Jehova witnis nani wal Baibil stadi taki tânka kasak ba lan takram. Jehova pânika takram bara naika piua dukiara bîla kaikanka kum maikan sa: Tasba ra paradais kum ra iwaia Gâd Kingka Lâka mununhta ra. Baku sin Baibil ra kasakkam lukan lâka ba kau dutki sa, bara kristian kangrigisanka ba aikuki blisin ailal sin briram sa. ¡Âu sika! Jehova ai uplika ba wal asla pali sa kaikisma (Sak. 8:23).

Almukka nani wal Baibil smalkanka tâ nani tisku kupia kraukma ba mita ridi kaia dukiara tâm baikaisa (Hib. 6:1-3). Jehova ra bik takisa, man witin tânka pliki sakaia trai munisma ba yamni mai munbia, bara witin dîa pramis muni ba kat sin maikbia (Jan 17:3).

1. ¿Dîa muni aihtabi takaia want sma?

2. ¿Jehova ba ya?

   • “Dawan [Jehova] ba Gâd sa, kasbrika pura tasba ra sin witin baku wala âpu sa” (Kli S. 4:39).

   • “¡Witin nani ai dara wali banhbia, man [...] [ninam Jehova mâkisma ba]. Kaikbia man baman Laih Purara iwisma ba, tasba aiska ra!” (Law. 83:18).

3. ¿Dîa muni aitani sa ki Gâd nina ba yus munaia?

   • “Man nani naku puram suns: ‘Yawan Aisa kasbrika purara sma ba, ninam ba holikira kulkan kabia’” (Mt. 6:9).

   • “Dawan [Jehova] nina mâki wini ba sut swaki sakan kabia” (Ro. 10:13).

4. ¿Baibil ra dîa bîla nani yus munisa Jehova dukiara aisisa taim?

   • “Dawan [Jehova] sika Gâd ban kaia ba, tasba lui waia piua sin witin mita paskan ba” (Ais. 40:28).

   • “Yawan Aisa kasbrika purara sma ba” (Mt. 6:9).

   • “Gâd ba latwan lâka sa” (1 Jan 4:8).

5. ¿Man bui Jehova ra dîa yabaia sip sma?

   • “Man Dawan Gâdkam ra latwan kaikma kupiam aiska, sulkam aiska, lukankam aiska, bara karnikam aiska ni” (Mk. 12:30).

   • “Man Dawan Gâdkam ra puram suni mayuns, bara witin dukia baman dauks” (Lk. 4:8).

6. ¿Dîa muni man Jehova ra kasak kaia want sma?

   • “Luhpi, sinskira bas, bara kupi lilia daukma, bara laihtubi uplika ra pana diara aisaia sip kamna” (S.L. 27:11).

7. ¿Man yaura puram sunisma, bara ya nina ra daukisma?

   • “Kasak pali mai wisni, Aisa ra dîa dîa yang nini mâki makama ba, sut pali maikbia” (Jan 16:23).

8. ¿Dîa dukiara wan pura sunaia sip sa?

   • “Man nani naku puram suns: ‘Yawan Aisa kasbrika purara sma ba, ninam ba holikira kulkan kabia. Man king aimakaia ba yarka balbia. Man kupiam lâka tasba ra daukan kabia,kasbrika purara dauki ba baku. Naiwa wan yua pata ba wankma. Wan saurka ban swi tiks, yang nani maipara saura daukan kan ban swih tikisna ba baku. Traika kaikan tilara ban wan swipara, sakuna saura ba wina dakbi wan sâks’” (Mt. 6:9-13).

   • “Bamna yawan lika Gâd ra wan kupia mangki lukisa, kan yawan kaikisa, witin ai kupia lâka kat dîa dîa makabuya ba wan walisa” (1 Jan 5:14).

9. ¿Dîa tâwan Jehova bui upla pura sunra ba walras?

   • “Yu kumi man nani bui Dawan ra winma, sakuna Dawan bui man nani ra mai walbia apia [...] saurka nani daukram ba tâwan” (Miq. 3:4).

   • “Dawan lika kasakkira nani ba main kaikisa, bara baha nani pura sunra sin walisa; sakuna witin lika saura dadaukra nani mapara sa” (1 Pi. 3:12).

10. ¿Jisas Kraist ba ya?

    • “Saiman Pita bila: ‘Man ba Misaya, Gâd rayakira ba Luhpia’” (Mt. 16:16).

11. ¿Dîa mata Jisas ba tasba ra balan?

