Sturka 84

Insal Kum Meri Ra Wih Kaikan

NAHA mairka painkira na nina Meri. Witin Israel wina, bara taun kum Nasaret maki kan ba ra iwi kan. Gâd nu kan witin ba upla kum pain kan ba. Baha mita ai insalka Gebriel ra blikan witin ra wih aisabia. Nu sma Gebriel mita Meri ra dia win? Kaisa kaikaia.

Gebriel mita Meri ra win: ‘Titan yamni, mairin yamnikira sma ba. Jehova man wal sa.’ Sakuna Meri aima kumi sin naha uplika ra kaikras kan. Witin sibri kan, kan sturi wi kan ba dia tanka bri kan sapa nu apu kan. Sakuna Gebriel mita minitka ra maisa nihkan.

Bara witin win: ‘Sibripara Meri, Jehova mita man ra yamni mai kaikan sa bamna. Baha mita witin sain kum daukbia. Man kwihra tiwma, bara luhpa waitna kum brima, ai nina Jisas makma.’

Gebriel ba ban tanka mariki win: ‘Tuktika na tara pali kabia; Gâd Lai Purara iwi ba Luhpia makan kabia. Jehova mita king mangkbia, king Debit kan ba baku. Sakuna naha lika ban kaiara king kabia, bara ai kingka laka ba sin tnata apu kabia!’

Bara Meri mita makabi walan: ‘Nahki naha diara na takbia, kan yang kau maî apu sna na?’

Bara Gebriel win: ‘Gâd karnika ba man puram ra balbia. Baha mita tuktika aisubia ba Gâd luhpia makan kabia. Kupiam krauks man tamya Elisabet, upla mita almuk bara byarapara wi kata ba, kais nanara kwihra tiwan ba. Baku bara kais Gâd mapara sip apia dukya apu sa.

Bara minitka ra Meri bila: ‘Yang Jehova napakanka mairin sna! Bamna man ai wiram ba kat ai takbia.’ Bara insalka ba mahka wan.

Meri ba Elisabet ra kaikaia wan. Bara Elisabet ba Meri bila baikra walan taim, bibi ai byara ra bri kan ba lilia taki srutwan. Elisabet ba spirit hulikira wal banghki taki Meri ra win: ‘Gâd yamni pali mai munan sa mairin nani sut tilara.’ Meri ba kati yuhmpa baku Elisabet watla ra takaskisi, kli Nasaret ra wan.

Meri ba waitna kum nina Josep maki kan ba wal marit takai kan. Baha pyua ba pat lamara kan. Sakuna Josep Meri ba bibi kum baikaisa walan taim, witin marit takaia apia lukan. Bara Gâd insalka mita win: ‘Man Meri ba maîam briaia sibripara. Kan ai luhpia bribia ba lika Gâd wina sa bamna.’ Baha mita Josep Meri wal marit takan, bara Jisas aisubia pyua ba bila kaikan.

Luk 1:26-56; Matyu 1:18-25.

Sturka 85

Jisas Bip Watla Kum Ra Aisuban

MAN nu sma bibi lupia ba ya? Witin ba Jisas. Bara witin bip watla kum ra aisuban. Naha ba daiwan nani main kaikaia watla kum kan. Meri ba daiwan nani pata dakakaika kum ra Jisas ra tnikisa, baha ra biriku bara daiwan wala nani ra plun dakaki kan. Sakuna, dia muni Meri Josep wal daiwan nani tilara kan? Naha ba tuktan nani aisubaia pliska apia kan, rait apia?

Ban sakuna, witin nani baha ra bangwi kan, kan Rom kingka Augusto Cesar ba, lâ kum mangkan ba ra wi kan, upla nani ani taunka ra aisuban ba ra wih buk kum ra ai nina manki bangwbia. Josep ba Betlehem ra aisuban kan. Bara witin nani Betlehem ra wan taim, rûm kum pliki bangwan, sakuna kumi sin sakras kan. Baha mita daiwan nani bara kan ba pliskara wan. Baha yua, Meri Jisas ra baikan! Sakuna kaikisma ba baku, witin pain kan.

Jisas kaikaia dukyara, syîp main kakaira nani aula ba kaikisma? Tihmia twi bilara ai syîpka nani main kaiki kan pyua ra, witin nani tnaya kir ra ingni kum klahwan. Bara kaikan taim, insal kum kan! Syîp main kakaira nani ba uba sirang iwan. Sakuna insalka ba mita witin nani ra win: ‘Sibri bangwpara! Yang sturi yamni brih aulna. Kan wan Dawan Kraist ba naiwa Betlehem ra aisubi takan. Bara witin mita upla nani ra swaki sakbia! Witin ra kwala wal karban, daiwan nani pata dakakaika kum ra tnikan sa.’ Ban wina, insal nani ailal taki Gâd ra mayuni bangwan. Minitka ra syîp main kakaira nani ba Jisas ra kaikaia plapi bangwan, bara witin nani pliki wan taim bara kan.

Man nu sma dia muni Jisas sat aihka kan ba? Rait pali nu sma witin ya kan ba? Yawan naha bukka sturka pas ra, Gâd luhpia kum dukyara aisan ba kupiam krauki bas. Witin Jehova wal wark taki heven, tasba bara diara wala nani paskan ba. Witin ba Jisas kan!

Jehova ai luhpia rayaka ba brih Meri plauya ra mangkan. Minitka ra, bibi wala nani ai yaptika plauya ra pawi ba baku witin mahka pawan. Sakuna naha bibika na Gâd luhpia kan. Tnata kat witin Betlehem ra daiwan nani main kaikaia watla kum ra aisuban. Nanara man tankam brisma dia muni Jisas aisuban bara insal nani ba lilia taki upla nani ra maisapahkan?

Luk 2:1-20.

Sturka 86

Slilma Kum Nina Blikan

SLILMA ingwi waitna kum ai mihta wal kulki mariki ba kaikisma? Witin nani Jerusalem wina taki bangwan taim, slilmika ba kaikan. Witin nani lalma tani wina kan, bara slilma nani tanka pliki kakaira bangwi kan. Witin nani lukan naha slilmika na upla kum kulkanka tara bri ba ra witin nani ra brih wabia.

Waitnika nani Jerusalem ra wan taim upla nani ra makabi walan: ‘Ju nani kingka aimakai tuktika ba anira sa ki?’ Israel uplika nani ra “Ju” uplika nani sin maki kan. Baha wina kli aisi bangwan: ‘Yang nani witin ai slilmika ba lalma tani ra takan ba kaiki bangwri, bara mayunaia aulna.’

Herad Jerusalem kingka ba naha walan pyua ra, uba ai kupia sauhkan. Witin want apia kan king wala kum ai pliska ba bribia. Baha mita, witin prîst lalka nani ra makabi walan: ‘King aisubaia ba anira aisubi takbia ki?’ Bara witin nani mita win: ‘Baibil bila Betlehem ra.’

Baku bara Herad mita waitnika nani lalma tani wina kan ba ra win: ‘Man nani tuktika ba pliki sakma pyua ra, bal ai wis, kan yang sin witin ra mayunaia want sna.’ Sakuna raitka ba, Herad mita tuktika ba ra ikaia want kan!

Bara slilmika ba waitnika nani taura Bethlehem kat brihwan, bara tutkika kan pliska pura kat wih takas kan. Waitnika nani watla ra diman taim, Meri Jisas wal ra kaikan. Witin nani prisantka nani Jisas ra yaban. Sakuna Jehova mita waitnika nani ra yaprisauhkanku, Herad ra kli taui wabia apia win. Baha mita, witin nani ai kuntrika ra yabal walakku mahka impaki bangwan.

