King Saúl luhpia almuk ba, Janatan, kupia karnakira aiklaklabrika kum kan. Debit win Janatan ba yakal kum wal kau isti bara layan kum wal kau karnakira sa. Yu kum Janatan, il kum ra Filisteo suldiarka kum kum ra kaikan. Baku, ai hilp mamunra ra win: “Jehova sain kum wankbia kaka yawan war aiklabia. Filisteo uplika nani, bal uls wan wibia kaka yawan nu kabia mapara aiklabaia sa”. Filisteo nani ai pura winan: “¡Aiklabaia bal uls!”. Baku Janatan bara ai hilp mamunra ba il ra ulan bara suldiar 20 ra win munan.

Janatan ba Saúl luhpia almuk kan ba mita, ai aisika prubia ningkara witin king kaia kan. Kuna Janatan nu kan Jehova Debit ra bâk sakan ba, Israel kingka wala kabia dukiara, bara witin ra tumras kan. Kau ni, Janatan bara Debit wal pâna painkira takan. Wâl pramis takan pana pana ai kan kahbaia bara ai tâwan aiklabaia. Wâl pâna kan ba marikaia dukiara Janatan ai prâkka yari, sord, pantamangka bara ai bilkka tara ba yaban.

Debit Saúl wina plapi kan taim, Janatan kaikaia wan bara win: “Karna bara kupiam karnakira kaia sma. Jehova bâk mai sakan sa king kaia dukiara. Aisiki kat sin pain nu sa”. ¿Want kama Janatan baku pâna painkira kum briaia?

Janatan ai rayaka piu ailal pât ra dingkan ai pânika hilp munaia. Witin nu kan ai aisa, king Saúl ba, Debit ra ikaia want kan, bara witin ra win: “Debit ikma kaka, saurka kum daukma. Witin saura daukras”. Saúl Janatan mapara ai kupia baikan. Mani wira luan, Saúl bara Janatan aiklabanka kum ra pruan.

Janatan pruan taim, Debit Mefi-bóset ra plikan, witin Janatan luhpia kan. Sakan taim witin ra win: “Rayakam aiska main mai kaikamna, kan aisikam ba pâinika pain kum kan. Yang waitla ra iwma bara tibilki ra yang wal pima”. Debit ai pânika Janatan ra aima kumi sin ai âuya tikras kan.

Saúl pruan taim, king wala ba Debit kan. Mani 30 bri kan. Mani ailal luan, bara tihmia kum ai watla banhta wina mairin painkira kum ra kaikan. Debit nu takan ai nina ba Betsabé bara suldiar kum nina Urías wal ai maya kan. Bara Debit Betsabé ai watla ra brih balbia mata blikan, wâl yapan bara witin kwihra takan. Debit dîa daukan ba yukukaia trai kaikan. Ba mita ai war aiklaklabrika lalka ra win Urías ra war aiklabanka tâura mangkbia, bara tnaya wina taki yakan swibia. Urías baha aiklabanka ra pruan, ba ningkara Debit Betsabé wal marit takan.

Kuna Jehova diara saura takan ba kaikan. ¿Jehova nanara dîa daukaia kan? Prapit Natán ra blikan Debit wal aisaia. Natán witin ra win: “Upla lalahkira kum sîp ailal bri kan, bara upla umpira kum sîp kumi man bri kan bara latwan pali kan. Waitna lalahkira ba, waitnika sîp kumi bri kan ba mihta dakban”. Debit ai kupia baiki win: “¡Baha waitna lalahkira ba pruaia sa!” Bara Natán pana win: “¡Man baha waitna lalahkira ba baku sma!”. Debit sari pali takan bara Natán ra win: “Jehova mapara saura daukri”. Baha saurka ba Debit ra diara saura ailal bri balan, bara ai pamalika ra sin. Jehova Debit ra klala yaban, kuna swin raya kabia ai kupia param bara bawikira kan ba mita.

Debit Jehova ra tempel kum paski yabaia want kan. Kuna, Jehova Salaman ra wahbi sakan, Debit luhpia ba, paskbia dukiara. Baku Debit tâ krikan diara nani ridi daukaia Salaman dukiara bara win: “Jehova tempelka ba pranakira kaia sa. Salaman kau wahma sa, kuna diara sut ridi daukaia yang hilp munaisna”. Debit tempel paskaia dukiara lalah ailal prisant yaban. Wark tatakra nani lankira plikan, gul bara silbar asla daukan, bara yalam dusa Tiro bara Sidón wina brih balan. Debit pruaia lamara kan taim, tempel paskaia wauhkataya nani Salaman ra yaban bara win: “Jehova naha adarka nani aikan ulbi mangki bara maikamna. Witin hilp mai munbia, si bripara. Karna kaia sma bara warkka ba daukaia”.

Salaman Israel ra king aimakan taim, Jehova makabi walan: “¿Dîa maikamna want sma?”. Salaman win: “Wahma sna bara diara nani kau pain daukaia lan apia sna. Pliskam, tawankam uplika main kaikaia dukiara sins lâka aik”. Jehova win: “Sins lâka ai makabram bamna, tasba aiska ra waitna kau sinskira mai daukamna. Bara yuyaka sin maikamna, bara mani ailal iwma bîli walma kaka”.

Salaman tempel paskaia tâ krikan. Gul, silbar, dus bara walpa yus munan. Paskaia dukia sut ba kau pain nani kan. Mairin bara waitna lankira ailal paskaia warkka takan. Mani 7 ra tempel ba ridi kan. Bamna, Jehova ra yabaia yua balan, baku altar purara prisantka nani kahban. Salaman altar mawanra ai lula kriki ai pura sunan: “Jehova, man aitani sma tempel kau tara bara pranakira ba briaia. Kuna, pliskam pali wan mayunra bris bara wan pura sunra wals”. ¿Dîa lukisma? ¿Jehova tempel ba yamni kaikan? ¿Salaman pura sunra ba walan? Salaman ai pura suni danh takan taim, kasbrika pura wina pauta bal iwan. Bara prisantka nani angkan. Baku Jehova marikan tempel ba witin yamni kaikisa. Israel uplika nani baha kaikan taim, lilia pali takan.

King Salaman kulkanka tara brin Israel kuntrika aiska ra, plis laihura ra sin, sinskira kan bamna. Upla nani wih kaiki kan ai trabilka nani wapni mangkaia hilp munbia dukiara. Sabá kwinka sin wih kaikan makabi walanka karna nani wal traika kaikaia. Salaman aisan ba walan taim, win: “Man dukiamra walri ba kasak lukras kapri, kuna nanara kaikisna man kau sinskira sma, walri ba wal. Jehova Gâdkam ba, yamni mai munisa”. Israel ra upla nani ba pain iwi bara lilia kan. Kuna tisku diara nani ba chens takaikan.

Salaman Jehova ra mayuni kan taim, Israel ra laman lâka bâra kan. Kuna witin kuntri wala mairka ailal wal marit takan, bara aidul nani ra mayuni kan. Tawa tawa Salaman chens takan bara aidul nani ra mayunan. Jehova lawi bara win: “Pamalikam ra Israel kingka lâka ba mihta dakbaisna bara tar baikamna. Pîska kau tara ba dukiam dadaukra kum ra yabamna, bara pîska sirpi ba ra pamalikam king aimakbia”.

Witin aisan ba pain ai tânka bribia dukiara Jehova diara wala daukan. Salaman dukia dadaukra kum nina Jeroboam impaki kan bara prapit Ahías wal yabal ra prawan. Prapit ba ai prâkka yari daiki pîs 12 ra kalkan bara Jeroboam ra win: “Jehova Salaman pamalika ra Israel kingka lâka ba mihta dakbaisa bara tar baikaisa. Naha prâkka yari wina 10 pîs alks, kan kiamka 10 kingka kama”. King Salaman, dîa takan ba nu takan taim, Jeroboam ra ikaia lukan. Ba mita, Jeroboam Idsip ra plapan. Piu luan taim, Salaman pruan bara ai luhpia Roboam king aimakan. Baku ba ra, Jeroboam lukan pât ba luan bara Israel ra kli balan.

Ba wina, Israel almukka nani Roboam ra win: “Tawan uplika ra pain munma kaka, man ra kasak kabia”. Kuna ai pânika wahma nani ba win: “Tawan ra karna muns. Kau wark takaia mangks”. Roboam ai pânika bîla walan bara saura kan. Ba mita tawan witin mapara bui bara Jeroboam ra kiamka 10 purara king mangkan. Baha kiamka 10 nani ba Israel kingka lâka nina mâkan. Kiamka 2 ba Juda kingka lâka nina mâkan, bara Roboam ra kasak kan. Baku tnatka ra Israel kiamka 12 ba tar baiwan.

Roboam Jerusalem ra kingka aimaki kan. Jeroboam want apia kan ai uplika nani bahara wabia Jehova ra mayunaia dukiara. ¿Nu sma dîa muni? Kan sibrin kan witin mapara bubia bara Roboam ra bîla walbia. Baku gul bîpka wâl paskan bara ai uplika nani ra win: “Jerusalem laihura sa. Nâra takaski naha bîpka lupia nani ra mayuns”. Upla nani ai bîla wali Jehova ra kli ai âuya tikan.

Israel kiamka 10 kingka lâka ba king saura ailal bri kan, kuna kau saura nani wina Acab ba kumi kan. Baal ra mayuni mairka saura kum ai maya brin. Nina Jezabel. Acab bara Jezabel upla ailal ra munan Baal ra mayunaia. Baku sin Jehova prapitka ailal ra ikan. ¿Jehova dîa daukan? Ai prapitka Elías ra blikan Acab ra ai bîla blikan ba yabaia.

Elías Acab ra win ai saurka tâwan Israel ra lî auhbia apia. Mani yumhpa purkara, insla nani ra diara pâwras kan, upla ailal plun wahwi kan. Ningkara, Jehova Elías ra kli blikan Acab wal aisaia. King Acab Elías ra win: “Man trabil baman daukisma. Naha sut na man pâtkam mita sa”. Elías pana win: “Lî auhras ba yang pâtki apia. Lî auhras sa kan man Baal ra mayunisma. Carmelo ilka banhta ra, tawan uplika nani bara Baal prapitka nani asla praks. Kaisa kaikaia ya ba Gâd kasakkira sa”.

Il ra tawan aiska ba asla prawan, bara Elías win: “Man nani luki kaikaia sma. Jehova Gâd kasakkira sa kaka, nina blîks. Kuna Baal ba gâd kasakkira sa kaka, witin nina blîks. Kaisa kaikaia ya ba Gâd kasakkira sa: Baal prapitka 450 ba sakripais kum ridi dauki bara ai gâdka ra winbia. Yang sin sakripais kum ridi dauki bara Jehova ra winamna. Ani gâdka pauta klauhan blîkbia kaka, witin sika Gâd kasakkira ba”. Tawan ba âu win.

Baku, Baal prapitka nani ba ai sakripaiska ridi daukan. Yu aiska ai gâdka ra wini banhwi kan: “¡Baal, yawan ra aisas!”. Kuna Baal aisaras kan, Elías witin nani lawaska kiki aisan: “Karnikam aiska wal wins. Ban kra yapisa bara tatukbaia nit sa”. Pat tihmia iwuya kan, bara Baal prapitka nani ban wini kan, kuna Baal pana aisaras kan.

Elías ai sakripaiska altar kum ra mangki, lî ailal purara laikan. Bara ai pura sunan: “Jehova, tawan uplika ba kaikbia man Gâd kasakkira sma ba”. Minitka ra, Jehova pauta blikan sakripaiska ba angkaia dukiara. Upla nani ba ai pura winan: “¡Jehova sika, Gâd kasakkira ba!”. Nanara, Elías win: “Baal prapitka kumi sin swipara plapi swakbia”. Baha yua, Baal prapitka 450 nani ra ikan.