    • “Upla Luhpia Waitna ba balras kan upla mita witin ai dukia daukaia dukiara, sakuna witin mita upla dukia daukaia, bara ai rayaka ba upla ailal pri sakaia mana baku yabaia” (Mt. 20:28).

    • “Jisas mita baha nani ra win: ‘Yang tawan wala nani ra sin Gâd King aimaki ba Lâka sturka ba wiaia, kan baha dukiara ai blikan sa’” (Lk. 4:43).

12. ¿Man nahki marikaia sip sma Jisas sakripaiska ba dukiara tingki lukisma ba?

    • “Kraist upla sut tâwan pruan, baha mita raya nani ba ai wîna dukiara raya kaia apia sa; sakuna witinka, witin nani ai dukiara pruan bara kli sin raya buan ba dukiara mika raya kabia” (2 Ko. 5:15).

13. ¿Jisas ba dîa karnika tara brisa?

    • “Karnika sut yang ra aikan sa, kasbrika purara bara tasba ra” (Mt. 28:18).

    • “Gâd mita kau prana tara ba witin ra yan bara nina sut purkara kau nina tara ba sin yaban” (Pil. 2:9).

14. ¿Rait pali man lukisma ki Jehova witnis nani Tâ Bri Daknika ba “alba kasak sinskira” sa Jisas mita mangkan ba?

    • “¿Bamna ya pali ba alba kasak sinskira ba? Baha lika ai dawanka mita ai watla suliarka nani purara mangkan ba, witin nani ra piua kat plun dakakbia dukiara?” (Mt. 24:45).

15. ¿Spirit holikira ba upla kum sa ki?

    • “Pana insal ba bila: ‘Spirit Holikira ba man puramra balbia, bara Gâd Laih Purara ba karnika kasbrika baku mamdiskbia. Baha mita, man wina tukta holikira aisubi takaia ba lika Gâd Luhpia mâkan kabia’” (Lk. 1:35).

    • “Man nani upla saura, ban sakuna luhpiam nani ra diara pain nani yaia nu sma, ¡kau pali Aisikam kasbrika purara ba Spirit Holikira yabia, baha nani witin ra makabia ba ra!” (Lk. 11:13).

16. ¿Jehova dîa dukiara spirit holikira ba yus munan sa?

    • “Dawan ai bîla aisin ba mita, kasbrika purara diara bâra ba paskan bara sin ai bîla wingka puhbra ba mita paskan” (Law. 33:6).

    • “Sakuna man nani puramra Spirit Holikira balbia ba ra karnika brima, bara yang dukira witnis nani kama [...] wan tasba wala ra kau laihura ba kat sin” (Ap.St. 1:8).

    • “Kuna naha diara na tâura âmya ra bri bas: Gâd dahra aisinka bîla nani ra âpu sa, upla bani yakan sip ba ai laikka kat ai tânka aiska param saki aisaia. Kan prapit nani lika, aima kumi sin upla lâka kat ai kupia wina diara saki aisaras kan. Sakuna, witin nani lika upla nani kan, bara Spirit Holikira mita tâ bri kan ba mita, Gâd wina diara brih aisi kata” (2 Pi. 1:20, 21).

17. ¿Gâd Kingka Lâka ba dîa sa ki?

    • “Kasbrika purara Gâdka ba king lâka kum bukbia bara ban kaia ra sauhki tikan kabia apia, nisan wala kumi mita sin pura lubia apia, ban sakuna, king lâka wala nani sut ra pura lubia, bâra ban kabia ban kaia ra” (Dn. 2:44).

18. ¿Man dukiamra Gâd Kingka Lâka ba dîa daukbia?

    • “Witin nani nakra laya ba sut dikbia, bara prura kau âpu kabia, inanka, pura mata inaia lâka, latwanka sin; kan diara almuk nani ba sut lui wan sa” (Par.M. 21:4).

19. ¿Dîa muni man nu sma naika piua ra Gâd Kingka Lâka blisinka nani ba kasak bal takbia?

    • “Ai disaipilka nani bal, pusbi win: ‘Naha na ahkia kabia sapa yang nani ra ai wis. ¿Man balaia sma ba bara tasba tnata sainka ba sin ani kabia ki?’. Bara Jisas bila witin nani ra: ‘[...] kuntri kumi mita wala mapara aiklabia, tasba kum mita wala mapara war aiklabia; plun tiwan sin bara tasba nikban nani sin plis ailal ra kabia. Bara naha king lâka sturka yamni na tasba aiska ra smalkan kabia, kuntri sut baha ba pain kaikbia dukiara; bâra lika tnata ba aimakbia’” (Mt. 24:3, 4, 7, 14).

