Ju nani ba Insal Luan Yua ba kati kum nina Nisán yua 14 ra dauki kan. Baku Jehova mita Idsip ra alba lâka ra kan ba wina pri sakan ba ai kupia krauki kan, bara pramis tasbaya ra brih wan ba sin. Mani 33 ra, Jisas bara ai apastilka nani Jerusalem ra utla pura tani rumka kum ra Insal Luan Yua ba daukan. Tutni pata danh takaia ra Jisas win: “Man nani tilam wina kumi ai atkaisa”. Apastil nani sirang iwi bara makabi walan: “¿Ya sa?”. Jisas pana win: “Yaura naha brit pîska yabuna ba baha waitnika sa”. Ba wina, Judas Iskariot ra brit pîska kum yaban. Judas baha minitka ra bui bara mahka taki wan.

Ba wina Jisas ai pura suni, brit kriki bara ai apastilka nani witin wal takaskan ra yuan. Bara win: “Naha britka na wina pis. Wîni tara baku sa, man nani dukiam ra yabamna ba”. Ba wina, wain ba dukiara pura suni, ai apastilka nani ra yabi bara win: “Naha wainka wina dis. Yang tailia baku sa, saurka swih tikaia dukiara yabamna ba. Heven ra man nani yang wal king kama pramis mai munisna. Kupiam ai kraukaia dukiara naha na mani bani dauki bas”. Jisas nina blablikra nani mani bani baha yua ba saiwan ra daukisa. Baha daukanka ba Dawan Tutnika Pata nina mâkisa.

Tutni pata pin ningkara, apastil nani ai tilara blahwi kan ya ba kau tara sa. Kuna Jisas witin nani ra win: “Man nani tilam ra ya kau tara ba kau sirpi baku kaia sa”.

Jisas win: “Man nani ba pâinika nani sma. Ba mita aisiki dîa man nani ra mai wiaia want ba sut mai wisna. Tisku, heven ra kli wamna, aisiki watla ra. Man nani nâra takaskma, pana pana latwan kaiki sma kaka, upla nani nu takbia disaipilki nani sma. Man nani ra latwan mai kaikisna baku pana pana latwan kaikaia sma”.

Las ra, Jisas Jehova ra ai pura suni makaban ai disaipilka nani main kaikbia bara asla kupia kumi lâka ra wark takaia hilp munbia. Baku sin, Jehova nina holikira kulkan kabia dukiara ai pura sunan. Ba wina, Jisas bara ai disaipilka nani wal Jehova ra mayunra lawana aiwani taki wan. Tisku Jisas ra alkbia.

Jisas bara apastil nani ba Olivet ilka ra wan bara Cedrón langnika bâk luan. Tihmia iwan aihwa kan bara kati ingni kan. Getsemani giadinka ra wan taim, Jisas win: “Nahara takaski banhs bara yappara”. Ba wina, Jisas witin nani wina wiria laihura taki bara ai lula krikan. Ai kupia turban kan bara Jehova ra ai pura sunan: “Man kupiam lâka dauks”. Bara Jehova ai insalka kum blikan kupia bukaia dukiara. Ningkara, Jisas apastil nani yumhpa bâra kan ba ra tawi balan bara yapi kan kaikan. Bara witin nani ra win: “¡Rawi bus! Yapaia piua apia sa. Waihli nani mihta ra ai mangkaia awarka balan sa”.

Baha minitkara, ispara bara dus nani ai mihta ra bri dakni tara kum Judas wal balan. Witin nu kan anira Jisas ra sakaia, kan Jisas bara apastil nani aikuki aima ailal baha giadinka ra wi kan. Judas suldiar nani ra win Jisas ya ba witin marikbia. Jisas kat wih bara win: “Naksa, smasmalkra”, bara mawan ra kiawalan. Jisas pana win: “Judas, ¿mawan kiawalanka kum wal waihli mihta ra ai mangkisma?”.

Jisas wira wapi taki bara waitnika nani ra makabi walan: “¿Yaura plikisma?”. Witin nani win: “Jisas ra, Nasaret wina ba”. Witin pana win: “Yang sna”. Witin nani ai nina ra wih bara tasba ra kauhan. Jisas kli makabi walan: “¿Yaura plikisma?”. Bara witin nani aima wala win: “Jisas ra, Nasaret wina ba”. Jisas pana win: “Pat mai wîri yang sna. Ba mita, naha waitnika nani na swis mahka wabia”.