Herad mita waitnika nani ba pat wan walan taim, uba ai kupya sauhkan. Baha mita, witin Betlehem ra tuktan mani wal wina mayara bri kan nani sut ra ikaia blikan. Sakuna Jehova mita kaina manas Josep ra yaprisauhkanku maisapahkan, bara Josep ai pamalika wal Idsipt ra wan. Baha ningkara, Josep, Herad ba pruan walan taim, ai pamalika ba kli Nasaret ra brihwan. Bara Jisas ba Nasaret ra pawan.

Sakuna ya mita baha slilmika yaban ingwan lukisma? Kupiam krauks waitnika nani ba slilmika ba kaikan taim Jerusalem ra pas wih bangwan. Setan Debil ba Gâd luhpia ra ikaia want pali kan, bara witin nu kan Herad Jerusalem kingka ba tuktika ba ra ikaia trai kaikan ba. Baha mita Setan bui daukan slilmika ba ingwbia dukyara.

Matyu 2:1–23; Maika 5:2.

Sturka 87

Jisas Ba Tuktan Pali Tempel Ra Kan

TUKTAN kum upla almuk nani aikuki aisi ba kaiki kais. Waitnika nani ba, Gâd tempelka Jerusalem ra lâ smasmalkra bangwi kan. Bara tuktika ba Jisas. Witin pawi pat 12 mani bri kan.

Lâ smasmalkrika nani, Jisas ba Gâd bara Baibil ra ulban dukya nani uba nu kan ba kaikan taim, sirang iwi bangwan. Sakuna, dia muni Josep Meri wal naha ra apu sa? Anira bangwisa? Kaisa kaikaia.

Josep ba mani bani ai pamalika ra Jerusalem ra brihwi kan insal luan yua ba liliaka briaia dukyara. Nasaret wina Jerusalem ra waia ba wihka pali kan. Upla kumi sin truk apu kan, masin tara nani sin plapras kan. Baha pyua ra kau naha dukya nani ba apu kan. Upla nani ba wapi kan, bara witin nani ba yu yuhmpa bilara Jerusalem ra wan.

Baha pyua ra, Josep pamalika ba tara kan. Baku bara witin Jisas muihnika bara lakrika kau sirpi nani ra main kaikaia kan. Baha manka ra, Josep Meri wal ai luhpia nani aikuki Nasaret ra kli taui auya kan. Witin nani luki kan Jisas ba upla wala nani tilara auya kan. Sakuna witin nani yu dimaia man ra, taskaski Jisas ra plikan taim apu kan. Ai taya bara ai panika nani tilara sin plikan, sakuna witin apu kan! Baha mita witin nani kli Jerusalem ra taui wan witin ra plikaia.

Tnata kat baha ra kan sakan. Lâ smasmalkrika nani ra wali bara makabi walanka nani dauki kan. Bara upla nani sut ta iwi bangwi kan witin sinska laka ba mita. Sakuna Meri bila: ‘Luhpi, dia muni naku ai munram? Yang aisikam wal uba wari taki mai pliki bangwi kapri.’

Bara Jisas pana win: ‘Dia muni ai pliki bangwi kapram? Man nani nu apu sma ki, yang aisiki watla ra kaia sna ba?’

Au, Jisas ba ani pliska ra kau Gâd dukyara lan taki kan ba lihki kan. Yawan sin baku kaia sa, rait apia? Nasaret taunka ra, Jisas ba wik bani asla takanka ra wih Gâd ra mayuni kan. Witin yu bani walaia wilin kan ba mita witin Baibil wina diara ailal lan takan. Yawan Jisas daukan ba nina blikaia sa.

Luk 2:41–52; Matyu 13:53–56.

Sturka 88

Jan, Jisas Ra Tahbi Daukan

KAIKI KAIS butku kum waitnika lalra wih takaskai ba. Waitnika ba Jisas. Nanara, witin 30 mani baku brisa. Bara witin lamara ba Jan. Yawan pat Jan dukyara wiria lan takan sa. Kupiam kraukisma Meri ai taya mairin Elisabet ra kaikaia wan pyua ra, witin byara bilara bibi lupia bri kan ba uba lilia taki srutwan ba? Baha bibika lupia ba, Jan kan. Sakuna nanara, Jan Jisas wal dia daukisa?

Jan mita Jisas ra rumhki dingkan Jordan awalka ra. Baku upla nani ra tahbi daukisa: uplika ra liura rumhki dingki, kli sakisa. Jan ba baku upla nani ra dauki kan; baha mita upla nani ba witin ra Jan Tatahbra nina maki kan. Sakuna dia muni Jisas ra tahbi daukan?

Jisas mita witin ra makaban tahbi daukbia. Jan upla nani saura daukan, lukanka ra sami muni nani ra tahbi dauki kan. Sakuna, Jisas ba diara saura daukan kan ki lukanka ra sami munaia dukyara? Apia, witin aima kumira sin saura daukras kan, kan witin ba Gâd luhpia pali kan bara witin heven wina balan kan. Baha mita, witin diara wala dukyara Jan ra makaban kaia sa tahbi daukbia dukyara. Kaisa kaikaia dia kan sapa.

Jisas kau Jan ra waras kan kainara, kiamda warkka taki kan. Upla kum kiamda warkka taki ba, tat wal tibil bara sîr nani paskisa. Josep Meri maia ba kiamda warkka taki kan, witin mita Jisas ra smalkan. Sakuna Gâd ai luhpia ba tasba ra kiamda warkka takbia dukyara blikras kan. Witin ra pat wark yaban kan, bara baha pyua ba pat aimakan kan. Baha mita witin Gâd kupia laka daukaia balan kan ba marikaia dukyara, Jan ra makaban tahbi daukbia. Sakuna, Gâd naha ba yamni kaikan ki?

Au, kan Jisas li wina takan ningkara, heven wina bila baikra kum naku win: ‘Naha sika Luhpi laitwankira, witin sika saki briri ba.’ Baku sin kasbrika nani ba kwawan talia bara naha butkuka na Jisas tanira wan. Sakuna rait aihwa butkuka apia sa. Raitka pali ba Gâd spiritka hulikira kan.

Jisas ba diara ailal ra lukaia kan, baha mita witin plis laiura kum ra wih, yu 40 yakan takaskan. Bara baha ra kan taim, Setan ba witin ra wan. Setan aima yuhmpa Jisas ra traika kaikan Gâd lâka nani ba krikbia dukyara. Sakuna Jisas ba baku daukras kan.

Baha ningkara, Jisas kli taui wan bara witin waitna nani kum ra kakaira takan, bara witin nani ba ai disaipelka nani takan. Witin nani kum kum ba: Andru, Pita (witin ra Saiman sin maki kan) bara Natanael (witin ra Bartolomyu sin maki kan). Witin nani Jisas wal Galili tasbaia ra impaki bangwan. Witin nani Natanael taunka Kena ra takaski bangwan, baha ra upla nani marit taki bangwi kan, bara Jisas sain tara pas ba baha ra daukan. Nu sma dia daukan? Li ba wain ra lakan.

Matyu 3:13-17; 4:1-11; 13:55; Mark 6:3; Jan 1:29-51; 2:1-12.

Sturka 89

Jisas Tempel Ba Klin Munan

NAHA ra Jisas uba ai kupya baikan sa kaikisa, rait apia? Nu sma dia muni? Kan waitna nani Gâd tempelka ra kan ba, uba gridi bangwi kan. Witin nani upla Gâd ra mayunaia wi kan nani ba taya wina lalah ailal sakaia luki kan.

Bip lupia, syîp bara butku nani ba kaikisma ki? Naha waitnika nani ba tempel ba kat atki bangwi kan. Nu sma dia muni? Kan Israel uplika nani ba daiwan nani nit kan sakripais dauki Gâd ra yabaia dukyara.

Gâd lâka ba wi kan Israel uplika kum saura daukan sa kaka, Gâd ra sakripais kum daukaia kan. Bara tnatka wala kum ra sin sakripais dauki bangwi kan. Sakuna, witin nani ani wina daiwan tnawira bara daiwan satka wala nani ba sakaia kan?

