Објавителите на Царството известуваат

Истрајноста води до Божји благослов во Малави

ЈОСИФ бил верен слуга на Јехова (Евреите 11:22). Тој бил и човек со извонредна истрајност. Иако бил издаден од страна на своите сопствени браќа, двапати продаден во ропство и подоцна фрлен в затвор под лажни оптужби, Јосиф не бил здробен. Духот на Јосиф не бил скршен. Место тоа, стрпливо истрајал многу години неволја, понизно очекувајќи го Јеховиниот благослов (1. Мојсеева 37:23—28, 36; 39:11—20).

На сличен начин и денес, Јеховините сведоци во Малави стрпливо го чекале Божјиот благослов. Веќе 26 години, овие христијански Сведоци поднесуваат владини забрани, жестоко противење и многу свирепости. Но, нивната истрајност се исплати!

Кога при крајот на 1967 во Малави избувна прогонство, имаше околу 18.000 објавители на Царството. Замисли си ја само радоста на Сведоците кога дознаа дека 1997 службена година започна со нов највисок број од 38.393 објавители — двапати повеќе отколку на почетокот од забраната! Освен тоа, присутноста на 13-те Обласни конгреси „Гласници на божествен мир“ што се одржаа во Малави, порасна на преку 117.000. Навистина, Јехова ја благослови нивната вера и истрајност.

Пример за овој благослов е искуството на едно 14-годишно момче, по име Мачака. Кога Мачака прифатил една понуда да ја проучува Библијата со Јеховините сведоци, неговите родители станале многу вознемирени. Тие рекле: „Ако сакаш да станеш Сведок, мораш да се отселиш од дома“. Меѓутоа, оваа закана не го обесхрабрила да продолжи со својата студија. Како последица од тоа, родителите на Мачака му ја конфискувале сета облека. Браќата реагирале со тоа што му купиле нешто облека. Кога родителите на Мачака дознале за ова, му рекле: „Ако те издржуваат Сведоците, да си одиш и да живееш кај нив“. Откако внимателно размислил за работата, Мачака заминал од дома, и го зело едно семејство Сведоци од локалното собрание.

Родителите на Мачака биле толку изнервирани што решиле да се отселат од тоа подрачје за да избегнат секаков контакт со Сведоците. Се разбира, Мачака бил вознемирен поради ова, но нашол многу утеха кога браќата со него го продискутирале Псалм 26:10, кој наведува: „Зашто татко ми и мајка ми ме оставија, но Господ ме прими“.

Со текот на времето, родителите на Мачака омекнале во својот став и решиле да се вратат дома. Изгледа дека одлучноста на нивниот син да му служи на Јехова им оставил силен впечаток, затоа што и тие сакале библиска студија со Јеховините сведоци! Исто така, присуствувале сите три дена на Обласниот конгрес „Гласници на божествен мир“, после кој биле поттикнати да изјават: „Навистина, ова е Божјата организација“.

Да, противењето може да биде искушувачко, но Божјите лојални гласници не се предаваат. Тие храбро навалуваат напред, знаејќи дека „неволјата создава истрајност, а истрајноста, пак, призната положба“ (Римјаните 5:3, 4, NW). Јеховините сведоци од Малави можат со право да посведочат дека истрајноста води до Божји благослов.