Pita dîa taki ba nu takan taim, ispara kum saki Malco kiama ba klakan, prîs tara albika kan ba. Kuna Jisas ai kiama ra kangbi bara rakan. Bara Pita ra win: “Isparkam ba mangki bris. Kan ispara wal aiklama kaka, ispara wal pruma”. Suldiar nani ba Jisas ra alkan bara ai mihta nani wilkan, bara apastil nani plapan. Ba wina, upla nani Jisas ra prîs nani lalka Anás mawanra brih wan. Witin Jisas ra taibi muni makabi walan bara prîs tara Caifas watla ra blikan. Kuna, ¿apastil nani dîa daukan?

Jisas pura rumka ra ai apastilka nani wal kau bâra kan taim, witin nani ra win: “Man nani sut naha tihmia yakan ai swima”. Pita pana win: “Yang lika apia. Wala nani sut mai swibia sin, yang lika mai swimna apia”. Kuna Jisas Pita ra win: “Kalila wainhka aiwanras kainara, aima yumhpa ai kaikras wima”.

Keyapas watla ra suldiar nani ba Jisas ra brih wan taim, apastil nani aihkika pat plapan kan. Kuna apastil wâl upla nani tilara wan. Pita ba kum kan. Keyapas watla latka ra witin diman bara pauta klauhan lamara wan lapta takaia dukiara. Pauta klauhan ingnika ra, dukia dadaukra mairin kum Pita mawan ra kaiki bara win: “¡Yang mai kaikri man Jisas wal tauki kapram!”.

Pita pana win: “Apia. Rait apia sa. Dîa aisisma sapa yang tânka briras”, ba wina dur lamara wan. Baku ba ra, dukia dadaukra mairin wala witin ra kaikan bara upla wala nani ra win: “¡Naha waitnika Jisas wal tauki kan!”. Pita pana win: “¡Jisas ya sapa sin yang kaikras!”. Baku sin waitna kum win: “Man witin nani kumika sma. Galili uplika nani aisi ba baku aisisma, Jisas baku”. Kuna Pita swer takan: “¡Yang witin ra kaikras!”.

Ba minitka ra, kalila wainhka kum aiwanan. Pita kaikan Jisas ba witin ra kaiki kan bara ai kupia kraukan Jisas bîla nani win ba. Latara taki sari pali inan.

Baku ba ra, Sanedrín ba Keyapas watla ra asla prawan, Jisas lâka daukaia. Sanedrín ba rilidian tâ uplika nani lâ daukaia daknika kan. Pat aisan kan ikaia bara lukanka kum pliki kan ikaia dukiara. Sakuna dîa wal dahra sakaia sip sakras kan. Las kat Keyapas Jisas ra makabi walan: “¿Man ba Gâd luhpia sma?”. Jisas pana win: “Âu, yang sna”. Bara Keyapas win: “Diara wala kau nit apia sa. ¡Gâd mapara saura aisan sa!”. Lâ dauki daknika ba aitani lukan bara win: “Naha waitnika na pruaia sa”. Mawan ra pruki, yabalaya tuhbi, nakra wilki, pruki bara win: “¡Prapit kum sma kaka, wan wis ya mai prukan!”.

Kakna takan taim, Sanedrín pliska ra Jisas ra brih wan bara kli makabi walan: “¿Man ba Gâd luhpia sma?”. Jisas pana win: “Âu. Man nani aisaram ba kat”. Bara, Gâd mapara saura aisisa dahra sakan, bara Pontius Pailat Rom wihtka ba watla ra brih wan. ¿Ba wina dîa takan? Kaisa kaikaia.

Jisas ra prîs lalka nani mita wihta tara watla ra brih wan. Bahara Pailat witin nani ra makabi walan: “¿Naha waitnika ra dîa tâwan dahra sakisma?”. Witin nani pana win: “¡Witin ba king sa wisa!”. Pailat Jisas ra makabi walan: “¿Man ba Ju nani kingka sma?”. Jisas pana win: “Yang Kingki Lâka ba naha tasba wina apia sa”.

Ba wina Pailat mita Jisas ba Herod ra blikan, Galili wihtka ba, dîa wal dahra sakaia pliki kaikbia dukiara. Herod kaikan Jisas ba diara saura daukras kan bara kli Pailat ra blikan. Baku ba ra, Pailat upla nani ra win: “Herod bara yang sin kaikri naha waitnika na pât âpu sa. Yang pri swimna”. Kuna upla nani ba karna wini kan: “¡Ikaia sma! ¡Ikaia sma!”. Suldiar nani mita wipi, yabalaya tuhbi bara prukan. Bara kiaya kraunka kum lal ra bapi bara ai lawaska kiki win: “¡Titan yamni, Ju nani kingka!”. Pailat kli upla nani ra win: “Yang witin ra diara saura kumi sin sakras sna”. Kuna witin nani winan: “¡Dus ra sas!”. Baku ba ra Pailat adar yan Jisas ra ikaia.