Ningkara, kabu purara mukus lupia kum takan, bara Elías Acab ra win: “Bahara pâsa tara kum aula. Trukkam ridi dauki wamtla ra was”. Kasbrika ba mukus siksa ni banhwan, pâsa ba krawan bara lî karna pali auhwan. Las kat lî auhras kan ba nanara auhwisa. Acab ai trukka ra isti pali uli wan. Jehova Elías ra hilp munan kau isti plapaia trukka ba wal. Kuna, ¿Elías trabilka nani ba sut luan? Kaisa kaikaia.

Jezabel Baal prapitka nani ra dîa takan ba nu takan taim ai kupia saura baikan. Baku bîla twatwilkra kum blikan Elías ra wibia: “Baal prapitka nani baku, yauhka pruram kama”. Elías sibri pali taki bara upla iwras tasbaya ra plapan. Bahara ai pura sunan: “Jehova, yang kau sip apia sna. Pruaia want sna”. Elías swapan pali kan bara dus kum munhtara yapan.

Kuna insal kum Elías ra tatukban bara bîla baikra swapni wal win: “Bus bara plun pis”. Elías brit krukma kum walpa lapta nani purara bara lî kap kum kaikan. Plun pin bara lî din, bara kli yapan. Insal ba kli tatukbi bara win: “Plun pis. Karna kaia nit sma impakanka daukaisma ba dukiara”. Baku Elías plun kau wira pin. Ba wina, kakna 40 bara tihmia 40 impakan Horeb ilka ra wan ba kat. Bahara walpa unta kum ra diman yapaia. Bara Jehova witin ra aisan: “Elías, ¿nâra dîa daukisma?”. Elías pana win: “Israel uplika nani pramis mai munan ba daukras. Altarkam nani sauhkan bara prapitkam nani ikan. Bara nanara yang ra sin ai ikaia want sa”.

Jehova Elías ra win: “Taki bara il ra bûi bas”. Ba wina pâsa karna pali kum krawan, bara tasba nikban, ba wina, pauta klauhan kum. Las kat, Elías bîla baikra swapni kum walan. Baku ai mawan ba ai kwalka wal prakan bara walpa unta wina taki bûi kan. Jehova makabi walan dîa muni witin plapan. Bara Elías pana win: “Yang yakan prapit takaskri”. Kuna Jehova win: “Yakan apia sma. Israel ra kau upla 7.000 bâra sa mayunra aiki ba. Was bara Eliseo ra wis witin ba wahbi sakri sa prapit kaia man watlikam ra”. Elías isti pali wan Jehova dîa win ba daukaia. ¿Lukisma Jehova bîla walma kaka man ra sin hilp mai munbia? Âu sika. Lî auhras kan taim dîa takan ba kaisa kaikaia.

Lî auhras kan piua ra Jehova Elías ra win: “Sarepta ra was. Bâra piarka mairin kum ba plun maikbia”. Tawan lata tani ra, Elías piarka mairin kum kaikan pauta wahbi kan, bara lî kap kum makaban. Witin plikaia wan taim, Elías witin ra win: “Pliskam pali, brit pîs kum sin aik”. Kuna piarka mairin ba win: “Brit âpu sna, diara sip maikras. Batana laya bara plawar baman brisna, plun wira dauki yang bara luhpi waitna wal piaia”. Elías pana win: “Jehova pramis munan, man brit angki aikma kaka, batana laya bara plawar bri kama, lî auhras piua aiska ra”.

Baku piarka mairin ai watla ra wan, Jehova prapitka ra brit dauki yan. Piarka mairin bara ai luhpia waitna plun bri kan, lî auhras piua aiska, Jehova pramis munan baku. Ai plawarka bara batana laya watla ba imhti takras kan.

Ba wina, diara sari pali takan. Piarka mairin luhpia sirpi ba siknis pali taki pruan bara witin Elías ra bik takan hilp munbia. Baku ba ra Elías, ai yapti klahkla wina tuktika ba brin. Utla pura rumka kum ra brih ulan. Ba wina, krikri kum ra tniki bara ai pura sunan: “Jehova pliskam pali, naha tuktika ra ai rayaka kli yas”. ¿Nu sma dîa muni painkira sa Jehova baha daukan ba? Kan baha piua kat, pruan kumi sin kli buras kan. Bara baku sin, piarka mairin bara ai luhpia ba Israel uplika nani apia kan.

Baku ba ra, tuktika ba ai wingka puhban bara kli raya takan. Elías piarka mairin ra win: “¡Kaiks, luhpiam raya sa!”. Witin lilia pali taki bara Elías ra win: “Nanara nu sna, man ba Gâd uplika kum sma. Aisisma ba Jehova wina sa, baha mita piua bani rait takisa”.

King Acab Jezreel ra ai watla windarka wina, waitna kum nina Nabot wainka nasla ba kaiki kan. Acab baha tasbaya ba want kan bara trai kaikan atkaia. Kuna Nabot atkaia want apia kan, Jehova lâka ra ulban sa ai aisa nani wina tasba pahni brin ba, sip apia sa atka waia. Nabot lâ kat daukan. ¿Nabot lâ kat daukan ba Acab rispik munan lukisma? Apia. Acab praut takan. Praut pali takan ba mita, ai rumka bîla wina takaia want apia kan, plun sin piras kan.

Acab maya ba, kwin saura Jezabel kan. Witin win: “Man Israel kingka sma, bara dîa want sma ba sip sma briaia. Baha tasbaya ba yang brih bara maikamna”. Baku ba ra, tawan almukka nani ra wauhtaya nani ulban. Baha wauhkataya nani ra adar yan Nabot ra dahra sâkbia witin Gâd ra lahtuban bara ningkara walpa ni sabi ikbia. Almuk nani ba Jezabel dîa adar yan ba sut daukan. Ba wina witin Acab ra win: “Nabot nanara pruan sa. Ai wainka nasla ba sip sma briaia”.

Nabot baman apia kan upla pâtkas Jezabel ikan ba. Witin Jehova ra latwan kaiki uplika wala nani ailal ra ikan. Baku sin aidul nani mayuni kan bara, diara saura wala nani sin dauki kan. Kuna Jehova ai saurka nani ba sut kaiki kan. ¿Jehova Jezabel ra dîa munbia?

Acab pruan wina piu kum luan, ai luhpia Joram King aimakan. Baku Jehova waitna kum nina Jehú ra blikan Jezabel bara ai pamali ra klala yabia dukiara.

Jehú ai trukka ra uli Jezreel ra wan, Jezabel tawanka ra. Joram sin ai trukka ra uli Jehú ra kaikaia wan. Kaikan taim, Joram makabi walan: “¿Kupia kumi lâka bâra sa ki wan tilara?”. Jehú pana win: “Yaptikam Jezabel ba, saurka nani ban daukisa kaka, kupia kumi lâka âpu”. Ba wina Joram trai kaikan wilwi tawaia ai trukka wal mahka waia dukiara, kuna Jehú trisba kum lulki bara ikan.

Ba wina, Jehú Jezabel watla ra wan. Witin nu takan Jehú aula ba, bara ai mawan bara ai tawa skahki ai watla pura windarka lamara bîla kaikan. Balan taim, Jezabel praut wal lakula daukan. Jehú Jezabel dukia dadaukra nani lamara kan ba ra adar yan: “¡Tukbi bataks!”. Witin nani windar bâk platukban, bara witin kauhi pruan.

Baha wina, Jehú Acab luhpia 70 ikan bara kuntri ba wina Baal mayunanka ba sakan. ¿Tânka brisma? Jehova diara sut nu sa bara, saurka dauki uplika nani ra piua kat klala yabisa.

Josafat Juda kingka kum kan, Baal altarka bara aidul nani kuntri ra bâra kan ba sauhkan. Witin want kan upla nani ba Jehova lâka nani kakaira takbia. Ba mita, tawan tâ uplika bara libait nani ra blikan Juda aiska ra Jehova lâka nani ba upla nani ra smalkaia.

Nisan nani lamara kan ba sibri kan Juda mapara aiklabaia, kan nu kan Jehova ai uplika nani ra hilp munisa. King Josafat ra prisant nani kat sin yabi kan. Kuna Amón, Moab bara Seír tasbaya wala uplika nani Juda mapara aiklabaia wan. Josafat nu kan Jehova hilpka nit takaia kan ba. Baku Jerusalem ra waitna, mairin bara tuktan nani sut asla prakan. Witin nani mawan ra pura sunra kum daukan: “Jehova man âpukira aiklabanka ba yawan nani win takbia apia. Pliskam pali, wan wis yawan dîa daukaia ba”.

Jehova Josafat ra walan bara pana win: “Si bripara, yang hilp mai munamna. Pliskam nani ra was, sâp bas, bara kaiks nahki swaki mai sakaisna ba”. ¿Jehova nahki swaki sâkbia?

Titan wala ra, Josafat aiwawanra nani wahbi sakan bara win aiklaklabra nani tâura wapbia. Witin nani Jerusalem wina takan, aiklabaia tasbaya tani ra wan, plis kum nina Tecoa mâki kan ba.

Ai karma binka karna wal Jehova ra lawana nani aiwani aiwawanra nani ba lilia kan. Jehova ai uplika nani tâwan aiklabi kan. Amón bara Moab uplika nani ra lal blakan, bara pâna pâna aiklabi sut pruan. Kuna Jehova Juda uplika nani ra suldiar bara prîs nani ra kan kahban. Nisan nani lamara kan ba sut nu takan Jehova dîa daukan ba, bara ai tânka brin witin ban ai waihla nani wina ai uplika nani kan kahbisa. ¿Jehova ai uplika nani ra nahki swaki sakisa? Tnatka ailal ra. Witin upla nani hilpka nit apia.

Siria ra, Israel tuktika mairin kum kan ai watla bara ai pamali wina laihura kan. Siria suldiarka nani ba alki brih wan kan, bara nanara, suldiarka nani lalka kum nina Naamán maya mairin dukia dadaukra kan. Tukta mairin ba Jehova ra mayuni kan, kuna upla nani wal iwi kan ba lika apia.

Naamán ai taya ra siknis saura kum bri kan bara latwan muni kan. Tuktan mairin ba hilp munaia want kan, baku maya mairin ra win: “Upla kum kakaira sna mayam waitna ra hilp munbia kau pain ai dara walaia. Israel prapitka kum sa nina Eliseo. Witin mayam ra sip sa rakaia”.

Naamán maya ba win tukta mairin dîa aisan ba. Witin tnatka ailal plikan rawaia dukiara, ba mita Eliseo watla ra wan Israel ra. Naamán luki kan Eliseo ba taki kaikbia upla kulkanka tara bri baku. Kuna witin wal taki aisaia watlikara, Eliseo ai dukia dadaukra kum blikan witin ra kaikbia, bara naha maisa pahkanka yabia: “Was bara Jordan awalka ra aima 7 dims. Baku rawma”.

Naamán baha ba laik apia kan bara win: “Lukri naha prapitka na ai Gâdka ra wini bara ai mihta nani wahwi ai rakbia. Kuna diara kumi ai win ba sika yang wamna Israel awalka ra. Siria ra awala kau pain nani yawan brisa. ¿Dîa muni yang baha awalka nani ra sip waras?”. Naamán praut taki Eliseo watla wina mahka wan.

Naamán dukia dadaukra nani witin ra hilp munan diara ba kau pain luki kaikaia bara win: “¿Rait apia man, dîa kabia sin daukma rawaia dukiara? Naha prapitka mai mamkabi ba isi pali sa. ¿Dîa muni daukras?”. Naamán bîla wali bara Jordan awalka laya ra 7 taim diman. Aima las diman ba ra Naamán aiska pali rawi lî wina bal takan. Lilia pali kan bara Eliseo watla ra wan tingki wiaia. Bara win: “Nanara nu sna Jehova sika Gâd kasakkira ba”. Naamán rawi ai watla ra balan. Israel tuktika mairin witin ra kaikan taim, ¿nahki ai dara walan luki?