    • “Tnata yua nani ra piua karna nani balbia. Upla nani ba klauna ai dukiara baman luki kabia, lalah ra latwan kaikbia, kakalra kabia bara sin diara lalihkra kabia, Gâd mapara aisi kabia, ai aisika bîla walras kabia, tingkikas kabia bara serts ra rispik âpu kabia. Ai uplika nani ra latwan bara umpira sin kaikbia apia, upla nina aisasara nani kabia, ai wîna brinka nani sip alki takaskras kabia, kupias nani bara diara pain nani waihla kabia. Upla nani ra kunin muni pât ra dingki kabia, ai kupia lukras diara dauki kabia, prautkira nani kabia; Gâd ra plikaia ba watlika ra, ai wîna brinka nani pliki kabia. Gâd ra lukaia lâka ba pain talia kulki nani kabia, sakuna ai daukanka ba ni lika apia, kristian lâka kasak karnika ba daukbia apia. Bahmuna uplika wal man lika diara âpu bas” (2 Ti. 3:1-5).

20. ¿Man nahki marikaia sip sma Gâd Kingka Lâka ba diara kau tara sa rayakam ra?

    • “Bahamna man nani, lukankam aiska ba Gâd King aimaki ba lâka ra dîa daukaia mai aisi ba ra luks, bara baha diara nani ba sin sut brima” (Mt. 6:33).

    • “Jisas ai disaipilka nani ra win: ‘Ya yang nini blikan dauki kaka, witin ai wîna ba kulkaia apia sa, bara ai dusa [...] ba brih, nini blîkbia’” (Mt. 16:24).

21. ¿Sitan bara ai insalka saurakira nani ba ya nani sa?

    • “Man nani aisikam ba lika dibil [...]. Dibil ba tâ pali piua wina upla âikra sa” (Jan 8:44).

    • “Dragun tara ba latara lulkan kan. Witin sika piuta almuk ba, nina dibil bara Sitan mâki ba, witinka mita sika tasba aiska ra kunin aisi ba. Witin ai insalka nani kira tasba ra lulkan kata” (Par.M. 12:9).

22. ¿Sitan ba dîa dukia nani saura win Jehova bara ai uplika nani ba mapara?

    • “Mairin ba pana piuta ra win: ‘Giadin ra dus nani ba mâ wina yang nani piaia sip sna; sakuna giadin lilara dusa mâ ba dukiara, Gâd ai win yang nani baha wina pimna apia, bara sin kangbamna apia win, kan baha daukamna kaka, pruamna ai win’. Bara piuta ba bui mairin ra win: ‘Baha lika rait apia. Man nani pruma apia. Ban sakuna, Gâd kaikisa man nani baha dusa wina pima yua ba, Gâd baku namkra ilingkan kabia, bara yamni ba wihki saura ba wal tânka kaiki banhma’” (Bla.St. 3:2-5).

    • “[Sitan] pana Dawan ra win: ‘Ani piua upla kumi taya ra pan kangbras sma kaka, diara sut ba aitani sa, uplika ba wilin pali sa dîa sip ba kat daukaia, ai rayaka swaki sakaia mata’” (Job 2:4).

23. ¿Man nahki marikaia sip sma Sitan dahra kwahki ba kunin baman sa?

    • “[Gâdkam] ba ai dukia dauks kupia kasak ni” (1 Kr. 28:9).

    • “Yang raya kamna yua sut ra, pâtkas sna ba ban kamna” (Job 27:5).

24. ¿Dîa muni upla nani ba pruisa?

    • “Saurka ba upla kumi tâka ba mita upla sut ra luan, bamna saurka ba mita prura balan bara prura ba upla sut ra alkan sa, kan upla sut saura daukan bamna” (Ro. 5:12).

25. ¿Upla pruan nani ra dîa takisa?

    • “Raya nani ba ai dahra walisa, witin nani pruaia ba, sakuna pruan nani ba diara tânka sin briras” (Smas. 9:5).

26. ¿Upla pruan nani ba kli raya takbia ki?

    • “Pruan nani ba kli buaia sa, upla pain nani, upla saura nani sin” (Ap.St. 24:15).

27. ¿Upla an heven ra wabia Jisas aikuki king aimakaia dukiara?

    • “Sîp Luhpia ba Saion ilka ra bûi kan. Witinka wal upla 144,000 bâra kan, bara baha nani ai lal purara Sîp Luhpia nina ba bara ai Aisika nina ba sin ulbi bri kata” (Par.M. 14:1).

