Jisas ra tahbi daukan ningkara, spirit holikira ba upla iwras tasbaya ra brih wan. Yu 40 plun piras kan bara plun dauki kan. Bara Dibil bal Jisas ra traika kaikan. Pas win: “Rait Gâd luhpia sma kaka, naha walpaya nani ra wis brit takbia”. Kuna Jisas Ulbanka Holi bîla nani wal pana win: “Ulban sa upla nani ba plun baman nit apia sa raya kaia dukiara. Jehova dîa aisi ba sin walaia nit sa”.

Traika kaikanka wala wal Dibil ba Jisas mapara buan: “Rait Gâd luhpia sma kaka, tempel banhta ba wina pali kauhs. Ulban sa Gâd ai insalka nani blîkbia swaki mai sakaia dukiara”. Kuna Jisas kli Ulbanka Holi bîla nani wal pana win: “Ulban sa Jehova ra traika kaikaia apia sma”.

Las ra, Sitan tasba kingka lâka nani ai ritska bara prana nani sut marikan bara win: “Naha kingka lâka sut maikaisna aima kum pan mayunra aikma kaka”. Kuna Jisas pana win: “¡Sitan taki was! Ulban sa Jehova ra baman mayunaia sa”.

Baku ba ra, Dibil mahka wan bara insal nani bal Jisas ra plun yaban. Baha wina, Jisas King Lâka sturka yamni nani ba smalkan. Tasba ra baha warkka daukaia Jehova Jisas ra yaban. Jisas smalki kan ba upla nani pain wali kan, bara plis sut ra nina bliki kan.

Mani 30 abril katka bilara, Jisas Jerusalem ra wan. Upla ailal tawan ba ra wan kan, Insal Luan Yua kulkaia dukiara. Yua kulkanka tilara, tempel ra daiwan nani sakripaiska dauki kan. Upla kum kum ai daiwra nani bri bali kan, kuna wala nani Jerusalem ra atki kan.

Jisas tempel ra wan taim, kaikan upla kum kum ba ai daiwra nani upla wala ra atki kan. ¡Jehova ra mayunaia watla bilara diara nani kahbi atki kan! ¿Jisas dîa daukan? Kiwa wal klala kum dauki tempel wina sîp bara bîp nani ba sakan. Baku sin lalah chens muni kan nani tibilka batakan, bara lalahka nani sut tasba ra yakawan. Jisas butku kahbi atki nani ra win: “¡Naha wina diara nani sut sâks! ¡Yang aisiki watla ba markit kum daukpara!”.

Tempel ra upla nani kan ba Jisas daukan ba kaiki tâ iwan. Ai disaipilka nani kupia krawan Misaya dukiara dahra aisanka ba: “Jehova watla tâwan rispik tara brimna”.

Piu kum ningkara, 33 manka ra, Jisas aima wala tempel ba klin munan. Upla kumi ra sin swiras kan ai aisa watla ba rispik munras kaia.

Insal luan yua kulkan ningkara, Jisas bara ai disaipilka nani kli Galili ra balan. Sameria bâk impaki luan bara Sicar lamara takaskan, Jekob layawanhta ra. Jisas bahara takaskan ris briaia, disaipil nani lika tawan ra wan plun atkaia.

Mairin kum liwanhta ra balan lî panhkaia, bara Jisas witin ra win: “Lî aik diaia”. Mairin ba pana makabi walan: “¿Sameria uplika kum sna, dîa muni ai aisisma? Ju nani Sameria uplika nani ra aisaras”. Jisas win: “Ya sna ba nu takram kata, lî diaia ai makabaia kapram, yang rayaka laya ba maikamna”. Witin pana win: “¿Dîa wiaia want sma? Lî panhkaia dukia âpu sma”. Jisas win: “Yang lî yabuna uplika ba, kli lî din daukbia apia”. Bara witin win: “Dawan, baha laya aik”.

Ba wina Jisas win: “Maritkam ra wis balbia”. Witin pana win: “Yang mayi âpu”. Jisas win: “Pain aisaram, kan aima 5 marit takram bara nanara waitna kum wal brisma ba maritkam apia”. Witin pana win: “Man prapit sma. Upliki nani lukisa naha ilka ra Gâd ra sip sa mayunaia, kuna Ju nani wisa Jerusalem ra baman Gâd ra mayunaia sa. Yang lukisna Misaya balbia taim, witin wan smalkbia Gâd ra nahki mayunaia”. Jisas diara kum aisan ba kau upla kumi ra sin wiras kan: “Misaya ba yang sna”.

Mairin ba ai tawanka ra plapi wan bara Sameria uplika nani ra win: “Misaya ba yang sakri sa. Yang rayaki dukiara aiska ai win. Bal bara kaiki banhs”. Baku witin wal liwanhta ra wan Jisas smalkanka nani ba walaia dukiara.

Baku, Sameria uplika nani ba Jisas ra makaban witin nani wal takaskbia. Baha tawanka ra yu wâl luan bara diara ailal smalkan, bara upla ailal witin ra kasak lukan. Las ra, Sameria mairka ra wi banhwan: “Naha waitnika ra walan ningkara, pain wan dara walisa witin sika tasba swaki sasakrika aihwa ba”.

Tahbi daukan wina Jisas mahka smalkan: “Gâd Kingka Lâka ba baila sa”. Galili bara Judia aiska ra ai disaipilka nani witin wal impaki kan. Jisas ai tawanka Nasaret ra balan taim, Gâd ra mayunaia watla ra wan, Aiseya ulbanka ba kwâki bara ai bîla baikra tara wal aisi kaikan: “Jehova ai spiritka holikira aikan sa ai sturka yamni nani ba smalkamna dukiara”. ¿Dîa wiaia want kan? Upla ba Jisas sainka tara nani kaikaia want kan sakuna, witin sain daukaia baman spirit holikira ba briras kan. King Lâka sturka yamni nani ba kau tara kan. Las ra, wali nani kan ba ra win: “Naha prapit aisanka ba naiwa aimakisa”.