Siria kingka Bin-Hadad aima ailal Israel mapara aiklaban. Kuna prapit Eliseo ba piua sut Israel kingka ra maisa pahki kan plapi swakbia dukiara. Ba mita Bin-Hadad Eliseo ra alki priskaia lukan. Nu takan Dotán tawanka ra kan ba, bara Siria war aiklaklabrika nani blikan alkaia dukiara.

Siria uplika nani tihmia ra Dotán ra wan. Titan ra, Eliseo dukia dadaukra ba takan, bara kaikan tawan ba suldiar nani kutbi bri kan. Sirang iwan bara ai pura winan: “Eliseo, ¿yawan dîa daukbia?”. Eliseo pana win: “Yawan nani wal, suldiar kau ailal sa witin nani ba wal”. Baha minitka ra, Eliseo dukia dadaukra ra Jehova yan kaikan il nani ra war aiklabaia pauta klauhi araska bara trukka nani banhki kan.

Siria suldiarka nani Eliseo ra alkaia trai kaikan taim, witin ai pura sunan: “Jehova, du pali blain dauks”. Ban wina, suldiar nani ba ai tânka briras kan anira kan sapa, kaikaia sip kan kuna. Bara Eliseo win: “Tawan ba sip sakras sma, nini blîks, bara mai brih wamna waitnika plikisma ba ra”. Witin nani Eliseo nina bliki Samaria kat wan. Baha ra Israel kingka iwi kan.

Ba kat Siria uplika nani ba ai tânka brin anira kan ba, kuna diara daukaia sip apia kan. Israel kingka ba Eliseo ra makabi walan: “¿Ikamna?”. Siria uplika nani ba Eliseo ra saura munaia trai kaiki kan, ¿naha sanska wal witin pana munbia? Apia. Witin king ra pana win: “Ikpara. Yas plun pibia bara swis mahka wabia”. Baku king ba plun ailal ridi dauki, ba wina swin ai watla nani ra mahka wabia.

Jezabel ba luhpa mairin kum baikan nina Atalía, ai yapti baku saurakira kan. Atalía Juda kingka wal marit takan. King ba pruan taim, ai luhpia waitna king aimakan. Bara ai luhpia pruan taim, Atalía Juda kingka lâka ba brin. Upla kumi sin ai mihta dakbia apia dukiara, king luhpia nani ra ikaia trai kaikan bara upla wala nani sin witin ai watlikara king aimakaia sip ba. ¡Ai mula nani kat sin ikan! Ba mita upla sut sîa kan.

Prîs tara Joiadá bara ai maya mairin Joseba nu kan Atalía dîa dauki kan ba saura pali kan. Baku ai rayaka pât ra dingkan Atalía mulika kum ra kan kahbaia dukiara, bibi kum nina Joás. Tempel ra pakan.

Joás 7 mani alkan taim, Joiadá main kakaira nani lalka bara libait nani sut ra asla prakan. Bara win: “Tempel durka nani ba main kaiks, upla kumi sin swirka dimbiara. Ba wina, Joiadá Joás ra kraun mangkan Juda kingka kabia dukiara. Bara Juda uplika nani ai pura winan: “¡King ba ban kabia!”.

Kwin Atalía ba upla nani bin dauki ba walan bara tempel ra plapi wan. King raya ba kaikan taim, ai pura winan: “¡Maipara buan! ¡Maipara buan!”. Main kakaira nani lalka ba witin ra alkan, brih wan bara ikan. Witin tânka saura kum marikan kuntri ba mapara. ¿Nanara dîa takbia?

Joiadá kuntri ra hilp munan Jehova wal lâ kum daukaia. Baha lâka ba wal witin nani Gâd ra pramis takan witin ra baman mayunaia. Joiadá adar yan Baal tempelka ba slingbaia bara aidul nani ba sauhkaia. Prîs bara libait nani mangkan Jehova tempelka ra wark takbia, upla nani ba sip kabia bahara kli mayunaia dukiara. Baku sin main kakaira nani mangkan tempel ba aihwakaia, klin takras nani dimbia apia dukiara. Ba wina Joiadá bara main kakaira lalka nani ba Joás ra brih wan king watla ra, bara king iwaika ra yan iwan. Juda uplika nani lilia pali takan. Las kat Jehova dukia daukaia sip kan, Atalía saurakira bara Baal mayunanka ba wina pri. ¿Lukisma Joiadá kupia karnakira kan? ¿Tânka brisma baha daukan ba mita upla ailal ra hilp munan?

Asiria tawanka kum Ninibi nina mâki kan uplika nani ba saura pali kan. Jehova ai prapitka Jona ra adar yaban Ninibi ra wabia bara uplika nani ra wibia chens takaia. Kuna Ninibi ra waia watlikara, Jona plis wala ra plapan. Tawan kum ra wan nina Tarsis but kum ra uli.

But ba kabu ra kan taim, pâsa tara kum krawan, bara but ra kan nani ba sibrin pali takan. Ai gâdka nani ra ai pura suni bara makabi walan: “¿Dîa muni naha wan takisa?”. Las ra, Jona win: “Yang pâtki mita. Jehova adar aikan ba daukaia apia dukiara plapisna. Pâsa tara takaskbia dukiara, liura ai lulks”. But uplika nani ba Jona ra liura lulkaia want apia kan, kuna witin kli makaban liura lulkbia. Baku kabu ra lulkan, bara pâsa tara ba takaskan.

Jona lukan witin prubia. Kabu ra kau kau rungwi auya kan ba ra, Jehova ra ai pura sunan. Baku Jehova inska tarka tara kum blikan Jona ra langkaia, kuna ikras kan. Inska biara bilara, Jona Jehova ra ai pura sunan: “Pramis mai munisna piua sut ra bîlam walaia”. Jehova Jona ra raya ban bri kan inska biara bilara yu yumhpa bara ningkara yaban inska ba sauhka ra aikabi sakan.

Jehova Jona ra swaki sakan, kuna baha ba ¿Ninibi ra wabia apia wiaia want kan? Apia. Jehova kli blikan, nanara lika Jona bîla walan. Bâra wan, upla saura nani ra win: “Jehova yu 40 bilara tawan ba sauhkaisa”. Sakuna diara bîla kaikras kan ba takan. Ninibi uplika nani ba bîla wali bara chens takan. Ninibi kingka ba ai uplika nani ra win: “Gâd ra bik taki makas bara kupiam laks, baku ban kra wan sauhkbia apia”. Jehova kaikan upla nani ba ai kupia lakan, ba mita sauhkras kan.

Jehova tawan ba sauhkras kan ba mita, Jona praut takan. Minit kum luks: Jehova, Jona wal ai kupia alki takaskan bara umpira kaikan. Kuna Jona, Ninibi uplika nani ra umpira kaikras kan. Baha watlika ra, tawan wina lata tani ra wih pispis distika ra iwi bara praut takan. Ba wina, pispis ba lâwan bara Jona ai kupia baikan. Baku ba ra, Jehova witin ra win: “Man baha inma wahia ba kau tara kulkisma Ninibi uplika nani wal. Yang witin nani ra umpira kaikri, ba mita swakwi takan”. ¿Gâd Jona ra dîa smalkaia want kan? Ninibi uplika nani ba kau kulkanka tara brisa inma wahia ba wal.

Asiria kingka lâka ba Israel kiamka 10 kingka lâka ba dakbi brin kan. Nanara, Asiria kingka Senaquerib, Juda kiamka wâl kingka lâka ba sim briaia want kan. Ba mita Juda tawanka kumi bani dakbi briaia tâ krikan. Kuna tawanka kau brin dauki kan ba sika Jerusalem. Jehova kan kahbi kan ba sika Senaquerib nu âpu kan.

Ezequías Juda kingka ba, Senaquerib ra lalah ailal aibapan Jerusalem mapara aiklabia apia dukiara. Senaquerib lalahka ba brin, ban sakuna ai suldiarka karnakira nani blikan mapara aiklabia. Tawan uplika nani sirang iwan, kan Asiria uplika nani kau kau lamara bali kan. Bara, Ezequías win: “Si bripara. Asiria uplika nani ba karna sa, kuna Jehova kau karna wan daukbia witin nani ba wal”.

Senaquerib ai bîla twatwilkra rabsaqué ba blikan, Jerusalem uplika nani lawaska kikaia. Rabsaqué ba lata tani ra takaski ai pura winan: “Jehova hilp mai munbia apia. Swipara Ezequías kunin mai munbia. Wan mihta wina gâd kumi sin kainam kahbia apia”.

Ezequías dîa daukaia sapa Jehova ra makabi walan, bara Jehova pana win: “Rabsaqué ba dîa aisi ba wali sibripara. Senaquerib Jerusalem dakbi bribia apia”. Ba wina, Ezequías Senaquerib wina wauhtaya nani brin ba naku ulban kan: “Maipa bupara. Jehova swaki mai sâkbia apia”. Bara Ezequías ai pura sunan: “Jehova, du pali, swaki wan sâks bara upla sut nu takbia man baman Gâd kasakkira sma ba”. Bara Jehova pana win: “Asiria kingka ba Jerusalem ra dimbia apia. Yang tawanki ba kan kahbaisna”.

Senaquerib luki kan tisku Jerusalem dakbi bribia. Kuna tihmia kum, Jehova insal kum blikan Asiria uplika nani kiampka ra, tawan lata tani ra kan ba. ¡Insal ba 185.000 suldiar ra ikan! King Senaquerib ai uplika kau karnakira nani ba lus tiwan, kau diara wala daukaia sip apia kan, lus tiwi ai watla ra mahka wan. Baku Jehova Ezequías bara Jerusalem kan kahban, pramis munan kan ba baku. Man Jerusalem ra kapram kaka, ¿Jehova ra kasak lukaia kapram?

Josías Juda ra king aimakan taim, 8 mani bri kan. Baha piua ra upla nani ba magia yus muni bara aidul nani mayuni kan. Josías 16 mani bri kan taim, lâ kat Jehova ra mayunaia want kan. Ba wina 20 mani bri kan taim, aidul bara altar nani kuntri aiska ra sauhkaia tâ krikan. Bara 26 mani bri kan taim, diara sut ridi daukan tempel kli paskaia.

Hilquías prîs tara ba, Gâd Lâka wauhkataya karbanka ba tempel ra sakan. Ban kra baha karbanka ba Moses ulban kata ba. Safán, king âiulbrika ba, karbanka ba Josías ra brih wan bara ai bîla baikra tara wal aisi kaiki yaban. Josías walan bara ai tânka brin tawan uplika ba mani ailal bilara Jehova ra bîla walras kan. Baku ba ra, king Josías Hilquías ra win: “Jehova yawan nani wal ai kupia sauhkan sa. Witin wal aisas bara wan wibia yawan dîa daukaia ba”. Jehova prapitka mairin Huldá ra naha bîla yaban: “Juda uplika nani ba ai swin. Yang klala yabaisna, kuna Josías king kabia piua ra lika apia, kan witin bawikira sa”.

King Josías naha bîla walan taim, tempel ra wan bara Juda uplika sut asla prakan. Ba wina Jehova lâka ba upla nani sut mawan ra aisi kaikan. Josías bara tawan uplika ba pramis takan ai kupia aiska Gâd ra bîla walaia.

Mani ailal kan Juda uplika nani ba Insal Luan Yua ba kulkras kan. Kuna Josías Lâ ra aisi kaikan Insal Luan Yua ba mani bani kulkaia kan, baku tawan uplika ra win: “Jehova dukiara, Insal Luan Yua liliaka kum bribia”. Ba wina, Josías adar yaban sakripais ailal ridi daukbia bara aiwawanra daknika kum tempel ra kabia. Baku, Brit Îs Mangkras Liliaka ba daukan yu 7 bilara. Insal Luan Yua kum baha baku daukras kan Samuil yua nani wina. Josías kasak pali Jehova Lâka ba latwan kaiki kan. ¿Bara man? ¿Jehova wina lan takaia laik sma?

