¡Sanska nani man brisma yus muns King Lâka sturka smalkaia dukiara!
1. ¿Yawan Debit samplika ba wina dîa lan takaia sip sa?
1 King Debit diara ailal ai rayaka ra daukaia want kan, sakuna kum kum sip daukras kan baha mita sât wala daukaia lukan. Sampla kum Debit ai brinka pali kan Jehova tempelka ba paskaia. Sakuna sip apia kan, bara ai luhpia Salaman ra hilp munan tempelka ba paskbia dukiara (1 Ki. 8:17-19; 1 Kr. 29:3-9). Witin sip daukras kan ba ra lukaia sirka ra, Debit kau ni lukan diara wala daukaia sip ba ra. ¿Yawan nahki Debit samplika ba nina blikaia sip sa smalkaia warkka ba aihni pali daukaia dukiara?
2. ¿Nahki kumi bani silp wan rayaka ba laki kaikbia?
2 Dîa daukaia sip sma ba dauks: Upla ailal ba ai taimka pain yus muni tâ baiki smasmalkra apia kaka tâura smasmalkra warkka daukisa (Mt. 6:22). Man sin sip sma witin aikuki asla takaia. Puram suns bara ningkara taimkam nani ba laki kaiks bara kaikma sans tara pain kum bara sa Gâd warkka pain pali daukaia dukiara. Baku sa kaka baha sanska ba bris (1 Ko. 16:8, 9).
3. Yawan tâura smasmalkra baku sip takras kabia sin, ¿dîa sanska wala painkira nani brisa smalkaia dukiara?
3 Tâura smasmalkra warkka sip daukras mai munbia kaka, ¿dîa laki kaikaia sma? Sampla baku, wark pânika nani ra sip sma aisaia, ¿dîa muni naha sanska ba yus munras witin nani ra smalkaia dukiara? Bara siknis trabilka brisma kaka sin sip sma baha sanska wal daktar bara hilp mai munbia uplika nani ra smalkaia. Kupiam krauki bas pat mankam nani ba dukiara apia kaka siknis mita mai takaskisa kaka 15 minit kum pan smalkaia warkka ra daukma ba ulbaia sip sma. Kati lâs ra smalkaia warkka ra amya tikpara ban wina smalkram ba sin ulbaia. Bara dîa ulbi sakanka nani upla ra yabram ba sin ulbia, wauhkataya sirpi, Jisas Pruan Kupia Kraukanka bara Aidrubanka Kau Tara dukiara paiwanka nani yabi ba sin. Man lilia takma kaikaia wark lupia sut kulki ba nahki ailal taki ba.
4. ¿Yawan dîa daukaia wilin sa?
4 Wan rayaka ra dîa sât trabilka bri kabia sin, sanska painkira nani ba lus tiwaia apia sa smalkaia warkka dukiara. Wan rayaka ra âuyapah lâka wankbia dîa sip ba kat King Lâka dukiara tâ baikbia kaka (Mk. 14:8; Lk. 21:2-4).