Bara, Jisas ra plis kum nina Golgota mâki ba ra brih wan. Dus kum ra sabi bara pami swin. Jisas Jehova ra ai pura sunan: “Aisa, padin muns kan witin nani dîa dauki ba nu âpu sa”. Upla nani Jisas lawaska kiki bara win: “¡Gâd luhpia sma kaka, dus ba wina bal iwi bara swakwi taks!”.

Jisas lamara saura dadaukra kum ba paman kan ba witin ra win: “King aimakma taim yang dukira kupiam krauks”. Jisas witin ra pramis munan: “Yang wal paradais ra kama”. Tutni ra, awar yumhpa prais tihmu tara kum takan. Disaipil kum kum, Meri Jisas yaptika ba sin, dus ba lamara bui kan. Witin Jan ra makaban Meri ra main kaikbia ai yapti pali baku.

Las ra, Jisas win: “¡Sut aimakan sa!”. Ai lal makupi bara las ai wingka aubi puhbi pruan. Baha minitka ra, tasba nikban tara kum takan. Holi bara Holikira pliska ba dakbi sakaia kwalka tara ba lilak kalwan. Baku, suldiar lalka kum win: “Kasak pali naha waitnika na Gâd luhpia kan”.

Jisas pruan ningkara, waitna lalahkira kum nina Josep, Pailat ra makaban dus wina Jisas wîna tara ba lahbaia. Josep Jisas wîna tara ba linin kwalka painkira kum ra bara sîka mâka kîa pain wal yuki blakan, bara raiti raya kum ra bikan. Walpa tara kum wal raitika ba prakan. Baku ba ra, prîs lalka nani ba Pailat ra win: “Wan sringka sa Jisas disaipilka nani witin wîna tara impliki bara kli buan wibia”. Baku Pailat witin nani ra win: “Raitika ba pain praki bara main kakaira nani mangks”.

Yu yumhpa luan taim, titan pali, mairin kulki kum raiti ra wan. Bara kaikan upla kum walpa tara ba karbi sakan kan, bara raiti ba kwawan kan. Raitika ba bilara insal kum bâra kan bara witin nani ra win: “Si bripara. Jisas pruan wina buan sa. Ai disaipilka nani ra wis Galili ra wabia witin wal prawaia”.

Meri Magdalin isti pali Pita bara Jan ra pliki bara win: “Jisas wîna tara ba upla brih wan”. Pita bara Jan raiti ra plapi wan. Raiti imhti ba kaikan taim, ai watla ra tawi balan.

Ba wina, Meri kli raiti ra wan. Bilara insal wâl kaikan bara witin nani ra win: “Dawanki ba anira brih wan sapa yang nu âpu”. Ba wina waitna kum ra kaikan bara giadin main kakaira sa lukan. Makabi walan: “Waitna, pliskam pali, wîna tara anira mangkram ba ai wis”. Waitnika pana aisan: “¡Meri!”, witin ai tânka brin Jisas kan ba. Witin win: “¡Smasmalkra!”, bara witin ra alkan. Jisas win: “Man ai kaikram ba muihki nani ra wih wis”. Isti pali Meri plapi wan bara disaipil nani ra win witin Jisas ra kaikan.

Ningkara sim yua, Jerusalem wina Emaûs ra disaipil wâl auya kan. Waitna kum witin nani wal wapi bara makabi walan dîa dukiara aisisa sapa. Witin nani pana win: “¿Man nu âpu sma ki? Yu yumhpa luan ra, prîs lalka nani adar yaban Jisas ra ikaia. Nanara, mairin kulki kum wisa witin ba raya sa”. Waitna ba makabi walan: “¿Prapit nani ra kasak lukras sma ki? Witin nani win Kraist ba pruaia kan bara kli buaia sa”. Ba ningkara ulbanka nani wina diara nani tânka kau smalki kan. Emaûs ra wan ba ra, disaipil nani ba witin ra makaban witin nani wal takaskbia. Tutni pata pi kan taim, brit ba dukiara witin ai pura sunan, bara disaipil nani ba ai tânka brin Jisas kan ba. Ba wina lap tiwan.

Disaipilka wâl ba Jerusalem ra plapi wan. Apastil nani asla prawi kan watla ba ra, ba wina dîa takan ba aisi win. Kau utla bilara kan ba ra, Jisas param takan. Tâura, apastil nani sip kasak lukras kan Jisas kan ba. Kuna witin nani ra win: “Mihti nani kaiks, bara kangbi ai kaiks. Kraist ba pruan nani tila wina buaia ulban kan”.