Jehova Jirimaya ra wahbi sakan Juda tasbaya ra prapit kaia. Baha ra iwi uplika nani ra smalkaia blikan bara maisa pakbia diara saura dauki ba swibia. Kuna Jirimaya Jehova ra pana win: “Kau wahma lupia sna, upla ailal mawan ra turi aisaia sip apia sna”. Jehova pramis munan: “Si bripara, yang hilp mai munamna bara mai wimna dîa smalkaia sma ba”.

Jehova Jirimaya ra win tawan almukka nani ra asla prakbia, slaubla sumika kum witin nani mawan ra baiki bara wibia: “Naha sim baku Jerusalem ra takaisa”. Jirimaya baha daukan taim, tawan almukka nani praut takan. Prîs kum nina Pashur Jirimaya ra prukan, mina bara mihta nani tat ra priski swin. Jirimaya tihmia aiska sip aiawras kan. Pashur yauhkika titan ra lanhkan. Bara Jirimaya win: “Yang kau sip apia sna. Smalkamna apia”. Kuna ¿rait pali baha daukan? Apia. Jirimaya pain luki kaiki bara win: “Jehova bîla ba kupi ra pauta klauhan kum baku sa. Smalkaia swimna apia”. Baku ba ra, Jirimaya upla nani ra ban maisa paki kan.

Mani ailal luan bara king raya kum Juda ra king aimakan. Prîs bara prapit kuninkira nani ba Jirimaya smalkanka ba misbara kaiki kan. Baha mita tawan wihtka nani ra win: “Naha waitnika ba pruaia sa”. Jirimaya win: “Ai ikma kaka, waitna pâtkas kum ra ikma. Yang smalkanki ba Jehova wina sa, yang kupi wina lika apia”. Tawan wihtka nani baha walan taim aisan: “Naha waitnika na pruaia apia sa”.

Jirimaya ban smalki kan, kuna naha taim, wihta nani ba ai kupia saura baiki king ra makaban ikbia. King ba pana win: “Dîa daukaia want sma ba witin ra dauks”. Baku, alki liwanhta pakni drapapa ailal bri kan ba ra lulkan baha ra prubia wisi. Jirimaya tawa tawa, drapapa ra rungwi kan.

Ba wina king dukia dadaukra wihtka kum Ébed-Mélec nina mâki kan ba king ra win: “Wihta nani ba Jirimaya ra liwanhta kum ra lulkan. Yawan bâra swibia kaka, prubia”. King ba adar yaban Ébed-Mélec ra waitna 30 brih wabia bara Jirimaya ra liwanhta wina sâkbia. Jirimaya takaskras ban smalki kan. ¿Rait apia man witin baku kaia want sma?

Juda uplika nani ba aima ailal Jehova ra swin bara aidul nani ra mayunan. Baha manka nani piua ra, Jehova trai kaikan prapit ailal bliki hilp munaia. Sakuna upla nani ba bîla walras kan bara lawaska kiki kan. Jehova aidul lâka âpu daukaia want kan. ¿Nahki daukbia?

Nabucodonosor, Babilon kingka ba, kuntri kum bara wala dakbi bri kan. Aima pas Jerusalem dakbi brin taim, king Joaquín, wihta, war aiklaklabra, bara diara papaskra nani ra alkan, bara Babilon ra brih wan. Jehova tempelka dukia manakira nani sin brih wan. Ba wina, Nabucodonosor lukan Sedequías ba Juda kingka kabia.

Tâ krikanka ra king Sedequías Nabucodonosor ra bîla wali kan. Kuna prapit kuninkira nani bara kuntri lamara uplika nani ba Sedequías ra wi kan Babilon mapara bubia. Jirimaya maisa pakan: “Mapara buma kaka, prura, plun wahwan bara siknis nani Juda ra takbia”.

Mani 8 luan ba ra, king Sedequías ba Babilon mapara buan, bara baha dukiara Idsip war aiklaklabrika nani hilpka makaban. Baku ba ra, Nabucodonosor ai war aiklaklabrika nani blikan Jerusalem mapara aiklabaia. Babilon war aiklaklabrika nani ba tawan aiska kutban. Jirimaya Sedequías ra win: “Jehova win Babilon uplika nani mapara buras sma kaka, man bara tawan ba swakbia. Kuna mapara buma kaka, witin nani Jerusalem ba angkbia bara silak uplika baku mai brih wabia”. Sedequías pana win: “¡Yang mapara aiklabamna!”.

Mani kum bakriki ningkara, Babilon uplika nani Jerusalem kutbanka nani ba pîs kum slingban. Bahak tawan ra dimi bara angkan. Tempel ba sin angkan, upla ailal ikan bara upla tausin nani silak ra brih wan.

Sedequías Jerusalem wina plapan, kuna Babilon uplika nani nina bliki Jeriko lamara alkan bara king Nabucodonosor ra brih wan. King ba Sedequías ra taibi munan kaikbia nahki ai luhpia nani iki ba. Ba wina, blain dauki silak ra mangkan. Sedequías bahara pruan. Kuna Jehova Juda uplika nani ra naha pramiska daukan: “Wamtla ra kli mai brih balamna Jerusalem ra mani 70 lubia taim”.

¿Babilon ra brih wan wahmika nani ra dîa takbia? ¿Jehova ra ban kasak kabia?

Nabucodonosor Juda wihtka nani Babilon ra brih wan, bara witin nani king lamara warkka taki nani lalka kum mihta ra mangkan Aspenaz nina mâki kan. Baku sin, adar yaban wark tatakra lalka ba wahma nani wîna tara yamni sinska yari nani ra plikbia baha wihtka nani tila ba wina. Naha wahmika nani skul pain kum briaia kan mani yumhpa bilara, Babilon ra kulkanka tara warkka briaia dukiara. Babilon bîla aisanka acadio ba aisi kaikaia, ulbaia bara aisaia lan takaia kan. King watla ra plun kahbi kan ba sim pata ba piaia kan. Naha wahmika nani tila ba wina Daniel, Ananías, Misael bara Azarías nina mâki kan. Kuna Aspenaz Babilon uplika nani nina yaban: Beltsasar, Sadrac, Mesac bara Abednego. ¿Baha skulka briaia kan ba lukisma sip kan Jehova wina laihura sakaia?

Naha wahmika walhwal want kan Jehova bîla wali daukaia. Witin nu kan king pata ba piaia apia kan, kan Jehova lâka nani ba saura kulki kan baha pata nani kum kum piaia. Ba mita, Aspenaz ra makaban: “Du pali, taibi wan munpara king pata piaia”. Kuna Aspenaz pana win: “Plun pain piras sma kaka, king ba kaikbia siknis sma, bara ai ikbia”.

Daniel lukanka kum sakan. Main kakaira ra win: “Du pali, upan âpu pata bara lî baman wanki bas yu 10 bilara. Ba wina king pata pi wahmika nani wal praki wan kaiks”. Main kakaira ba pain lukan.

Yu 10 luan taim, Daniel bara ai pânika nani wîna tara ba kau yamni kan wahma wala nani ba wal. Jehova lilia pali kan witin nani wal, kan ai bîla wawalra nani kan. Baku sin Daniel ra sins lâka yan nakra ra marikanka bara yapri sauhkanka nani tânka briaia dukiara.

Mani yumhpa skulka ba danh takan taim, Aspenaz Nabucodonosor mawan ra wahma nani ba brih wan. King ba witin nani wal aisan bara tânka brin Daniel, Hananías, Misael bara Azarías kau sinska yari kan wahma wala nani ba wal. Baku wahbi sakan ai lamara wark takbia dukiara. Ba wina, king ba aima ailal diara tara nani dukiara lukanka makabi kan. Jehova sins lâka kau yaban king uplika sinskira bara mago wala nani ba wal.

Daniel, Ananías, Misael bara Azarías ai kuntrika ra apia kan, kuna piua sut ai kupia krauki kan Jehova uplika kan ba. ¿Bara man? Aisikam nani man wal apia sa taim, ¿Ban Jehova ra kupiam krauki kama?

Tihmia kum king Nabucodonosor yapri sauhkan aihka kum kaikan, baha luki sip yapras kan. Mago nani ra wini bara win: “Yapri sauhkan kaikri ba ai wis”. Witin nani pana win: “King tara, yapri sauhkankam ba wan wis”. Kuna king ba pana win: “¡Apia! Yapri sauhkanki ba man nani ai wis. Ai wiras sma kaka, mai ikamna”. Kli makaban: “Kuna yapri sauhkankam ba wan wis, bara ningkara tânka ba mai wimna”. Witin pana win: “Kunin ai munaia trai kaikisma. ¡Yapri sauhkanki ba ai wis!”. Witin nani pana win: “Na tasba ra upla kumi sin âpu sa makabisma ba daukaia. Sip apia sa daukaia”.

Nabucodonosor ai kupia baiki bara adar yan kuntri bilara sinskira nani ba sut ikbia. Baku Daniel, Sadrac, Mesac bara Abednego ra sin ikaia kan. Kuna Daniel king ra taim makaban. Baku, witin bara ai pânika nani Jehova ra ai pura sunan hilp munbia. ¿Jehova dîa daukan?

Jehova Daniel ra marikan Nabucodonosor yapri sauhkanka ba nakra ra marikanka kum ra, bara dîa tânka ba win. Yu wala, Daniel king dukia dadaukra ra wan bara win: “Sinskira nani kumi sin ikpara. Yang sip sna king yaprisauhkanka ba tânka wiaia”. Dukia dadaukra ba Daniel ra brih wan Nabucodonosor mawanra, Daniel king ra win: “Gâd naika piua ba mamrikan. Naha sa yaprisauhkankam ba: Gul ni kusbi paskan lal lilkika tara kum kaikram, lama bîla bara klahkla nani ba silbar kan, maisa bara kuhma nani ba bras kan, braka nani ba ayan kan bara mina nani ba ayan slaubla wal miks munan kan. Ba wina, il kum wina walpa kum takan bara lilka tara mina ra karna pali prukan. Lilka tara ba baiwi pukpuka takan, bara pâsa ba brih wan. Walpa ba il tara kum taki tasba aiska banhkan”.

Ba wina, Daniel win: “Yapri sauhkan tânka ba naha sa: kingkam lâka ba sika gul lal ba. Silbar pîska ba king lâka kum ninamra takbia ba. Bras ba king lâka wala kabia, ningkara balbia ba, bara tasba aiska purara king aimakbia. King lâka wala aula ba karna pali kabia ayan baku. Las ra king lâka tar baiwan kum kabia pîska karna bri kabia ayan baku, pîska swapni bri kabia slaubla baku. Walpa il kum takan ba Gâd kingka lâka sa, king lâka wala nani sut ra sauhkbia bara ban kaia ra ban kabia”.

Nabucodonosor Daniel mawan ra ai lula kriki ai lal makupi bara win: “Man Gâdkam yapri sauhkanki ba param sakan. Witin baku gâd wala âpu sa”. Daniel ra ikaia watlikara, Nabucodonosor sinskira nani sut lalka mangkan bara Babilon purara wihta tara mangkan. ¿Kaikram Jehova nahki Daniel pura sunra wali hilp munan ba?

King Nabucodonosor ba lilka wal yapri sauhkanka kaikan ba wina, adar yaban gul wal lilka tara kum paskbia. Dura langnika ra bapan bara kuntri uplika kulkanka tara bri nani sut ra, Sadrac, Mesac bara Abednego sin baha mawan ra asla prakan. King ba adar yaban: “Trumpit, arp bara miusik walma taim, lilka ba mawan ra bawaia sma. Ya ya daukras kabia kaka pauta klauhan kubuska ra klala yaban kabia”. ¿Dîa lukisma? ¿Hibru yumhpa ba lilka tara mawan ra bawbia? ¿Apia kaka Jehova ra baman mayunbia?

