Upla almuk lupia nani ra sin smalkaia sa
1. ¿Dîa muni aitani sa upla almuk nani iwi pliska ba kat sin sturi yamni smalkaia?
1 Upla ailal ba pat almuk takan trabilka nani brisa (Smas.12:1-7). Baha mita kum kum ba upla almuk main kaiki pliska ra iwisa mita, yawan utla utla ra smalki taukisa piua ra sip witin nani wal prawras wan munisa. Naha ba sin takisa aisa yapti pat almuk takan nani ba ai luhpia apia kaka ai pamalika aikuki iwi ba tila ra. Upla almuk lupia nani naha sât pliska ra iwi ba ra witin nani ba kau pain main kaikbia nitka brisa, apia kaka sip wapras bara ai âuya tiwisa. Baha sât trabilka bri kabia sin, sip kabia Jehova dukiara lan takaia bara latwan kaikaia. ¿Yawan dîa daukaia sa pramis holikira sturi yamni ba witin nani ra yabaia dukiara? (Tai. 2:13.)
2. ¿Nahki upla almuk nani iwi pliska dairiksanka brih wih kaikaia sip sa?
2 Nahki tâ krikaia. Sip kabia dairiksanka briaia ani pliska upla almuk nani bâra sa, Internet ra apia kaka directorio telefónico wina sin sip sa ulbi briaia “residencias de ancianos”, “clínicas geriátricas” apia kaka “asilos”. Smalkaia warkka pura kakaira ba sip sa smalki tataukra lankira kum ra wiaia naha sât pliska nani ba wih kaikaia. Jehova ra kasak luki bara pain ridi takbia kaka, isi kabia dakni kum saki Baibil stadika nani daukaia (S.L. 21:5; 1Jan. 5:14, 15).
3, 4. a) ¿Ya wal pas aisaia sip sa Baibil stadika dakni kum ra daukaisa kaka? b) ¿Nahki wibia yawan stadika ba dîa dukiara sa?
3 Nahki natka ra stadika daukbia ba dukiara pas pali pliska dîa sât ba laki kaikbia. Upla almuk bara wark tatakra ailal bâra sa kaka, pain kabia baha ra wark taki uplika kum ra makabi walaia sip sa sapa tâ bri uplika wal aisaia. Sakuna pliska sirpi sa kaka ( upla almuk nani wiria baman bara upla kum apia kaka wâl baman main kaikaisa), kau pain kabia pliska dawanka pali wal aisaia.
4 Baku kabia sin, wis upla wilinkira kum sma, upla nani ra kupia bukisma Baibil aisi kaikaia bara baha dukiara sin aisaia. Makabi wals upla nani bâra ba ai brinka sa sapa wik bîlara 30 minit ra dakni kum taki Baibil tânka nani ba nu takaia. Bara ulbi sakanka nani ailal yus munaia sip sa. Upla ailal ra pain takan sa Baibil Sturka nani Bukka bara El hombre más grande de todos los tiempos yus munan ba wina. Ban kra aitani kabia pliska dawanka pali ra ulbi sakanka nani ba marikaia. Witin wal sip kabia aisaia ani awarka, yua bara ani pliska ra aidrubia. Dîa daukbia maisa pakanka nani ba sut baha pliska almanak ra ulbi swisa. Jehova Witniska sma ba minitka ra wis, bara dawanka ra tânka aisas rilidian wala nani priaska dauki ba baku apia sa, kau pali ba Baibil stadika yabaia want sma.
5. ¿Dîa kupia kraukanka ba yus munbia stadika ba lilia bara yamni kabia dukiara?