Ba wina, Jisas Galili kabuka ra wan. Bahara ai disaipilka 4 ra kaikan inska mamiskra nani kan, bara win: “Nini blîks bara upla mamiskra mai daukamna”. Waitnika nani ba Pita, Andru, Jems bara Jan nina bri kan. Isti pali inska alkaia warkka ba swih witin wal wan. Jehova Kingka Lâka ba Galili aiska ra impaki smalkan. Gâd ra mayunaia watla nani ra, markit bara yabal nani ra smalki kan. Witin nani anira auya ba ra upla ailal nina bliki kan. Jisas sturka ba plis nani sut ra walan, Siria ra kat sin.

Piu luan ningkara, Jisas ai nina blablikra kum kum ra siknis nani ra rakaia bara lasa nani kangbi sakaia karnika yaban. Wala nani witin wal wan smalkaia tawan tara bara sirpi nani ra. Baku sin mairin kasakkira daknika kum witin ra hilp muni kan bara ai nina blablikra nani ra sin. Witin nani tilara Meri Magdalin, Juana, Susana bara wala nani sin kan.

Ai disaipilka nani ra ridi daukan ningkara, Jisas smalkaia blikan. Galili bâk impaki ba ra, upla wala nani sin Jisas disaipilka nani takan bara tahbi daukan. Upla ailal Jisas nina blikaia want kan, ba mita witin insla kum dâkaia ridi ba wal prakan. Witin win: “Jehova ra puram suns dâkaia warkka tatakra nani kau blîkbia dukiara”. Ningkara, disaipil 70 wahbi saki bara kum wala wal pânika dauki Judia aiska ra smalkaia blikan. Upla sut ra King Lâka dukiara aisi kan. Kli tawi balan taim, dîa witin nani ra takan ba Jisas ra wiaia want kan. Smalkaia warkka ba alki takaskaia dukiara Dibil ba diara kumi sin daukaia sip apia kan.

Jisas heven ra kli waia kan ba mita, ai disaipilka nani ra ridi daukan wark tara ba ban dauki kaia. Witin win: “Tasba aiska ra King Lâka sturka yamni ba smalki banhs. Gâd bîla ba upla nani ra smalki bara tahbi dauks”.

Jisas Gâd Kingka Lâka sturka yamni nani ba smalkaia tasba ra balan. Baku sin, Jehova sain nani daukaia ai spiritka holikira yaban bara King kabia taim dîa daukbia ba marikaia. Naha nani daukan, Jisas siknis sâtka sut sip kan rakaia. Ani anira wabia, sikniskira nani witin ra hilp makabi kan, bara witin sut ra raki kan. Blain nani sip kan kaikaia, walras nani walaia bara wapras nani wapaia. Jisas prâka un ra kangbia kaka sip kan rawaia. Jisas lasa nani sin kangbi saki kan. Plis sut ra upla nani nina bliki kan, bara upla kumi sin ra apia wiras kan, yakan kaia want kan piua ra kat sin.

Aima kum Jisas bâra kan watla ra, wapras waitnika kum brih balan. Kuna upla ailal kan mita sip dimi banhras kan, baku Jisas bâra kan ba kat lahbaia dukiara utla banhta ra unta kum daukan. Bara Jisas wapras uplika ra win: “Bus bara waps”. Wapan taim, upla nani tâ iwan.

Yu wala, Jisas tawan wala ra auya kan taim, laih wina ai pura winan waitna liparkira 10 nani ba: “¡Jisas, hilp wan muns!”. Baha taimka ra, upla pain nani lamara liparkira nani ba sip apia kan waia. Baku sin, Jehova Lâka wi kan ba liparkira nani rawan ba wina tempel ra waia kan. Baku Jisas witin nani ra bahara wabia win. Liparkira nani tempel ra auya kan ba ra rawan. Tila wina kum pat rawan ba kaikan taim, Gâd ra mayunaia bara Jisas ra tingki yabaia kli tawi balan. Liparkira 10 ba wina, kumi baman Jisas ra tingki win.

Mairin kum bâra kan 12 mani siknis kan bara kau sip apia kan ba mita rawaia want kan. Baku ba ra, upla tilara diman Jisas nina bâk lamara waia dukiara bara ai prâka un ra kangban. Baha minitka ra rawan. Bara Jisas makabi walan: “¿Ya ai kangban?”. Mairin ba sirang iwan, kuna ai lamara wan bara dîa takan ba witin ra win. Jisas witin ra maisa nihki win: “Luhpi mairin, kupiam kumi wamtla ra was”.

Tâ uplika tara kum nina Jairo Jisas ra wih bik taki makaban: “Waitla ra bal. Luhpi mairin siknis pali sa”. Kuna Jisas Jairo watla ra kau waras kan ba ra, tuktika mairin ba pruan. Jisas wan ba ra, kaikan pamalika wal upla ailal inisa. Jisas witin nani ra win: “Ini banhpara, witin yapisa”. Baku tuktika mairin mihta ra alki bara win: “Tukta mairin, ¡bus!”. Tuktika mairin baha minitka ra buan, bara Jisas ai aisika nani ra win plun wira yabia. ¡Man luks aisika nani nahki ai dara walan kaia sa!

Mani kum bakriki Jisas smalki kan taim, diara tara kum daukaia kan. ¿Kristian kangrigisan tâ briaia dukiara bara witin wal kau ai lamara wark takaia dukiara ya nani ra wahbi sakaia kan? Baha daukaia lukanka briras kaina ra, Jisas Jehova hilpka plikan. Ba mita, il kum ra wan yakan kaia bara tihmia aiska ai pura suni luan. Yauhkika titan ra, ai disaipilka kum kum nani ra asla prakan bara ai apastilka nani 12 ba wahbi sakan. ¿Kum pan nina nu sma ki? Ai nina nani ba Pita, Andru, Jems, Jan, Pilip, Bartolomiu, Tamas, Matiu, Jems Alfeo luhpia, Tadeo, Saiman bara Judas Iskariot.

Jisas wal 12 nani ba impaki kan. Nahki smalkaia lan dauki kan, bara las ra, yakan smalkaia blikan. Baku sin, lasa nani kangbi sakaia, sikniskira nani ra rakaia Jehova karnika yan.

Jisas mapara, apastil 12 nani ba ai pânika nani kan, bara witin nani ra kasak luki kan. Apastil nani ba diara lan apia baku parisi nani kaiki kan. Kuna Jisas baku kaikras kan. Witin pain ridi daukan kan ai warkka daukaia. Ai rayaka piua kau tara nani ra Jisas wal kaia kan. Baku ba ra, pruras kainara bara prura wina bubia taim witin wal kaia kan. Aihkika nani ba Galili wina kan, Jisas baku. Bara kum kum nani ai maya bri kan.