Upla kum kum nani ba tnawirka bara daiwan satka wala nani sakripais daukaia sip kan ba dawanka kan. Sakuna Israel uplika nani ailal ba tnawira kum apia kaka daiwan satka wala nani kumi sin apu kan. Bara wala nani ba Jerusalem wina uba laiura iwi kan ba mita sip apia kan tempel ra daiwan kum brihwaia. Baha mita upla nani ba tempel ra, tnawira bara daiwan satka wala nani ba atki kan. Sakuna naha waitnika nani ba uba mana kulki kan. Upla nani ra impliki kan. Baha purkara Gâd tempelka bilara atkaia apia kan.

Baha mita Jisas ai kupya baiki, tibil ra lalah bara kan ba makupan, bara lalahka ba sut yakawan. Bara witin klala awka kum dauki tempel bila wina daiwra nani sut ra kangbi sakan. Atki bangwi kan uplika nani ra win: ‘Baha nani ba saks naha wina! Yang aisiki watla na, sin atkaia watla baku daukpara!’

Jisas nina blablikra nani kum kum ba Jerusalem ra witin wal tempel ra bangwi kan. Witin nani sirang iwan Jisas baha dauki kan kaikan taim. Baha pyua ra witin nani ai kupia krawan Baibil ra Gâd luhpia dukyara naku aisi ba: ‘Gâd watla tawan, ai kupia aiska ni lauan.’

Jisas ba insal luan yua liliaka ra kau Jerusalem ra kan pyua ra, sain nani ailal daukan. Ningkara, Jisas ba Judia wina taki kli Galili taunka ra wan. Sakuna Sameria taunka bak luan. Kaisa baha ra dia takan sapa kaikaia.

Jan 2:13-25; 4:3, 4.

Sturka 90

Mairin Kum Wal Liwahnta Ra

JISAS ba Sameria taunka ra liwahnta kum lamara takaskan ris briaia dukyara. Ai disaipelka nani taun ra wih bangwan kan plun atkaia dukyara. Mairka Jisas wal aisi ba li pankaia wan kan. Jisas mita win: ‘Li wira aik diaia.’

Naha ba mairka ra sirang ikan. Nu sma dia muni? Jisas ba Ju uplika kan bara mairka ba Sameria uplika kan. Ju uplika aihkika nani ra Sameria uplika nani ra misbara kaiki kan. Sturi sin aisi bangwras! Sakuna Jisas upla sut ra latwan kaikisa. Witin win: ‘Ya man ra li makabi ba nu sma kaka, kasak pali mai wisni man witin ra li makabaia kapram, bara witin rayaka laya ba maikbia.’

Mairka ba bila: ‘Masa, dia ni li pankaia sin apu sma ba, bara liwahnta na sin pakni pali sa. Bamna man ani wina li diaia aikma ki?’

Jisas pana win: ‘Naha liwahntika laya na wina dima sa kaka, kli din mai daukbia, sakuna yaura yang mita li yarka dibia ba, ban kaiara iwbia daukaia sip sa.’

Bara mairka mita: ‘Masa, baha laya ba aik dimna! Bara kli diran ai daukbia apia. Bara naha liwahntika ra kli bal li pangkamna apia.’

Mairka luki kan Jisas ba rait aihwa laya dukyara aisi kan. Sakuna witin lika Gâd raitka bara kingka laka dukyara aisi kan, naha ba sika rayaka laya baku sa bamna.

Jisas mita mairka ra win: ‘Man wih maîam wini brih naha ra bal.’

Sakuna mairka mita win: ‘Yang maî apu.’

Bara Jisas win: ‘Man aitani aisaram, maîam apu, kan man waitna matsip brih swiram, bara nanara brisma ba sin, man maîam apia sa.’

Mairka ba sirang iwan, kan Jisas win ba rait kan. Witin naha dukya nani na nahki nu kan? Kan Jisas sika, Gâd Pramis munan kan uplika sa, witin mita blikan bara Gâd mita yaban naha sut nu kan. Jisas disaipelka nani kli taui wan taim, sirang iwi bangwan kan Jisas ba Sameria mairka kum aisi kan ba mita.

Yawan naha sut wina dia lan takisa? Jisas ba upla sat sat ra latwan kaiki ba lan takisa. Yawan nani sin witin baku kaia sa; yawan lukaia apia sa upla kum ba saura sa nisan wala daknika wina ba mita. Jisas want sa upla nani sut ba kasak tanka raya ban kaiara brihwaia sip ba kakaira takbia. Bara yawan nani sin want kaia sa upla nani ra help munaia baha ba lan takbia dukyara.

Jan 4:5-43; 17:3.

Sturka 91

Jisas Il Kum Purara Smalkan

NAHA ra Jisas iwi ba kaiki kais. Galili ilka kum purara upla nani ra smalkisa. Kau witin lamara pali nani ba ai disaipelka nani sa. Witin nani 12 ra, Jisas mita bak saki brin ai apastilka nani kabia dukyara. Apastil nani ba Jisas nina blablikra pali nani kan. Man nu sma witin nani ba nina dia?

Pas ba Saiman Pita, ai muihka Andru wal. Ningkara, Jems ai muihka Jan wal. Apastil wala kum kan ba sin nina Jems kan, bara wala sin nina Saiman kan. Wala wal kan ba nina Judas maki kan. Kum ba Judas Iskariat, bara wala ba, Judas Tadius. Bara wala nani ba Pilip bara Natanael (nina wala Bartolomyu maki kan), Matyu bara Tamas bangwi kan.

Jisas ba Sameria wina kli taui wan taim, witin: ‘Gâd kingka laka heven wina ba lamara balan sa,’ smalki tâ krikan. Man nu sma baha kingka laka ba dia sa ki? Baha ba Gâd gabamintka sa. Jisas ba kingka kabia. Witin heven pura wina king aimakbia bara Tasba aiskara kupia kumi laka brih balbia. Gâd kingka laka ba mita Tasba aiska na paradais kum ra daukan kabia.

Lilka ra Jisas Gâd kingka laka dukyara upla nani ra smalkisa. Witin bila: ‘Naku puram suns. Yawan Aisa kasbrika purara sma ba, ninam ba hulikira kulkan kabia. Man king aimakaia ba yarka balbia. Mam kupiam laka ba tasba ra daukan kabia, kasbrika purara dauki ba baku.’ Upla ailal ba naha pura sunra ra, ‘Wan Dawanka pura sunra’ makisa. Wala nani bila, ‘Yawan Aisa’ pura sunra ba wisa. Man pura sunra aiska ba nu sma ki?

Jisas ba upla wala aikuki nahki iwaia ba dukyara sin smalkan. ‘Man ra nahki mai munbia want sma ba baku, upla wala nani ra muns’ win. Upla wala mita yamni mai muni taim pain damra walras sma ki? Baha mita, yawan upla wala aikuki pain bangwi kaia sa. Nahki pain kabia lukisma paradais tasbaia ra upla nani sut naku daukbia taim! Rait apia?

Matyu sapta 5 wina 7 kat; Mat 10:1-4.

Sturka 92

Jisas Pruan Nani Ra Kli Bukan

TUKTAN mairin naha ra kaikisma ba 12 mani brisa. Jisas bui mihta ra alki brisa, bara ai yaptika ai aisika nani ba lamara bangwisa. Man nu sma witin nani dia muni lilia bangwisa? Kaisa kaikaia.

Tuktika mairin aisika ba, waitna kum kulkanka tara bri kan bara nina Jairus maki kan. Yu kum luhpia mairin ba siknis takan, bara witin krikri ra brisi tnikan. Witin sip pain takras kan; kau saura ni taki kan. Bara Jairus ai maîa mairin wal uba wari takan ai luhpia mairin prubia wisi. Baha ba ai luhpia unhsak kan. Baha mita Jairus ba Jisas ra pliki wan. Witin Jisas sain nani dauki kan ba dukyara walan kan.

