“Sîbripara”
1. Jirimaia baku, ani trabilka nani yawan brisa ki?
1 Jirimaia, prapit baku smalkaia blikan taim, sip apia baku ai dara walan. Sakuna, Jehova witin ra kupia bukan: “Sîa briaia apia sma” win. Bara Jirimaia ai warkka pain daukbia dukyara karnika yaban, baku Jehova ai kupia pihnika laka marikan (Jir. 1:6-10). Naiwa pyua ra, sîbrin laka apia kaka sip apia baku wan dara walaia ba, yawan ra smalkaia warkka ra pain daukras kaia wan munaia sip sa. Wan smalkanka nani upla nahki kaikbia sîbrinka brisa kaka, smalkaia warkka ba pain daukras kabia. Nahki muni wan sîbrinka pura luaia sip sa, bara naha ba daukbia kaka, dia blisinka nani bribia?
2. Kaina manas ridi takaia ba, nahki help wan munbia wan sîbrinka bri ba pura luaia?
2 Kaina manas ridi kaia. Kaina manas ridi takaia ba help wan munbia wan sîbrinka bri ba tikaia. Sampla kum, kaina manas lukaia sip sa dia dukya nani ba wan aisanka nani ba takaskbia, bara nahki muni pura lubia. Bara upla nani wan smalkanka walaia apia dukyara tnatka kum kum pliki ba mapara ridi takaia sa (Sins.l 15:28). Skul watla ra bara smalkaia warkka ra nahki ansika kum yabaia wisi, Pamali Mayunra Tihmika ra ridi takaia sa (1 Pi. 3:15).
3. Jehova ra kasak lukaia ba, nahki help wan munisa wan sîbrinka pura luaia?
3 Jehova ra kasak luks. Wan sîbrinka ba tikaia dukyara Jehova pânika kaia sa. Jehova help wan munbia pramis munisa (Ais. 41:10-13). Rait apia, wan kan kahbaia helpka tara wala apu? Jisas pyua kum ra win ban wina trabil nani balbia pyua ra, Gâd spiritka hulikira help wan munbia ban witnis aisaia (Mark 13:11). Baha mita, pyu bani Jehova ra makabaia sa ai spiritka wankbia (Luk 11:13).
4. Trabil nani tila ra ban smalkisa kaka, dia blisinka nani bribia ki?
4 Blisinka nani. Trabil nani tila ra ban smalkisa kaka, kaina pyua ra trabil wala nani balbia taim yawan pura luaia sip kabia. Yawan sîbrin apukira bara takaskraskira smalkisa kaka, marikisa spirit hulikira ni aibangwan sa (W.n 4:31). Baku sin, wan sîbrinka ba pura luisa taim, wan kasakka lukan laka bara Jehova karnika ra kau kasak lukaia help wan munisa (Ais. 33:2). Bara wan auyapah lilia wan dara walbia, kan Jehova yamni pali wan kaikisa (1 Pi. 4:13, 14). Bamna, King laka sturka ba sîbrin apukira Jehova helpka wal smalki kap!