Aisa bara yapti nani dukiara

Aisa yapti nani ba want sa ai luhpia nani ba Jehova ra latwan kaikbia bara ai rayaka ba witin ra yabia. Sakuna, ¿nahki sip sa ai luhpia nani ra hilp munaia tahbi daukan lâka ba briaia? ¿Luhpiam nani ba ahkia ridi kabia baha daukaia dukiara?

Jisas ba ai nina bliki uplika nani ra adar yaban nisan uplika sut wina disaipil nani daukaia bara tahbi daukan lâka ba bribia (Mt. 28:19). Baha mita, tahbi daukan lâka ba briaia dukiara pas ba Kraist disaipil takaia sa. Disaipil kaia ba tânka sa Jisas dîa smalkan ba ra kasak luki bara tânka briaia, sakuna baha baman apia; witin dîa adarka yaban ba kat sin alki daukaia sa. Bara baha ba wahma bara tiara nani sin daukaia sip sa.

Aisa bara yapti nani sma ba dîa daukisma ba wal luhpiam ra pain smalks bara Jehova smalkanka nani ba witin kupia kat bribia trai muns (Kli S. 6:​6-9). Baibil smalkanka tara nani witin ra lan daukaia sip sma bara ridi daukaia witin silp Jehova smalkanka alki bri diara kau yamni daukaia, baha daukaia wisi Rait pali Baibil ba Dia Smalkisa ki? bara Gâd Latwanka Laka ra ban bas bukka nani ba yus muns. Luhpiam dîa kasak luki ba silp tânka marikbia hilp muns (1 Pi. 3:15). Man nani dîa lan daukma ba bara nahki witin kupia bukma ba wal tâ baikma tahbi daukan lâka ba briaia bara spirit lainka ra kau pâwaia, baku sin witin silp Baibil stadi takbia ba lan daukaia sma, pamali mayunra daukaia, asla aidrubanka nani ra waia bara kangrigisan ra pâna nani pain briaia ba witin ra hilp munbia. Kupiam krauks luhpiam ra hilp munaia sma spirit lainka ra warkka nani kau daukaia.

Sins Lâka 20:11 wisa: “Ai daukanka nani tâka mita latan kaikan sa, wahma kum wapni wapisa kaka”. ¿Luhpiam ba nahki marikaia sip sa Jisas disaipil takan bara tahbi daukan lâka ba briaia ridi sa kaka?

Baibil ba wisa Jisas ba 12 mani bri kan taim ai aisika bara ai yaptika ra bîla wali kan (Lk. 2:51). Sim baku, wahma kum tahbi daukan lâka briaia want ba ai aisika bara ai yaptika ra bîla walaia sa (Ap.St. 5:29; Kol. 3:20). Latan sa luhpiam ba mistik takbia. Ban sakuna witin trai munaia sip sa Jisas daukanka ba nina blikaia bara upla wala nani mita nu takbia witin bîla wawalra sa.

Baku sin luhpiam ba marikaia sa Baibil tânka ba briaia want ba (Lk. 2:46). Wînam kat mamkabi wals: “¿Luhpi ba asla aidrubanka waia laik bara ai mihta buki aisanka yabaia want sa ki? ¿Witin ba Baibil aisi kaiki bara stadi takaia laik?” (Law. 122:1; Mt. 4:4).

Tuktan kum tahbi daukan lâka briaia want ba Gâd Kingka Lâka ba ai rayaka ra pas mangkaia trai munisa (Mt. 6:33). Witin nu sa dîa kasak luki ba wina upla wala nani ra wiaia sa. Smalkaia warkka ra tnatka sât sât ra daukisa. Ai maestroka bara skul ra dimi uplika nani ra wiaia witin Jehova witnis ba swira âpu sa.

Baku sin, aisanka nani ba Kristian Rayaka bara Smalkaia Warkka aidrubanka dukiara ridi daukisa. Rug lâka ba mapara buisa. Daukanka pain bri uplika nani wal pâna takisa bara miusik saura walras, so nani, tilivisan programika nani pain wahbi sakisa, videojuegos nani bara Internet ra dimisa taim diara pain baman wahbi sakisa (S.L. 13:20; 1 Ko. 15:33).

Wahma bara tiara ailal ba tânka kasak ba lan taki tahbi daukan lâka ba brin sa ai aisika nani hilpka wal. Man nani ra Jehova blisin mai munbia luhpiam nani ba hilp munram sa kristian takbia dukiara, kan witin nani rayaka ra diara tara sa.

Aihtabi takras smalki tataukra ra maisa pakanka kum

Kau aihtabi takras smalki tataukra kum baku, man kangrigisan ra ta baiki wark painkira kum daukisma. Bara spirit lâka ra pâwisma ba mita uba lilia mai kaikisa. ¡Âu sika! Dawan Bîla ba stadi taki, tânka kasak briram ba tâka, kasak lukan lâka marikaia sip mai munan (Jan 17:3; Hib. 11:6).