Jairus Jisas ra pliki sakan taim, upla kwara tara kum mita tnaya ba kutbi kir bri kan. Sakuna Jairus upla nani tila bak lui, Jisas mina kat kahwi naku win: ‘Luhpi mairin ba siknis pali sa, bara dupali, yang wal bal, bara raks,’ makaban. Bara Jisas ba waia win.

Witin nani wapi kan bara, upla kwara tara ba mita tukbi muni kan lamara waia dukyara. Ban wina Jisas ba takaski, makabi walan: ‘Ya mita ai kangban?’ Witin kaikan ai karnika ba taki wan kan, baha mita witin nu kan upla kum mita witin ra kangban kan ba. Sakuna, ya kan? Baha ba mairin kum pat 12 mani siknis bri kan ba mita kangban kan. Witin Jisas lamara bal kwalka ra kangban, bara witin rawan!

Jairus ba naha kaiki kau pain ai dara walan, kan kaikan Jisas mapara isi pali kan upla kum ra rakaia. Sakuna baha minitka ra maisapapahkra kum bal Jairus ra win: ‘Jisas ra kau ambuk munpara, kan luhpiam mairin ba pruan.’ Jisas ba naha wali naku Jairus ra aisan: ‘Wari takpara; luhpiam mairin ba pain takbia.’

Las kat Jairus watla ra wan taim, upla nani ba sari pali ini kan. Sakuna Jisas mita win: ‘Ini bangwpara. Tuktan mairin na pruras, witin yapisa.’ Ban sakuna upla nani ba Jisas lawaska kiki bangwan, kan witin nani nu kan tuktan mairin ba pat pruan kan ba.

Jisas, tuktika mairin aisika, yaptika bara ai disaipelka yuhmpa aikuki tuktika mairin rûmka ra diman. Bara witin mihta ra alki muni win: ‘Bus!’ Bara witin kli rawi buan, man naha ra kaikisma ba baku. Witin bui, mahka wapan! Baha mita, aisika yaptika nani ba uba lilia bangwi kan.

Jisas pruan wina bukan uplika pas ba naha apia kan. Nain taunka ra pyarka kum iwi kan ba luhpia waitna ra pas bukan. Baha ningkara, witin Lasarus ra sin bukan Meri bara Marta lakrika kan ba. Jisas ba Gâd wina yaban baku king aimakbia taim, upla ailal ra pruan wina kli bukbia. Baha ba lilia wan daukaia dukya apia sa ki?

Luk 8:40-56; 7:11-17; Jan 11:17-44.

Sturka 93

Jisas Upla Ailal Ra Plun Dakakan

DIARA saura kum takan kan. Jan tatahbra ra ikan. Herodias, king maîa mairin ba mita misbara kaiki kan. Bara witin mita king ra yaban Jan lal ba dakban.

Jisas naha dukyara walan taim, uba sari takan. Witin yakan twi bila kum ra wan. Sakuna upla nani ba nina blikan. Bara Jisas upla nani ba ra kaikan taim, uba ai kupia ra latwan kaikan. Baha mita, witin upla nani ra Gâd kingka laka dukyara smalkan, bara sikniskira nani ra rakan.

Baha tutnika ai disaipelka nani ba witin ra bal naku win: ‘Pat tutni sa, bara upla kumi sin naha tasbaia ra iwras. Upla nani ba mahka bliks wabia, bara taun sirpi nani ra wih, dia pan atki pibia.’

Sakuna Jisas mita win: ‘Witin nani ba waia nit apia sa, man nani mita plun yas pibia.’ Bara witin Pilip ra taui makabi walan: ‘Ani wina yawan plun aitani atkaia sip sa, naha uplika nani sut dakakaia dukyara.’

Bara Pilip bila: ‘Lalah ailal want sa, plun ailal atki witin nani ra wiria wiria yabaia dukyara.’ Baha ningkara Andru bila: ‘Naha tuktika wan pata twilki na lika, brit matsip bara inska wal brisa. Sakuna naha wal, upla nani sut ra dakakaia sip apia sa.’

Bara Jisas win: ‘Upla nani ra wis twi ba ra iwbia’. Ningkara witin Gâd ra ai pura suni, mahka pis pis ra krikan. Bara disaipel nani ba, brit bara inska nani ba upla nani ra laki yabi kan. Waitna 5.000 bara kan, bara tausin wala nani ba mairin bara tuktan nani kan. Upla sut pih, byara bangki takan. Disaipel nani yuika ba wahban taim, baskit bangki 12 takan!

Nanara Jisas mita ai disaipelka nani ra yaban duri tara kum ra aimaki, Galili kabuka baila wala ra wabia. Tihmia, pasa tara kum bal muni rip nani ba mita duarka bara abakaia muni kan. Disaipel nani ba uba sibri bangwi kan. Bara tihmia tilara, upla kum liura wapi witin nani ra aula kan kaikan. Bara witin nani sibri, kisbi kan, kan nu apu bangwi kan ya kan sapa.

Bara Jisas win: ‘Yang sna! Man nani sibripara.’ Witin nani sip kasak lukras kan. Baha mita Pita win: ‘Man sma kaka, Dawanki, ai swis man ra li bakku wamna.’ Jisas mita win: ‘Bal!’ Bara Pita ba taki liura wapan! Sakuna witin ra si brin daukan taim, mahka rumhwi auya kan. Sakuna Jisas mita swaki sakan.

Kaina tanira, Jisas kli upla ailal ra plun dakakan. Naha pyua ra witin brit 7 bara inska kum kum wal daukan. Bara kli upla nani sut dakakaia dukyara aitani bara kan. Nahki pain sa lukisma Jisas mita upla nani ra yamni muni ba kaiki kaia! Witin ai kingka laka munuhtara, yawan diara kumi dukyara sin wari takaia apia kabia!

Matyu 14:1-32; 15:29-38; Jan 6:1-21.

Sturka 94

Tutktan Nani Ra Latwan Kaiki Kan

JISAS ba kaiki kais tuktan kum ra ai klahkla wal alki ba. Witin tuktan nani ra sin luki kan ba man kaikaia sip sma. Upla kaiki ba apastil nani sa. Man nu sma witin nani Jisas ra dia win?

Jisas ai apastilka nani aikuki lai wina wan kan. Apastil nani ba impaki kan pyua ra yabal bilara blahwanka kum brih bangwan. Baha mita, witin nani taun ra wan taim, Jisas mita witin nani ra makabi walan: ‘Dia dukyara blahwi bangwi kapram yabal bilara?’ Jisas pain nu kan dia dukyara blahwi kan ba. Sakuna makabi walan raitka wibia sapa kaikaia dukyara.

Sakuna apastil nani ba witin ra wiras kan, kan witin nani tila wina ya kau tara sapa dukyara blahwi kan. Kum kum ba kulkanka kau tara briaia pliki kan wala nani ba wal. Jisas nahki witin nani ra wiaia sip kan tara pulaia brinka bri kaia saura ba dukyara?

Witin tuktika ba ra wini, ai disaipilka nani mawanra mangkan. Bara witin ai disaipelka nani ra win: ‘Kasak pali man nani ra mai wisni, man nani kupiam laki, tuktan lupia nani baku takras sma kaka, Gâd king aimaki laka ra dimi bangwma apia. Kan ya Gâd kingka laka ra kau tara ba tuktan lupia baku sa.’ Man nu sma witin dia muni naku win?

Kan tuktan sirpi nani ba tara puli bangwras sa. Baha mita apastil nani ba tuktan nani baku lan taki bangwaia kan bara kau tara pulaia dukyara pana pana blahwaia apia.

Bara pyu nani wala ra sin, Jisas tuktan nani dukyara uba luki kan ba marikan. Kati kum kum nani luan bara upla nani ba ai luhpia nani sin bri balan Jisas ra kaikaia. Sakuna apastil nani ba mita kaina dakbi muni kan. Sakuna Jisas mita witin nani ra win: ‘Swis tuktan nani ba yang ra balbia, witin nani ra alki takaspara, kan Gâd kingka laka ba ya witin nani baku ba dukya sa.’ Baha ningkara witin tuktan nani ra klubi alki blis munan. Nahki kat lilia wan daukisa lukisma Jisas mita tuktan nani ra latwan kaiki ba dukyara! Rait apia?