Apastil nani ba kasak apia kan, bara mistik taki kan. Yu kum kum ra lukras turi aisi kan, piua wala nani ra diara daukaia lukanka saura nani brin. Yu kum kum ra ai kupia alki takaskras kan. Ai tilara ya ba kau tara sapa dukiara blahwi kan. Kuna Jehova ra latwan kaiki kan upla pain nani kan. Jisas heven ra wabia taim, kristian kangrigisan pas uplika nani baku wark tara daukaia kan.

Apastil nani 12 ra wahbi sakan ningkara, Jisas il wina bal iwi bara upla ailal asla prawi pliska kum ra wan. Galili, Juda, Tiro, Sidón, Siria bara Jordan awala baila wala wina sin. Upla sikniskira apia kaka, lasa pruki nani ba bri balan bara Jisas sut ra rakan. Baku il mâyara iwan bara upla nani ra smalkan. Gâd pânika kaia want sa kaka, dîa daukaia ba smalkan. Jehova ra plikaia ba yawan tânka briaia sa bara latwan kaikaia lan takaia sa. Kuna upla wala ra latwan kaikras sa kaka, Gâd ra latwan kaikbia apia. Yawan upla sut wal pain bara kasak kaia sa, wan waihla nani wal kat sin.

Jisas win: “Pâna nani ra baman latwan kaikaia apia sa, waihla nani ra sin latwan kaikaia sma bara kupiam wina padin munaia. Upla kum man wal saura ai dara walisa kaka isti was padin makabaia. Nahki mai munbia want sma ba baku wala nani ra munaia sma”.

Yawan dîa bri ba dukiara Jisas kupia kraukanka pain nani yaban. Bara win: “Jehova pânika kaia ba kau pain sa lalah ailal briaia ba wal. Âimplikra kum lalahkam implikaia sip sa, kuna Jehova wal pâna lâka brisma ba upla kumi sin implikbia apia. Ba mita, plun, diaia apia kaka kwala dukiara trabil taki lukpara. Tnawira nani ra kaiks. Gâd piu bani main kaikisa plun aitani bribia dukiara. Trabil taki lukma sin kau raya iwma apia. Kupiam krauks: Dîa nit sma ba, Jehova pat nu sa”.

Jisas nahki smalki kan ba upla kumi sin kau walras kan. Baha dukia nani rilidian tâ uplika nani smalkras kan. ¿Jisas dîa muni smasmalkra painkira kan? Kan ai smalkanka sut ba Jehova wina kan.

Parisi nani diara dauki kan ba upla nani pain kaikbia dukiara kan. Diara pain kum dauki ba, upla nani nu takbia dukiara kan. Baku ba ra, upla sut kaikbia dukiara upla ailal tauki pliska nani ra ai pura suni kan. Pura sunra yari nani lan taki bara Gâd ra mayunaia watla nani ra kli aisi kan bara yabal nani ra sin upla walbia dukiara. Upla nani tâ iwan Jisas naha aisan taim: “Parisi nani baku puram sunpara. Witin nani lukisa Gâd ba pain kaikisa bîla ailal yus muni ba, kuna baha rait apia sa. Pura sunaia ba Jehova wih man wal baman sa. Sim dukia baman aisapara. Nahki damra walisma ba Jehova want sa wima”.

Nahki wan pura sunaia ba Jisas naku smalkan: “Yawan aisa heven ra sma ba, ninam ba holikira kulkan kabia. Kingkam Lâka ba balbia. Kupiam lâka daukan kabia, heven ra dauki ba baku tasba ra sin”. Ba wina Jisas win upla ba ai pura sunaia sa, yua pata makabaia, ai saurka swih tikaia bara rayaka dukia wala nani dukiara sin.

Baha purkara, Jisas win: “Puram sunaia ba swipara. Jehova, aisikam ra diara pain nani ba makabi bas. Ai luhpia nani ra aisa nani sut diara pain ba yabaia want sa. Luhpiam brit kum mamkabia kaka, ¿walpa kum yama? Bara inska kum mamkabia kaka, ¿piuta kum yama?”.

Baku Jisas tânka ba aisi smalkan: “Luhpiam nani ra diara pain yabaia nu sma kaka, ¡Jehova aisikam ba, kau pali sip sa spirit holikira maikaia! Makabaia baman sma”. ¿Jisas win ba daukisma? ¿Puram sunisma taim Jehova ra man dîa makabisma?

Mani 32 Insal Luan Yua kulkanka kainara, apastil nani impaki smalkanka kum wina tawi balan. Ris bribia dukiara Jisas duri tara kum ra brih wan Betsaida ra swapan kan bamna. Kuna un lamara auya kan taim, Jisas kaikan baha kat upla tausin nani ai nina bliki wan. Witin ai apastilka nani baman aikuki kaia want kan, kuna liliakira uplika nani ra brin. Diara ailal smalkan bara sikniskira nani ra rakan. Yu aiska Gâd Kingka Lâka ba dukiara witin nani ra smalki kan. Tutni iwan ra, apastil nani witin ra win: “Upla nani ba plun dauki kaia sa. Plun plikaia wabia wis”.

Jisas pana win: “Witin nani waia nit apia sa. Nahara man nani plun yas”. Apastil nani witin ra makabi walan: “¿Witin nani dukiara want sma yang nani wamna brit atkaia?”. Felipe, apastil nani tila wina kum ba, win: “Lalah ailal yawan bri kabia sin, upla ailal dukiara yawan sip apia kabia brit atkaia”.

Jisas witin nani ra makabi walan: “¿Yawan plun an brisa?”. Andrés pana win: “Inska lupia wâl bara brit 5 yawan brisa. Kuna upla ailal dukiara wiria sa”. Jisas win: “Brit bara inskika nani ba sal aik”. Ba wina, dakni 50 bara 100 ra twi ra iwbia makaban. Baku ba ra, brit nani bara inska lupia nani ba ai mihta ra brin, kasbrika ra kaiki pura sunra kum daukan. Ba wina, upla nani sut ra yubia dukiara pata ba apastil nani ra yaban. Waitna 5.000 bâra kan, mairin bara tuktan nani sin ai âuya pah kat pin. Las ra, diara tanis tikaia apia dukiara, tâka takan ba apastil nani wahban. ¡Baskit (canasta) 12 banhkan! ¿Sain painkira kum kan rait apia?