Jisas apastil nani ra param takan ningkara, Pita Galili lakunka ra inska alkaia wan. Tomas, Jems, Jan, bara disaipil wala nani witin wal wan. Tihmia aiska miskan kuna inska alkras kan.

Yauhkika titan ra, lakun un ra waitna kum bûi kan kaikan. Un ba wina witin nani ra makabi walan: “¿Inska alkram ki?”. Witin nani pana win: “Apia”. Waitnika pana win: “Duri aihkika tani ra iliskam ba lulks”. Lulkan ningkara, iliska ba inska ailal alkan bara sip duri ra sunras kan. Ba wina, Jan nu takan waitnika ba Jisas kan bara win: “¡Witin ba Dawan sa!”. Pita isti pali liura dimi bara un kat yawi wan. Disaipil wala nani duri ra ai nina blikan.

Un ra wan taim, pauta mukan kum kaikan. Pauta mukan ba purara inska bara brit bâra kan. Inska alkan ba wina Jisas makaban kum kum bri balbia angkaia dukiara. Ba wina witin nani ra win: “Bal titan pata piaia”.

Titan pata pin ningkara, Jisas Pita ra makabi walan: “¿Naha inskika nani purkara yang ra kau latwan ai kaikisma ki?”. Pita pana win: “Âu, Dawan, man nu sma yang latwan mai kaikisna”. Jisas pana win: “Baku sa kaka, sîpki nani ra plun dakaks”. Aima wala Jisas makabi walan: “Pita, ¿latwan ai kaikisma ki?”. Pita pana win: “Dawan, man nu sma yang latwan mai kaikisna”. Jisas pana win: “Sîpki nani main kaiki bris”. Jisas aima yumhpa sim makabi walanka daukan. Pita sari taki bara pana win: “Dawan, man diara sut tânka brisma. Man nu sma yang latwan mai kaikisna”. Jisas witin ra makaban: “Sîpki lupia nani ra plun dakaks”. Ba wina win: “Nini bliki bas”.

Jisas ai disaipilka nani ra Galili ra asla prakisa. Adar tara kum yabisa: “Man nani nisan nani sut uplika nani ra was. Bara smalki banhs dîa dîa man nani ra adar maikri ba bara tahbi dauki banhs”. Ba wina pramis munan: “Yang man nani wal kamna piu sut ra, kupiam krauki bas”.

Pruan wina buan ningkara, Jisas Galili bara Jerusalem ra yu 40 ai disaipilka 100 nani ra param takan. Sain ailal daukan bara smalkanka tara nani yaban. Ningkara, Olivet ilka ra ai disaipilka nani aikuki aima las asla prawan. Jisas witin nani ra win: “Jerusalem wina taki banhpara. Aisa pramis munan ba bîla kaiki bas”.

Jisas dîa aisan ba ai apastilka nani ba tânka briras kan, ba mita witin ra makabi walan: “¿Nanara Israel kingka kama?”. Jisas witin nani ra win: “Jehova want apia sa yang nanara king kamna. Kuna tisku pali man nani spirit holikira brima bara karnika maikbia, bara yang witniski nani kama. Baku ba ra, Jerusalem, Judia, Sameria ra smalkaia was bara ban wan tasba wala kau laihura ba kat sin”.

Ba wina, Jisas kasbrika ra uli wan, bara mukus kum mita prakan. Ai disaipilka nani purara kaiki kan, kuna witin ra kaikras kan.

Olivet ilka wina disaipil nani taki Jerusalem ra wan. Bahara witin nani tnatka bri kan utla kum pura tani rumka ra asla prawi bara ai pura sunaia. Jisas smalkanka kau yabia bîla kaiki kan.

Jisas heven ra wan ba wina yu 10 luan kan. Baku bamna Jisas disaipilka nani ba spirit holikira brin. Mani 33 Pentikus liliaka dauki kan, plis ailal wina upla nani yua ba kulkaia dukiara Jerusalem ra balan kan. Jisas disaipilka 120 nani utla pura rumka kum ra asla prawan kan taim, ban wina, diara tara kum takan. Pauta klauhan baku disaipil nani lal purara takan bara bîla aisanka sât wala nani ra aisan. Baku sin, utla aiska ra pâsa karna binka kum walan.

Jerusalem ra kuntri wala nani wina balan uplika nani ba binka ba walan, bara dîa takisa sapa kaikaia dukiara watla ra plapan. Disaipil nani bîla aisanka wala ra aisi ba walan taim, tâ iwan. Witin nani aisi kan: “Naha uplika nani na Galili wina sa, ¿witin nani nahki sip sa wan bîla kat aisaia?”.

