Понизен Африканец што ја сакал Божјата реч

ПОСЕТИТЕЛИТЕ на Африка честопати се изненадени кога ќе сфатат колку е лесно да се започне разговор за Библијата со локалното население. Лесно може да се најде уво што слуша ако се постават прашања, како на пример: „Што е Божјето царство?“ или „Дали има трајно решение за проблемите како што се недостиг на храна, болести, војна и криминал?“ Многумина радо ќе му дозволат на некој непознат да им ги покаже одговорите од Библијата. Ова честопати води до редовна библиска студија. И откако духовно ќе напредуваат, учениците стануваат крстени Христијани.

Еден од првите Африканци кои реагирале на ваков начин е спомнат во Библијата во Дела 8:26⁠-40. Тој бил еден Етиопјанец којшто патувал до Ерусалим за да го обожава вистинскиот Бог, Јехова.

Како што е прикажано на сликата подолу, Етиопјанецот се враќа дома во неговата кола, читајќи од одвитканиот свиток. Еден непознат човек му приоѓа и го прашува: „Го разбираш ли всушност тоа што го читаш?“ Етиопјанецот понизно признава дека му треба помош и сесрдно го моли непознатиот човек, христијанскиот евангелизатор Филип, да се качи во колата. Тогаш го замолува Филип да му го објасни значењето на стиховите од Писмото кои штотуку ги прочитал. Филип објаснува дека тоа е пророштво коешто се однесува на неодамнешната смрт на Месијата, Исус Христос. Исто така, Филип му кажува и други работи во врска со „добрата вест за Исус“, несомнено вклучувајќи го и воскресението на Исус.

Откако ги слуша овие прекрасни вистини, Етиопјанецот сака да стане ученик на Исус и прашува: „Што ме спречува да се крстам?“ По своето крштавање, овој понизен Африканец радосно пак тргнува накај дома и Библијата не кажува ништо повеќе за него.

Денес, Јеховините сведоци им помагаат на милиони луѓе низ целиот свет да дознаат нешто повеќе за истата „добра вест“. Моментално се водат околу шест милиони бесплатни домашни библиски студии.