Baibil stadi taki aulma ba tingki, lâ kat Jehova dîa mamkabi ba, bara baha makabanka nani nahki alki brih daukaia ba sin lan takram sa. Bara lan takram ba kat, kupiam lukanka ba, bara iwankam ba sin sât wala ra lakram kaia sa. Nanara lâ kat Jehova dîa wan makabi ba alki dauki wapaia luki briram ba tâka, witin want sa man sturka yamni suliarka kum takma.

Tisku kupia kraukanka daukma ba mita hilp mai munbia, lâ kat Jehova dîa wan makabi ba sinskam ra dingkaia, bara ai suliarka painkira kum kaia wisi dîa daukaia sma sapa sin kli laki kaikaia. Laki kaikanka na marikisa, yawan diara sut ba wan kupia dara walra kum pain ni, bara Jehova ra prana yaia dukiara daukaia sa (2 Ko. 1:12; 1 Ti. 1:19; 1 Pi. 3:16, 21).

Nawas piua ra, man want sma Jehova Kingka Lâka ba tâ baikaia bara ai asla takanka tilara kaia. Makabi walanka nani aula ba wal nu takma tânka brisma sapa dîa sa tâ briaia lâka Gâd swin ba diara yumhpa ra: kangrigisan ba, pamali ba bara tasba gabamintka nani. Naha laki kaikanka na wal man sip kama kau tara kulkaia Jehova dîa dauki ba ai uplika nani ra smalki bara tâ baikaia dukiara. Baku sin kupiam buki kabia asla aidrubanka nani ra waia bara mihtam buki aisanka nani sin daukaia sip sma ba kat.

Naha pîska ra sin mai marikbia dîa muni diara tara sa kati bani smalkaia warkka ba daukaia bara Gâd upla nani dukiara dîa dauki ba lan daukaia (Mt. 24:14; 28:19, 20). Las makabi walanka nani ba, marikbia dîa tânka sa Gâd ra wan rayaka yabi aihtabi takaia. Jehova umpira mai kaikan ba mita man want sma kupiam aiska ni witin kupia lâka daukaia, baku bamna Jehova kasak lilia sa man dukiamra.

1. ¿Dîa sât maritka lâka Gâd yamni kaikisa ki? ¿Baibil wi ba baku ahkia piua ra lika upla nani dibors takaia sip sa?

   • “¿Man nani Ulbanka ra aisi kaikras ki? Blasi pali papaskra mita witin nani ba ‘waitna bara mairin paskan. Baha mita waitna ba ai aisika bara ai yaptika wal swibia, bara ai maya wal asla takbia, bamna wâl ba ai wîna kumi baku takbia’. Baha mita, Gâd mita asla prakan ba, upla mita dakbi sakaia apia sa”. “Ya ya ai maya mairin ra swiaia ba, mairka ba rug lâka daukras kan kaka, bara waitna ba mairin wala wal marit takbia kaka, witin marit lâka sauhkisa” (Mt. 19:4-6, 9).

2. ¿Waitna kum mairin kum wal bri ba, dîa muni lâ kat marit takaia sa ki? Man ba marit uplika kum sma kaka, ¿kasak nu sma ki marit takram wauhkataya ba lâ kat brisma bara wihta nani mawanra kulkanka brisa?

   • “Uplikam nani kupia krauks, tâ bri nani ra bara wihta nani ra sin bawbia; baha nani bîla wali daukbia bara diara pain sât sât daukaia wilin nani kabia” (Taitus 3:1). 

   • “Upla sut mita marit lâka ba pain pali kulki kabia, bara marit waitna nani ba ai maya mairin wal sunu kasak kaia sa. Marit takras si tâski lâka dauki nani ba bara marit lâka sasauhkra nani ba sin, Gâd mita lâka daukbia” (Hib. 13:4).

3. ¿Pamalikam bilara man dîa daukaia sma?

   • “Luhpi waitna, aisikam mai smalki ba wals, bara sin yaptikam mai smalki ba, bahki kulkpara” (S.L. 1:8).

   • “Maya waitna ba ai maya mairin lal sa, sim Kraist serts ra lal ba baku”. “Maya waitna nani, mayam mairin ra latwan kaiki kaia sma, sim Kraist mita [kangrigisan] ra latwan kaiki [ba]” (Epe. 5:23, 25).