Matyu 18:1-4; 19:13-15; Mark 9:33-37; 10:13-16.

Sturka 95

Jisas Nahki Smalki Kan Ba

YU KUM Jisas mita waitna kum ra ai walka nani ra latwan kaikaia sa win. Bara waitnika makabi walan: ‘Ya ba yang walki sa ki?’ Sakuna Jisas pain nu kan watnika dia luki kan ba. Witin luki kan ai kyamka uplika nani, ai rilidianka uplika nani, apia kaka ai lamara iwi uplika nani ba baman witin ai walka nani kan. Sakuna Jisas dia win ba kaisa kaikaia.

Aima kum kum ra Jisas ai smalkanka ba, sturi nani tanka wal praki smalki kan. Baha mita witin baha yua, baku smalkan. Witin Sameria uplika kum bara Ju uplika kum sturka dukyara aisi smalkan. Yawan pat lan takan ba baku, Ju uplika aihkika nani ba Sameria uplika nani ra laik apia bangwi kan. Bara sturka ba naku wisa:

Yu kum, Ju uplika kum Jeriko ra waia il yabalka bak iwi aula kan. Bara aîmplikra nani mita dara walras alki, lalahka sut dakbi, witin ra kasak prukan.

Baha takan ningkara, Ju prîstka kum yabalka bak luan. Waitnika prukan kan ba ra kaikan. Sakuna dia daukan lukisma? Witin dis yabal baila wala ra lui, mahka wan. Baha ningkara serts warkka dauki uplika kum luan. Libait uplika kum. Sakuna, takaskan luki? Apia, witin sin takaski waitnika ba ra help munras kan. Witin nani wal sut luan pat laiura iwi auya ba man sip sma kaikaia.

Sakuna kaiki kais prukan ba ya wal sapa. Sameria uplika kum wal sa. Prukan uplika ba ra help munisa. Bara insauhkanka nani ba ra sîka wiria mangki, witin waitnika bara ris taki rawaia pliska kum ra brihwi swin.

Jisas sturka ba aisi dan takan ningkara, witin ra makabi walan waitnika ra win: ‘Naha yuhmpa na wina, ani ba prukan waitnika ra ai walka baku kaikan lukisma ki? Prîst ba, Libait ba, apia kaka Sameria wina ba?

Bara waitna ba mita naku win: ‘Sameria wina ba. Kan witin mita prukan waitnika ra uba pain munan.’

Jisas win: ‘Man kasak aisisma. Baha mita, witin daukan ba baku, man sin wih upla wala nani ra dauks.’

Man Jisas nahki smalki kan ba laik apia sma ki? Yawan diara pain nani ailal lan takaia sip sa Jisas Baibil ra dia win ba bak, rait apia?

Luk 10:25-37.

Sturka 96

Jisas Sikniskira Nani Ra Rakan

JISAS ba kuntri aiska ba bilara impaki kan pyua ra, witin siknis ailal nani rakan. Naha sainka nani dauki kan ba sturka dukyara taun nani sut wali kan. Baha mita, upla nani ba mihta skahwa, nakra blain, mina skahwa bara sikniskira wala nani ra brihwan. Bara Jisas mita witin nani sut ra raki kan.

Jan, Jisas ra tahbi daukan ba wina pat mani yuhmpa luan kan. Jisas mita ai disaipelka nani ra win witin ba Jerusalem ra waia sa, baha ra witin ra ikbia, bara witin kli pruan nani tila wina bubia ba sin win. Bara witin ban upla nani ra raki kan.

Yu kum, Jisas satadi yua kum ra smalki kan. Sakuna satadi ba, Ju nani ris takaia yua kan. Mairin kum naha ra kaikisma ba 18 mani baku baui wapi kan, bara witin sip wapni takras kan. Baha mita Jisas bui witin purara ai mihta mangkan, bara witin wapni taki, rawan!

Baha daukan ba mita, serts lalka nani ba uba ai kupia sauhki bangwi kisbi win: ‘Yu 6 bara sa wark takaia dukyara baha nani ba rakaia yua, sakuna satadi yua ba lika apia.’

Sakuna Jisas bila: ‘Saurkira nani! Man nani birikukam kum satadi li din daukbia sa kaka, brisi dakakma. Baha mita naha mairka umpira 18 mani baku siknis kan ba rakaia apia sa ki?’ Bara naha ansika wal saurkira nani sut ra swira daukan.

Baha ningkara, Jisas ai disaipelka nani aikuki Jerusalem ra impakan. Witin nani Jeriko taunka lamara wan taim, makakabra nakra blain wal mita naku winan: ‘Jisas, help wan muns.’

Bara Jisas mita blainka wal sut ra winan balan, bara makabi walan: ‘Dia mai daukamna want sma ki?’ Bara witin nani bila: ‘Dawan, yang nani kaikaia want pali sna.’ Bara Jisas mita witin nani nakra ra kangban, bara minitka ra witin nani sip kata kaiki bangwaia! Man nu sma Jisas dia muni naha sainka nani sut dauki kan ba? Kan witin upla nani ra latwan kaiki ba mita bara want sa upla nani ba witin ra kasak luki bangwbia. Naha daukanka nani na wal wan marikisa witin king aimakbia taim, tasba ra upla kumi sin kli siknis takbia apia ba.

Matyu 15:30, 31; Luk 13:10-17; Matyu 20:29-34.

Sturka 97

Jisas Ba King Baku Balan

JISAS makakabra blain wal ra rakan ba wina, witin Jerusalem lamara plis sirpi kum ra balan. Bara ai disapelka wal ra naku win: ‘Man nani taun bilara dimma bara biriku wahma kum kaikma. Langki yang ra bribal aik.’

Birikuka ba bribal yaban taim, Jisas ba witin nina dusa ra uli, Jerusalem lamara kan ra balan. Bara witin taun lamara balan taim, upla kwara tara kum takan witin ra kaikaia. Upla aihkika nani ba ai kwalka nani daiki yabal ra palkan. Wala nani dus tnawa nani mangki, naku wini bangwi kan: ‘Jehova nina ra aula Kingka ra Gâd mita blis munan kabia!’

Pyua ailal luan ra Israel ra king raya aimakan kan nani ba, biriku kum ra uli Jerusalem ra bal dimi, taun uplika nani ra king ba marikaia dukyara. Baha mita Jisas sin baku daukan. Bara naha uplika nani ba sin Jisas ba ai kingka kabia want bangwi kan. Sakuna upla nani sut ba baku want apia kan. Bara naha ba yawan tempel ra takan bara kaikaia sip sa.

Jisas tempel ra upla skahwa nani bara blain nani ailal ra rakan. Tuktan sirpi lupia nani ba naha kaikan taim, Jisas ra mayuni bangwan. Bara prîst nani ba naha kaikan taim, uba ai kupia sauhki, Jisus ra naku aisan: ‘Walisma tuktan nani dia aisi ba?’

Bara Jisas bila: ‘Au, man nani Baibil ra naku aisi ba aisi kaikrasma ki: ‘Tuktan nani bila wina Gâd mayunra sakbia?’’ Baha mita tuktan nani ba Gâd bui king mangkan ba ra ban mayuni bangwi kan.

Yawan sin baha tuktika nani baku kaia sa, rait apia? Sip sa upla kum kum nani brinka kaia yawan Gâd kingka laka dukyara aisi ba swibia. Sakuna yawan ban upla wala nani ra aisi bangwi kabia Jisas diara painkira nani daukai ba dukyara.

