Jehova Witniska nani ba dia lukisa?

“Sakuna aitani baku luki banghwi sna man wina walaia ani nani ba man lukankam nani sa, kan, rait pali ba, naha daknika dukiara aisi bara yawan nusa plis sutra witin mapara aisisa.” (Apostel Storka 28:22) Naha ju tawanka ta uplika nani, pas mani handat piua Romanka wina ba, tanka pain kum mangki bangwansa. Witin nani tilara kan nani ba lukanka walaia brinka kan, dis lata tani wina dahra aisikan nani ra baman walras kan.

Sim baku, naiwa yuara Jehova Witniska nani mapara pat pat aisisa, bara mistik kum kabia saura luki nani ba wina bila kaikaia raitka ba lan takaia witin nani dukiara. Ban sakuna, brinki banghwisa yang nani luki banghwi sna ba lalka ta nani kum kum ba smalki param marikaia.

Baibil ba, Jisus Kraist, bara God

Luki banghwi sna “Ulbanka sut ba God lukanka mita sika bara yamnisa.” (2 Timoti 3:16) Ao tilara kum kum bara ba aisan yang nani ba Kristian apia, baha ba rait apia. Yang nani aiska pali aitani luki banghwi sna apostel Piter Jisus Kraist dukiara aisi win ba wal: “Heven munuhtara nina wala apusa upla nanira yaban yawan bakku swaki sakan laka ba briaia.”—Apostel Storka 4:12.

Ban sakuna, kan Jisus win witin ba “God Luhpia” bara “Aisaba bui blikan,” Jehova Witniska nani luki banghwi sna God ba kau kanra tara sa Jisus ba wal. (Jan 10:36; 6:57) Jisus pali bui baku kaikata: “Aisa ba kau kanra tara sa yang ba wal.” (Jan 14:28; 8:28) Baku bara yang nani luki banghras sna Jisus Aisa ba wal bakusa, Kumira Yumhpa sa lukanka smalki ba baku. Kau pain, luki banghwi sna witin ba God bui paskan bara Ai mina munuhtara sa.—Kolosi nanira 1:15; 1 Korint nanira 11:3.

Miskitura, God nina ba Jehova makisa. Baibil ba wisa: “Man, yakan ninam JEHOVA, Tasba aiskara kau Purara pali sma ba.” (Salmo 83:18, King James Version) Naha aisanka na wal, Jisus God nina bara kulkanka ailal yaban, bara ai nina bliki nanira smalkan ai pura sunaia: “Yawan Aisa heven nanira sma ba, ninam holikira kulkan kabia.” Bara witin pali sin God ra ai pura sunra ra wisata: “Yang ninam ba param marikri upla nani aikram bara.”—Matyu 6:9; Jan 17:6.

Jehova Witniska nani ba luki banghwi sna, sim Jisus baku, yawan param marikaia sa wala nanira God nina bara lukanka nani ba. Baha mita, Jehova Witniska nina brih banghri kan Jisus tnata luki dauki banghwi sna ba mita, “Witnis Kasak Lalukra ba.” (Reveleshen 1:5; 3:14) Isaias 43:10 ra, aitani kat wisa God uplika nanira: “Man nani ba yang witniski sma,–Jehova aisanka sa–, ban albiki bak saki briri ba.”

God Kingka laka ba

Jisus ai nina bliki nanira smalkan ai pura sunrara wibia: “Man king kam laka ba yarka balbia,” bara baha Kingka laka ba ai smalkanka lalka pura karnika baku dauki brin. (Matyu 6:10; Luk 4:43) Jehova Witniska nani luki banghwi sna King laka ba rait aihwa gabamintka kum heven nanira ai pliska brisa, Tasbana purara ai gabamintka mangki brih iwbia, bara baha Kingka sip kaikras ba nina mankan sa Jisus Kraist. “Ai pahpaia nani purara kabia gabamint ba,” Baibil ba wisa. “Ai gabamintka ba pawan kabia bara laman laka ba tnata apu kabia.”—Isaias 9:6, 7, KJ.

Ban sakuna, Jisus Kraist baman king apia kabia God gabamintka ra. Witin baku king nani aimaki banghwai ba ailal bri kabia heven ra. “Yawan ban bapi bubia kaka,” apostel Pol ulbata, “yawan asla aikuki king nani aimakbia.” (2 Timoti 2:12) Baibil ba wan marikisa upla nani pruan wina bubia ba Kraist wal hevenra king aimakaia dukiara “handat pati pur tausin ba kat, Tasba wina atkan sa.”—Reveleshen 14:1, 3.

Baku bamna, gabamint sut ba ai uplika nani brikaia sa, bara Jehova Witniska nani ba luki banghwi sna hevenra king aimakai nani ba purkara, upla tausin milian nani bara kabia raya bankaia laka ba brih bangbia. Piu lui bara Tasbana, paradais painkira kumra lakan ba, banghki kabia baha nani sut God Kingka laka uplika nani ba, sut ba Kraist king aimakai ba mununhtara kabia aikuki king aimakai nani ba sin. Baha mita Jehova Witniska nani ba kasak pali luki banghwi sna Tasbana aima kumira sin sauhki tikan kabia apia bara Baibil pramiska nanara ulbi mangkina aimakbia: “Kasakkira nani ba Tasbana brih bangbia, bara bankaiara ai purara iwbia.”—Salmo 37:29; 104:5.

