yawan taura smasmalkra nani ra help munaia sip sa bara witin nani wal “yui briaia”, baku sin ridi kaia sa dia nit ba ra kaiki ta baikaia sa (2 Kor. 8:14, 15).

Patitara kristianka nani pyua ra, smalki tataukra mairin kum Senkriya kangrigisanka ra bara kan, ai nina Pibi, bara witin yu kum Rom taunka ra auya kan taim apastil Pâl Rom kristianka nani ra win: “Man nani witin na Dawan nina ra luki pain bris [...] dia kra Pibi want takbia kaka sin help muns” (Rom 16:1, 2). Yawan sin sans tara kum brisa ya ya kangrigisan ra taura smasmalkra, apia kaka pyua aiska smasmalkra baku wark taki ba ra ta baikaia (W.n 5:42).