¿Dîa muni Jehova witniska nani ba walan daukras win uplika nani watla ra ban wih smalkisa ki?
Jehova witniska nani ba, upla sut wal Baibil dukiara aisaia laik sa, wan walaia apia win uplika nani wal kat sin. ¿Dîa muni? Kan Gâd bara wan walka ra latwan kaiki ba mita (Matiu 22:37-39). Gâd ra latwan kaiki ba mita wan kupia bukisa ai Luhpia adarka ba bîla walaia “upla nani ra smalkaia” (Apastil Nani Sturka 10:42; 1 Jan 5:3). Baha mita patitara piua prapitka nani daukan baku, yawan sin Baibil smalkanka nani ba upla ra brih wisa (Jirimaya 25:4). Bara wan walka ra latwan kaiki ba mita, wan kupia bukisa Gâd Kingka lâka sturka yamni ba upla nani ra smalkaia, walaia want apia uplika nani ra kat sin, kan baha ba ai rayaka ba swaki sakaia sip sa (Matiu 24:14).
Baku sin, walan daukras uplika nani watla ra kli wisa taim aima ailal ra walan dauki uplika kum ra sakisa. ¿Dîa muni? Naha nani ba tânka kum kum sa:
Uplika nani ba utla wala ra tawisa.
Watla ra iwi uplika wala nani ba walan daukisa.
Upla lukanka nani ba chens takisa. Tasba aiska ra dîa taki ba apia kaka ai rayaka ra diara kum takan ba mita, upla kum kum ba ai dara walisa spirit lainka ra nitka nani bri ba. Baha kupia bukisa Baibil tânka ba dukiara kau nu takaia (Matiu 5:3). Sturi yamni mapara bui uplika nani kat sin sip sa ai lukanka ba chens munaia, apastil Pal daukan ba baku (1 Timoti 1:13).
Ban sakuna, upla kumi ra sin wan walbia taibi munras (1 Pita 3:15). Kasak luki banhwisna upla kumi bani ba ani rilidianka briaia ba silp wahbi sakaia sa (Kli Smalkanka 30:19, 20).