   • “Aisa nani bara yapti nani, man nani luhpiam nani ra ai kupia baikaia tatuski kapara, sakuna Dawan latwan lâka ra witin nani ra smalki paks, lâ kat wapni tauki kaia” (Epe. 6:4).

   • “Tuktan nani, aisikam nani bîla wali dauki bas, kan naha lika Gâd nakra ra yamni pali sa” (Kol. 3:20).

   • “Maya mairin nani, mayam waitna nani ra bawi bas” (1 Pi. 3:1).

4. ¿Dîa muni rayaka ba rispik munaia sa?

   • “[Gâd] bui sika yawan sut ra rayaka ba wankisa, baku sin pâsa bara diara wala nani ba”. “Kan yawan lika Gâd ra raya sa, aiawisa bara wan wingka puhbisa” (Ap.St. 17:25, 28).

5. ¿Dîa muni upla ra ikaia apia sa, mairin kwihra sin dîa muni bibi ra iki sakaia apia sa?

   • “Waitna kum waitna wala wal aiklabi si mairin kwihra kum ra latwan yan sa kaka, bara luhpia ba prui takan sa kaka, [...] makabaia sa pana sin witin ba ikaia” (Imp.St. 21:22, 23).

   • “Man namkra nani ba ai kaikan yang ai paski kan piua ra, baha sut ba man wauhkamtaya ra ulban sa, yang rayaki yua nani sin man pat kulki kaikram baha nani kumi sin kau bal takras kan ba ra” (Law. 139:16).

   • “Dawan mita aiska misbara kaiki ba: [...] mihta nani sin tala pâtkas laiki ba” (S.L. 6:16, 17).

6. ¿Tala yus munaia dukiara Gâd dîa adar wankisa?

   • “Pipara, tâlia ba sin apia, daiwan nani langki ikan wîna ba sin apia” (Ap.St. 15:29).

7. ¿Dîa muni wan muihni bara lakri nani ra latwan kaikaia sa?

   • “Naha lâ raya na, man nani ra maikisni: Pana pana walkam ra latwan kaiki kama. Yang bui man nani ra latwan mai kaikisna ba baku, pana pana walkam ra latwan kaiks. Man nani pana pana walkam ra latwan kaikisma kaka, upla sut kaikbia man nani ba yang disaipilki nani sma” (Jan 13:34, 35).

8. a) ¿Dîa muni upla siknis kum ba wala nani laki yabaia apia dukiara kîa wali bara kiaubi alkaia apia sa ki? b) ¿Dîa muni baha uplika ba praut takaia apia sa wala nani mita ai watla ra paiwras kaka? c) Upla kum siknis takan sapa nu takaia dukiara, ¿dîa muni iksamint daukaia sa ki upla wal kut takaia lukisa kaka? d) Siknis takan uplika kum ba wala nani ra laki yabaia sip ba, ¿dîa muni tahbi daukan lâka kau briras kainara kangrigisan almuk nani daknika tâ brabrira ba ra wiaia sa?

   • “Upla kumi wal sin tras bripara, sakuna upla wala wal pana pana latwan kaikaia traska ba lika bri bas; [...] ‘Upla wala ba man wînam baku latwan kaikma’. Latwan lâka bri uplika ba mita witin ai uplika ra sip saura munras sa” (Ro. 13:8-10).

   • “Kumi bani ai painka yamnika baman plikaia apia sa, sakuna wala nani yamnika dukiara sin plikbia” (Pil. 2:4).

9. ¿Dîa muni Jehova want sa yawan nani mita wala nani ra padin munbia?

   • “Kumi wala mapara kupiam alki takaski pana pana swakwankam ba swih tiki bas, upla kumi ai walka mapara diara brisa kaka, Dawan mita pâtkam swih tikan ba baku, man nani sin pana pana baku dauki bas” (Kol. 3:13).

10. Muihni kum, apia kaka lakri kum man mampara kunin tnatka ra dahra saki aisi, apia kaka kunin muni implikisa kaka, ¿man dîa daukaia sma?

    • “Muihkam mita mampara saura yabia kaka, wal mânkam aisi, ai saurka ba latan mariks. Bîlam walbia kaka, muihkam ba pat kupia alkram sa. Sakuna bîlam walras kaka, kau upla kumi, apia kaka wâl paiws, bara dahra saki aisabia ba, witnis wâl, apia kaka yumhpa kaia sa. Baha nani ra witin bîla walras kaka, [kangrigisan] ra dahra sâks; bara [kangrigisan] ra sin bîla walras kaka, baha uplika ba swis Gâd kakaira nani apia ba baku takbia, apia kaka Rom ra lal mana aibapaia saki ba baku kabia” (Mt. 18:15-17).

