Вести од службата

Службената 2010 година заврши со досега највисокиот број на објавители: 1.363 браќа и сестри дадоа извештај од својата служба на проповедање во август.

Меѓу тие 1.363 објавители имаше 61 специјален и 143 општи пионери. Како помошни пионери служеа 53 објавители. Многу нѐ охрабрува фактот дека голем број млади браќа и сестри беа пионери за време на својот училишен распуст. Сите објавители заедно врачија вкупно 761 книга, 1.870 брошури и 21.698 списанија. Во август, во службата на проповедање објавителите поминаа вкупно 29.515 часа, направија 10.452 повторни посети и водеа 1.148 библиски студии.

Многу сме радосни што 48 браќа и сестри се крстија во текот на 2010 службена година и што бројот на објавители порасна за 1 отсто. Исто така, среќни сме што во истиот период 9 браќа и сестри започнаа со специјална пионерска служба во нашата земја и што пристигнаа двајца од шесте нови мисионери што ќе служат кај нас. Јехова навистина го забрзува делото. Тоа ни дава основа да очекуваме голем напредок и во новата службена година. Можеме само да се придружиме на Јеховината небесна фамилија во извикот: „Благослов и слава... и благодарност и чест и моќ и сила на нашиот Бог во сета вечност!“ (Отк. 7:12).