5 Nahki natka ra stadika ba daukbia. Smalki tataukra kumi bani ba pliska ba dîa nitka bri ba bara nahki iwi natka ba laki kaiki tâ krikbia. Baha mita, upla yamnika ra luki tânkira lâka wal daukbia. Ya stadika tâ krikbia ba ulbi sakanka yus munbia ba ailal brih waia sa stadi takaia dukiara, bara danh takbia ningkara sip kabia kli brih waia. Ban kra, sip kabia ulbi sakanka nani letrika tara bri ba yus munbia. Ya baiki sakanka nani aisi kaikaia sip sa bara want sa kaka daukbia ningkara makabi walanka nani ba wibia. Stadika daukisa piua ra trai kaiks pânikam lâka marikaia bara diara yamni nani ra lukaia. Dawanka adar yaban ba wal, Jehova asla takanka lilka nani sakan kum kaikaia, baku sip kabia Baibil dukiara ai kasak lukanka ba pâwaia, apia kaka Baibil ra patitara dukiara dîa takan ba aisaia. Bara stadika tâ krikaia bara danh takbia dukiara sin pura sunra prahni kum daukbia. Smalki tataukra kum kum ba lâwanka sin yus munisa aiwanaia dukiara.
6. ¿Mapara buanka lâka kum bâra sa kaka dîa daukbia?
6 ¿Dîa daukaia sa upla kum ba stadika daukisa piua ra diara kum aisaram ba pain kaikras sa kaka? Tânkira lâka wal ansika yabaia sa (Kol. 4:6). Ban kra, sip sa Baibil wina tikska kum yus muni makabi walanka ba ansika yabia. Baha sim minitka ra daukaia sanska âpu sa kaka, tingkika yabia bara pain kabia uplika ra wiaia stadika danh takbia ningkara witin wal baman sip sa aisaia.
7. ¿Dîa daukaia sa upla kum makabi walanka kum brisa apia kaka kau lan takaia want sa taim?
7 Sam taim, upla kum makabi walanka daukisa apia kaka ai brinka sa ulbanka lalka ba wina kau lan takaia. Baku takisa taim, kristian mairin kum wisa: “Makabi walankam ba painkira sa, sakuna makabi walanka kum ba mita sip sa wiaia, ¿pain kabia stadika na danh takbia ningkara yawan wal laki kaikaia?” Upla kum ai brinka sa kaka taim saki bara plis walara Baibil stadika kum yabia.
8. ¿Nahki kulkaia sa upla dakni kum apia kaka kumi bani ra yabi sa kaka?
8 Kau pain kabia, sim smalki tataukrika nani baman baha pliska ra daknika ba ra Baibil stadika ba yabi kabia. Kumi bani ai taimka ba ulbia. Stadika ba pat daukisa piua ra, ani smalki tataukra tâ bribia ba sip kabia aima an daknika ra kli wih kaikan ba ulbaia bara Baibil stadika kumi baman kati lâs ra ulbi dingbia. Upla kumi bani ra stadika yabisa kaka, sip kabia dîa natka ra ulbi ba baku daukbia.
9, 10. Tânka aisi wis stadika tâ krikbia uplika nani ba dîa sât daukanka bri kaia sa.
9 Ban dauki bas. Yua bara awarka ba sin pain saki bri bas stadika dakni kum ra yabaia sma ba. Stadi tatakra bara pliska dawanka ba sin ai brinka kabia stadika ba tâ krikbia bara danh takbia ba sim awarka bara yua mangkan ba kat (Mt. 5:37). Baha mita, takaskraskira ridi takbia diara sut ai piua kat daukaia sa. Pat dîa takan ba kaiki, pain kabia smalki tataukra wâl mita dakni kum ra Baibil stadika yabia (Smas. 4:9, 10). Plis tara nani ra, ban kra smalki tataukra kau nitka kabia.
10 Pain kabia uplika nani ra pânika lâka marikaia bara witin nani dukiara lukaia (Pil. 2:4). Pas yua ra sip kabia uplika kumi bani ra kakaira takaia. Kau stadika wala daukras bara trai kaiks uplika kumi bani nina ba nu takaia. Kupiam krauks upla almuk kum kum ba ai nina maki yus munisa taim, saura ai dara walisa, sakuna pain ai dara walisa ai taikilka yus munisa taim. Yawan bila kaikanka lâka bara latwan lâka marikisa kaka, witin nani pain kaikbia bara tingki lukbia.