11. ¿Naha saurka nani na Jehova nahki kaikisa ki?

    • ▪ Rug lâka ba

    • ▪ Aidul nani ba yus munaia

    • ▪ Waitna ai tahkia wal, apia kaka mairin ai tahkia wal yapaia

    • ▪ Implikaia

    • ▪ Lalah tâwan pulaia

    • ▪ Bla takaia

    • “¿Man nani kaikras sma ki, taniskira nani ba, Gâd king aimaki ba lâka ra ai dukia bribia apia? ¡Baku bamna, man nani aimawahkpara! Kan ai maya takras tâski lâka dauki ba, aidul nani ra ai pura suni mayuni banhwi ba, marit lâka sasauhkra nani ba, waitna nani ai tahkia wal tâski lâka dauki nani ba, âimplikra nani ba, gridikira nani ba, bla tatakra nani ba, upla dusa kakuhbra nani ba, upla dukia dadakbra nani ba sut sin, Gâd king aimaki ba lâka ra ai dukia bribia apia” (1 Ko. 6:9, 10).

12. Rug lâka saurka ra kauhaia traika kaikanka ba brisma kaka, baha ba marit takras uplika wal briaia sin tilara sa, ¿man nahki pura luaia lukisma ki?

    • “Tâski lâka wina man nani plaps” (1 Ko. 6:18).

13. ¿Dîa muni droga yus munaia apia sa, bara bahmuna sâtka nani ba alba lâka ra wan mangki ba sin apia daktar kum mita adar yabras sa kaka?

    • “Baku bamna, muihki nani, Gâd kupia pihni lâka ba dukiara mamkabisna, man nani wînam aiska ba prisant raya kum baku ai mihta ra mangkma, baha ba holikira prisant yaia sma ba tânka sa. Bamna kli naha tasba lâka tânka ba kat iwi kapara; sakuna lukankam pali ba lakma, bara baku mika rayakam aiska ba tâwan kabia. Baha mita sip kama Gâd kupia lâka pali ba tânka briaia, baha tânka ba lika dîa pain ba, Gâd yamni kaiki ba, bara witin wapni kaiki ba lukma.” (Ro. 12:1, 2).

14. ¿Dîa sât Sitan warkka nani Gâd wisa daukaia apia?

    • “Man nani wina kumi sin [...] dahra pliki saki warkka sin daukpara,’ kainara dîa takaia ba aisi wipara, sukia warkka sin daukpara, yabaki kaiki uplika wal, dahra saki aisi uplika, bara yapi kaiki piritka uplika wal sin tânkam pliki kaikpara, ’ pruan nani piritka aikuki sin apia” (Kli S. 18:10, 11).

15. ¿Saurka tara dauki uplika kum ba aihni pali dîa daukaia sa Jehova mita witin ra pain kaikbia dukiara?

    • “Saurki daukri dahra, yang bui man ra param mai wîri; watawi daukri ba, man ra yukukras kupi wal lâ daukri ba, lâ krikanka daukri daihra ba sut man ra sakri” (Law. 32:5).

    • “¿Upla kum siknis sa kaka, [kangrigisan] almukka nani ba paiwaia sa, bara witin ai pura suni, Dawan nina mâki witin ra batana yûkbia. Bara witin nani kasak luki ai pura sunbia ba ra, siknis uplika ba rawbia, bara Dawan mita witin ra bukbia; bara saurka nani daukan kaka, sut swih tikan kabia” (Je. 5:14, 15).

16. Muihni kum, apia kaka lakri kum saurka tara daukram ba nu takma kaka, ¿man dîa daukma ki?

    • “Upla kum bui upla wala saura dauki kan kaikan, bara baha witniska ba aisaia lâ watla ra paiwan, sakuna witin baha dahra ba aisaras yukukbia kaka, saura daukisa. Uplika saura daukan saurka ba witin purara kabia” (Lib. 5:1).

17. Upla kum danh Jehova witnis apia ba maisa pakbia kaka, ¿baha uplika ra yawan nahki kaikaia sa ki?

    • “Upla kum wan muihni wisa, sakuna tâski lâka daukisa, gridikira sa, aidul nani ra ai pura suni mayunisa, upla dusa kakuhbra sa, rum dadira sa, âimplikra kaka sin, witin wal taukpara” (1 Ko. 5:11).

    • “Ani uplika naha smalkanka brih man nani ra balras sa kaka, wamtla ra dingki bripara, bara lakula sin wipara” (2 Jan 10).