Lilia pali banhwi kan ba mita, want kan Jisas ai kingka kabia. Kuna Jehova want apia kan king kabia kau piua aimakras kan bamna, baha Jisas nu kan. Baku upla nani ra mahka wabia swin bara ai apastilka nani ra win Galili kabuka baila wala ra wabia. Witin nani duri ra wan, bara Jisas yakan il kum ra uli wan. ¿Dîa muni? Ai aisa ra ai pura sunaia dukiara taim nit kan. Jisas wark ailal dauki tilara ai pura sunaia dukiara piu bani ra taim saki kan.

Jisas sikniskira nani rakaia bara pruan nani bukaia sip kan. Baku sin, pâsa bara lî alki takaskaia sip kan. Il ra ai pura sunan ningkara, Jisas mâyara kaikan Galili kabuka ra, bara pâsa tara kum kaikan. Ai apastilka nani but kum ra ai karnika aiska wal pâsa mapara kaubi kan. Baku Jisas bal iwi bara lî purak but tani ra wapisa. Upla kum lî purak wapi ba apastil nani kaikan taim, sirang iwan. Kuna Jisas witin nani ra win: “Yang sna. Si bripara”.

Pita win: “Dawan, man sma kaka, ai wis man ra wamna”. Jisas witin ra win: “¡Bal!”. Baku ba ra, Pita duri ba wina iwan bara pâsa tara tila bâk Jisas sait ra lî purak wapi wan. Kuna Pita Jisas lamara wan taim, pâsa tara ba kaikan, bara si brin takan. Ai dara walan rungwi ba, bara winan: “¡Dawan swaki ai sâks!”. Jisas ai mihta alki bara win: “¿Dîa muni namhpa namhpa lukram? ¿Kasak lukan lâka âpu sma?”.

Jisas bara Pita wal duri ra ulan, baha minitka ra pâsa tara ba takaskan. ¿Apastil nani nahki ai dara walan lukisma? Bara aisi banhwan: “Rait pali man sika Gâd luhpia”.

Baha piua ra baman apia kan Jisas paskanka nani karnika alki takaskan ba. Yu wala, Jisas bara ai apastilka nani wal kabu baila wala ra duri ra impaki kan taim, Jisas duri tnata tani ra yapi kan. Yapi kan ba ra, pâsa karna kum krawan. Rip nani ba duri ra pruki kan, bara dwarka ba lî ni banhwi kan. Apastil nani Jisas ra wini bukan: “¡Smasmalkra, yawan nani pruaisa! ¡Hilp wan muns!”. Jisas bûi bara kabu ra win: “¡Sap taks!”. Baha minitka ra, pâsa bara kabu ba lamni takan. Bara Jisas ai apastilka nani ra makabi walan: “¿Kasak lukan lâka âpu sma ki?”. Bara witin nani pana ai walka ra win: “¡Pâsa bara kabu kat sin ai bîla walisa!”. Apastil nani ba lan takan Jisas kat kasak lukbia kaka, diara kumi ra sin sibrin briaia apia sa.

Jisas ra misbara kaiki bara alkaia pliki kan parisi nani ba. Witin nani aisi kan Jisas sikniskira nani sabat ra rakaia apia, res briaia yua sa bamna. Sabat kum, Jisas blain waitna kum kaikan yabal ra lalah makabi kan. Bara, ai disaipilka nani ra win: “Gâd karnika ba naha waitnika ra hilp munai ba kaiks”. Bara, Jisas ai yabalaya tasba wal miks muni slaubla daukan. Ba wina waitnika nakra ra yuki bara win: “Siloam laya ra wih namkra sikbi sâks”. Waitnika ba baku daukan, bara ai rayaka ra aima pas sip kan kaikaia.

Upla nani tâ iwi bara win: “Naha waitnika sika iwi makabi kata ba, ¿rait apia? ¿Wala kum wal talia sa?”. Witin win: “Yang sika blain aisubi takri ba”. Upla nani makabi walan: “¿Dîa muni blain apia sma?”. Witin dîa takan ba aisan. Bara, brih wan parisi nani wal aisaia.

Waitnika ba parisi nani ra win: “Jisas naikra ra slaubla yukan bara ai win sikbamna. Yang daukri bara nanara, yang kaikisna”. Parisi nani aisan: “Jisas sabat yua ra upla rakisa kaka, ai karnika ba Gâd wina balras”. Kuna wala nani aisan: “Ai karnika ba Gâd wina balras sa kaka, ¿sikniskira nani ra nahki sip sa rakaia?”.

Parisi nani waitnika aisika bara yaptika ra paiwi, makabi walan: “¿Nahki sip sa nanara luhpiam ba kaikaia?”. Aisika nani ba sibrin kan, kan parisi nani win Gâd ra mayunaia watla wina kangbi sakaia ya ya Jisas ra kasak lukbia kaka. Bara pana win: “Yang nani nu âpu sna. Man nani witin ra makabi wals”. Parisi nani waitnika ra makabi walanka nani kau daukan, bara witin pana win: “Yang dîa nu sna ba, sut mai wîri. ¿Dîa muni ban ai makabi walisma?”. Parisi nani praut taki bara baha wina kangbi sakan.

Ba wina, Jisas waitnika ra kaikaia wan bara makabi walan: “¿Misaya ra kasak lukisma? Waitnika pana win: “Witin ya ba nu sna kaka, witin ra kasak lukamna”. Jisas pana win: “Misaya ba yang sna”. ¿Rait apia Jisas waitnika blain ba ra pain munan? Witin ra rakan bara kasak lukan lâka briaia sin hilp munan.

Jisas pâna pain yumhpa bri kan ba Betania ra iwi kan. Lasarus, Meri bara Marta nina mâki kan, bara yumhpa sut ai lakra bara ai muihnika kan. Yu kum Jisas Jordan awalka baila wala ra kan, Meri bara Marta wal maisa pahkanka isti kum blikan: “Lasarus siknis pali sa. Pliskam pali isti bal”. Kuna Jisas baha minitka ra waras kan. Yu wâl bîla kaikan ba wina ai disaipilka nani ra win: “Betania ra wap. Lasarus yapi ba wina tatukbaisna”. Apastil nani witin ra win: “Lasarus yapisa kaka, pain takbia”. Bara Jisas param win: “Lasarus pruan”.