Baku ba ra, Pita bara apastil wala nani upla sut mawan ra ai mina ra buan. Pita witin nani ra smalkan: “Jisas ra man nani mita ikram, kuna Jehova pruan wina bukan. Nanara Jisas heven ra Gâd mihta aihkika ra sa. Bara spirit holikira pramis wan munan kan ba wankan sa. Ba mita sika naha sainka nani kaikram bara walram ba”.

Upla nani ba tâ iwan kan. Pita smalkanka ba pain walan, baha mita makabi walan: “¿Yawan dîa daukaia sa?”. Witin pana win: “Saurkam wina kupiam laks bara Jisas nina ra tahbi mai daukan kabia. Baku sin prisant baku spirit holikira ba brima”. Baha yua upla 3.000 baku tahbi daukan. Baha piua wina Jerusalem ra disaipil nani kau ailal takan. Apastil nani spirit holikira hilpka wal kangrigisan nani kau ailal paskan. Baku Jisas witin nani ra aisan ba sip kan disaipil nani ra smalkaia.

Tempel durka ra yu bani waitna kum sip wapras kan ba iwi, lalah makabi kan. Tutni kum, Pita bara Jan wal tempel ra auya kan ba kaiki bara win: “Diara kum aik pliskam pali”. Pita pana win: “Lalah wal diara kau pain sip sna maikaia. Jisas nina ra, ¡minam ra bui waps!”. Baku Pita hilp munan buaia, bara waitnika ba mahka wapan. Upla nani lilia takan naha sainka kaikan ba ra, bara ailal lalukra nani takan.

Kuna parisi bara sadiusi nani ai kupia baikan. Apastil nani ra alki rilidian tâ uplika nani lâ dauki ba mawan ra brih wan, nina Sanedrín mâki ba. Bara witin nani ra makabi walan: “¿Baha waitnika rakaia dukiara ya mita karnika maikan?”. Pita pana win: “Jisas mita karnika aikan, man nani mita ikram ba”. Rilidian lalka nani ba karna aisan: “¡Jisas dukiara smalki banhpara!”. Apastil nani pana win: “Witin dukiara yang nani aisaia sna. Bîli praki banhwamna apia”.

Baku ba ra, Pita bara Jan ra pri swin, bara witin nani mahka wih disaipil wala nani ra dîa takan ba aisan. Asla Jehova ra ai pura sunan: “Pliskam pali, si brin âpu kaia bara man dukiam ra ban aisi kaia, hilp wan muns”. Jehova witin nani ra spirit holikira yaban bara baku sip kan ban smalkaia bara sikniskira nani rakaia. Upla kau ailal lalukra takan. Sadiusi nani, tuman lâka wal apastil nani ra silak ra mangkan. Kuna baha tihmika Jehova insal kum bliki bara silak watla durka kwâki apastil nani ra win: “Tempel ra kli was bahara smalki banhs”.

Yauhkika titan ra, upla kum Sanedrín ra bal win: “¡Silak watla ba prakan sa kuna waitnika nani silak ra mangkram ba bilara âpu sa! ¡Tempel ra smalki banhwi sa!”. Baku apastil nani ra kli alki bara Sanedrín mawan ra brih wan. Prîs tara ba win: “¡Pat adar maiki banhri Jisas nina ra kau smalkaia apia!”. Pita pana win: “Yang nani Gâd bîla ba kau walaia sna, upla nani ra lika apia”.

Rilidian tâ uplika nani ba kupia baiwan bara apastil nani ra ikaia want kan. Ban sakuna parisi kum nina Gamaliel ai mina ra bui bara win: “¡Aman kaiks! Ban kra Gâd naha waitnika nani wal sa. ¿Rait pali man nani Gâd mapara aiklabaia want sma?”. Witin nani ai bîla walan bara apastil nani ra pri swin, kuna klala yabi bara witin nani ra aima wala adar yaban smalkbia apia. Kuna apastil nani ra baha ba alki takaskras kan. Ai kupia karna wal tempel bara utla utla nani ra ban smalki kan.

Saulo Tarso ra aisuban Rom uplika kum kan. Parisi kum Ju nani lâka lankira kan bara kristian nani ra misbara kaiki kan. Waitna bara mairin nani ra ai watla nani wina raski saki, silak watla ra mangki kan. Upla prautkira nani dakni kum disaipil Stiben ra walpa ni sabi ikan taim witin bui kaiki kan.

