ТЕМА ОД НАСЛОВНАТА | ДАЛИ ВРЕДИ ДА СЕ МОЛИШ?

Зошто луѓето се молат?

„Бев тежок коцкар. Се молев да добијам голема сума пари, но попусто“ (Самуел,a Кенија).

„На училиште сите требаше напамет да учиме молитви и да ги рецитираме“ (Тереза, Филипини).

„Му се молам на Бог кога се соочувам со некој проблем. Се молам и за простување на гревовите и за да бидам подобра христијанка“ (Магдалена, Гана).

1. Човек се моли пред маса за рулет; 2. Девојче се моли во училиште; 3. Жена се моли

Изјавите на Самуел, Тереза и Магдалена покажуваат дека луѓето се молат од најразлични причини. Некои се молат од срце, а други чисто формално. Како и да е, без разлика дали некој се моли за да добие добра оценка на училиште, за да победи неговата омилена екипа, за да има среќен семеен живот или за што и да е друго, стотици милиони луѓе чувствуваат потреба да се молат. Истражувањата покажуваат дека дури и некои лица што не припаѓаат на ниту една религија се молат редовно.

Дали и ти се молиш? Ако да, за кои работи? Без оглед на тоа дали имаш навика да се молиш или не, можеби се прашуваш: ‚Дали вреди да се молам? Дали некој воопшто ги слуша молитвите?‘ Еден писател рекол дека молитвата е само „еден вид терапија... исто како да си зборуваш со своето милениче“. Некои лекари имаат слично гледиште за молитвата и ја нарекуваат „алтернативна медицина“. Дали молитвата е само една безначајна навика или служи само како емоционален вентил?

Од Библијата дознаваме дека молитвата е нешто многу повеќе од терапија. Оваа книга ни кажува дека има некој што навистина нѐ слуша кога се молиме на исправен начин и за исправни работи. Како можеме да бидеме сигурни во ова? Да разгледаме некои докази.

a Некои имиња се сменети.