¿Wîni daukra ba dukiara dîa muni trabil taki lukisna ki?

¿MAN DÎA DAUKMA?

Nahara luki kaiks: Julia ba ai wîna tara lukinglas ra kaiki, bara batana tara ai dara walisa. Bara witin lukisa: “Biawaia sna”. Kuna ai aisika ba, ai yaptika bara ai pânika nani witin ra wisa pat biawan pali sa.

Julia bila “kau biawaia sna”, ban kra 5 paun pan. Bara witin lukisa yua kum kum baman plun piaia apia...

Julia baku damra walisma kaka, ¿dîa daukma?

LUKI KAIKS

Man wînam daukra ba dukiara wari takaia saura apia sa. Baibil aisisa waitna bara mairin ailal mawan painkira kan: Sara, Raquel, Josep, Debit bara Abigail. Bara, mairin kum Abisag nina mâki kan ba “tiara painkira pali kata” (1 King Nani 1:4).

Ban sakuna, wahma bara tiara manis ai wîna daukra ba dukiara uba lukisa. Ba mita, trabil tara briaia sip sa. Nahara luki kaiks:

• Tânka pliki kaikanka kum ra, tiara ailal ba batana sa win, sakuna witin nani tila wina wiria baman rait pali batana kan.

• Tânka pliki kaikanka wala ra, mairin kum kum ba rait biawan pali kan kuna witin nani batana pali sa win.

• Wahma bara tiara kum kum uba biawaia want sa, baha tâka mita anorexia sikniska alkan. Naha sikniska na, upla rayaka ba pât ra mangkisa bara ban biawan kaia wisi plun piras.

Anorexia sikniska, apia kaka plun mai daukras sikniska kum brisma kaka, hilp makas. Baha dukiara aisikam bara yaptikam wal aisas, apia kaka upla almuk kum pain kulkisma ba wal aisas. Baibil ba wisa: “Wan uplika piu bani ra latwan wan kaiki ba, wan kupia wirha bri piua ra, wan muihni wal baku sa” (Sins Lâka 17:17).

NAHA DAUKMA KAKA PAIN KABIA

Wan kupia lukanka yamni yawan bri ba, kasak pali upla painkira wan sakisa. Luki kaiks, Debit luhpia Absalón nina mâki kan ba dukiara Baibil wisa:

“Israel aiska ra, waitna wala kum kau painkira Absalón baku âpu kan, kau mayunan ba. Mina wina lal kat watawi lupia kumi sin âpu kan” (2 Samuil 14:25).

Sakuna witin ba uba praut lâka bri kan, gridikira bara kuninkira kan. Baha mita, Baibil ba witin dukiara yamni aisaras; kau ni, witin ba ai walka ra kunin muni bara misbara kaiki iki kan.

Baha tâka mita, Baibil ba wan kupia kraukisa:

Man nani “tânka raya ba prâmka baku” dims (Kolosi 3:10).

“Man nani aiskahkisma ba, lata tani dukia nani kaia lika apia sa, tâmwa aihkakira pitbanka nani kra [...], sakuna baku daukaia watlika ra, pramna ba kupiam bilara kaia sa” (1 Pita 3:3, 4).

Man ba pain skahki kaia want sma ba saura apia sa, sakuna kupiam lukanka yamni kau tara sa nahki kwala dimisma ba wal. Kan upla nani ba mai kaikbia taim, daukankam nani bara kupiam lukanka yamni nani ba kau tara kulkbia. Tiara kum nina Felicia ba win: “Man mairin painkira sma kaka, upla mahka tawi mai kaikbia sakuna kupiam yamni bara daukankam pain brisma ba lika, man dukiamra kau ai kupia krawan kabia”.

WÎNAM DAUKRA BA KAIKS

¿Nahki sma ba pain kaikisma ki?

¿Aima kum lukram sa ki wînam daukra ba aparit munaia wapni daukaia dukiara, apia kaka yu ailal plun piras kaia wînam daukra kau painkira takbia dukiara?

¿Wînam daukra ba ra ani pîska wapni daukaia want sma ki? (Mark muns).

• YARIKAM

• WIHRIKAM

• TÂMWA

• WÎNAM DAUKRA BA

• MAMWAN

• WÎNAM TARA TAYA SÂTKA BA

Pas makabi walanka nani “âu” mark munram sa kaka, bara makabi walanka yumhpa ba ra, pîs ailal mark munram kaka, nahara lukaia sma: man diara wala lukma sin, upla wala nani wînam daukra ba saura kaikras kaia sa. Luki bas, isi sa wan wîna daukra ba dukiara wari takaia (1 Samuil 16:7).