Jisas naha tasba ra kan pyua ra, witin king aimakaia pyua apia kan. Sakuna, ahkia baha pyua kabia ki? Baha ba disaipelka nani nu takaia brinka kan. Kaisa nanara naha dukyara yawan aisi kaikaia.

Matyu 21:1-17; Jan 12:12-16.

Sturka 98

Jisas Alibit Ilka Ra

NAHA na Jisas Alibit ilka ra. Waitna walhwal witin wal ba ai apastilka nani. Andru ai muihka Pita wal, Jems bara ai muihka Jan wal. Bara utla tara kum laiura kaiki ba, Gâd tempelka Jerusalem ra bara kan ba.

Jisas biriku kum ra uli Jerusalem ra diman ba wina yu wal luan kan. Nanara susdi kan. Alibit ilka ra waras kainara witin tempel ra kan. Baha ra prîst nani mita alki witin ra ikaia lukan. Sakuna sibri bangwi kan, kan upla nani ba Jisas ra yamni kaiki kan.

Jisas mita rilidian lalka nani ra pyuta nani bara pyuta luhpia nani makan. Bara diara nani saura dauki ba dukyara Gâd mita panis muni bangwbia sin win. Baha ningkara witin Alibit ilka ra uli wan, bara apastil nani walhwal ba mita witin ra makabi walanka nani daukan. Man nu sma witin nani dia dukyara makabi walan ba?

Apastil nani ba kaina tani dukyara makabi wali kan. Witin nani nu kan saurka laka nani naha tasba ra dauki ba Jisas tnata mangkaia sip kan ba. Sakuna witin nani nu takaia want kan naha dukya nani ba ahkia tnata mangkbia sapa. Ahkia Jisas kli balbia king aimakaia dukyara?

Jisas nu kan witin kli balbia taim, ai nina blablikra nani tasba ra bangwi ba mita witin ra kli sip kaikbia apia ba. Kan witin ba heven ra kabia, bara tasba wina sip kaikras kabia. Bara Jisas bui ai disaipelka nani ra win witin heven ra king aimaki kabia taim sain nani kum kum taki kabia ba dukyara. Ani ba baha sainka nani kum kum sa ki?

Jisas bila, war tara nani bara kabia, upla ailal nani siknis taki kabia bara plun sin wauhwi bangwi kabia, lâ krikanka nani sin ailal bara kabia bara tasba nikbanka tara nani sin bara kabia win. Bara Gâd kingka laka sturka na dukyara tasba aiskara smalkan kabia sin win. Yawan pyua ra naha dukya nani na takan kaikisa ki? Au! Yawan pat Jisas heven ra king aimaki ba dukyara kasak lukaia sa. Witin pat pali tasba ra saurka laka nani na tnata mangkbia.

Matyu 21:46; 23:1-39; 24:1-14; Mark 13:3-10.

Sturka 99

Purara Rûm Tara Kum Bilara Bangwisa

PYU wal luan ningkara, nanara tausdi tihmia kan. Jisas ai disaipelka nani aikuki naha rûmka tara purara balan, Insal Luan Yua ba pata piaia dukyara. Taki auya ba Judas Iskariat. Witin prîst nani ra wiaia auya Jisas ra nahki alkaia ba dukyara.

Yu kum kainara, Judas ba pat naku aisan kan: ‘Nahki aikma ki Jisas ba mihtam ra mangkamna kaka?’ Bara witin nani bila: ‘Lalah ma 30 maiki bangwamna.’ Nanara Judas ba witin nani ra auya, Jisas bara ba pliska ra brihwaia dukyara. Nahki kat saura dauki kan ba! Rait apia?

Insal Luan tutnika pata pat dan takan kan. Bara nanara Jisas tutni pata painkira sat wala kum dauki ta krikan. Ai disaipelka nani ra brit kum yabi naku win: ‘Pi bangws, kan naha na yang wîni tara man nani puram mata yabaia ba tanka sa.’ Ningkara wain glas kum brih, naku win: ‘Di bangws, naha na yang tailya sa, kan man nani pura mata laikan kabia.’ Naha na Baibil ra ‘Dawan Tutnika Pata’ nina makisa.

Israel uplika nani ba Insal Luanka bara ai kupia krauki pata ba pih bangwi kan, Idsipt kuntrika ra Gâd insalka ba ai watla nanikku ‘lui’, Idsipt uplika luhpia tawahkika nani ra baman iki kan ba yua. Sakuna nanara Jisas want kan ai nina blablikra nani ba witin ra ai kupia krauki bangwi kabia, bara nahki ai rayaka ba witin nani pura mata yaban ba dukyara sin. Baha dukyara sika mani bani naha tutnika pata dauki ba.

Dawan Tutnika Pata ba pih bangwan ningkara, Jisas mita ai disaipelka nani ra ai kupia karna bri kabia bara karna bangwi kabia ai kasakka lukan laka ra win. Tnata kat witin nani lawana aiwani taki bangwan. Bankra nanara pat tihmia 12 aklak ningkara kan. Anira wih bangwan?

Matyu 26:14-30; Luk 22:1-39; Jan sapta 13 wina 17 kat; 1 Korint 11:20.

Sturka 100

Jisas Ba Gadin Ra Kan

JISAS baha rûmka wina takan taim, ai disaipelka nani aikuki Getsemani gadinka ra wih bangwan. Witin pat nara aima ailal ra balan kan. Bara nanara Jisas bila ai disaipelka nani ra yapi bangwbia apia wisi, wiria laiura wih, tasba ra aimakupi, ai pura sunan.

Baha ningkara witin kli ai apastilka nani bara kan ba ra balan. Sakuna witin nani ba, dia dauki kan lukisma? Yapi bangwi kan! Jisas mita aima yuhmpa ra win yapi bangwbia apia, sakuna aima yuhmpa ra witin nani yapi kan alkan. Sakuna witin las kli bal kaikan yapi bangwi kan taim, witin naku pali aisan: ‘Nahki naha sat pyua kum ra yapi bangwisma ki?’ Bara witin las kli wih balan taim, naku aisan: ‘Waihli nani mihta ra ai mangkaia pyua ba aimakan sa.’

Baha minitka ra upla nani ailal bin dauki aula kan. Bara, kaiki kais! Upla nani ba dus bara sord nani wal aula kan! Bara awas dusa ingnika nani sin brih bangwi kan. Witin nani ba lamara balan taim tila ba wina upla kum taki, Jisas ra bal kyawalan. Man naha ra kaikisma ba baku. Bara baha ba Judas kan! Sakuna, dia muni witin Jisas ra kyawalan?

Jisas makabi walan: ‘Judas, man kyawalanka kumi ni waihla nani mihta ra ai mangkisma ki?’ Baha kyawalanka ba sain kum kan, Judas wal tauki kan uplika nani ba nu taki bangwbia dukyara baha ba Jisas. Baha mita, waihla nani ba ai kainara wiria kitwi bangwan Jisas ra alkaia wisi. Sakuna Pita ba aiklabras kaka Jisas ra ban swirka brih wabia want apia kan. Baha mita witin ai sordka ba saki ai lamara waitna bara kan ba ra kyama aihkika ba klaki taih dakban. Sakuna Jisas mita waitna kyama ra kangban bara kyama ba kli pain takan.

Baha wina Jisas mita Pita ra naku win: ‘Sordkam ba kli ai pliska ra mangks. Yang Aisiki ra insal nani tausin makabrika sip apia kabia lukisma yang ra swaki ai sakaia?’ Au, sip kan! Sakuna witin ai aisika ra insal nani makabras kan, kan witin nu kan ai waihla nani ba mita witin ra brihwaia pyua aimakan kan ba. Baha mita, witin swin ai waihla nani ba mita brihwabia. Kaisa nanara Jisas ra dia takan sapa kaikaia.

Matyu 26:36-56; Luk 22:39-53; Jan 18:1-12.

Sturka 101

Jisas Ra Ikan

DIARA nani aihka taki ba ra kaiki kais! Jisas ra iki, dus kum ra paman. Ai mihta bara ai mina nani ba silak wal saban sa. Sakuna, ya ba baku daukaia want kan?