11. ¿Stadika tâ bri nani ba nahki sip kabia rispik lâka marikaia baha ra wark taki apia kaka pamalika nani ra?
11 Âmya tikpara ban latwankam lâka bara rispik lâka marikaia baha ra wark taki uplika nani ra bara uplika almuk pamalika nani dukiara sin. Pat stadika ba daukisa piua ra, pain kabia awarka bara nahki dauki ba shens munaia apia kau dawanka ra makabi walras kaka. Pain kabia piu kum kum ra makabi walaia stadika ba nahki kaikisa sapa. Stadika daukisa piua ra witin nani pamalika kum wabia kaka, pain kabia yawan lakula wiaia. Pamalika ba ra wibia yawan baha skulka ra dîa daukisa. Trai kaiks marikaia witin nani yamnika dukiara sin luki sma bara sip kabia paiwaia witin nani sin walaia.
12, 13. Rayaka ra takan sturka painkira kum aisas dîa yamnika sakan upla almuk nani iwi pliskara smalkan ba wina.
12 Yamnika ba. Ani kangrigisanka bara pura kakaira nani mita naha sât warkka daukan ba, maisa pakansa dîa yamnika sakan ba. Upla almuk nani main kaiki pliska ra, 20 baku baha skulkara kan, bara upla 6 want kan silp ai stadika briaia. Mairin almuk kum spirit lâka ra pâwan ba aihtabi takan. Plis wala ra, mairin almuk kum 85 mani bri kan ba kupia bukan asla aidrubanka ra waia, baku sin aisan ai brinka sa aihtabi takaia. Jehova Witniska nani Baibil stadika dauki ba wina, wark tatakra nani stadika ba danh want apia win taim, upla almuk nani ba pliska dawanka ra dahra sakan. Lâs kat, kli tâ krikan taim, Baibil stadika ba 25 apia kaka 30 upla bâra kan.
13 Almuk lupia nani baman tâ iwras kan, nahki wan latwanka lâka mariki ba wina. Sam taim baha ra wark taki uplika nani sin tilara kaia want kan. Yawan sakripais dauki bara wan latwanka lâka mariki ba, tawan uplika nani ba yamni kaikisa (1 Pi. 2:12). Smalki tataukra dîa daukbia dukiara pliska dawanka ra win ningkara witin naku win: “¿Dîa muni kaina manas ra daukras kapram? ¿Ahkia tâ krikma?” Pliska dawanka mairin kum ba ulban: “Maisa pakisna naha stadika dakni ra dauki ba pliska sut bâra daukbia. Jehova Witniska nani ba naha sât stadika nani mana luha daukisa tawan ra.” Pliska dawanka kum mita, Jehova Witniska nani ra, wauhtaya pranakira kum yaban ai warkka wilinkira dauki ba mita, bara ulban, muihni lakri nani ba “diara manakira” kum baku sa baha ra wark taki bara iwi uplika nani dukiara.
14. ¿Dîa muni upla almuk nani iwi pliska ra smalkaia want sa?
14 Jehova upla almuk nani ra sin paiwisa ai nina mayunaia (Law. 148:12, 13). Naha sât paiwanka ba upla almuk nani iwi pliska ra daukisa. ¿Tawankam ra naha sât pliska nani bâra sa ki, upla almuk nani ba tânka kasak smalkanka ba wina yamnika sakaia? Kangrigisan almukka nani bara pliska dawanka hilpka ba wal sip kabia yamnika painkira daukaia. Upla almuk nani dukiara, wan âuya tiwras sa kaka yawan sin Jehova daukanka nina plikisa (Law. 71:9, 18).