Kul dimaia ridi sma ki?

1. Kul dimi bara, dia daukaia sip mai munisa?

¹ Kul ra raya sma, apia kaka kli mani wala kum dimuma kaka sin, kristian wahma-tyara baku diara ailal mampara bubia kaikma. Sakuna, sip mai munbia sin “diara kasak ba upla nani ra wiaia” (Jan 18:37). Upla ra witnis aisaia ridi sma ki?

2. Nahki tnatka ra kul dimaia ridi takaia sip sma ki?

² Rayakam ra yamni baman mai takbia wisi, man help tara brisma. Kan Jehova, aisikam-yaptikam, bara alba kasak sinskira ba mita sin lan mai daukisa (Sins.l 1:8; 6:20; 23:23-25; Epe. 6:1-4; 2 Tim. 3:16, 17). Ban kra sin pat nu sma kulkam watla ra dia sat trabilka nani mai takaia sip sa. Baku bara, sip sma Gâd dia wan makabi ba pain lan taki, wihki dia sat uplika lamamra kabia ba sin luki, witnis kum sma marikaia wisi kaina manas ridi taki kaia (Sins.l 22:3). Yus tara kabia Los jóvenes preguntan bukka wal sut ba ra, wihki ¡Despertad! ra sin ani ani tanka help mai munaia sip ba plikaia.

3. Nahki laka ra witnis pain aisaia sip kama ki?

³ Kul watla dimisma ba sika, maikisa tnatka sat sat ra witnis pain aisaia. Man kwalkam dimra, tamwa aubra pain ba, bara wapni aisi taukisma ba wala nani kaikisa. Tuktan wala ra, maestrukam nani ra sin rispik munisma ba, bara notikam nani sin pain saki sinska yamni marikisma ba kaiki wina, kum kum ban kra naku luki mai wibia: “Dia muni man sat wala sma ki?” (Mal. 3:18; Jan 15:19). Baha sip mai munaia sip sa upla ra witnis aisi kasak lukisma ba tanka dukyara smalkaia (1 Tim. 2:9, 10). Mani bilara sin traika kaikanka sat sat —kuntri tawan mayunra, apia kaka liliaka yua wala nani dauki— mampara buaia sip sa. Diakan man nahamuna tila dimras mai walbia kaka, man sip sma dis naku wiaia: “Naha na yang rilidianki mapara sa; yang Jehova Witnis kum sna”. Apia kaka, sip mai munbia ki, man Aisikam painkira, Jehova tanka dukyara aisaia? Kaina manas ridi takma sa kaka, bara Jehova helpka laka wal, maestrukam nani ra, kul panika nani ra, bara upla wala ra sin witnis pain aisaia sip kama (1 Pi. 3:15).

4. Dia muni kasak lukaia sip sma kul dimi yamni man mai takbia?

⁴ Kul dimuma na ra, wira srinhka mai alkbia kra sin, nu bas upla ailal bara sa kulkam ra yamni man takma dukyara tam baikisa. Sut purkara lilia lukisa, kan nu sa witnis aisuma pliska na ra man pain daukma. Baku bamna, sibripara, kau ni kul dimaia dukyara ridi bas!