Sakuna, nahki God Kingka laka ba balbia? Tawan nani sut ba ai kupia wilin wal God gabamintka munuhtara dimbia ba wal? Apia, Baibil ba rait aihwakira sa bara marikisa God Kingka laka balaia ba nit kabia God witin silp upla iwanka nani kainara aimakaya: “Heven Godka ba king laka kum mangbia aima kumira sin sauhki tikan kabia apia. Bara kingka laka ba mita [...] sauhki tikan kabia bara tnata mangkbia naha kingka laka nanira, bara witin baman ban tnata apu kaiara takasbia.”—Daniel 2:44.

God Kingka laka ba ahkia balbia? Naha piuara prapit aisanka nani Baibilra ba aimaki bara kaiki, Jehova Witniska nani luki bangwi sna pat pali balbia. Mai paiwi banghwi sna aman kaikaia prapit nani aisanka kum kum kaina manas wina takbia win ba daukanka nani kum kum “tnata yua nani” dukiara bara naha saurakira iwanka natka piua nani dukiara. Ulbanka nani mangkan sa Matyu 24:3–14; Luk 21:7–13, 25–31 bara 2 Timoti 3:1–5 ra.

Kan yawan ‘Jehova wan Godka ra wan kupia aiska wal latwan kaiki, sulka aiska, lukanka aiska, karnika aiska ni, bara wan walka nanira wan wîna baku kulki ba bui,’ yawan tarbaiwras sa nisan nani baku, kiamka nani, bara tawan bilara baiki sakanka bara nani tilara. (Mark 12:30, 31) Pain wan kakaira sa yang nani muihki Kristian nisan wala nani bara latwan kaiki banghwi sna ba mita. (Jan 13:35; 1 Jan 3:10–12) Baha mita nisan nani pulitikka tilara lila kat banghwi sna. Pas Jisus disaipilka nani kan ba baku kaia traikaki banghwi sna, witin nani ai dukiara win: “Witin nani ba tasba wina apia sa, yang tasba wina apia sna ba baku.” (Jan 17:16) Luki banghwi sna tasba na wina saitra kaia tanka ba sika watawan laka ba daukaia apia naiwa piuara ailal pali ba, daukanka nani Baibil latubi ba tilara dingki sa kunin laka, implikaia laka, ruk takaia laka, marit laka krikaiaba, waitna ai tahkia wal ruk takaia laka, tala aitani apia lakara yus munaia ba, aidol laka ba, bara wala nani sin.—1 Korint nanira 6:9–11; Efesus nanira 5:3–5; Apostel Storka 15:28, 29.

Kainara balaia ba dukiara bila kaikanka laka

Jehova Witniska nani luki banghwi sna nanara wan rayaka na baman aiska pali apia sa. Luki banghwi sna Jehova ba Kraist ra blikam naha Tasbara ai talia laikbia atkisakaia praiska baku, upla nani ba God mawanra liliakaia pliska kasak kum briaia sip banghwi kabia bara rayaka bankaia laka ba briaya iwanka tnatka raya kumra. Jisus apostelka kum win ba baku: “Nanara yawan nani kasak wan kulkansa ai talia ba mita.” (Roman nanira 5:9; Matyu 20:28) Jehova Witniska nani ba Godra tingki laka tara wisna bara ai Luhpia ra sin naha atkisakaia mana yan ba mita sip daukata rayaka kainara balaia ba briaya.

Jehova Witniska nani kasak pali luki banghwi sna wan kainara rayaka kum balaia ba bara kabia, bara naha ba sip kabia pruan nani wina kli buaia tanka bara ba mita God Kingka laka munuhtara. Luki banghwi sna, Baibil smalki ba baku, upla kum pruya bara witin kli apu takisa, bara “baha yuara ai lukanka nani ba sut tiwi luisa.” (Salmo 146:3, 4; Ezequiel 18:4; Eclesiastes 9:5) Ao, upla pruan nani rayaka kainara balaia ba God lukankara bara banghwisa kaka bara lika Witin kli raki bukbia.—Jan 5:28, 29.

Ban sakuna, Jehova Witniska nani ba kasak pali luki banghwi sna God Kingka laka ba nanara gabamintka nanira tnata mankbia piuara, upla nani ailal naiwa raya banghwiba kau raya lui banghbia, Noa ai pamalika aikuki Lisamra tara wina kau raya luan ba baku, bara raya lui banghbia raya bankaia laka ba Tasba klin kumra liliaka laka briaia dukiara. (Matyu 24:36–39; 2 Piter 3:5–7, 13) Sakuna luki banghwi sna kau raya luaia laka ba Jehova laka nani alki bribia ba wina sa, kan Baibil ba wisa: “Tasba ba lui auya [...], sakuna ya God kupia laka dauki ba bankaia ra bara kabia.”—1 Jan 2:17; Salmo 37:11; Reveleshen 7:9, 13–15; 21:1–5.

Latan param sa, nahara Jehova Witniska nani lukanka nani sut sip alkbia apia, sakuna maipaiwi banghwi sna kau mai smalkbia dukiara makabi walaia.

Diara wala mapara marikras kaka, Baibil marikanka nani ba bila lakanka ulbanka Tasba Rayaba wina brin. (New World Translation of the Holy Scriptures–with References)

[Wahya 4 aisanka ba]

Jehova Witniska nina brih banghri kan Jisus tnata luki dauki banghwi sna ba mita