Jisas Betania ra wan taim, Lasarus bikan yu walhwal bri kan. Upla ailal Marta bara Meri ra maisa nihkaia wan kan. Marta Jisas balan ba nu takan bara witin wal aisaia plapi wan. Bara win: “Dawan nâra kapram kaka, laikra pruaia apia kan”. Jisas pâna win: “Lamkra ba kli raya takbia. ¿Marta, kasak ai lukisma?”. Witin pana win: “Yang lukisna pruan nani bubia taim, bubia”. Baku ba ra, Jisas pana win: “Yang sika kli buaia lâka bara rayaka ba sin”.

Ningkara Marta Meri ra wih win: “Jisas nâra sa”. Meri Jisas ra plapi wan, bara upla nani nina blikan. Witin ra wan taim, Meri ai lula kriki bara ini kan. Witin ra win: “Dawan, man nâra kapram kata, laikra ba raya kaia kan”. Jisas nu takan Meri sari pali kan ba, bara witin sin inan. Bâra uplika nani kaikan Jisas ini kan bara witin nani aisan: “Kasak pali Jisas Lasarus ra latwan kaiki kan”. Kuna kum kum makabi wali kan: “¿Dîa muni ai pânika ra swaki sakras kan?”. ¿Jisas nanara dîa daukaisa?

Jisas raitika ra wan, walpa unta kum kan, bara dimaika ba walpa kum wal prakan kan. Witin adar yan: “Walpaya ba sâks”. Marta witin ra win: “Yu walhwal brisa bikan bara kîa saura kaia sa”. Kuna ban walpaya ba sakan bara Jisas ai pura sunan: “Aisa ai walisma ba dukiara tingki maikisna, yang nu sna piua bani ai walisma, kuna bîli baikra tara wal aisisna upla nani kasak lukbia man mita ai blikram ba”. Baha ningkara karna winan: “¡Lasarus, bal taks!”. Ban wina, diara pain kum takan: Lasarus raiti wina bal takan, kau kwala ni blakan kan. Jisas win: “Kwalka nani ba lanhks bara swis mahka wabia”.

Upla ailal dîa takan ba kaikan bara Jisas ra kasak lukan, kuna upla kum kum parisi nani ra wih win. Baha yua wina, parisi nani lukan nahki Lasarus bara Jisas ra ikaia. Apastil nani 12 ba wina kum, Judas Iskariot, yukuwi parisi nani ra wih makabi walan: “¿Lalah an aikma Jisas anira ba mai wimna kaka?”. Lalah pihni 30 mâ yabaia win, bara Judas âu win bara tnatka plikan Jisas ra atkaia.

Ju nani ba Insal Luan Yua ba kati kum nina Nisán yua 14 ra dauki kan. Baku Jehova mita Idsip ra alba lâka ra kan ba wina pri sakan ba ai kupia krauki kan, bara pramis tasbaya ra brih wan ba sin. Mani 33 ra, Jisas bara ai apastilka nani Jerusalem ra utla pura tani rumka kum ra Insal Luan Yua ba daukan. Tutni pata danh takaia ra Jisas win: “Man nani tilam wina kumi ai atkaisa”. Apastil nani sirang iwi bara makabi walan: “¿Ya sa?”. Jisas pana win: “Yaura naha brit pîska yabuna ba baha waitnika sa”. Ba wina, Judas Iskariot ra brit pîska kum yaban. Judas baha minitka ra bui bara mahka taki wan.

Ba wina Jisas ai pura suni, brit kriki bara ai apastilka nani witin wal takaskan ra yuan. Bara win: “Naha britka na wina pis. Wîni tara baku sa, man nani dukiam ra yabamna ba”. Ba wina, wain ba dukiara pura suni, ai apastilka nani ra yabi bara win: “Naha wainka wina dis. Yang tailia baku sa, saurka swih tikaia dukiara yabamna ba. Heven ra man nani yang wal king kama pramis mai munisna. Kupiam ai kraukaia dukiara naha na mani bani dauki bas”. Jisas nina blablikra nani mani bani baha yua ba saiwan ra daukisa. Baha daukanka ba Dawan Tutnika Pata nina mâkisa.

Tutni pata pin ningkara, apastil nani ai tilara blahwi kan ya ba kau tara sa. Kuna Jisas witin nani ra win: “Man nani tilam ra ya kau tara ba kau sirpi baku kaia sa”.

Jisas win: “Man nani ba pâinika nani sma. Ba mita aisiki dîa man nani ra mai wiaia want ba sut mai wisna. Tisku, heven ra kli wamna, aisiki watla ra. Man nani nâra takaskma, pana pana latwan kaiki sma kaka, upla nani nu takbia disaipilki nani sma. Man nani ra latwan mai kaikisna baku pana pana latwan kaikaia sma”.

Las ra, Jisas Jehova ra ai pura suni makaban ai disaipilka nani main kaikbia bara asla kupia kumi lâka ra wark takaia hilp munbia. Baku sin, Jehova nina holikira kulkan kabia dukiara ai pura sunan. Ba wina, Jisas bara ai disaipilka nani wal Jehova ra mayunra lawana aiwani taki wan. Tisku Jisas ra alkbia.

Jisas bara apastil nani ba Olivet ilka ra wan bara Cedrón langnika bâk luan. Tihmia iwan aihwa kan bara kati ingni kan. Getsemani giadinka ra wan taim, Jisas win: “Nahara takaski banhs bara yappara”. Ba wina, Jisas witin nani wina wiria laihura taki bara ai lula krikan. Ai kupia turban kan bara Jehova ra ai pura sunan: “Man kupiam lâka dauks”. Bara Jehova ai insalka kum blikan kupia bukaia dukiara. Ningkara, Jisas apastil nani yumhpa bâra kan ba ra tawi balan bara yapi kan kaikan. Bara witin nani ra win: “¡Rawi bus! Yapaia piua apia sa. Waihli nani mihta ra ai mangkaia awarka balan sa”.