Baku dauki bangwan, kan upla kum kum mita Jisas ra misbara kaiki kan. Man nu sma baha nani ba ya kan? Kum ba insal saurakira nina Setan Debil maki ba. Bara witin mita sika Adam Iv wal ra yaban Jehova bila lulkan ba. Bara Setan mita Jisas waihla nani ra yaban naha saurka tara na daukbia.

Kau witin ra dus ra pamras kainara, waihla nani ba mita witin ra latwan yabi kasak saura munan. Kupiam kraukisma witin kau Getsemani gadinka ra kan bal brihwan ba? Ya kan waihla nani ba? Rilidian lalka nani kan. Kaisa kainara dia takan ba kaikaia.

Rilidian lalka nani ba Jisas ra brihwan taim, apastilka nani ba plapi bangwan. Witin nani sirang iwi, Jisas ra waihla nani baman wal swin. Sakuna apastil Jan bara Pita wal uba wihka ra waras kan. Nina bliki bangwi kan Jisas ra dia munbia sapa kaikaia dukyara.

Prîst nani ba mita Jisas ra dama Anas ra brihwan, kan kainara witin ba prîst wihtka kan. Upla nani ba naha ra uba wihka takaski bangwras kan. Baha ningkara Jisas ra Keyapas watla ra brihwan, kan witin ba prîst wihtka kan. Bara baha ra rilidian lalka nani ba ailal bara kan.

Keyapas watla ra lâ dauki bangwi kan. Waitna kum kum nani ra bri balan Jisas mapara kunin aisabia wisi. Bara rilidian lalka nani sut ba bila: ‘Jisas ba ikaia.’ Bara Jisas mawanra yabalaya tuhbi, ai mihta kruski pruki muni kan.

Naha nani sut taki kan bara, Pita ba watla latara kan. Tihmia kum kauhla pali kan bara upla nani ba pauta muki bangwan lapta takaia dukyara. Witin nani pauta tnaya ra lapta taki kan bara, wark taki mairka kum ba Pita ra kaiki naku aisan: ‘Naha waitnika sin Jisas wal kan.’

Sakuna Pita bila: ‘Apia, witin wal apia kapri.’

Aima yuhmpa ra upla nani mita Pita ra win witin Jisas wal kan ba. Sakuna Pita aima bani ra apia wi kan. Sakuna witin aima yuhmpa ra naku aisan taim, Jisas mita witin ra taui kaikan. Bara Pita kunin aisan ba dukyara uba sari taki, latara taki inan.

Praidi titan yu baiwan bara, prîst nani mita Jisas ra witin nani asla taki pliska tara kum ra brihwan, nina Sanedrin maki kan ba ra. Witin nani naha ra laki kaiki kan Jisas ra dia daukaia ba. Baha wina Pontius Pailet Judia tasbaia ra gabamit aimaki kan ra brihwan.

Bara Pailet ra witin nani bila: ‘Naha na waitna kum saura sa, baha mita witin ra ikaia sa.’ Bara Pailet ba Jisas ra makabanka nani kum kum dauki naku aisan: ‘Yang witin ra diara saura daukan kumi kaikras sna’. Baha ningkara Pailet mita yaban Jisas ba Herad Antipas, Galili tasbaia ra gabamit aimaki kan ba ra brihwabia, witin ba Jerusalem ra kan. Witin sin Jisas ba saura daukan kaikras kan, baha mita kli Pailet ra blikan.

Pailet ba Jisas ra prî sakai kan. Sakuna Jisas waihla nani ba want apia kan Jisas ra prî sakbia, baha watlika ra Barabas, silak uplika ba ra prî sakbia wi kan. Pailet mita Jisas ra latara sakan bara 12 aklak auarka lamara kan. Bara Pailet bila upla nani ra win: ‘Kingkam ba! Kaiki bangws! Sakuna prîst lalka nani ba wini kan: ‘Witin ba prubia! Witin ba prubia! Baku, Barabas ra prî saki bara Jisas ra ikaia brihwan.

Praidi tutni yu kau ra witin ra dus kum ra saban. Man sip sma lilka ba ra kaikaia, bara Jisas tnaya bani ra saura dadaukra kum ra dus ra paman kan prui bangwbia dukyara. Kau Jisas pruras kainara, saura dadaukra kum ba mita naku win: ‘King aimakma pyua ra yang ra luki bas.’ Bara Jisas mita pana win: ‘Pramis mai munisna man yang wal paradais ra kama.’

Nahki painkira sa naha pramiska na! Rait apia? Sakuna, Jisas dia paradaiska dukyara aisi kan ba man nu sma ki? Anira kan blasi pyua ra Gâd paradais paskan kan ba? Naha tasba ra kan. Baha mita Jisas heven ra king aimakbia taim, naha waitnika ra kli bukbia, bara witin paradais raya naha tasba ra daukbia ba ra ai lilia bribia. Rait apia baha ba uba pain kabia?

Matyu 26:57-75; 27:1-50; Luk 22:54-71; 23:1-49; Jan 18:12-40; 19:1-30.

Sturka 102

Jisas Ba Raya Sa

MAN nu sma mairka bara waitna wal nani ba ya sapa? Mairka ba Meri Magdalin, Jisas panika mairin. Bara waitna kwala pihni dimi nani ba insal bangwisa. Meri ba raiti bilara Jisas wîna tara pliska ra mangkan ba kaikisa, sakuna witin Jisas wîna tara ba apu kan kaikan! Ya mita brihwan ki? Kaisa kaikaia.

Jisas pruan ningkara, prîst nani ba mita Pailet ra naku win: ‘Jisas kau raya kan pyua ra witin yu yuhmpa lubia ningkara kli bubia win. Baha mita, raiti ba main kaikaia bliks, baku lika disaipelka nani ba Jisas wîna tara ba impliki, pruan wina kli buan wibia apia dukyara!’ Bara Pailet mita suldiar nani blikbia win.

Sakuna Jisas pruan ningkara yu yuhmpika titan pali ra, Jehova insalka kum ban wina taki, Jisas raitika dimaika ra walpa tara kan ba kararbi sakan. Suldiar nani ba uba sirang iwi sip aiyawi bangwras kan. Tnata kat, witin nani raiti bilara kaikan, Jisas wîna tara ba apu kan! Bara suldiarka nani kum kum ba taun bilara dimi prîst nani ra win baku takan ba dukyara. Man nu sma prîstka saurkira nani ba dia dauki bangwan? Aibapi bangwan kunin aisi bangwbia dukyara. ‘Man nani yapi kapram taim disaipelka nani mita bal Jisas wîna tara brihwan wis’ win.

Baku taki kan pyua ra, Jisas panika mairin nani kum kum raiti ra wan kaikaia. Raitika ba bila man kan kaikan! Ban wina, insal wal kwala ingnikira dimi bara kan kaikan. Bara witin nani makabi walan: ‘Dia muni Jisas ra nara pliki bangwisma?’ Baku sin win: ‘Witin pat pruan nani tila wina buan, bara man nani na minit ai disaipelka nani ra wih wis.’ Bara witin nani taki plapan. Sakuna yabal ra waitna kum mita witin nani ra alki takaskan. Bara witin ba Jisas kan! Bara witin bila win: ‘Disaipelki nani ra wih wis.’

Sakuna mairin nani ba mita Jisas ba raya sa kaikan disaipelka nani ra win taim, witin nani sip kasak luki bangwras kan. Pita, Jan wal raiti ra plapi wan, sakuna raiti ba bila man kan! Witin nani kli mahka wan taim, Meri Magdalin ba ninara takaskan. Baha pyua ra witin raiti ra biki kaikan taim, insalka wal ra kaikan.