Kuna Saulo Jerusalem ra baman kristian nani alki kan ba wal ai âuyapah apia kan. Ba mita prîs tara ra makaban Damaskus tawanka ra waia, baha kristianka nani nina bliki rau sauhkaia dukiara. Saulo tawan lamara kan taim, ai tnaya kir ra ingni tara kum takan, bara witin tasba ra kahwan. Baku ba ra bîla baikra kum walan: “Saulo, ¿dîa muni nini bliki rau ai sauhkisma?”. Saulo pana makabi walan: “¿Man ya sma?”. Bîla baikra ba pana win: “Yang Jisas. Damaskus ra was bara dîa daukaia sma ba bahara mai wibia”. Baha minitka ra blain takan, bara upla wala mita ai mihta ra alki tawan ra brih diman.

Damaskus ra kristian kasak kum bâra kan nina Ananías mâki kan. Jisas, nakra ra marikanka kum ra win: “Judas watla ra was, yabal kum nina Wapni wi ba kat was, bara Saulo ra pliks”. Ananías pana win: “Dawan, baha waitnika dukiara diara ailal walri. Witin disaipilkam nani ra silak ra dingkisa”. Kuna Jisas pana win: “Witin ra was, Saulo ra yang wahbi sakri sa kuntri ailal ra Gâd sturka yamni nani ba smalkbia dukiara”.

Baku ba ra, Ananías Saulo ra wan bara win: “Saulo, muihni, Jisas man ra ai blikan sa kli kaikma dukiara”. Baha minitka ra Saulo sip kan kli kaikaia. Jisas dukiara diara nani lan takan bara ai nina blablikra takan. Witin ra tahbi daukan bara Gâd ra mayunaia pliska ra ai pânika nani wal smalki kan. ¿Man lukisma Ju nani nahki tâ iwan kan? Nanara Saulo ra kaiki kan upla nani ra Jisas dukiara smalki ba. Ju nani ai wîna kat makabi wali kan: “¿Naha sim waitnika apia Jisas disaipilka nani ra nina bliki rau sauhki kata ba?”.

Mani yumhpa Saulo Damaskus uplika nani ra smalkan. Ju nani misbara kaiki bara ikaia lukan. Kuna dîa daukai kan ba muihni nani nu takan bara plapi swakwaia hilp munan. Baskit kum ra tawan kutbanka untika kum bâk witin ra lahban.

Saulo Jerusalem ra wan taim, muihni nani ra wih kaikaia trai munan. Kuna witin nani Saulo sîa bri kan. Baku ba ra, disaipil pain kum nina Bernabé Saulo ra apastil nani mawan ra brih wan bara param win Saulo chens takan sa. Saulo Jerusalem kangrigisanka ra asla prawi bara Gâd sturka yamni nani ba liliakira mahka smalkan. Ningkara, upla nani mita Pal nina mâkan.

Cesarea ra Roman suldiarka nani lalka tara kum Cornelio nina mâki kan ba bâra kan. Ju apia kan sakuna Ju nani mita rispik muni kan. Witin kupia painkira kan, umpira nani ra diara ailal pain dauki kan. Cornelio Jehova ra kasak luki kan, piu bani witin ra ai pura suni kan. Yu kum, insal kum witin ra param takan bara win: “Gâd puram sunra nani ba walan sa. Jope tawanka ra uplikam nani blîks wabia, Pita takaski ba ra, bal mai kaikaia dukiara makabia”. Cornelio Jope ra ai uplika yumhpa isti blikan, 50 kilómetros (30 millas) waupasa (sur) tani ra.

Baku ba ra, Jope ra Pita sain kum kaikan. Ju nani piras daiwra nani kaikan. Ba wina bîla baikra kum walan ba win daiwra nani ba pibia. Pita want apia kan bara win: “Daiwan tâski aima kumi sin yang piras”. Bîla baikra ba pana win: “Naha daiwra nani tâski sa wipara, nanara Gâd wisa klin sa”. Bîla baikra ba naha sin win: “Durkam ra waitna yumhpa bâra sa, witin nani wal was”. Pita dur ra wan bara dîa dukiara balan ba waitnika nani ra makabi walan. Witin nani pana win: “Cornelio wan blikan sa, Roman suldiarka nani lalka tara kum ba. Cesarea ra yang nani wal balma want sa”. Pita baha tihmika bahara takaskbia waitnika nani ra paiwan. Yu wala ra, witin nani wal Cesarea ra wan. Jope wina muihni nani kum kum sin wan.