Baha minitkara, ispara bara dus nani ai mihta ra bri dakni tara kum Judas wal balan. Witin nu kan anira Jisas ra sakaia, kan Jisas bara apastil nani aikuki aima ailal baha giadinka ra wi kan. Judas suldiar nani ra win Jisas ya ba witin marikbia. Jisas kat wih bara win: “Naksa, smasmalkra”, bara mawan ra kiawalan. Jisas pana win: “Judas, ¿mawan kiawalanka kum wal waihli mihta ra ai mangkisma?”.

Jisas wira wapi taki bara waitnika nani ra makabi walan: “¿Yaura plikisma?”. Witin nani win: “Jisas ra, Nasaret wina ba”. Witin pana win: “Yang sna”. Witin nani ai nina ra wih bara tasba ra kauhan. Jisas kli makabi walan: “¿Yaura plikisma?”. Bara witin nani aima wala win: “Jisas ra, Nasaret wina ba”. Jisas pana win: “Pat mai wîri yang sna. Ba mita, naha waitnika nani na swis mahka wabia”.

Pita dîa taki ba nu takan taim, ispara kum saki Malco kiama ba klakan, prîs tara albika kan ba. Kuna Jisas ai kiama ra kangbi bara rakan. Bara Pita ra win: “Isparkam ba mangki bris. Kan ispara wal aiklama kaka, ispara wal pruma”. Suldiar nani ba Jisas ra alkan bara ai mihta nani wilkan, bara apastil nani plapan. Ba wina, upla nani Jisas ra prîs nani lalka Anás mawanra brih wan. Witin Jisas ra taibi muni makabi walan bara prîs tara Caifas watla ra blikan. Kuna, ¿apastil nani dîa daukan?

Jisas pura rumka ra ai apastilka nani wal kau bâra kan taim, witin nani ra win: “Man nani sut naha tihmia yakan ai swima”. Pita pana win: “Yang lika apia. Wala nani sut mai swibia sin, yang lika mai swimna apia”. Kuna Jisas Pita ra win: “Kalila wainhka aiwanras kainara, aima yumhpa ai kaikras wima”.

Keyapas watla ra suldiar nani ba Jisas ra brih wan taim, apastil nani aihkika pat plapan kan. Kuna apastil wâl upla nani tilara wan. Pita ba kum kan. Keyapas watla latka ra witin diman bara pauta klauhan lamara wan lapta takaia dukiara. Pauta klauhan ingnika ra, dukia dadaukra mairin kum Pita mawan ra kaiki bara win: “¡Yang mai kaikri man Jisas wal tauki kapram!”.

Pita pana win: “Apia. Rait apia sa. Dîa aisisma sapa yang tânka briras”, ba wina dur lamara wan. Baku ba ra, dukia dadaukra mairin wala witin ra kaikan bara upla wala nani ra win: “¡Naha waitnika Jisas wal tauki kan!”. Pita pana win: “¡Jisas ya sapa sin yang kaikras!”. Baku sin waitna kum win: “Man witin nani kumika sma. Galili uplika nani aisi ba baku aisisma, Jisas baku”. Kuna Pita swer takan: “¡Yang witin ra kaikras!”.

Ba minitka ra, kalila wainhka kum aiwanan. Pita kaikan Jisas ba witin ra kaiki kan bara ai kupia kraukan Jisas bîla nani win ba. Latara taki sari pali inan.

Baku ba ra, Sanedrín ba Keyapas watla ra asla prawan, Jisas lâka daukaia. Sanedrín ba rilidian tâ uplika nani lâ daukaia daknika kan. Pat aisan kan ikaia bara lukanka kum pliki kan ikaia dukiara. Sakuna dîa wal dahra sakaia sip sakras kan. Las kat Keyapas Jisas ra makabi walan: “¿Man ba Gâd luhpia sma?”. Jisas pana win: “Âu, yang sna”. Bara Keyapas win: “Diara wala kau nit apia sa. ¡Gâd mapara saura aisan sa!”. Lâ dauki daknika ba aitani lukan bara win: “Naha waitnika na pruaia sa”. Mawan ra pruki, yabalaya tuhbi, nakra wilki, pruki bara win: “¡Prapit kum sma kaka, wan wis ya mai prukan!”.

Kakna takan taim, Sanedrín pliska ra Jisas ra brih wan bara kli makabi walan: “¿Man ba Gâd luhpia sma?”. Jisas pana win: “Âu. Man nani aisaram ba kat”. Bara, Gâd mapara saura aisisa dahra sakan, bara Pontius Pailat Rom wihtka ba watla ra brih wan. ¿Ba wina dîa takan? Kaisa kaikaia.

Jisas ra prîs lalka nani mita wihta tara watla ra brih wan. Bahara Pailat witin nani ra makabi walan: “¿Naha waitnika ra dîa tâwan dahra sakisma?”. Witin nani pana win: “¡Witin ba king sa wisa!”. Pailat Jisas ra makabi walan: “¿Man ba Ju nani kingka sma?”. Jisas pana win: “Yang Kingki Lâka ba naha tasba wina apia sa”.

Ba wina Pailat mita Jisas ba Herod ra blikan, Galili wihtka ba, dîa wal dahra sakaia pliki kaikbia dukiara. Herod kaikan Jisas ba diara saura daukras kan bara kli Pailat ra blikan. Baku ba ra, Pailat upla nani ra win: “Herod bara yang sin kaikri naha waitnika na pât âpu sa. Yang pri swimna”. Kuna upla nani ba karna wini kan: “¡Ikaia sma! ¡Ikaia sma!”. Suldiar nani mita wipi, yabalaya tuhbi bara prukan. Bara kiaya kraunka kum lal ra bapi bara ai lawaska kiki win: “¡Titan yamni, Ju nani kingka!”. Pailat kli upla nani ra win: “Yang witin ra diara saura kumi sin sakras sna”. Kuna witin nani winan: “¡Dus ra sas!”. Baku ba ra Pailat adar yan Jisas ra ikaia.

Bara, Jisas ra plis kum nina Golgota mâki ba ra brih wan. Dus kum ra sabi bara pami swin. Jisas Jehova ra ai pura sunan: “Aisa, padin muns kan witin nani dîa dauki ba nu âpu sa”. Upla nani Jisas lawaska kiki bara win: “¡Gâd luhpia sma kaka, dus ba wina bal iwi bara swakwi taks!”.