Man nu sma Jisas wîna tara ba wal dia takan sapa? Gâd mita tikan. Witin wîna tara pruan kan ba wal kli bukras kan. Insal nani baku spirit wîna sat wala raya kum yaban. Sakuna witin kau raya ba marikaia dukyara kaikaia sip ba wîna tara kum ra param taki marikaia kan.

Matyu 27:62-66; 28:1-15; Luk 24:1-12; Jan 20:1-12.

Sturka 103

Dur Prakan Kan Bilara

PITA, Jan wal Jisas wîna tara raiti bilara mangkan kan ba wina bal takan ningkara Meri ba yakan takaskan, bara witin mahka inan. Witin raiti bilara kaikan taim, insal wal ra kaikan! Bara witin nani makabi walan: ‘Dia muni inisma ki?’

Bara Meri mita naku laki win: ‘Dawanki wîna ba brihwi bangwan bara yang nu apu sna anira swin sapa.’ Sakuna witin wilwi tauan taim, waitna kum ra kaikan. Bara waitnika ba bila: ‘Yaura plikisma ki?’

Meri luki kan tangni nani main kaiki ba waitnika, bara witin luki kan bankra naha waitnika ba Jisas wîna tara ba brihwan. Baha mita witin naku win: ‘Man brihwaram sa kaka, ai wis anira swiram sapa.’ Sakuna naha waitnika ba Jisas kan. Witin ai wîna sat wala bri kan ba mita Meri sip kaikras kan. Sakuna witin ra ai nina maki winan taim, witin nu takan Jisas kan ba. Bara witin disaipel nani ra plapi wih win: ‘Yang Dawan ra kakri!’

Baha wina yu wala kakna ra, disaipel wal Emeus yabalka ra impaki kan pyua ra, waitna kum witin nani lamara bal prawan. Disaipel nani ba uba sari bangwi kan Jisas pruan kan ba dukyara. Sakuna witin nani ban impaki kan bara, waitnika ba mita Baibil tanka nani ailal smalkan bara witin nani wiria pain ai dara wali bangwan. Tnata kat witin nani plun piaia takaski bangwan taim, waitnika ba Jisas kan kaikan. Sakuna minitka ra Jisas lap tiwan bara witin nani kli Jerusalem ra taui balan disaipelka nani ra wiaia.

Baha takan ningkara, Jisas Pita ra sin param takan. Bara wala nani ba naha walan pyua ra uba lilia taki bangwan. Bara witin nani wal ba Jerusalem ra bal apastil nani aikuki prawan. Witin nani Jisas yabal ra takan kaikan ba win. Sakuna witin nani kau naha dukya na aisi kan pyua ra, man nu sma diara aihkakira takan ba?

Lilkika ba ra kaiki kais. Dur ba prakan kan sakuna Jisas ba utla lila kat param takan. Disaipel nani mapara nahki kat lilia kan lukisma! Bara nahki kat baha yua ba aihka painkira kan lukisma! Aima an Jisas mita upla nani ra param takan ba man sip sma ki kulkaia? Matsip baku kata ki?

Apastil Tamas ba, Jisas witin nani ra param takan pyua ra apu kan. Baha mita disaipel nani bila win: ‘Yang nani Dawan ra kaiki bangwri!’ Sakuna Tamas bila witin baha ra kasak lukaia sa silp ai nakra wal kaikbia kaka lika. Yu 8 luan ningkara, disaipel nani ba utla bilara dimi kli ai durka praki bara kan, sakuna baha pyua ra Tamas sin bara kan. Bara ban wina Jisas ba param takan. Nanara lika Tamas ba kasak lukan.

Jan 20:11-29; Luk 24:13-43.

Sturka 104

Jisas Kli Heven Ra Wan

PYU nani lui kan bara, Jisas ba aima ailal ra ai nina blablikra nani ra param takan. Yu kum, ai disaipelka nani 500 mita witin ra kaikan. Bara witin param takan pyua ra, nu sma witin nani ra dia dukyara aisan? Gâd kingka laka dukyara. Jehova mita Jisas ra Gâd kingka laka ba aisaia dukyara tasba ra blikan. Bara witin pruan nani tila wina kli bukan ba wina, naha ba ban dauki kan.

Man nu sma Gâd kingka laka ba dia sa ki? Gâd kingka laka ba, Gâd gabamintka heven ra ba tanka sa bara Gâd mita Jisas ra bak saki brin baha gabamintka kingka kabia dukyara. Yawan lan takan ba baku, Jisas pat marikan witin king painkira kum kabia ba upla nani ra plun dakaki, sikniskira nani ra raki, bara pruan nani ra bukan pyua ra!

Baha mita, Jisas heven ra tausin kum king aimakbia taim, dia takbia tasba na ra? Tasba aiska na paradais painkira kum ra lakan kabia. Kli war nani apu kabia, lâ krikan nani, siknis nani, bara prura ba kat sin apu kabia. Yawan nu sa baku kabia ba, kan Gâd mita tasba na paradais kum paskan kan upla nani dukyara. Baha mita witin Eden gadinka ba paskan kan. Tnata kat Gâd dia want ba Jisas sut daukbia.

Jisas kli heven ra waia pyua ba aimakan kan. Witin yu 40 baku ra ai disaipelka nani ra ai wîna ba param saki marikan bara disaipel nani nu kan witin kau raya kan ba. Sakuna witin kau heven ra waras kainara naku witin nani ra win: ‘Man nani Jerusalem ra takaski bangws spirit hulikira ba brima kat.’ Spirit hulikira ba Gâd karnika aiawikira ba pasa kraui ba baku sa, bara naha mita ai nina blablikra nani ra Gâd kupia laka ba dauki help munbia dukyara. Tnata kat, Jisas mita naku win: ‘Man nani yang dukyra tasba kau laiura ba kat smalki bangwma.’

Witin naha aisan ningkara, diara aihkakira kum takan. Man nara kaikisma ba baku Jisas mahka heven ra uli auya kan. Baha ningkara kasbrika kum mita witin ra dingki lap tikan, bara disaipel nani ba mita witin ra sip kli kaikras kan. Jisas ba heven ra wih, baha wina witin king aimaki ta krikan ai nina blablikra nani purara.

1 Korint 15:3-8; Param marikan 21:3, 4; Wark nani 1:1-11.

Ulbanka Daknika 7

Jisas pruan kli bukan ba wina Pâl ra silak ra dingkan ba kat

PRUAN wina yu yuhmpa ra, Jisas ra kli bukan. Baha yua ra, aima matsip baku witin ai nina blablikra nani ra takan. Kau yu 40 ai disaipelka nani ra taki kan. Baha wina witin nani kaiki kan, witin heven ra uli wan. Bara yu 10 luan ningkara, Jerusalem ra Gâd mita Jisas nina blablikra bila kaiki kan nani purara spirit hulikira laikan.

Kaina tanira, Gâd waihla nani ba mita apastil nani ra yaban silak ra mangkan, sakuna Gâd insalka kum mita witin nani ra prî sakan. Bara disaipel Stiben ra, mapara babura nani mita walpa wal sabi ikan. Sakuna yawan lan takaisa, nahki Jisas baha nani tila wina kum ra bak saki brin ba ai albika baku kabia dukyara, bara baha ba apastil Pâl takan. Jisas pruan wina mani yuhmpa purara bakriki bri kan bara, Gâd mita apastil Pita ra blikan Kornilius Ju uplika apia kan ba ra wih smalkbia.

Mani 13 baku kaina tanira, Pâl smalki taukaia impakanka pas ba ta krikan. Impakanka wala daukan ba Timoti wal daukan. Pâl ai panika nani aikuki liliaka manas brin bara diara nani tanka sin manas kaiki bangwan Gâd dukya dauki kan pyua ra. Baha ningkara Pâl silak ra kauhwan Rom ra. Sakuna mani wal bilara witin kli prî takan, baha ningkara witin kli silak ra kauhwan taim, witin ra ikan. Bara ULBANKA DAKNIKA 7 na mani 32 dukyara aisisa.