Bara, king ba miusik kangbaia adar yaban. Sut bawi lilka ba mayunan. Kuna Sadrac, Mesac bara Abednego mayunras kan. Waitna kum kum kaikan bara king ra win: “Baha hibruka yumhpa lilka ba mayunras”. Nabucodonosor wahmika yumhpa ra winan bara win: “Sans wala kum maikaisna lilka ba mayuni banhma dukiara. Daukras sma kaka, pauta klauhi kubuska tara ra mai lulkamna. Bara gâd kumi sin mihti wina swaki mai sâkbia apia”. Witin nani pana win: “Yang nani sans wala nit âpu sna. Wan Gâdka sip sa swaki wan sakaia. Swaki wan sakras kabia sin, king tara, lilka ba yang nani mayunamna apia”.

Nabucodonosor ai kupia baikan. Ai uplika nani ra win: “¡Kubus ba aima 7 taim kau lapta dauks!”. Ba wina ai suldiarka nani ra adar yan: “Naha waitnika nani mihta priski bahara lulks”. Kubus ba lapta pali kan suldiar nani ba lamara wan taim prui banhwan. Hibru nani yumhpa ba pauta ra kauhan. Ba wina, Nabucodonosor kubus lamara wan, bara upla walhwal wapi kan kaikan yumhpa watlika ra. Sirang pali iwi bara ai hilp mamunra nani ra makabi walan: “¿Yawan waitna yumhpa pauta ra lulkan apia? Walhwal kaikisna, ¡bara kum ba insal talia sa!”.

Nabucodonosor kubus lamara kau wih ai pura winan: “¡Laih pura Gâdka dukia dadaukra nani, bal taks!”. Sut sirang iwan Sadrac, Mesac bara Abednego pauta wina bal takan taim, bara witin nani ra diara kumi sin takras kan. Ai taya, tawa bara prâkka amras kan, kiasma kîa sin âpu kan.

Nabucodonosor win: “¡Sadrac, Mesac bara Abednego Gâdka ba tara sa! Ai insalka kum blikan swaki sâkbia. Witin nani Gâdka baku gâd wala âpu sa”.

Hibru yumhpa ba wilin kan Jehova ra kasak kaia, dîa takbia kra sin. ¿Man witin nani baku kasak kaia want sma?

Tihmia kum, Nabucodonosor ba sirang iwan yapri sauhkan kum kaikan ba. Sinskira nani ra winan yapri sauhkan ba tânka wibia dukiara, kuna kumi sin tânka wiaia sip apia kan. Las ra, king ba Daniel wal aisan.

Nabucodonosor Daniel ra win: “Yapri sauhkan ra dus kum pâwi kasbrika kat alkan kaikri. Tasba pîska bani wina sip kan kaikaia. Wahia painkira nani bara mâ nani bri kan. Daiwan nani ai distika ra ris bri kan, daiwan tnawira nani dusa tnawa ra ai watla mâki kan. Ba wina, insal kum heven wina bal iwan bara ai pura wini aisan: ‘¡Dusa ba bara tnawa nani ba klaks! Kuna playa pîska kum wakia nani wal swis. Baku ba ra ayan bara bras kiwka wal wilks. Dusa kupia ba chens takbia. Waitna kupia kum apia kabia, kuna daiwan kupia kum bribia. Bara piu 7 lubia. Upla sut ai tânka bribia Gâd ba King sa bara witin king lâka kum yabaia sip sa yaura witin yabaia lukbia ba’”.

Jehova yapri sauhkanka tânka ba Daniel ra win. Daniel yapri sauhkan tânka ba brin taim, sirang iwi, aisan: “King tara, baha yapri sauhkanka ra kaikram ba waihlam nani ra takbia kaka pain kabia, kuna man ra mai takaisa. Dus tara klakan ba sika man. Kingkam lâka tikma bara latara daiwan wail baku inma wahia pima. Kuna insal ba win plamaya pîs kum wakia nani wal swibia. Baha tânka ba kli king kama”.

Mani kum ningkara, Nabucodonosor ai watla bahna ra kirhbi kan bara Babilon prana ba kaiki witin win: “¡Tawan pranakira paskri! ¡Yang kau tara sna!”. Baha aisi kan ba ra, heven wina bîla baikra kum witin ra win: “¡Nabucodonosor! Kingkam lâka ba lus tiwram”.

Ba minitka ra, Nabucodonosor krisi takan bara daiwan wail kum baku takan. Baku king watla wina kangban bara latara daiwan nani tilara iwan. Ai tawa yari pâwan bara yakal tnawa talia kan, ai asmala nani yari takan tnawira kum asmala nani baku.

Mani 7 luan, Nabucodonosor kli upla sinska brin, bara Jehova Babilon kingka kaia kli mangkan. Baku ba ra Nabucodonosor aisan: “Jehova ra mayunisna, heven Kingka ba. Upla tara puli nani ra witin swira daukisa. Nanara yang nu sna Jehova ba King sa bara witin king lâka kum yabaia sip sa yaura witin yabaia lukbia ba”.

Piu kum luan, Belsasar Babilon kingka aimakan. Tihmia kum, ai uplika nani tausin dukiara plun tara kum daukan. Kuntri uplika kau tara nani bâra kan. Bara ai dukia dadaukra nani ra adar yan gul kapka nani Nabucodonosor Jehova tempelka wina brih balan ba sâkbia. Belsasar bara ai uplika nani kapka nani yus munan diaia dukiara bara ai gâdka nani ra mayuni banhwi kan. Ban wina, upla mihta kum takan bara bîla aihkakira kum kum ba piaia pliska kutbanka ra ulbi kan.

Belsasar sirang iwan. Ai magoka nani ra wini pramis munan: “Ya ya kra bîla nani na tânka ai wibia kaka, Babilon waitnika tara nani tilara yumhpika ba man kama”. Trai kaiki banhwan, kuna bîla blikan ba kumi sin sip apia kan tânka wiaia. Ba wina kwin ba balan bara win: “Waitna kum nina Daniel Nabucodonosor ra yapri sauhkan bara bîla aihka nani tânka aisi wi kan. Witin sip sa naha bîla nani tânka ba mai wiaia”.

Daniel king mawanra wan. Wan taim, Belsasar witin ra win: “Naha bîla nani aisi kaiki tânka wiaia sip sma kaka, gul lilurka kum maikamna bara Babilon waitnika tara nani tilara yumhpika ba man kama”. Daniel pana win: “Prisant nani want apia sna. Kuna bîla nani tânka ba mai wimna. Nabucodonosor aisikam ba, tara papulra kan, bara Jehova bawikira kaia smalkan. Man nu sma witin ra dîa nani takan ba, kuna ban Jehova ra rispik munras sma. Baku ai tempelka gul kapka nani yus munram wain diaia dukiara. Ba tâwan Gâd naha bîla nani ulban: MENÉ, MENÉ, TEKEL bara PARSÍN. Tânka ba Media bara Persia uplika nani Babilon dakbi bribia, bara man king apia kama”.

Sip apia talia kan upla kum ba Babilon dakbi bribia. Tawan ba kutbanka tara nani bara awala tihu kum wal kan kahban kan. Kuna baha sim tihmika Media bara Persia uplika nani Babilon mapara aiklaban. Ciro, Persia kingka ba, awala laya ba tnaya ra lakan suldiar nani ba tawan durka nani kat waia sip kabia dukiara. Bahara wan taim, ¡durka nani kwawan kan! Suldiar nani ba isti pali mapara aiklaban, tawan ba dakbi brih bara king ra sin ikan. Nanara Ciro ba Babilon kingka aimakan.

Ai kingka lâka pas manka ra, Ciro maisa pakan: “Jehova Jerusalem ra ai tempelka ba kli paskamna ai win. Ju nani hilp munaia want ba sip sa waia”. Ba mita, Jerusalem sauhkan 70 mani luan ningkara, ailal ai tasbaya ra kli tawi wan. Baku Jehova pramiska ba aimakan. Baku, Ciro gul bara silbar kapka nani ba kli yaban, bara Nabucodonosor diara wala nani tempel wina brih wan kan ba sin. ¿Kaikram Jehova nahki Ciro ra yus munan ai uplika nani ra hilp munaia?

Darío Media wina ba, Babilon kingka wala kan. Nu takan Daniel baku wala âpu sa. Witin kuntri waitnika kulkanka tara bri nani tâ briaia mangkan. Naha waitnika nani ba Daniel ra tumi bara ikaia luki kan. Nu kan Daniel Jehova ra yu kumi ra aima yumhpa ai pura suni kan, ba mita Darío ra win: “King tara, lâ kum mangkaia sa, upla sut man ra baman ai pura sunaia. Ya, lâka ba alki daukras sa kaka, layan nani watla ra lulkan kaia sa”. Darío baha pain kaikan, bara lâka ba sain munan.

Daniel lâ raya ba nu takan taim, ai watla ra wan. Bahara kan taim, ai lula kriki windar kum kwâkan ba mawan ra Jehova ra ai pura sunan. Baha waitnika tatumra nani ba isti ai watla ra diman bara ai pura suni kan kaikan. Bara baku, plapi Darío ra wih win: “Daniel bîlam walras sa. Yu bani aima yumhpa ai Gâdka ra ai pura sunisa”. Darío Daniel ra pain kaiki kan bara ikaia want apia kan. Yu aiska luki tauki kan nahki swaki sakaia, kuna witin sin sip apia kan lâ pat sain munan ba chens munaia. Ba mita diara wala daukaia âpu kan, adar yan Daniel ra layan kraskira nani watla ra lulkbia.

Baha tihmika, Darío trabil taki luki kan Daniel dukiara bara yapras kan. Titan ra, layan watla ra plapi wan, kaiki bara ai pura wini aisan: “¡Daniel! ¿Gâdkam swaki mai sakan?”.

Darío bîla baikra kum walan. Aisan ba Daniel kan: “Jehova insalka layan nani bîla prakan, bara diara ai munras”. Darío lilia takan bara adar yan baha wina sâkbia. Daniel taya ba kurban kumi sin âpu bal takan. Ba wina, king ba adar yan: “¡Layan watla ra waitnika nani ba lulks Daniel ra dahra sakan ba!”. Lulkan taim, layan nani ba isti pali pin.

Darío ai uplika nani ra naha adarka yan: “Upla sut Daniel Gâdka ra rispik munaia sa. Witin layan nani wina swaki sakan”.

¿Bara man? ¿Yu bani Jehova ra Daniel baku puram sunisma?

Ester ba Ju tiarika kum kan Persia tawanka kum Susa nina mâki ba ra iwi kan. Mani ailal luan ra, King Nabucodonosor ba Ester pamalika ba Jerusalem wina brih wan. Ai tahtika luhpia Mardoqueo ba witin ra pakan, Asuero Persia kingka dukia dadaukra kum kan.

King Asuero ba kwin raya kum want kan. Ba mita, ai dukia dadaukra nani ba, kuntri mairka kau painkira nani ba witin ra bri balan, mairka nani sut tila wina king ba Ester ra wahbi sakan ai kwinka kabia dukiara. Mardoqueo Ester ra win witin Ju ba upla kumi ra sin wibia apia.

Waitna tara papulra kum nina Amán, wihta nani sut lalka kan. Witin want kan upla sut ai mawanra bawbia. Kuna Mardoqueo bawras kan. Amán ai kupia saura baikan bara ikaia want kan. Amán Mardoqueo Ju ba nu takan taim, lukanka kum sakan kuntri wina Ju nani sut ra ikaia. King ra win: “Ju nani ba upla saura banhwisa. Sut ra ikaia sa”. Asuero pana win: “Dîa ba kau pain lukisma ba dauks”. Bara adar kum yan lâ kum paskaia. Naha lâka ra ulban kan, kati kum nina Adar yua 13 ra upla nani ba Ju nani ra ikaia kan. Kuna Jehova diara nani sut ba kaiki kan.