Cornelio Pita balan ba kaikan taim, ai lula krikan kuna Pita pana win: “Minam ra bus. Man wal baku yang waitna kum sna. Gâd wamtla ra balamna ai win, sakuna Ju nani, Ju apia nani watla ra dimras. Nanara, pliskam pali, dîa muni ai winram ba ai wis”.

Cornelio Pita ra win: “Yu walhwal sa Gâd ra puri suni kapri, bara insal kum ai win mai winamna. Pliskam pali, Jehova bîla nani ba wan smalks”. Pita pana win: “Nanara Gâd upla sâtka sut ra pain kaiki ba yang tânka brisna, baha nani sut witin ra mayunaia want ba witin pain kaikisa”. Pita Jisas dukiara witin nani ra smalkan. Baku ba ra, Cornelio bara bahara kan nani sut spirit holikira brin bara tahbi daukan.

Tasba aiska ra Gâd sturka yamni nani ba brih waia Jisas adar yan ba apastil nani ba bîla walisa. Mani 47 ra, Antíoco wina muihni nani ba Pal bara Bernabé ra smalkaia impakanka ra blikan. Asia Menor aiska ra Derbe, Listra bara Iconio bâk impaki kan taim wâl sut liliakira smalkan.

Pal bara Bernabé upla nani sut ra smalki kan: lalahkira bara umpira nani, wahma bara almuk nani ra. Kraist tânka ba upla ailal pain brin. Pal bara Bernabé Chipre wihtka tara ra sin smalkan, Sergio Paulo nina mâki kan, kuna sukia kum alki takaskaia trai munan. Pal sukika ra win: “Jehova mampara sa”. Baha minitka ra sukika ba blain takan. Sergio Paulo wihta tara ba baha kaikan taim, lalukra takan.

Pal bara Bernabé plis nani sut ra smalki kan: utla utla, markit, yabal nani ra, bara Gâd ra mayunaia watla nani ra sin. Aima kum, Listra ra kahwa kum ra rakan. Upla nani baha ba kaikan taim lukan witin nani ba gâd nani sa bara mayunaia trai kaikan. Pal bara Bernabé swiras kan mayunbia sakuna witin nani ra win: “¡Gâd ra baman mayunaia sa! Yang nani waitna nani sna”. Baku ba ra, Ju nani kum kum bal upla nani ba Pal mapara yan buan. Upla nani ba walpa ni sabi bara raski tawan wina lata tani ra sakan pruan sa luki. ¡Kuna Pal kau raya kan! Ba wina, muihni nani kum kum bal hilp munan bara kli tawan bilara brih diman. Ningkara Pal Antíoco ra balan.

Mani 49 ra, Pal impakanka wala daukan. Asia Menor wina muihnika nani ra kaikaia wan, ba wina plis kau laihura Europa ra Gâd sturka yamni nani ba brih wan. Atenas, Epesus, Pilipai, Tesalonaika bara plis wala nani ra sin wan. Baha impakanka ra Silas, Luk bara wahma kum nina Timoti witin wal wan. Kangrigisan raya nani paskaia dukiara asla wark takan bara karna kaia dukiara hilp munan. Pal Korint ra sin mani kum bakriki takaskan muihni nani ra tâ baikaia dukiara. Smalki, lan dauki kan bara wauhtaya nani ulbi kan kangrigisan nani ailal dukiara. Baku sin wark taki kan tint watla nani paski. Piu kum ningkara, Pal Antíoco ra kli balan.

Piu wala, mani 52 ra, Pal impakan yumhpika ba daukan, Asia Menor ra tâ krikan. Yahbra tani ra impakan, Pilipai kat, ba wina Korint kat bal iwan. Pal Epesus ra mani ailal luan smalki, raki, bara kangrigisan ra hilp muni. Baku sin, skul watla asla aidrubaia rumka tara kum ra yu bani upla sut walaia aisanka nani yabi kan. Upla ailal witin ra pain wali bara ai rayaka chens munan. Las kat, Gâd sturka yamni nani ba plis ailal ra smalkan ningkara, Pal Jerusalem ra wan.

Pilipai ra alba tiara kum bâra kan diara kaikaia piritka bri kan, pirit saura kum ai wîna ra kan. Ai dawanka nani dukiara lalah ailal win taki kan diara kaiki warkka dauki. Pal bara Silas Pilipai ra wan taim, ani anira wabia ba yu ailal ra nina blikan. Pirit saura ba munan ai pura wini turi aisaia: “Naha waitnika nani na Gâd Purara iwi ba dukia dadaukra nani sa”. Las ra, Pal pirit saura ra win: “¡Jisas nina ra mai wisna witin wina taks!”. Bara tiara ba wina takan.