Jehova Witniska nani ba wal kau stadi takras kapram kainara, ban kra rilidian asla takanka wala ra wi kapram, apia kaka diara saura wala nani kra dauki taukram. Ban sakuna kupiam ba laki kasakkam lukan lâka ba marikisma, wibia sa kaka, anira wi kapram, apia kaka dîa saura dauki kapram ba tâwan kupiam sarka tara briram. Man kasak lukan lâka brisma marikanka wala ba sika, man tawram, wibia sa kaka, kainara daukankam saura ba swi si Gâd kupia lâka kat iwaia lukanka briram (Ap.St. 3:19).

Sakuna ban kra kristian pamalika kum ra mai smalki mai pakan. Bara Timoti ra takan baku, man sin “tuktan lupia piua wina [...] Ulbanka holikira nani” kaiki, watawanka saurka tara nani sin daukras pali sma (2 Tim. 3:15). Bara mika, upla wala mita saura daukma maisam kapi ba dukiara, bara traika kaikanka wala nani mapara bui kaia ba dukiara sin lan takram sa. Baku sin, mayunra rait aihwa ra dutki tâ baiki, bara kristian smalkanka nani ba upla ra aisi muni, kasakkam lukan lâka ba marikisma. Bara aisikam-yaptikam sapa, apia kaka smalki tataukra wala yula kahbi sin kau diara lan takram sa. Bara nanara kau aihtabi takras smalki tataukra kum baku, kangrigisanka bakahnu wark takaia luki briram.

Tuktan wina, apia kaka ningka pali Jehova yabalka kakaira takram kaka sin, sip sa spirit wapankam ra kau diara wal —Jehova ra rayakam ba yabaia, wihki aihtabi takaia ba sin— daukaia lukisma. Jehova ra rayakam yabaia lukisma kaka, man silp puram sunra kum dauki witin ra baman ban kaia ra ban kaia ra mayunaia lukanka briram ba wiaia sma (Mt. 16:24). Bara rayakam pat yabram ba marikaia wisi, wînam aiska ba liura rungki aihtabi takma (Mt. 28:19, 20). Naha wal sut ba mita, man lâ kat Jehova Gâd suliarka kum takisma. ¡Naha na nahki tara si!

Baibil ra lan takram baku, naha wapanka ku trabil nani bara sa. Amya tikpara Jisas ba kat sin aihtabi taki si “spirit ba mita [...] upla iwras tasbaya ra brih wan, Dibil mita traika kaikbia” (Mt. 4:1). Bara man sin Jisas disaipilka kum baku aihtabi taki si traika kaikanka nani sât sât mampara bubia ba kaikma (Jan 15:20). Ban kra wark takisma pliska ra, apia kaka pânikam kata nani ba mita lamwaska kikbia. Ban kra tamya nani ba sin mampara bubia (Mt. 10:36). Nahki kabia kra sin, Jisas nan wisata amya tikpara: “Kasak mai wisni: Ya ya yang dukira bara sturi yamni ba dukiara sin ai watla, ai muihni nani, ai lakra nani, ai aisika, ai yaptika, ai luhpia nani, ai tasbaya swisa kaka, naha tasba ra, naha piua ra 100 prais kau utla nani, muihni nani, lakra nani, yapti nani, luhpa nani, tasba sin bribia, rau sauhkan nani tilara; bara naika balaia tasbaya ra, raya ban kaia ba bribia” (Mk. 10:29, 30). Bahamna, ¡Jehova lamara kaia, bara ai lâka kat brih wapaia trai muni bas!

Aihtabi takan mai daukbia taim, kangrigisankam almukka nani ra maisa paks. Naha baiki sakanka nani ningkara makabi walanka nani bâra sa. Baha nani ni almukka nani ba mita man wal iwi aisi laki kaikisi, aihtabi takaia aitani ridi sma sapa kaikbia. Tâura lika sait ra man silp stadikam ra baha nani laki kaikaia sip sma.

Makabi walanka nani ba ridi daukma taim, Baibil tikska nani ba aiki kaiks bara tihu luki kaiks. Dîa tânkam brisma ba wauhtaya kum ra ulbaia sip sma. Almuk nani wal asla takma taim, bukka na kwâkan briaia sip sma bara dîa ulbram ba kaikaia. Makabi walanka kum uba karna sa kaka, Baibil stadika maiki uplika ra hilp makas, apia kaka almuk kum ra.

Almukka nani wal iwi aisuma taim, ansikam nani ba yari tara yaia sma lika lukpara. Aihkika ba kupiam wina prahni lal kat yama kaka aitani kabia. Tânka ailal ba mapara, man Baibil tikska kumi, apia kaka tikska wâl kahbi marikma kaka, bitar kabia.

Bara Baibil smalkanka tâ nani ba tânkam pain briras sma kaka, almukka nani ba daukbia upla kum tâm baikbia. Bara naika taim tânkam pain brisi, bara kupiam wina aisi, man aihtabi takaia dukiara aitani ridi kama.

[Almuk nani ba dukiara: Aihtabi takaia want nani wal nahki asla takaia tânka nani ba wahia 56 wina 60 ba kat takisa].