18. ¿Dîa muni wan pânika nani ba Jehova ra latwan kaikaia sa ki?

    • “Sinskira nani wal tauki bas, bara sinskira kama; taniskira nani wal tauki bas, bara mai sauhki mai tikbia” (S.L. 13:20).

    • “Man nani mamwahkpara. Aisanka kum aisi ba baku: Wan pânika saura nani mita wan lâka pain nani ba sauhkisa” (1 Ko. 15:33).

19. ¿Dîa muni Jehova witnis nani ba pulitik lâka tilara dimras?

    • “Yang [Jisas] naha tasba wina apia sna ba baku, baha nani man aikram ba sin naha tasba wina apia sa” (Jan 17:16).

20. ¿Dîa muni gabamint nani ra man bîla walaia sma?

    • “Upla sut ba wan tasba wihtka nani ra bawan kaia sa. Kan tasba wihtka kumi sin âpu sa Gâd wina mangkras ba, bara tasba wihtka bâra ba Gâd mita mangkan sa” (Ro. 13:1).

21. Gabamint lâka nani ba Gâd lâka mapara sa kaka, ¿man dîa daukma ki?

    • “Yang nani Gâd bîla ba kau walaia sna, upla nani ra lika apia” (Ap.St. 5:29).

22. Wark kum briaia lukisa taim, ¿ani tikska nani hilp wan munaia sip sa naha tasba lâka nani tilara dimaia apia dukiara?

    • “Nisan kum bui nisan wala mapara kli war aiklabaia lukbia apia, war aiklabaia lâka nani sin kli smalkbia apia” (Miq. 4:3).

    • “Yang upliki nani, baha tawanka [Babilon Tara] ba wina bal taks. Baku lika ai saurka nani ba aikuki brima apia bara ai pâtka tara nani ba sin mai alkbia apia” (Par.M. 18:4).

23. ¿Diara lilia daukaia lukma piua ra nahki wahbi sâkma dîa pain bara dîa saura ba?

    • “Witin ai kupia aiska saura pali kaikisa, baha nani saura daukaia latwan kaiki ba ra” (Law. 11:5).

    • “Saura lâka ba misbara kaiks, kuna diara pain ba nina blîks” (Rom. 12:9).

    • “Diara pain bara mayunra briaia aitani ba lukankam ra mangki bris. Diara kasak nani ba, dîa dîa kulki briaia aitani ba, diara wapni nani ba, diara sunu nani ba, dîa dîa upla mita lihki ba bara dîa dîa upla mita pain kulki ba” (Pil. 4:8).

24. ¿Dîa muni Jehova witnis nani ba rilidian wala nani smalkanka tilara dimras?

    • “Dawan [Jehova] tibilka wina piaia bara pirit saura nani tibilka wina piaia sin sip apia sma” (1 Ko. 10:21).

    • “‘Witin nani lilapaska ba wina dakwi taki bal taks, Dawan bila; diara tâski ba kangbi banhpara’, ‘bâra mika yang mita mai brimna’” (2 Ko. 6:17).

25. ¿Ani Baibil smalkanka nani hilp mai munbia lilia yua kum kulkaia, apia kaka kulkaia apia?

    • “Idan nani wal abalkan baha nani iwanka kata ba sin lan takan; 36 idan aidulka nani ra mayunan, baha nani tâka sika sauhki tikan ba” (Law. 106:35, 36).

    • “Sakuna pruan nani ba diara tânka sin briras” (Smas. 9:5).

    • “Yang naha tasba wina apia sna ba baku, baha nani man aikram ba sin naha tasba wina apia sa” (Jan 17:16).

    • “Saura daukaia laik taki ba ra iwi kapram, brinka saura nani ra, bla lâka ra bara pata pira binka nani ra, diranka kum ailal pali, bara aidul tâski nani ra sakahkram” (1 Pi. 4:3).

26. ¿Upla aisubanka yua liliaka daukaia, apia kaka daukaia apia dukiara nahki Baibil smalkanka nani hilp mai munaia sip sa?

    • “Yu yumhpa luan ba ra, king fero aisubanka yua ba aimakan kan. Bara witin ai uplika tara nani ba sut aikuki lilia tara kum daukaia win. Bara witin ai uplika nani sut paiwan balan ba mawanra, king fero adar yaban wain glas ra lalaikra nani pura kakaira ba bara brit âiangkra nani pura kakaira ba sin silak watla ba wina saki bri balaia. Wain glas ra lalaikra nani pura kakaira ba kli ai warkka ra swin, bara witin kli wain glas ra laiki king fero ra yabi kan. Sakuna brit âiangkra waitna ba lika langki ikaia blikan” (Bla.St. 40:20-22).