Tiara dawanka nani ba kau lalah daukaia sip apia ba nu takan taim, ai kupia baikan. Pal bara Silas ra alki wihta tara bara wihta nani mawan ra brih wan, bara win: “¡Naha waitnika nani na lâ bîla walras sa bara tawan aiska ra trabil bukisa!”. Wihta nani ba Pal bara Silas ra pruki bara silak ra dingkaia adar yaban. Silak watla main kakaira ba silak watla pîska kau tihmu ba ra witin nani ra dingki swin. Baku sin cepo ra mangkan (tânka ba ai mina bara mihta tat ra priski swin).

Baku, Pal bara Silas Jehova ra mayunaia dukiara lawana aiwanan, silak ra dingkan wala nani ba wali kan. Ban wina, tihmia ra, silak watla ba karna nikban. Dur nani sut kwawan, silak ra mangkan nani sînka bara cepo nani ba lanhwan. Silak watla main kakaira waitnika ba silak watla bilara plapi dimi wan bara dur nani ba kwawan kan. Silak ra mangkan uplika nani sut plapan lukan, baku ba ra, silp pruaia dukiara ispara kum alkan.

Baha minitka ra, Pal ai bîla baikra karna wal winan: “¡Wînam ra saura munpara! ¡Yang nani sut nâra sna!”. Silak main kaiki uplika ba Pal bara Silas ra plapi wan bara witin nani mawan ra bawan. Bara makabi walan: “¿Swakwi takaia dukiara dîa daukaia sna?”. Witin nani pana win: “Man bara wamtla bîla uplika sut Jisas ra kasak lukaia sma”. Baku, Pal bara Silas Jehova bîla witin nani ra smalkan, silak watla main kakaira bara ai watla uplika nani sut ra tahbi daukan.

Timoti Listra kangrigisanka ra muihni wahma kum kan. Ai aisa ba, Grik kan, bara ai yapti Ju kan. Ai yapti ba Eunice nina mâki kan, ai kukika, Loida. Witin nani Timoti ra tuktan wina Jehova tânka smalkan.

Pal smalki ai impakanka wâl ra Listra ra wan taim, nu takan Timoti ba muihni nani ra kasak latwan kaiki kan bara piu sut ra hilp munaia want kan. Ba mita Pal ai impakanka ra witin wal wabia dukiara Timoti ra paiwan. Piu luan ba ra, Pal Timoti ra Gâd sturka yamni lan dadaukra bara smasmalkrika pain kaia dukiara ridi daukan.

Spirit holikira ba Pal bara Timoti ra ani anira waia ba tâ bri kan. Tihmia kum, Pal nakra marikanka kum kaikan. Waitna kum ra kaikan bara witin ra win Macedonia ra wabia hilp munaia. Baku bamna Pal, Timoti bara Luk bahara smalkaia bara kangrigisan nani paskaia wan.

Tesalonaika tawanka Macedonia ra, waitna bara mairin ailal kristian nani takan. Kuna Ju nani kum kum, Pal bara ai pânika nani ra tumi kan. Upla saura nani ailal asla praki bara muihni nani ra tawan wihtka nani mawanra brih wan. Ju nani ba ai bîla baikra karna wal aisi kan: “¡Naha waitnika nani na Rom gabamintka waihla nani sa!”. Pal bara Timoti rayaka ba pât ra kan, ba mita tihmia ra Berea ra plapaia kan.

Berea uplika nani ba Gâd sturka yamni ba walaia want kan, Grik bara Ju uplika ailal kristian takan. Kuna Ju kum kum Tesalonaika ra balan trabil munaia. Baku ba ra Pal Atenas ra wan. Timoti bara Silas Berea ra takaskan muihni nani tâ baikaia dukiara. Piu luan ba ra, Pal Timoti ra aima wala Tesalonaika ra blikan muihni nani ra hilp munaia nina bliki rau sauhkanka saura ba mapara bapi buaia. Ningkara, Pal kangrigisan ailal kaikaia bara kupia bukaia Timoti ra blikan.

Pal Timoti ra win: “Jehova dukia daukaia want nani ba, nina bliki rau sauhkan kabia”. Timoti nina bliki rau sauhkanka ba wahwan bara ai kasakka lukan lâka tâwan silak ra sin mangkan. Kuna witin lilia kan, baku sanska bri kan Jehova ra kasak kan ba marikaia.

Pal Pilipai nani ra win: “Timoti man nani ra blikaisna. Witin kasak lâka yabalka ra ban wapaia bara nahki smalkaia ba lan mai daukbia”. Pal Timoti ra pain kaiki kan bara mani ailal asla Gâd dukia daukan bara pâna pain banhwi kan.