ДАЛИ СТЕ ЗНАЕЛЕ?
Што значи зборот „евнух“ што се спомнува во Библијата?
Детаљ од асирски релјеф на кој е прикажан евнух
Понекогаш, овој збор може да се однесува на маж кој бил кастриран. Во библиски времиња, некои мажи биле кастрирани за казна или, пак, кога ќе биле заробени или ќе станеле робови. Доверливи мажи што биле кастрирани ги надгледувале женските одаи, или хареми, во царските палати. На пример, евнусите Хигеј и Саазгаз служеле како чувари на жените и наложниците на персискиот цар Ахасвер, за кој се смета дека бил Ксеркс I (Естира 2:3, 14).
Меѓутоа, не биле кастрирани сите што во Библијата се наречени евнуси. Некои изучувачи велат дека овој збор се користел и во поширока смисла и се однесувал на службениците на кои им биле доверени разни задолженија во царскиот дворец. Изгледа дека во таа смисла овој збор е употребен за Авде-Мелех, пријателот на Еремија, и за еден Етиопјанец на кој му проповедал христијанинот Филип, а чие име не е кажано. Авде-Мелех очигледно бил висок службеник, бидејќи имал директен пристап до царот Седекија (Еремија 38:7, 8). А за Етиопјанецот е речено дека бил царски ризничар кој „дошол во Ерусалим да му се поклони на Бог“ (Дела 8:27).
Зошто пастирите во библиски времиња ги одвојувале овците од јарците?
Кога зборувал за судењето што требало да настапи во иднина, Исус рекол: „Кога Синот човечки ќе пристигне во својата слава... ќе ги одвои луѓето едни од други, како што пастирот ги одвојува овците од јарците“ (Матеј 25:31, 32). Зошто пастирите ги одвојувале овие животни во различни стада?
Во текот на денот, овците и јарците обично паселе заедно. Навечер ги собирале во заградени простории за да бидат заштитени од дивите животни, од крадците и од студот (1. Мојсеева 30:32, 33; 31:38-40). Јарците и козите се поагресивни од овците, кои по природа се кротки. За да не ги повредат овците, особено женките и јагнињата, тие биле одвојувани во посебни трла. Пастирите ги одвојувале овците од јарците и кога требало „да се парат, да се молзат и да се стрижат“, пишува во една книга (All Things in the Bible). Според тоа, споредбата што ја кажал Исус се состоела од сцени кои им биле добро познати на оние што го слушале бидејќи во древниот Израел сточарството било многу застапено.