Gâd nina Jehova maki ba nu apu sa kaka, nahki muni witin wal pana takbia ki? Baha purkara sin, Gâd nina ba yus munras uplika ba, nina ba dia tanka bri sapa sip nu taki bangwras. Gâd nina ba dia tanka brisa ki?

Gâd bui ai nina ba dia tanka bri ba Moses ra param win. Moses mita, Gâd nina dia ba makabi walan taim, Jehova pana win: “Yang ba, yang sna bara ban sna ba” (Impakan sturka 3:14). Bara Rotherham Baibilka ra naku ulbi lakan: “Yang Dia Kaia want sna ba Kamna”. Baku bamna, ai lukanka aimakbia dukyara Jehova dia takaia nit ba kat takisa.

Man diaura takaia want sma ba kat, tauaia sip kama kaka, panikam nani tnata mana dia daukma ki? Panikam kum siknis takan kaka, man daktar lankira kum baku taui witin ra rakma. Wala kum lalah trabilka ra diman kaka, man lalahkira taui, ta baikma. Wel au, yawan sut ba, rait pali ba sika, dia want ba kat tauaia sip apia sa. Sakuna Baibil stadi taki auma bara, aihka painkira lukma, kan ai lukanka aimakbia dukyara Jehova dia takaia nit ba kat takisa kaikma. Bara ai uplika ra ta baikaia mata witin ai karnika yus munaia lihkisa (2 Kronikas 16:9). Gâd nina ba lan takras nani ba, Jehova ai daukanka pranakira nani bri na sin kaikras.

Param sa! Gâd nina ba, Baibil ra ulbi mangkaia sa. Nina Jehova maki ba tanka brih yus munisa taim, wan Aisa painkira ra mayuni, ai lamara kaia kau isi sa.

PRAPIT Danyal ba mani 500 Jisas kau aisubi takras kainara iwi kan. Sakuna, Jehova Danyal ra tanka kum kum yaban ba wal, Jisas ba Misaia, wibia sa kaka, Kraist baku ahkia balai kan ba kaikaia sip kan. Danyal ra naku win: “Naha na nu takaia an tanka briaia kama: Jerusalem bukaia an kli raya paskaia adarka yabia ba minitka wina, [Misaia] balbia ba pyua kat, wik 7 luaia kabia, bara Jerusalem yabalka nani, an kan kutbanka tara nani kli raya paskan ba lika wik 62 bara kabia, sakuna sari tara ailal pyua nani kabia” (Danyal 9:25, Miskitu Testament Almuk [MTA], 1991).

Misaia ahkia balaia kan sapa nahki nu takaia sip ba, kaisa kaikaia. Misaia balai ba kat pyua yarka kum luaia kabia wisa. Sakuna taura lika, baha pyua lubia ba ani minitka wina kulki kaiki ta krikuya ba wan tanka briaia sa. Prapit aisanka bila, baha ba “Jerusalem bukaia an kli raya paskaia adarka yabia ba minitka wina” ta krikisa wisa. Ahkia baha ‘adarka ba yaban’ ki? Baibil aîulbra wala Nihimaya maki ba bila, Jerusalem kutbanka nani kli paskaia adarka ba “Artaserksis pat 20 mani king aimaki kan ba manka ra” yaban wisa (Nihimaya 2:1, 5-8). Sturi aîulbra ailal bila, 475 yawan pyua nina [y.p.n.] manka ra, Artaserksis ba king aimaki ta krikan wisa. Bara kulki kaikuya taim, witin king aimaki mani 20 alkan ba, 455 y.p.n. manka ra kauhwisa. Baku sa kaka, Misaia balaia Danyal aisan ba, 455 y.p.n. manka ba wina aimakaia ta krikisa.

Baha manka wina “[Misaia] balbia ba pyua kat” mani an lubia sapa Danyal ba marikisa. Prapit aisanka bila, “wik 7” bara “wik 62” lubia win. Wal sut bara wik 69 takisa. Baha wik 69 ba mani an kaia kan ki? Baibil ulbi sakanka wala nani mariki ba baku, wik kum yu 7 bri ba dukyara aisaras sa. Sakuna wik kum mani 7 bri ba dukyara lika aisisa. Wibia sa kaka, wik kumi bani ba mani 7 brisa. Patitara Ju nani ba, wik kum mani 7 bri ba dukyara ai tanka pain brih bangwi kan. Kan mani 7 bani, sabat manka kum kulki bangwi kan (Impakan sturka 23:10, 11). Baku bamna, wik 69 aisi kumi bani ba mani 7 brisa, wibia sa kaka, sut bara mani 483 takisa.

Nanara kulki kaikaia man sa. 455 y.p.n. manka ba wina, mani 483 kulkbia sa kaka, 29 yawan pyua [y.p.] manka ba kat kauhwisa. Bara baha manka pali ra sika, Jisas aihtabi takisi Misaia takan (Luk 3:1, 2, 21, 22).a Rait apia kaina manas Baibil ra naha win ba kasak aimakan?

JEHOVA GÂD mita Misaia —Pri Sasakra ba— balbia pramis munan. Bara ai prapitka nani ra Misaia ba dahra kaina manas