    • “Sakuna Herod aisubanka yua ra, Herodías luhpia mairin ba taki, paiwan uplika nani mawanra dans pulan. Baha ba Herod lilia takan, bara swer taki pramis munan, dîa dîa makabia ba witin ra yabaia. Bara yaptika mita smalki munan ba ra, Herod ra win: Jan Tatahbra lal ba plit kum ra mangki aik”. “Bamna [king ba] blikan wan silak watla ra Jan lal ba dakbaia” (Mt. 14:6-8, 10).

27. ¿Kangrigisan almukka nani kupia kraukanka yabi ba dîa muni man alki daukaia want sma ki?

    • “Man nani tâm bri uplika nani ba bîla wals, bara ai adarka nani kat dauki bas. Witin nani sika ris âpu pali sulkam nani main kaiki ba, kan kaikisa ai warkka daukan ba tânka Gâd ra saki aisaia sa. Witin nani bîla walma kaka, ai warkka nani ba liliakira daukbia, sarikira lika apia; kan baku daukma kaka, baha ba man nani mampara hilp kumi sin apia kabia” (Hib. 13:17).

28. ¿Dîa muni aitani sa man bara pamalikam ba tadi Baibil aisi kaiki stadi munbia?

    • “Sakuna witin Dawan lâka ra ai latwanka lâka ba brisa; bara baha lâka dukiara kakna ra bara tihmia ra sin ai kupia wal aisisa. Bara baha uplika ba dus kum baku sa, awala lamara mangkan ba, ai piua kat ai mâ saki ba, ai wahia nani ba sin srawras sa. ¡Bara diara sut witin dauki ba, yamni baman takisa!” (Law. 1:2, 3).

29. ¿Dîa muni asla aidrubanka nani ra waia bara mihtam buki aisaia laik sma?

    • “Yang bui man tânkam ba muihki nani ra smalkamni, upla kwâra tilara yang mamyunamni” (Law. 22:22).

    • “Bara yawan pana pana wan walka nani ra hilp munaia trai kaikaia sa, latwan lâka bri kaia bara diara yamni nani sin dauki kaia. Yawan asla aidrubi lâka dauki ba swiaia apia sa, upla tila nani dauki ba baku. Baku daukaia watlika ra, yawan pana pana wan walka nani aikuki wan tâ baikaia sa, bara kau pali nanara Dawan yua ba pat baila kan kaiki ba” (Hib. 10:24, 25).

30. ¿Jisas ba ani wark kau tara wankan sa?

    • “Bamna man nani nisan sut uplika nani ra was, bara yang disaipilki nani dauki banhs; tahbi dauki banhs [...]. Smalki banhs dîa dîa man nani ra adar maikri ba bîla wali kaia” (Mt. 28:19, 20).

31. Gâd Kingka Lâka tâ baikaia dukiara lalah prisant yabi bara wan muihni lakri nani ra hilp munisa taim, ¿yawan nahki daukaia sa Jehova kupia lâka ba kat?

    • “Dawan ra kulkanka yas man yuyakam nani ba wal” (S.L. 3:9).

    • “Upla bani dîa yaia ai kupia ra lukan ba kat yaia sa; saura luki baku taiban lâka ni lika apia, kan Gâd mita latwan kaikisa liliakira ni yabi uplika ra” (2 Ko. 9:7).

32. ¿Kristian nani ba ani trabilka nani pura luaia sa?

    • “Lilia pali sa baha nani pât wahwi ba Gâd mita dîa daukaia win ba dauki ba, kan king lâka kasbrika purara ba wina witin nani ai dukia bribia bamna. Liliam pali bas man nani, mamwanra upla mita saura mai wibia, rau sin mai sauhkbia bara yang tâiwan saura mai munbia kunin lâka ra. Liliam pali bas, man nani âmyapah sin bas, kan kasbrika purara mamna tara kum bâra sa bamna, kan baku sin upla saura nani mita prapit nani ra rausauhkan baha nani kainamra bâra kan nani ba ra” (Mt. 5:10-12).

33. ¿Dîa muni diara tara sa tahbi daukan lâka ba briaia bara Jehova witnis takaia?

    • “Upla wala nani sut Dawan [Jehova] plikbia ba mata, bara nisan wala nani sut purara yang nini ra mâkan [kabia] sin” (Ap.St. 15:17).