¿Dîa muni kau smalkaia sa?

¿Dîa muni yawan utla utla ra smalkaia sa bara Baibil stadika nani sin daukaia sa? ¿Dîa muni aitani sa upla nani ra hilp munaia ai rayaka pain tâ bribia dukiara? (Mt. 7:14.) Natka pas mununhtara ba wan marikisa dîa muni, sakuna naha baman apia sa. Smalkaia warkka daukaia dukiara natka 12 taki ba tilara, ¿ani ba kau tara sa lukisma?

1. Smalkaia warkka ba upla rayaka swaki sakisa (Jn. 17:3).

2. Watawan lâka dauki uplika nani ra maisa pakanka kum yabisa (Isi. 3:18, 19).

3. Baibil dahra aisanka nani ba tnata aimakisa (Mt. 24:14).

4. Jehova kasakka lâka ba param takisa. Upla watawikira kumi sin sip wiras sa Gâd witin nani ra sanska yabras kan ai rayaka chens munaia (Ap.St 17:30, 31; 1 Ti. 2:3, 4).

5. Smalkaia warkka ba wan kupia bukisa upla nani ra spirit lâka ra hilp munaia. Naha uplika nani ba Jisas pruan talia ni atki sakan sa (Ro. 1:14, 15).

6. Naha ba hilp wan munisa upla rayaka tiwbia ba wina pâtkas kaia (Ap.St 20:26, 27).

7. Naha ba daukaia sa, kan wan rayaka swaki sakisa (Isi. 3:19; Ro. 10:9, 10).

8. Wan walka ra latwan lâka marikisa (Mt. 22:39).

9. Jehova bara ai Luhpia ra bîla wali ba marikisa (Mt. 28:19, 20).

10. Naha ba Jehova ra mayunanka lâka yabi ba tânka sa (Hib. 13:15).

11. Jehova ra latwan lâka bri ba marikisa (1 Jn. 5:3).

12. Jehova nina ba holi kulkan kabia dukiara tâ baikisa (Ais. 43:10-12; Mt. 6:9).

Naha natka 12 laki kaikan ba baman aitani apia sa smalkaia warkka daukaia dukiara. Sampla baku, wan kasakka lukan lâka ba kau pâwisa bara sanska wankisa Jehova warkka ba tâ baikaia (1 Ko. 3:9). Sakuna naha warkka daukaia dukiara natka 12 ba kau tara sa. Upla nani ba walbia apia kaka walras kabia sin, smalkaia warkka ba Jehova nina ba holi daukisa bara baku natka ra Witin ai waihla ra ansika yabaia sip kabia (S.L 27:11). Baha mita, diara ailal tâwan ‘piu bani ra smalkaia warkka bara Baibil stadika nani takaskraskira dauki kaia sa’ (Ap.St 5:42).