Ester naha lâka na nu âpu kan. Baku Mardoqueo, lâka ba witin ra blikan bara win: “King wal aisaia sma”. Ester pana win: “Ya ya kra king paiwras kan witin ra wih kaikbia kaka, pruaia sa. Bara yu 30 luan sa king ba ai paiwras. Kuna wamna. Ai kînka ba yang ra sakbia kaka, raya kamna. Kuna ai sakbras kaka, pruamna”.

Ester king watla latka ra wan. King ba kaikan taim, ai kînka witin ra sakban. Ester lamara wan bara king ba makabi walan: “¿Ester dîa want sma?”. Witin pana win: “Man bara Amán wal dukiara pata tara kum daukaisna bara balma want sna”. Pata tara ba ra Ester pata tara wala ra paiwan. Pata tara wâl ra, king ba Ester ra makabi walan: “¿Dîa want sma?” Witin win: “Upla kum sa yang bara upliki nani sut ra ikaia want sa. Du pali, swaki wan sâks”. King ba makabi walan: “¿Ya mai ikaia want sa?”. Witin win: “Naha waitnika saura, Amán”. Asuero ai kupia saura baiki isti pali Amán ra ikbia adar yan.

Kuna Amán lâ daukan ba upla kumi sin sip chens munras kan, king pali sin apia. Baku king ba wihta nani sut lalka Mardoqueo ra mangkan, bara lâ raya kum paskaia adarka yaban. Baha lâka ra ulban kan, Ju nani ba sip kan ai kan kahbaia ai mapara aiklabia taim. Adar katka yua 13 ba, Ju uplika nani ai waihla nani pura luan. Baha yua wina Ju nani ba mani bani pura luanka yua ba kulki kan.

Israel uplika aihkika nani Jerusalem ra kli balan ba wina mani 70 baku luan kan, ban sakuna Persia tasbaya ra kau kum kum nani iwi kan. Baha nani tila wina kumika ba, Esdras kan, Jehova lâka ba smalki prîska kum kan. Esdras nu takan Jerusalem uplika nani ba, Lâ ba bîla wali daukras kan, ba mita bahara waia want kan hilp munaia dukiara. Artajerjes Persia kingka ba, witin ra win: “Gâd ai lâka smalkma dukiara sins lâka maikan. Baku bamna, was bara ya ya man wal waia want ba brih was”. Esdras Jerusalem ra waia uplika nani wal asla prawan. Jehova ra makaban yabal ra main kaikbia, baku witin nani mahka impakan.

Kati 4 luan, Jerusalem ra balan. Tawan wihtka nani ba Esdras ra win: “Israel uplika nani Jehova ra bîla walras sa bara gâd bahki mayuni mairka nani wal marit takan”. ¿Esdras dîa daukan? Tawan uplika mawanra ai lula kriki ai pura sunan: “Man Jehova yawan nani tâwan diara ailal pain daukram, kuna man mampara yawan nani saurka daukan”. Tawan uplika nani ba ai kupia lakan, kuna ban diara yamni apia ba dauki kan. Baku Esdras almuk nani bara wihta nani wahbi sakan tânka plikbia dukiara. Kati yumhpa bilara, Jehova ra mayunaia want apia kan nani sut ra kangbi sakan.

Mani 12 nani luan. Ba piua bilara, Jerusalem kutbanka tara nani ba kli paski danh takan. Esdras Gâd lâka aisi kaikaia dukiara, asla aidrubaia pliska ra upla sut ra asla prakan. Gâd bukka lâka kwâkan taim, upla nani ba buan. Esdras Jehova ra mayunan bara Israel uplika nani ba ai mihta nani bukan pain kaiki ba marikaia dukiara. Ba wina, Esdras Lâ ba aisi kaiki bara tânka win. Bara upla nani ba pain walan. Ai tânka brin Jehova wina aima wala laihura takan sa bara inan. Yu wala ra, Esdras Lâ ba ban aisi kaiki yabi kan. Israel uplika nani ai tânka brin tisku pali Utla Papakni Liliaka ba daukaia sa. Bara isti pali liliaka ba dukiara ridi takan.

Liliaka ba yua 7 sut ra Israel uplika nani ba lilia kan. Mâ dâkan pain brin ba mita Jehova ra tingki yaban. Utla papakni liliaka kum baha sât Jasua raya kan piua ba wina briras kan. Liliaka ba danh takan taim, asla taki bara ai pura sunan: “Jehova, alba lâka wina man pri wan sakram. Upla iwras tasbaya ra plun wankram bara naha tasbaya painkira sin. Kuna aima ailal yawan bîlam walras kan. Bara wan kupia kraukaia prapit nani blikram sakuna, yawan bîlam walras kan. Baha purkara, man bîla kaiki kapram. Ebraham ra pramis daukram ba aima kumi sin amya tikras sma. Bîlam walaia yawan pramis takisa, nanara”. Upla nani pramiska ba ulban, bamna wihta, libait bara prîs nani sîl kum wal sain munan.

Piua luan ra dîa takan ba kaikbia. Nihimaya Israel uplika kum kan Susa ra iwi kan, Persia tawanka kum. King Artajerjes dukia dadaukra kum kan. Yu kum, Nihimaya muihnika ba Juda wina lilia apia sturka bri balan: “Israel uplika nani Jerusalem ra balan ba kan kahbanka pain briras sa. Tawan kutbanka nani bara durka nani ba Babilon uplika nani sauhkan ba kli paskras sa”. Nihimaya sari takan. Hilp munaia want kan, baku Gâd ra ai pura sunan king mita swika Jerusalem ra waia dukiara.

Piu luan ningkara, king ba Nihimaya sari ba kaikan. Bara win: “Yang aima kumi sin baku mai kaikras. ¿Dîa mai takisa?”. Nihimaya pana win: “Jerusalem tawanki ba aisawan sa, ¿nahki yang sari apia kamna?”. King ba makabi walan: “¿Hilp mai munaia dukiara dîa daukamna?”. Baha minitka ra ai kupia ra ai pura sunan. Ba wina win: “Du pali, ai swis Jerusalem ra waia kutbanka nani ba kli paskaia dukiara”. King Artajerjes adar yaban waia dukiara. Baku sin impakanka ra diara kumi sin takbia apia dukiara hilp aitani yaban. Ba purkara, Juda wihtka tara mangkan bara dus yaban tawan durka nani paskaia dukiara.

Nihimaya Jerusalem ra balan taim, kutbanka nani ba kaikaia wan. Ba wina, prîs bara wihta nani ra asla prakan, bara win: “Naha na saura pali sa. Yawan nani wark takaia sa”. Tawan ba aitani lukan bara kutbanka nani ba kli paskan.

Israel uplika waihla nani kum kum ba ai lawaska kiki bara aisi banhwi kan: “Kutbanka paski banhwisma ba sikiski kum mita slingbaia sip sa”. Kuna wark tatakra nani ba bîla walras kan bara ban wark taki kan. Kutbanka ba piu bani kau yari bara karna paski kan.

Bara, waihla ailal plis sât sât wina Jerusalem mapara aiklabaia buan. Ju uplika nani nu takan, bara sibrin takan. Kuna Nihimaya win: “Si bripara. Jehova yawan nani wal sa”. Bara wark tatakra nani ra kan kahbaia dukiara main kakaira nani mangkan. Baku, waihla nani ai mapara aiklabras kan.

Yu 52 bilara, kutbanka bara dur nani ba paskan. Lilia daukaia dukiara, Nihimaya Jerusalem ra libait nani ra bri balan. Aiwawanra daknika wâl ra asla daukan. Esdras daknika kum wal wan, Nihimaya daknika wala ba wal wan. Lî Karma Durka tepska nani bâk ulan. Ba wina, dakni kumi bani sait kum ku wapi wan kutbanka pura bâk tawan kir ra. Trumpit, pân taya bara arp kangbi auya kan, Jehova ra aiwani, tempel ra asla prawan ba kat. Waitna, mairin bara tuktan nani Jehova ra sakripais dauki yabi bara liliaka ba dauki kan. Lilia banhwi kan, ai bîla baikra nani ba laih wina wali kan.

Prîs kum nina Zacarías bara ai maya, Elisabet, Jerusalem lamara iwi kan. Pat mani 400 pura luan kan Jerusalem kutbanka tara nani ba kli paskan wina. Zacarías bara Elisabet mani ailal bri kan marit takan ba wina, kuna luhpa nani baikras kan. Yu kum, tempel holi pliska ra Zacarías sîka mâka angki kan taim, insal Gabriel witin ra param takan. Zacarías sirang iwan, kuna Gabriel win: “Si bripara. Jehova wina man ra sturi yamni nani brih balri. Elisabet mayam ba, luhpa kum baikbia, bara ai nina Jan mâkma. Jehova Jan ra wark yamni kum dukiara wahbi sakan sa”. Zacarías makabi walan: “¿Nahki nu kamna kasak aisisma? Mayi bara yang almuk sna luhpa baikaia dukiara”. Gabriel pana win: “Gâd ai blikan sturka yamni na maikaia. Kuna kasak ai lukras kapram ba mita, turi aisama apia tuktika ba aisubia kat”.

Zacarías plis holi ra piu kau ailal takaskan. Ba wina takan taim, upla nani lata ra bîla kaiki kan ba nu takaia want kan dîa takan ba. Kuna Zacarías sip turi aisaras kan, sain nani baman daukaia sip kan. Baku upla nani nu takan witin Gâd wina bîla blîkanka kum brin ba.

Piu kum ningkara, Elisabet kwihra takan bara bibi waitna kum baikan, insal win kan ba baku. Elisabet pamalika bara pânika nani ba bibi ba kaikaia balan, bara lilia taki banhwan witin dukiara. Elisabet win: “Nina Jan mâkbia”. Witin nani pana win: “Pamalikam ra upla kumi sin baha nina briras, kau pain sa nina Zacarías mâkma, ai aisika baku”. Kuna Zacarías ulban: “Ai nina ba Jan sa”. Baha minitka ra Zacarías sip kan kli turi aisaia. Judia aiska ra bibi sturka ba walan, bara upla nani makabi walan: “Naha tuktika pâwbia taim dîa kabia?”.

Bamna Zacarías spirit holikira ni aibanhwan bara dahra aisanka kum win: “¡Jehova ra mayunpi! Witin Ebraham ra pramis munan swaki sasakra kum blikaia, Misaya ba, atki wan sakaia dukiara. Bara Jan ba prapit kum kabia Misaya yabalka ba ridi daukaia dukiara”.

Baku sin Elisabet pamalika kum nina Meri ra diara painkira kum takan. Saptika aula ba ra yawan kaikbia.

Meri tiara kum kan Nasaret tawanka ra iwi kan, Galili ra, bara Elisabet taika kan. Meri tat ni diara paski waitnika kum nina Josep wal marit takai kan. Elisabet kati 6 kwihra kan taim, insal Gabriel ba Meri ra param taki bara win: “Titan yamni, Meri, Jehova yamni mai kulkan sa”. Witin tânka briras kan Gabriel aisan ba, baku witin tânka aisi win: “Kwihra takma bara luhpa waitna kum baikma. Nina Jisas mâkma. King kabia, bara ai kingka lâka ban kabia ban kaia ra”.

Meri win: “Kuna yang waitna wal kau prawras sna. ¿Nahki luhpa kum baikamna?”. Gabriel pana win: “Gâd diara sut daukaia sip sa. Spirit holikira man purara balbia bara luhpa kum brima. Elisabet, tamya mairin ba, sin kwihra sa”. Bamna Meri pana win: “Jehova albika sna. Dîa aisaram ba yang ra takbia”.