Jisas lamara saura dadaukra kum ba paman kan ba witin ra win: “King aimakma taim yang dukira kupiam krauks”. Jisas witin ra pramis munan: “Yang wal paradais ra kama”. Tutni ra, awar yumhpa prais tihmu tara kum takan. Disaipil kum kum, Meri Jisas yaptika ba sin, dus ba lamara bui kan. Witin Jan ra makaban Meri ra main kaikbia ai yapti pali baku.

Las ra, Jisas win: “¡Sut aimakan sa!”. Ai lal makupi bara las ai wingka aubi puhbi pruan. Baha minitka ra, tasba nikban tara kum takan. Holi bara Holikira pliska ba dakbi sakaia kwalka tara ba lilak kalwan. Baku, suldiar lalka kum win: “Kasak pali naha waitnika na Gâd luhpia kan”.

Jisas pruan ningkara, waitna lalahkira kum nina Josep, Pailat ra makaban dus wina Jisas wîna tara ba lahbaia. Josep Jisas wîna tara ba linin kwalka painkira kum ra bara sîka mâka kîa pain wal yuki blakan, bara raiti raya kum ra bikan. Walpa tara kum wal raitika ba prakan. Baku ba ra, prîs lalka nani ba Pailat ra win: “Wan sringka sa Jisas disaipilka nani witin wîna tara impliki bara kli buan wibia”. Baku Pailat witin nani ra win: “Raitika ba pain praki bara main kakaira nani mangks”.

Yu yumhpa luan taim, titan pali, mairin kulki kum raiti ra wan. Bara kaikan upla kum walpa tara ba karbi sakan kan, bara raiti ba kwawan kan. Raitika ba bilara insal kum bâra kan bara witin nani ra win: “Si bripara. Jisas pruan wina buan sa. Ai disaipilka nani ra wis Galili ra wabia witin wal prawaia”.

Meri Magdalin isti pali Pita bara Jan ra pliki bara win: “Jisas wîna tara ba upla brih wan”. Pita bara Jan raiti ra plapi wan. Raiti imhti ba kaikan taim, ai watla ra tawi balan.

Ba wina, Meri kli raiti ra wan. Bilara insal wâl kaikan bara witin nani ra win: “Dawanki ba anira brih wan sapa yang nu âpu”. Ba wina waitna kum ra kaikan bara giadin main kakaira sa lukan. Makabi walan: “Waitna, pliskam pali, wîna tara anira mangkram ba ai wis”. Waitnika pana aisan: “¡Meri!”, witin ai tânka brin Jisas kan ba. Witin win: “¡Smasmalkra!”, bara witin ra alkan. Jisas win: “Man ai kaikram ba muihki nani ra wih wis”. Isti pali Meri plapi wan bara disaipil nani ra win witin Jisas ra kaikan.

Ningkara sim yua, Jerusalem wina Emaûs ra disaipil wâl auya kan. Waitna kum witin nani wal wapi bara makabi walan dîa dukiara aisisa sapa. Witin nani pana win: “¿Man nu âpu sma ki? Yu yumhpa luan ra, prîs lalka nani adar yaban Jisas ra ikaia. Nanara, mairin kulki kum wisa witin ba raya sa”. Waitna ba makabi walan: “¿Prapit nani ra kasak lukras sma ki? Witin nani win Kraist ba pruaia kan bara kli buaia sa”. Ba ningkara ulbanka nani wina diara nani tânka kau smalki kan. Emaûs ra wan ba ra, disaipil nani ba witin ra makaban witin nani wal takaskbia. Tutni pata pi kan taim, brit ba dukiara witin ai pura sunan, bara disaipil nani ba ai tânka brin Jisas kan ba. Ba wina lap tiwan.

Disaipilka wâl ba Jerusalem ra plapi wan. Apastil nani asla prawi kan watla ba ra, ba wina dîa takan ba aisi win. Kau utla bilara kan ba ra, Jisas param takan. Tâura, apastil nani sip kasak lukras kan Jisas kan ba. Kuna witin nani ra win: “Mihti nani kaiks, bara kangbi ai kaiks. Kraist ba pruan nani tila wina buaia ulban kan”.

Jisas apastil nani ra param takan ningkara, Pita Galili lakunka ra inska alkaia wan. Tomas, Jems, Jan, bara disaipil wala nani witin wal wan. Tihmia aiska miskan kuna inska alkras kan.

Yauhkika titan ra, lakun un ra waitna kum bûi kan kaikan. Un ba wina witin nani ra makabi walan: “¿Inska alkram ki?”. Witin nani pana win: “Apia”. Waitnika pana win: “Duri aihkika tani ra iliskam ba lulks”. Lulkan ningkara, iliska ba inska ailal alkan bara sip duri ra sunras kan. Ba wina, Jan nu takan waitnika ba Jisas kan bara win: “¡Witin ba Dawan sa!”. Pita isti pali liura dimi bara un kat yawi wan. Disaipil wala nani duri ra ai nina blikan.

Un ra wan taim, pauta mukan kum kaikan. Pauta mukan ba purara inska bara brit bâra kan. Inska alkan ba wina Jisas makaban kum kum bri balbia angkaia dukiara. Ba wina witin nani ra win: “Bal titan pata piaia”.

Titan pata pin ningkara, Jisas Pita ra makabi walan: “¿Naha inskika nani purkara yang ra kau latwan ai kaikisma ki?”. Pita pana win: “Âu, Dawan, man nu sma yang latwan mai kaikisna”. Jisas pana win: “Baku sa kaka, sîpki nani ra plun dakaks”. Aima wala Jisas makabi walan: “Pita, ¿latwan ai kaikisma ki?”. Pita pana win: “Dawan, man nu sma yang latwan mai kaikisna”. Jisas pana win: “Sîpki nani main kaiki bris”. Jisas aima yumhpa sim makabi walanka daukan. Pita sari taki bara pana win: “Dawan, man diara sut tânka brisma. Man nu sma yang latwan mai kaikisna”. Jisas witin ra makaban: “Sîpki lupia nani ra plun dakaks”. Ba wina win: “Nini bliki bas”.

Jisas ai disaipilka nani ra Galili ra asla prakisa. Adar tara kum yabisa: “Man nani nisan nani sut uplika nani ra was. Bara smalki banhs dîa dîa man nani ra adar maikri ba bara tahbi dauki banhs”. Ba wina pramis munan: “Yang man nani wal kamna piu sut ra, kupiam krauki bas”.

