2023 manka ra hilp munaia warkka nani: “Jehova latwanka lâka ba wan nakra ni kaikan sa”

Baibil ra win las tnata piua nani ra “kuntri kumi mita wala mapara aiklabia, tasba kum mita wala mapara war aiklabia” wan kaina kir ra sauhki tikanka nani ailal bâra kabia (Matiu 24:3, 7). Smalkaia warkka ba 2023 manka ra naha prapit dahra aisanka ba aimakan sa.a 100 kuntri nani bara plis ailal nani ra war aiklabanka bara tasba sauhkanka nani takan, ban sakuna Jehova witniska nani ba, Jehova latwan lâka marikan sa. ¿Nahki daukan sa ki?

2023 smalkaia warkka manka ra, tasba sauhkanka 200 kau pura takan ba wan muihni lakri nani ra saura munan. Jehova witniska nani asla takanka ba 10 milian dalasb kau pura yus munan ba, prisant nani yaban ba wina wala nani ra hilp munaia dukiara. Bara baku sin baha pliska ra muihni lakri nani iwi ba ra, ai lalahka ba yus munan wala nani ra tâ baikaia dukiara bara baha lalahka ba sin kulkras sa. Wan muihni lakri nani ra tasba sauhkanka wâl saura munan ba ra, kaisa kaikaia nahki prisant yabram ba hilp munaia dukiara nahki yus munan .

“Latwan lâka rait aihwa ba bâra sa”

Nigeria tawanka kum kum nani ra lî auhisa taim lisamra dingkisa. Ban sakuna, octubre katka ra 2022 manka ra lisamra tara kum dingkan 10 mani bilkara kaikras kan ba baku. 676.000 iktaria (1.670.432 acres) tasba plun mangkan ba ra sauhkan sa, bara upla 2 milian purkara ai watla ba swiaia kan. Isti pali, Nigeria Betel apiska ba hilp munaia dukiara daknika kum paskan tâ baikaia bara spirit lainka ra hilpka yabaia.

Wan muihni lakri nani ra sauhkanka nani daukan ba

• 7.505 smasmalkra nani ba ai watla nani swiaia kan.

• 860 utla nani sauhki tikan.

• 90 Asla Aidrubanka Watla nani bara Asla Takanka Watla Tara kum lisamra dingkan.

Prisant nani ba nahki yus munan

Hilp Munaia Daknika ba 250.000 dalas nani yus munan. Baha lalahka ba naku ra yus munan:

• Rais, bins bara espagueti nani atkan.

• Baku sin utla bilara yus munaia dukia nani ba, matras bara pabula atkan.

• Utla nani sauhkan ba kli raya paskaia.

¿Nahki lalah prisantka ba pain yus munan? Tnatka kum ba utla nani ba laki kaikan sa kli paskaia apia kaka raya paskaia nit kan sapa. Watla raya kum nit kan kaka, tawanka watla paskanka tnatka ba baku paski kan.

Muihni lakri nani baha hilpka ba bri banhwan ba lilia ai dara walan. Kristian mairin kum naku win: “Wan tasbaya ba, wan watla ba bara yawan dîa bri banhwi kapri ba sin lisamra tara wal sut lus tiwi banhri. Sakuna baha yua ba muihni lakri nani hilp wan munaia dukiara balan, bara takaskaia plis kum ra wan brihwan bara lilia daira wali banhri. Baku sin Betel apiska ba wina plun wan blikan. Yawan param kaiki banhri nahki Jan 13:34, 35 bîla ba wan rayaka ra aimakan. Tâ iwi banhri bara latwanka lâka rait aihwa ba bâra sa kaikri. Pamaliki bara yang kupi munhta wina tingki pali mai wisna man nani bal hilp ai muni banhram ba dukiara”.

Yawan hilp munaia warkka ba upla wala nani ba param kaikan sa. Sabagreia tawanka ra (Bayelsa kuntrika ra) tawanka tâ bri uplika kum naku win: “Tasba aiska ra asla takanka nani bara prias watla nani ailal bâra sa, sakuna Jehova witniska nani ba baman naha sâtka warkka ba dauki banhwisa. Tasba aiska wina Jehova witniska asla takanka ba kau yamni sa”.

“Jehova latwanka lâka ba wan nakra ni kaikan sa”

Febrero kati 2023 manka ra, Chile kuntrika ra tasba bara utla nani aman sauhkanka ba 400 kau pura takan. 430.000 iktaria nani ba (1.062.553 acres) aman, baku sin tawan bilara kutbanka kum kum aman. Bara 8.000 uplika nani ba ai watla wina takaia kan. Baha sauhki tikanka ba ningkara, Betel apiska ba Hilp Munaia Daknika ba asla daukan.

Wan muihni lakri nani ra sauhkanka nani daukan ba

• 222 smasmalkra nani ba ai watla ba swiaia kan.

• 20 utla nani sauhki tikan.

Prisant nani ba nahki yus munan

Hilp Munaia Daknika 200.000 dalas ba yus munan. Baha lalahka ba naku ra yus munan:

• Lî bara plun atkaia.

• Gias, klin munaia dukia nani bara sîka nani atkan.

• Utla nani sauhkan ba kli raya paskaia.

Pamali kum ai watla bara ai warkka pliska ba ul sauhki tikan nu takan taim, sari lâka tara brin bara wark kum bri kan ba lus tiwan. Pas yua nani witin nani mapara karna kan kaikaia ai watla bri kan ba âpu kan ba, bara tawa tawa ai watla ba kli mâki kan taim, lilia ai dara walan. Sakuna wilinkira muihni lakri nani ba naha warkka tâ baikaia dukiara ai latwanka lâka kaikaia hilp munan baha trabilka ba pura luaia dukiara. Bara baha pamalika ba kupia bukanka tara brin, baha mita muihni lakri nani wal asla taki upla wala nani watla mâkan.

Muihni lakri nani ailal Hilp Munaia Daknika warkka kaikan taim ai kupia kangban. Kristian waitna kum naku win: “Hilp Munaia Daknika nani ba Jehova wina prisantka tara kum sa. Sauhki tikanka yua luan ningkara pat bâra banhwi kan hilpka yabaia dukiara. Plis wala nani ra Hilp Munaia Daknika ba dîa daukisa aisi kaikisma taim kupiam bukisa, sakuna rayakam ra takisa taim Jehova asla takanka ba dîa dauki ba kau tara kulkisma. Baku sin muihni lakri nani ba Jehova daukanka painkira nani mariki ba mita uba tingki lukisa, witin nani ba spirit lainka ra bara diara wala nani yawan nit ba wankaia dukiara karna wark takisa. Jehova latwanka lâka ba wan nakra ni kaikan sa”.

Tnata piua ra iwi ba mita tasba sauhkanka nani ba kau ailal takbia (Luk 21:10, 11). Ban sakuna Jisas Kraist wan Kingka latwankira ba “tasba tnata kat” yawan nani wal kabia bara kangrigisan bâk wan marikbia (Matiu 28:20). Prisantka kum yabisma taim donate.jw.org bâk apia kaka dîa brisma ba wal, karnikam, bara taimkam yus munisma taim, Gâd Kingka lâka bara ai Kingka ra tâ baikisma. ¡Muihni lakri nani tingki tara maiki banhwisna kupia pihni lâka marikisma ba mita!