Meri Elisabet kaikaia wan tawan kum il nani tilara kan ba ra. Wan ba ra, lakula daukan, bara Elisabet ai dara walan ai bibika ai biara bilara pulan. Witin spirit holikira ni aibanhwan bara win: “Meri, Jehova yamni mai munan. Kulkanka tara kum sa yang Dawanki yaptika ba waitla ra bal ai kaikaia”. Meri pana win: “Kupi aiska wal Jehova ra mayunisna”. Baku ba ra, Elisabet wal kati yumhpa takaskan ba wina kli ai watla ra wan, Nasaret ra.

Josep Meri kwihra ba nu takan taim, witin wal marit takaia want apia kan. Kuna yapri sauhkan kum ra insal kum param taki bara win: “Witin wal marit takaia si bripara. Diara saura daukras”. Baku Josep Meri wal marit taki ai watla ra brih wan.

César Augusto Roma kingka tara ba, Ju nani sut ai aisubanka pliska ra wih ai nina mangkan kaia adarka yaban. Baku Josep bara Meri Betlehem ra impakan, Josep pamalika ba baha wina kan. Piua baila pali kan Meri ai bibika baikaia.

Betlehem ra wan taim, plis kumi baman sakan takaskaia dukiara bîp pata watla kum ra, Jisas bahara aisuban. Meri kwala wal blaki tânkira daiwan pata watla kum ra tnikan.

Betlehem lamara, sepad kum kum tihmia twi ra ai sîpka nani main kaiki kan. Ban wina insal kum param takan bara Gâd prana ingnika ba ai tnaya kir ra kaiki banhwan. Sîp main kakaira nani ba sirang iwan, kuna insal ba witin nani ra win: “Si bripara, sturi painkira nani brih balri. Misaya ba naiwa Betlehem ra aisuban sa”. Baha minitka ra, kasbrika ra insal ailal param taki aisan: “Gâd ra mayunan kabia heven ra, bara tasba ra kupia kumi lâka”. Ba wina insal nani lap tiwan. ¿Sepad nani ba dîa daukan?

Sepad nani pana pana aisan: “Nanara Betlehem ra wâp”. Baku wih banhwan taim, Josep bara Meri wal ra kaikan bîp pata watla ra bibi aisubi takan ba sin.

Insal dîa sepad nani ra win ba upla sut walan taim tâ iwan. Insal bîla nani ba Meri aman luki kan bara aima kumi sin ai auya tikras kan. Sepad nani ba ai sîpka nani main kaikaia kli twi ra wan, Jehova ra tingki yaban diara nani sut kaikan bara walan ba dukiara.

Israel lalma tani ra tasba kum bâra kan uplika nani ba luki kan slilma nani ba upla ra sip sa tâ briaia. Tihmia kum, lalma tani ra iwi waitnika kulki nani kasbrika ra slilma ingni kum wapi kan kaikan bara nina blikan. “Slilmika” ba Jerusalem kat brih wan. Waitnika nani ba upla nani ra makabi wali auya kan: “¿Tukta Ju nani kingka kabia ba anira sa? Yawan witin mawanra bawi mayunaia want sa”.

Herod, Jerusalem kingka ba, baha king raya ba dukiara sturi nani walan taim, trabil taki luki bara prîs tara nani ra makabi walan: “¿Baha kingka anira aisubi takaia kan?”. Witin nani pana win: “Prapit nani win Betlehem ra aisubi takaia kan”. Baku Herod lalma tani waitnika nani ra paiwan bara win: “Betlehem ra was bara tuktika ba pliks. Ba wina kli bal bara ai wis anira sa, kan yang sin witin mawanra bawi mayunaia want sna”. Kuna kunin kan.

“Slilmika” ba kli wapan bara waitnika nani ba Betlehem kat nina blikan. Baku “slilmika” ba utla kum purara takaskan, waitnika nani diman bara Jisas bara ai yaptika Meri wal kaikan. Witin nani tukta ba mawanra bawi bara prisant nani yaban: gul, dus mâka bara sîka mâka kîa pain. Kuna ¿rait pali Jehova mita naha waitnika nani ra Jisas bâra kan ba kat blikan? Apia.

Baha tihmika, Jehova yapri sauhkan kum ra Josep ra win: “Herod Jisas ra ikaia want sa. Mayam bara luhpiam ba naha wina brih Idsip ra plaps. Bahara takas bara kli balpara trabil ba luan sa mai wimna kat”. Baku Josep bara ai pamali wal mahka Idsip ra wan.

Baku, Jehova lalma tani waitnika nani ra win Herod ra kli wabia apia. Kli balras kan Herod nu takan taim, praut takan. Bara Jisas ra sip sakras kan ba mita, Jisas manka bri Betlehem tuktika nani sut ra ikaia adarka yan. Kuna Jisas ra diara takras kan, laihura kan bamna, Idsip ra.

Piua ba luan, bara Herod pruan. Baku Jehova Josep ra win: “Trabil ba luan sa sip sma kli balaia”. Josep, Meri bara Jisas Israel ra kli balan Nazaret tawanka ra iwaia takaskan.

Josep, Meri bara Jisas wal ai luhpia waitna bara mairin wala nani aikuki Nasaret ra iwi kan. Ai pamali main kaikaia dukiara Josep tat wal diara paskaia warkka dauki kan. Baku sin, Jehova dukiara bara ai lâka nani smalki kan. Pamali ba tnatka bri kan Gâd watla ra waia mayunaia dukiara, bara mani bani Insal Luan Yua kulkaia dukiara Jerusalem ra wi kan.

Jisas 12 mani bri kan taim, Jerusalem ra wan piu bani dauki kan ba baku. Insal Luan Yua kulkaia dukiara upla ailal tawan ba ra kan. Liliaka ba luan ba ra, Josep bara Meri ai watla ra mahka tawi wan Jisas ba ai pamali aikuki aula sa lukan. Kuna upla nani tilara plikan taim, sakras kan.

Baku Jerusalem ra kli wan bara ai luhpia pliki yu yumhpa luan. Las kat tempel ra sakan. Jisas bahara kan, smasmalkra nani tilara iwi, makabi walanka pain nani dauki bara tânkira wali kan. Smasmalkra nani ba tâ iwan Jisas dîa aisi kan ba wali bara makabi walanka nani daukan witin ra. Tânka nani aisan ba wali tâ iwan. Jehova lâka nani pain tânka bri kan ba nu takan.

Josep bara Meri trabil taki luki kan. Meri win: “Luhpi, tawan aiska ra mai plikri banhri. ¿Anira kapram?”. Bara Jisas pana win: “¿Yang Aisiki watla ra kaia sna ba man nani nu âpu kapram?”.

Jisas ai aisa nani wal Nasaret ra kli balan. Bahara, Josep Jisas ra tat wal diara paskaia lan daukan. ¿Dîa lukisma? ¿Jisas wahma kan taim nahki kan? Jisas ba pâwi kan bara kau sinskira taki kan. Baku Gâd bara upla nani mita pain kaiki kan.

Jan ba Zacarías bara Elisabet luhpia kan. Jehova prapit mangkan bara yus munan Misaya ba pat aula sa upla nani ra maisa pakaia. Kuna tawan tara nani ra apia kaka mayunaia watla nani ra smalkaia watlikara, upla iwras tasbaya ra smalki kan. Jerusalem bara Judia uplika ailal Jan ra walaia bali kan. Witin smalki kan Gâd kupia lilia daukaia dukiara saurka dauki ba swibia, tânka ba, Gâd witin nani wal lilia kabia dukiara. Ba mita, ailal ai saurka nani swih ai kupia lakan. Bara Jan Jordan awala ra tahbi dauki kan.

Jan ai rayaka ra diara ailal briras kan. Kiamil taya prâka dimi kan, nasma laya bara tristrisia pi kan. Upla nani witin dukiara kau nu takan dauki kan. Parisi bara sadiusi tara papulra nani wih kaikan. Bamna Jan pana win: “Kupiam lakaia sma. Ebraham luhpia nani wi kan ba mita tara ai dara wali kan, kuna Gâd luhpia nani sa tânka lika apia”.

Upla ailal Jan ra makabi walan: “¿Gâd kupia lilia daukaia dukiara yawan nani dîa daukaia sa?”. Bara witin pana win: “Prâk wal brisma kaka, kum ba nit uplika ra yabaia sma”. ¿Nu sma dîa muni baku wi kan? Witin want kan ai disaipilka nani nu takbia Gâd kupia lilia daukaia dukiara upla nani ra latwan kaikaia sa.

Bara lal mana sasakra nani ra win: “Kasak bas bara upla ra kunin munpara”. Bara suldiar nani ra win: “Kunin aisapara, pât ra dingkaia wisi lalah bripara”.

Prîs bara libait nani Jan ra kaikaia wan, bara win: “Ya sma sapa upla nani sut nu takaia want sa”. Jan pana win: “Upla iwras tasbaya ra bîla baikra kum sna upla nani Jehova ra brih waia dukiara, prapit Aiseya aisan baku”.

Jan smalki kan ba upla nani laik kan, witin ba Misaya sapa nu takaia want kan. Ba mita Jan win: “Wala kum yang wal kau karnakira ba tisku balbia. Ai sûska awa nani lanhkaia sin sip apia sna. Yang lî wal tahbi mai daukisna kuna witin spirit holikira wal tahbi mai daukbia”.

Jan naha sturka smalki kan: “Upla kum yang wal kau karna ba tisku balbia”. Jisas 30 mani baku bri kan taim, Galili wina Jordan awala ra wan. Bahara Jan upla nani tahbi dauki kan. Jisas want kan Jan witin ra sin tahbi daukbia, kuna Jan pana win: “Yang tahbi mai daukaia apia sna. Man yang ra tahbi ai daukaia sma”. Jisas pana win: “Jehova want sa man tahbi ai daukma”. Baku, wâl Jordan awala ra diman, bara Jan Jisas ra aiska liura dingkan.

Ba wina Jisas lî wina takan, Jehova ra ai pura sunan. Ba minitka ra, heven kwawan bara Gâd spiritka witin purara butku baku bal iwan. Bamna Jehova heven wina aisan: “Man ba luhpi laitwankira sma. Yang wahbi saki mai briri”.

Baku Jisas Jehova spiritka brin, bara baha minitka ra Kraist apia kaka Misaya takan. Nanara Jehova tasba ra wark daukaia yaban kan ba mahka tâ krikaia.

Tahbi daukan ningkara, Jisas upla iwras tasbaya ra wan bara yu 40 bahara kan. Balan taim, Jan ra kaikaia wan. Witin kaikan Jisas ai lamara aula bara win: “Naha sika Gâd sîpka luhpia ba tasba saurka ba brih saki ba”. Baha win upla nani ba ai tânka bribia Jisas ba Misaya sa. ¿Jisas upla iwras tasbaya ra kan taim nu sma witin ra dîa takan? Kaisa kaikaia.

Jisas ra tahbi daukan ningkara, spirit holikira ba upla iwras tasbaya ra brih wan. Yu 40 plun piras kan bara plun dauki kan. Bara Dibil bal Jisas ra traika kaikan. Pas win: “Rait Gâd luhpia sma kaka, naha walpaya nani ra wis brit takbia”. Kuna Jisas Ulbanka Holi bîla nani wal pana win: “Ulban sa upla nani ba plun baman nit apia sa raya kaia dukiara. Jehova dîa aisi ba sin walaia nit sa”.

Traika kaikanka wala wal Dibil ba Jisas mapara buan: “Rait Gâd luhpia sma kaka, tempel banhta ba wina pali kauhs. Ulban sa Gâd ai insalka nani blîkbia swaki mai sakaia dukiara”. Kuna Jisas kli Ulbanka Holi bîla nani wal pana win: “Ulban sa Jehova ra traika kaikaia apia sma”.

Las ra, Sitan tasba kingka lâka nani ai ritska bara prana nani sut marikan bara win: “Naha kingka lâka sut maikaisna aima kum pan mayunra aikma kaka”. Kuna Jisas pana win: “¡Sitan taki was! Ulban sa Jehova ra baman mayunaia sa”.