Pruan wina buan ningkara, Jisas Galili bara Jerusalem ra yu 40 ai disaipilka 100 nani ra param takan. Sain ailal daukan bara smalkanka tara nani yaban. Ningkara, Olivet ilka ra ai disaipilka nani aikuki aima las asla prawan. Jisas witin nani ra win: “Jerusalem wina taki banhpara. Aisa pramis munan ba bîla kaiki bas”.

Jisas dîa aisan ba ai apastilka nani ba tânka briras kan, ba mita witin ra makabi walan: “¿Nanara Israel kingka kama?”. Jisas witin nani ra win: “Jehova want apia sa yang nanara king kamna. Kuna tisku pali man nani spirit holikira brima bara karnika maikbia, bara yang witniski nani kama. Baku ba ra, Jerusalem, Judia, Sameria ra smalkaia was bara ban wan tasba wala kau laihura ba kat sin”.

Ba wina, Jisas kasbrika ra uli wan, bara mukus kum mita prakan. Ai disaipilka nani purara kaiki kan, kuna witin ra kaikras kan.

Olivet ilka wina disaipil nani taki Jerusalem ra wan. Bahara witin nani tnatka bri kan utla kum pura tani rumka ra asla prawi bara ai pura sunaia. Jisas smalkanka kau yabia bîla kaiki kan.

Jisas heven ra wan ba wina yu 10 luan kan. Baku bamna Jisas disaipilka nani ba spirit holikira brin. Mani 33 Pentikus liliaka dauki kan, plis ailal wina upla nani yua ba kulkaia dukiara Jerusalem ra balan kan. Jisas disaipilka 120 nani utla pura rumka kum ra asla prawan kan taim, ban wina, diara tara kum takan. Pauta klauhan baku disaipil nani lal purara takan bara bîla aisanka sât wala nani ra aisan. Baku sin, utla aiska ra pâsa karna binka kum walan.

Jerusalem ra kuntri wala nani wina balan uplika nani ba binka ba walan, bara dîa takisa sapa kaikaia dukiara watla ra plapan. Disaipil nani bîla aisanka wala ra aisi ba walan taim, tâ iwan. Witin nani aisi kan: “Naha uplika nani na Galili wina sa, ¿witin nani nahki sip sa wan bîla kat aisaia?”.

Baku ba ra, Pita bara apastil wala nani upla sut mawan ra ai mina ra buan. Pita witin nani ra smalkan: “Jisas ra man nani mita ikram, kuna Jehova pruan wina bukan. Nanara Jisas heven ra Gâd mihta aihkika ra sa. Bara spirit holikira pramis wan munan kan ba wankan sa. Ba mita sika naha sainka nani kaikram bara walram ba”.

Upla nani ba tâ iwan kan. Pita smalkanka ba pain walan, baha mita makabi walan: “¿Yawan dîa daukaia sa?”. Witin pana win: “Saurkam wina kupiam laks bara Jisas nina ra tahbi mai daukan kabia. Baku sin prisant baku spirit holikira ba brima”. Baha yua upla 3.000 baku tahbi daukan. Baha piua wina Jerusalem ra disaipil nani kau ailal takan. Apastil nani spirit holikira hilpka wal kangrigisan nani kau ailal paskan. Baku Jisas witin nani ra aisan ba sip kan disaipil nani ra smalkaia.

Tempel durka ra yu bani waitna kum sip wapras kan ba iwi, lalah makabi kan. Tutni kum, Pita bara Jan wal tempel ra auya kan ba kaiki bara win: “Diara kum aik pliskam pali”. Pita pana win: “Lalah wal diara kau pain sip sna maikaia. Jisas nina ra, ¡minam ra bui waps!”. Baku Pita hilp munan buaia, bara waitnika ba mahka wapan. Upla nani lilia takan naha sainka kaikan ba ra, bara ailal lalukra nani takan.

Kuna parisi bara sadiusi nani ai kupia baikan. Apastil nani ra alki rilidian tâ uplika nani lâ dauki ba mawan ra brih wan, nina Sanedrín mâki ba. Bara witin nani ra makabi walan: “¿Baha waitnika rakaia dukiara ya mita karnika maikan?”. Pita pana win: “Jisas mita karnika aikan, man nani mita ikram ba”. Rilidian lalka nani ba karna aisan: “¡Jisas dukiara smalki banhpara!”. Apastil nani pana win: “Witin dukiara yang nani aisaia sna. Bîli praki banhwamna apia”.

Baku ba ra, Pita bara Jan ra pri swin, bara witin nani mahka wih disaipil wala nani ra dîa takan ba aisan. Asla Jehova ra ai pura sunan: “Pliskam pali, si brin âpu kaia bara man dukiam ra ban aisi kaia, hilp wan muns”. Jehova witin nani ra spirit holikira yaban bara baku sip kan ban smalkaia bara sikniskira nani rakaia. Upla kau ailal lalukra takan. Sadiusi nani, tuman lâka wal apastil nani ra silak ra mangkan. Kuna baha tihmika Jehova insal kum bliki bara silak watla durka kwâki apastil nani ra win: “Tempel ra kli was bahara smalki banhs”.

Yauhkika titan ra, upla kum Sanedrín ra bal win: “¡Silak watla ba prakan sa kuna waitnika nani silak ra mangkram ba bilara âpu sa! ¡Tempel ra smalki banhwi sa!”. Baku apastil nani ra kli alki bara Sanedrín mawan ra brih wan. Prîs tara ba win: “¡Pat adar maiki banhri Jisas nina ra kau smalkaia apia!”. Pita pana win: “Yang nani Gâd bîla ba kau walaia sna, upla nani ra lika apia”.

Rilidian tâ uplika nani ba kupia baiwan bara apastil nani ra ikaia want kan. Ban sakuna parisi kum nina Gamaliel ai mina ra bui bara win: “¡Aman kaiks! Ban kra Gâd naha waitnika nani wal sa. ¿Rait pali man nani Gâd mapara aiklabaia want sma?”. Witin nani ai bîla walan bara apastil nani ra pri swin, kuna klala yabi bara witin nani ra aima wala adar yaban smalkbia apia. Kuna apastil nani ra baha ba alki takaskras kan. Ai kupia karna wal tempel bara utla utla nani ra ban smalki kan.