Prapit Joel samplika wina lan taks
1. Yawan smalkisa piua ra, ¿nahki muni Joel bawanka lâka nina blikaia sip sa?
1 ¿Prapit Joel ba ya kan ki? Witin silp aisan “Petuel luhpia waitna” kan (Jl. 1:1). Naha prapitka bawikira ba Jehova maisa pakanka ba tara kulkan, witin silp ai dukiara lika apia. Naiwa piua ra sin yawan ba kulkanka tara apia kaka nina tara kum briaia ba plikras; kau ni Jehova bara Baibil ra kulkanka tara yabisa smalkisa piua ra (1 Ko. 9:16; 2 Ko. 3:5). Yawan smalkisa piua ra maisa pakanka yabia ba wina karnika tara kum sakisa. Joel prapit aisanka ba wina, ¿dîa ba karnika bara bîla kaikanka wankisa?
2. ¿Jehova yua ba lamara sa mita yawan dîa daukaia sa?
2 ‘¡Jehova yua ba pat baila pali sa!’ (Joel 1:15.) Naha bîla nani ba mani ailal luan ra ulban, sakuna naiwa piua ra aimakisa. Naha tasba ra trabil nani ba kau ailal bâra sa, kan upla nani Gâd wina lan takaia want apia sa bara yawan smalkisa taim wan lawaska kiki ba wan marikisa lâs yua nani ra iwisa (2 Ti. 3:1-5; 2 Pi. 3:3, 4). Tnata yua ba pat baila sa yawan kaikisa taim, wan kupia bukisa smalkaia warkka ba wan rayaka ra tâura mangkaia (2 Pi. 3:11, 12).
3. ¿Dîa muni smalkaia warkka daukaia nit sa pât tara piua ba lamara ba mita?
3 ‘Jehova ai uplika nani dukiara kan kahbaika ban kabia.’ (Joel 3:16.) Naha borska ra nikbanka dukiara aisi ba pât tara piua balbia taim aimakisa. Bahara Jehova upla lâka daukbia. Sakuna, yawan lilia wan dara walisa, kan nu sa Jehova ai uplika nani ra baha piua wina swaki sâkbia (Par.M 7:9, 14). Smalkaia warkka ba daukisa piua ra bara Jehova nahki karnika wanki ba kaikisa taim, wan kasakka lukan lâka bara wihka bîla kaikan lâka kau tara takisa. Naha ba pât tara piua ra hilp wan munbia.
4. ¿Dîa muni naika piua trabilka nani ba liliakira pura luaia sa?
4 Upla kum kum wisa prapit Joel aisanka ba diara sari dukiara aisisa, sakuna Gâd uplika nani ra bîla kaikanka kum yabisa (Jl. 2:32). Baha mita, kaisa naika piua ra trabilka nani aula ba sibrin âpu lâka wal pura luaia bara Gâd Kingka lâka sturka nani ba sin smalkaia. Bara Joel 2:23 ra wi ba bîla walaia sa: ‘Man nani sin, Jehova Gâdkam ra liliam pali bas’.