Baku ba ra, Dibil mahka wan bara insal nani bal Jisas ra plun yaban. Baha wina, Jisas King Lâka sturka yamni nani ba smalkan. Tasba ra baha warkka daukaia Jehova Jisas ra yaban. Jisas smalki kan ba upla nani pain wali kan, bara plis sut ra nina bliki kan.

Mani 30 abril katka bilara, Jisas Jerusalem ra wan. Upla ailal tawan ba ra wan kan, Insal Luan Yua kulkaia dukiara. Yua kulkanka tilara, tempel ra daiwan nani sakripaiska dauki kan. Upla kum kum ai daiwra nani bri bali kan, kuna wala nani Jerusalem ra atki kan.

Jisas tempel ra wan taim, kaikan upla kum kum ba ai daiwra nani upla wala ra atki kan. ¡Jehova ra mayunaia watla bilara diara nani kahbi atki kan! ¿Jisas dîa daukan? Kiwa wal klala kum dauki tempel wina sîp bara bîp nani ba sakan. Baku sin lalah chens muni kan nani tibilka batakan, bara lalahka nani sut tasba ra yakawan. Jisas butku kahbi atki nani ra win: “¡Naha wina diara nani sut sâks! ¡Yang aisiki watla ba markit kum daukpara!”.

Tempel ra upla nani kan ba Jisas daukan ba kaiki tâ iwan. Ai disaipilka nani kupia krawan Misaya dukiara dahra aisanka ba: “Jehova watla tâwan rispik tara brimna”.

Piu kum ningkara, 33 manka ra, Jisas aima wala tempel ba klin munan. Upla kumi ra sin swiras kan ai aisa watla ba rispik munras kaia.

Insal luan yua kulkan ningkara, Jisas bara ai disaipilka nani kli Galili ra balan. Sameria bâk impaki luan bara Sicar lamara takaskan, Jekob layawanhta ra. Jisas bahara takaskan ris briaia, disaipil nani lika tawan ra wan plun atkaia.

Mairin kum liwanhta ra balan lî panhkaia, bara Jisas witin ra win: “Lî aik diaia”. Mairin ba pana makabi walan: “¿Sameria uplika kum sna, dîa muni ai aisisma? Ju nani Sameria uplika nani ra aisaras”. Jisas win: “Ya sna ba nu takram kata, lî diaia ai makabaia kapram, yang rayaka laya ba maikamna”. Witin pana win: “¿Dîa wiaia want sma? Lî panhkaia dukia âpu sma”. Jisas win: “Yang lî yabuna uplika ba, kli lî din daukbia apia”. Bara witin win: “Dawan, baha laya aik”.

Ba wina Jisas win: “Maritkam ra wis balbia”. Witin pana win: “Yang mayi âpu”. Jisas win: “Pain aisaram, kan aima 5 marit takram bara nanara waitna kum wal brisma ba maritkam apia”. Witin pana win: “Man prapit sma. Upliki nani lukisa naha ilka ra Gâd ra sip sa mayunaia, kuna Ju nani wisa Jerusalem ra baman Gâd ra mayunaia sa. Yang lukisna Misaya balbia taim, witin wan smalkbia Gâd ra nahki mayunaia”. Jisas diara kum aisan ba kau upla kumi ra sin wiras kan: “Misaya ba yang sna”.

Mairin ba ai tawanka ra plapi wan bara Sameria uplika nani ra win: “Misaya ba yang sakri sa. Yang rayaki dukiara aiska ai win. Bal bara kaiki banhs”. Baku witin wal liwanhta ra wan Jisas smalkanka nani ba walaia dukiara.

Baku, Sameria uplika nani ba Jisas ra makaban witin nani wal takaskbia. Baha tawanka ra yu wâl luan bara diara ailal smalkan, bara upla ailal witin ra kasak lukan. Las ra, Sameria mairka ra wi banhwan: “Naha waitnika ra walan ningkara, pain wan dara walisa witin sika tasba swaki sasakrika aihwa ba”.

Tahbi daukan wina Jisas mahka smalkan: “Gâd Kingka Lâka ba baila sa”. Galili bara Judia aiska ra ai disaipilka nani witin wal impaki kan. Jisas ai tawanka Nasaret ra balan taim, Gâd ra mayunaia watla ra wan, Aiseya ulbanka ba kwâki bara ai bîla baikra tara wal aisi kaikan: “Jehova ai spiritka holikira aikan sa ai sturka yamni nani ba smalkamna dukiara”. ¿Dîa wiaia want kan? Upla ba Jisas sainka tara nani kaikaia want kan sakuna, witin sain daukaia baman spirit holikira ba briras kan. King Lâka sturka yamni nani ba kau tara kan. Las ra, wali nani kan ba ra win: “Naha prapit aisanka ba naiwa aimakisa”.

Ba wina, Jisas Galili kabuka ra wan. Bahara ai disaipilka 4 ra kaikan inska mamiskra nani kan, bara win: “Nini blîks bara upla mamiskra mai daukamna”. Waitnika nani ba Pita, Andru, Jems bara Jan nina bri kan. Isti pali inska alkaia warkka ba swih witin wal wan. Jehova Kingka Lâka ba Galili aiska ra impaki smalkan. Gâd ra mayunaia watla nani ra, markit bara yabal nani ra smalki kan. Witin nani anira auya ba ra upla ailal nina bliki kan. Jisas sturka ba plis nani sut ra walan, Siria ra kat sin.

Piu luan ningkara, Jisas ai nina blablikra kum kum ra siknis nani ra rakaia bara lasa nani kangbi sakaia karnika yaban. Wala nani witin wal wan smalkaia tawan tara bara sirpi nani ra. Baku sin mairin kasakkira daknika kum witin ra hilp muni kan bara ai nina blablikra nani ra sin. Witin nani tilara Meri Magdalin, Juana, Susana bara wala nani sin kan.

Ai disaipilka nani ra ridi daukan ningkara, Jisas smalkaia blikan. Galili bâk impaki ba ra, upla wala nani sin Jisas disaipilka nani takan bara tahbi daukan. Upla ailal Jisas nina blikaia want kan, ba mita witin insla kum dâkaia ridi ba wal prakan. Witin win: “Jehova ra puram suns dâkaia warkka tatakra nani kau blîkbia dukiara”. Ningkara, disaipil 70 wahbi saki bara kum wala wal pânika dauki Judia aiska ra smalkaia blikan. Upla sut ra King Lâka dukiara aisi kan. Kli tawi balan taim, dîa witin nani ra takan ba Jisas ra wiaia want kan. Smalkaia warkka ba alki takaskaia dukiara Dibil ba diara kumi sin daukaia sip apia kan.

Jisas heven ra kli waia kan ba mita, ai disaipilka nani ra ridi daukan wark tara ba ban dauki kaia. Witin win: “Tasba aiska ra King Lâka sturka yamni ba smalki banhs. Gâd bîla ba upla nani ra smalki bara tahbi dauks”.

Jisas Gâd Kingka Lâka sturka yamni nani ba smalkaia tasba ra balan. Baku sin, Jehova sain nani daukaia ai spiritka holikira yaban bara King kabia taim dîa daukbia ba marikaia. Naha nani daukan, Jisas siknis sâtka sut sip kan rakaia. Ani anira wabia, sikniskira nani witin ra hilp makabi kan, bara witin sut ra raki kan. Blain nani sip kan kaikaia, walras nani walaia bara wapras nani wapaia. Jisas prâka un ra kangbia kaka sip kan rawaia. Jisas lasa nani sin kangbi saki kan. Plis sut ra upla nani nina bliki kan, bara upla kumi sin ra apia wiras kan, yakan kaia want kan piua ra kat sin.

Aima kum Jisas bâra kan watla ra, wapras waitnika kum brih balan. Kuna upla ailal kan mita sip dimi banhras kan, baku Jisas bâra kan ba kat lahbaia dukiara utla banhta ra unta kum daukan. Bara Jisas wapras uplika ra win: “Bus bara waps”. Wapan taim, upla nani tâ iwan.

Yu wala, Jisas tawan wala ra auya kan taim, laih wina ai pura winan waitna liparkira 10 nani ba: “¡Jisas, hilp wan muns!”. Baha taimka ra, upla pain nani lamara liparkira nani ba sip apia kan waia. Baku sin, Jehova Lâka wi kan ba liparkira nani rawan ba wina tempel ra waia kan. Baku Jisas witin nani ra bahara wabia win. Liparkira nani tempel ra auya kan ba ra rawan. Tila wina kum pat rawan ba kaikan taim, Gâd ra mayunaia bara Jisas ra tingki yabaia kli tawi balan. Liparkira 10 ba wina, kumi baman Jisas ra tingki win.

Mairin kum bâra kan 12 mani siknis kan bara kau sip apia kan ba mita rawaia want kan. Baku ba ra, upla tilara diman Jisas nina bâk lamara waia dukiara bara ai prâka un ra kangban. Baha minitka ra rawan. Bara Jisas makabi walan: “¿Ya ai kangban?”. Mairin ba sirang iwan, kuna ai lamara wan bara dîa takan ba witin ra win. Jisas witin ra maisa nihki win: “Luhpi mairin, kupiam kumi wamtla ra was”.

Tâ uplika tara kum nina Jairo Jisas ra wih bik taki makaban: “Waitla ra bal. Luhpi mairin siknis pali sa”. Kuna Jisas Jairo watla ra kau waras kan ba ra, tuktika mairin ba pruan. Jisas wan ba ra, kaikan pamalika wal upla ailal inisa. Jisas witin nani ra win: “Ini banhpara, witin yapisa”. Baku tuktika mairin mihta ra alki bara win: “Tukta mairin, ¡bus!”. Tuktika mairin baha minitka ra buan, bara Jisas ai aisika nani ra win plun wira yabia. ¡Man luks aisika nani nahki ai dara walan kaia sa!

Mani kum bakriki Jisas smalki kan taim, diara tara kum daukaia kan. ¿Kristian kangrigisan tâ briaia dukiara bara witin wal kau ai lamara wark takaia dukiara ya nani ra wahbi sakaia kan? Baha daukaia lukanka briras kaina ra, Jisas Jehova hilpka plikan. Ba mita, il kum ra wan yakan kaia bara tihmia aiska ai pura suni luan. Yauhkika titan ra, ai disaipilka kum kum nani ra asla prakan bara ai apastilka nani 12 ba wahbi sakan. ¿Kum pan nina nu sma ki? Ai nina nani ba Pita, Andru, Jems, Jan, Pilip, Bartolomiu, Tamas, Matiu, Jems Alfeo luhpia, Tadeo, Saiman bara Judas Iskariot.

Jisas wal 12 nani ba impaki kan. Nahki smalkaia lan dauki kan, bara las ra, yakan smalkaia blikan. Baku sin, lasa nani kangbi sakaia, sikniskira nani ra rakaia Jehova karnika yan.

Jisas mapara, apastil 12 nani ba ai pânika nani kan, bara witin nani ra kasak luki kan. Apastil nani ba diara lan apia baku parisi nani kaiki kan. Kuna Jisas baku kaikras kan. Witin pain ridi daukan kan ai warkka daukaia. Ai rayaka piua kau tara nani ra Jisas wal kaia kan. Baku ba ra, pruras kainara bara prura wina bubia taim witin wal kaia kan. Aihkika nani ba Galili wina kan, Jisas baku. Bara kum kum nani ai maya bri kan.

Apastil nani ba kasak apia kan, bara mistik taki kan. Yu kum kum ra lukras turi aisi kan, piua wala nani ra diara daukaia lukanka saura nani brin. Yu kum kum ra ai kupia alki takaskras kan. Ai tilara ya ba kau tara sapa dukiara blahwi kan. Kuna Jehova ra latwan kaiki kan upla pain nani kan. Jisas heven ra wabia taim, kristian kangrigisan pas uplika nani baku wark tara daukaia kan.